【 အလှအပနှင့်ကျန်းမာရေး 】သွေးဝမ်းသွားခြင်း

【 အလှအပနှင့်ကျန်းမာရေး 】သွေးဝမ်းသွားခြင်း

လူအများနားလည်ထားတဲ့သွေးဝမ်းသွားခြင်းဆိုတာကတော့ ဝမ်းသွားတာနဲ့အတူ သွေးပါလာတာကိုပြောကြတာဖြစ်ပါတယ်။

ကျွန်မတို့ရဲအစာအိမ်နဲ့အူလမ်းကြောင်းတစ်လျှောက်မှာ သွေးထွက်ခဲ့မယ်ဆိုရင် ဝမ်းနဲ့အတူသွေးပါ ပါလာတာကို သွေးဝမ်းသွားတယ်လို့ခေါ်ပါတယ်။

အစာအိမ်အထက်ပိုင်းမှာသွေးထွက်မယ်ဆိုရင်တော့ ဝမ်းထဲမှာသွေးအရောင်မတွေ့ရဘဲ အမည်းရောင်ကတ္တရာစေးကဲ့သို့ ဝမ်းများသွားခြင်းဟာလည်းသွေးဝမ်းသွားတဲ့လက္ခဏာပဲဖြစ်ပါတယ်။

အချို့သောသွေးဝမ်းသွားခြင်းဟာ ပုံမှန်မျက်စိနဲ့မမြင်ရဘဲ ဝမ်းကိုအဏုကြည့်မှန်ဘီလူး (microscope) နဲ့ စစ်ဆေးပြီးမှသွေးဝမ်းသွားခြင်းကို သိနိုင်တာမျိုးလည်းရှိပါတယ်။

သွေးဝမ်းသွားတဲ့အခါဘယ်လိုလက္ခဏာတွေခံစားရနိုင်ပါသလဲ?

  • ဝမ်းနဲ့အတူသွေးပါလာခြင်း၊ဝမ်းသွားပြီးနောက်စအိုမှ သွေးထွက်ခြင်း
  • ကတ္တရာစေးကဲ့သို့ကပ်စေးစေးနှင့် အနံ့ပြင်းသော ဝမ်းအမည်းရောင်များသွားခြင်း

(အိမ်သာအိုးမှာဝမ်းကပ်နေတတ်ပြီး၊ရေလောင်းချိန်မှာသွေးအရောင်ပြောင်းသွားတာကိုသတိပြုမိတတ်ပါတယ်)

  • ဗိုက်အောင့်ခြင်း
  • သွေးဝမ်းသွားခြင်းကြောင့်သွေးအားနည်းသောလက္ခဏာများဖြစ်သည့်

-  မောခြင်း

-  ရင်ဘတ်အောင့်ခြင်း

-  ရင်တုန်ခြင်း

-  ခေါင်းမူးခြင်း

-  သွေးပေါင်ချိန်ကျခြင်း

-  သတိလစ်ခြင်း စတဲ့ရောဂါလက္ခဏာတွေခံစားရနိုင်ပါတယ်။

သွေးဝမ်းသွားခြင်းကိုဖြစ်စေတဲ့အကြောင်းအရင်းတွေကတော့

  • အစာမျိုပြွန်ရောင်ရမ်းခြင်း
  • အစာမျိုပြွန်အက်ကွဲခြင်း
  • အစာမျိုပြွန်သွေး‌ကြောထုံးများမှ‌သွေးယိုခြင်း
  • အစာမျိုပြွန်ကင်ဆာ
  • အစာအိမ်‌ ရောင်ခြင်းကြောင့်အစာအိမ်အနာမှ‌ သွေးယိုခြင်း
  • အစာအိမ်ကင်ဆာဖြစ်ခြင်း
  • အူရောင်ရမ်းခြင်း
  • အူမကြီးကင်ဆာ
  • လိပ်ခေါင်းရောဂါ
  • အစာဟောင်းအိမ်ရောင်ရမ်းခြင်း
  • သွေးကျဲဆေးများ
  • အသည်း‌ခြောက်ခြင်း၊အသည်းကင်ဆာ
  • သွေးမွှားဥနည်းခြင်း၊
  • သွေးမတိတ်သောသွေးရောဂါရှိသူများစတဲ့အခြေအနေတွေမှာသွေးဝမ်းသွားခြင်း ဖြစ်စေနိုင်ပါတယ်။

သွေးဝမ်းသွားခြင်းကို ဘယ်လိုစစ်ဆေးနိုင်ပါသလဲ?

  • ဝမ်းထဲတွင်သွေးပါဝင်မှုရှိမရှိ ဝမ်းစစ်ဆေးခြင်း
  • အစာအိမ်နှင့်အူလမ်းကြောင်းကို မှန်ပြောင်းဖြင့်စစ်ဆေးခြင်း
  • ဝမ်းဗိုက် ကွန်ပျူတာဓာတ်မှန်CT scan စစ်ဆေးခြင်း
  • သွေးစစ်ဆေးခြင်း စတဲ့နည်းလမ်းများနဲ့စစ်ဆေးနိုင်ပါတယ်။

သွေးဝမ်းသွားခြင်းဟာအရေးကြီးသောအခြေအနေဖြစ်ပြီး ကုသမှုမခံယူပါက

  • သွေးအားနည်းခြင်း
  • သတိလစ်ခြင်း
  • နှလုံးအားနည်းခြင်း စတဲ့နောက်ဆက်တွဲအခြေအနေများကြောင့် အသက်အန္တရာယ်ပါ ထိခိုက်နိုင်ပါတယ်။

ဒါကြောင့်သွေးဝမ်းသွားခြင်းလက္ခဏာတွေခံစားနေရပြီဆိုရင်တော့ တတ်ကျွမ်းနားလည်တဲ့ ဆရာဝန်ထံသွားရောက်ပြသပြီး သေချာစွာစစ်ဆေးကုသမှုခံယူဖို့ တိုက်တွန်းလိုပါတယ်။

Dr.phyu

Photo credit- Tri-city medical center