【 အနုပညာ 】ဖေဖော်ဝါရီပထမပတ်ထဲ စုံတွဲခွေလေးထွက်နိုင်ဖို့စီစဉ်နေတဲ့ တေးသံရှင် ဇင်မင်းထက်

စုံတွဲတွေကြားထဲမှာ ဖြစ်လေ့ဖြစ်ထရှိတဲ့ သဝန်တိုမှုလေးတွေကို ရေးဖွဲ့ရင်း Music Video လေးတစ်ပုဒ် လာမယ့် ဖေဖော်ဝါရီပထမပတ်ထဲ ဖြန့်ချိသွားနိုင်ဖို့ ပြင်ဆင်နေတယ်လို့ တေးသံရှင် ဇင်မင်းထက်က ပြောပါတယ်။

 

“ကျွန်တော့်ရဲ့ ဒီ ပထမဆုံး MV သီချင်းမှာ တေးရေးက ကိုရယ်ဂျီ၊ IC Band ကဆရာချစ် တီးပေးထားတယ် မချမ်းချမ်းလို သမ္ဘာရင့်နေတဲ့ တကယ့်အဆိုတော်ကောင်း တစ်ယောက်နဲ့ တွဲဖက်သီဆိုရတာဆိုတော့ ပရိသတ်တွေကို အကောင်းဆုံးတွေပဲပေးချင်တယ်၊ ဖေဖော်ဝါရီပထမပတ်ထဲတော့ ကျွန်တော်မှန်းထားပါတယ်၊ အစ်မ(ချမ်းချမ်း)နဲ့လည်း တိုင်ပင်ရဦးမယ်၊ ရက်တော့အတိအကျပြောလို့မရသေးဘူး၊ ဒီသီချင်းထဲမှာက ဇနီးမောင်နှံ နှစ်ယောက်က တစ်ယောက်ကိုတစ်ယောက်ချစ်တယ်၊ အရင်ကလည်း ချစ်ကြတယ်၊ ဖြစ်လေ့ဖြစ်ထ ရှိတဲ့ သဝန်တိုမှုလေးတွေကို Story လေးအနေနဲ့ လုပ်ထားတာဖြစ်ပါတယ်”လို့ ၎င်းက ရှင်းပြပါတယ်။

 

သူဟာ တေးသီချင်းတွေကို လုပ်ကိုင်လာတာ ၉ နှစ်နီးပါးရှိနေတယ်လို့ သိရပြီး ယခုနောက်ပိုင်းမှသာ တစိုက်မတ်မတ်ဖြင့် အရှိန်တင်ပြီးမှ ပြန်လုပ်တဲ့သဘောမျိုး လုပ်ဆောင်နေကြောင်း၊ တေးသီချင်းပိုင်းကို သေချာ လုပ်ကိုင်ဖို့ ပြင်ဆင်ထားသလို စတူဒီယိုလည်း လုပ်ဆောင်ထားကြောင်း၊ ယခုစီစဉ်နေတဲ့ သီချင်းအတွက် လိုအပ်တဲ့ ရိုက်ကူးမှုတွေလုပ်ဆောင်ထားသလို အကောင်းဆုံးဖြစ်အောင် ပြင်ဆင်နေတယ်လို့ သိရပါတယ်။

 

“နောက်လည်းလုပ်ဦးမှာပါ၊ နောက် ဘယ်သူနဲ့ဆိုတာတော့ မပြောနိုင်သေးဘူး၊ ဒီလို စုံတွဲသီချင်း လေးတွေ ဆက်တိုက်တော့ ထပ်လာဖြစ်မှာပါ၊ ဒီသီချင်းလေးက ချစ်သူ စုံတွဲပဲဖြစ်ဖြစ် လင်မယားပဲဖြစ်ဖြစ် LGPT ပဲဖြစ်ဖြစ် တစ်ယောက်ကိုတစ်ယောက် သဝန်တိုကြတယ်၊ တစ်ယောက်ကိုတစ်ယောက် ချစ်ကြတယ်၊ ချစ်နေပေမယ့် သဝန်တိုတာလေးက မတူဘူးလေ၊ အဲ့ဒါလေးကို ပြသထားတာပါ၊ အားလုံးနဲ့လည်း တိုက်ဆိုင်နိုင်တာကြောင့် ခံစားပြီး နားဆင်ပေးပါလို့ ပြောချင်ပါတယ်”လို့ ၎င်းက ဆက်လက်ရှင်းပြခဲ့ပါတယ်။ 

 

“ဘဝရေစက်” လို့ နာမည်ပေးထားတဲ့ အဲ့ဒီသီချင်းထဲမှာ ၎င်းနဲ့အတူ တေးသံရှင် ချမ်းချမ်းကလည်း ပါဝင်သီဆိုထားပြီး ၎င်းအတွက် လိုအပ်တဲ့ သင်ပြမှုတွေကိုလည်း အတူသီဆိုရင်း ရရှိခဲ့တယ်လို့ သိရပါတယ်။

 

 မင်းခေတ်လင်း

(ဓာတ်ပုံ- ကိုနိုင် NG)

ရန်ကုန်၊ ဇန်နဝါရီ ၁၇ 

 

(  Zawgyi  )