【 ဆောင်းပါး 】ချယ်ရီပန်းခင်းများရှိရာ ထိုက်ဟူရေကန်

ထိုက်ဟူရေကန် (Taihu)ဟာ တရုတ်နိုင်ငံ ယန်ဇီမြစ်ဝကျွန်းပေါ်ဒေသရဲ့ တောင်ဘက်ပိုင်းမှာတည်ရှိပြီး ယန်ဇီမြစ် မြောက်ဘက်ကမ်းရှိ များပြားလှသော ရေကန်များအနက် အကြီးဆုံးဖြစ်ပါတယ်။ ၎င်းရေကန်ဟာ တရုတ်နိုင်ငံရဲ့ အကြီးဆုံးရေချိုကန်များထဲမှတစ်ခုဖြစ်ပြီး ရေကန်ရဲ့ ရှုခင်းအလှများ၊ ယဉ်ကျေးမှု ဆိုင်ရာအရေးပါမှု နှင့် ဂေဟစနစ်ဆိုင်ရာ အရေးပါမှုများကြောင့် ကျော်ကြားလှပါတယ်။

ဒီရေကန်ကြီးဟာ တရုတ်နိုင်ငံထဲက ကျန်းစူးပြည်နယ် (Jiangsu)နှင့် ကျဲ့ကျန်းပြည်နယ် (Zhejiang) တို့ တွင် တည်ရှိပြီး ခန့်မှန်းခြေအားဖြင့် ဧရိယာ ၂၂၅၀ စတုရန်းကီလိုမီတာ ကျယ်ဝန်းတယ်လို့ သိရပါတယ်။ ရေကန် ဧရိယာ မှာ ကျွန်းများ၊ တောင်ကုန်းများနှင့် စိမ်းလန်းစိုပြေသော သစ်ပင်များ ပေါင်းစပ်ပါဝင်နေတဲ့ လှပသော ရှုခင်းတွေကြောင့်လည်း လူသိများလှပါတယ်။

လာရောက်လည်ပတ်သူတွေအနေနဲ့လည်း လှေစီးခြင်း၊ တောင်တက်ခြင်းနှင့် သဘာဝအလှတရားများကို ခံစားနိုင်ရန် အခွင့်အလမ်းများရှိနေပါတယ်။ ထိုက်ဟူရေကန်ဟာ  နှစ်ထောင်ပေါင်းများစွာကတည်းက ကြွယ်ဝသော ယဉ်ကျေးမှုတွေကို ပိုင်ဆိုင်ထားပြီး ရေကန်နှင့် ၎င်း၏ပတ်ဝန်းကျင်မှာ တရုတ်သမိုင်းတစ်လျှောက် ကဗျာ ဆရာများ၊ အနုပညာရှင်များနှင့် ပညာရှင်အများအပြားနဲ့လည်း ဆက်စပ်ယှဉ်တွဲနေပါတယ်။ ဒေသတွင်းမှာ များပြားလှသော ယဉ်ကျေးမှုနှင့် သမိုင်းဝင်နေရာများ ရှိနေသလို ရေကန်ဟာ တရုတ်ဒဏ္ဍာရီများနှင့် ရိုးရာပုံပြင်များစွာနှင့်လည်း ဆက်စပ်နေပါတယ်။

ဒီရေကန်ကြီးက  ဂေဟဗေဒအရ အရေးပါပြီး မတူကွဲပြားသော သစ်ပင်ပန်းမန်များနှင့် တိရစ္ဆာန်များကို ထောက်ပံ့ပေးသလို  ငါး၊ ပုစွန်နှင့် ရေချိုခရုမျိုးစိတ်များ အပါအဝင် ၎င်း၏ပေါများသော ရေနေသယံဇာတများကြောင့် လူသိများလှပါတယ်။  ရေကန်သည် ရွှေ့ပြောင်းငှက်မျိုးစိတ်ပေါင်းများစွာ၏ နေထိုင်ရာနေရာဖြစ်ပြီး ၎င်းတို့၏ နှစ်စဉ်ရွှေ့ပြောင်းသွားလာမှုအတွင်း အရေးကြီးသော ရပ်နားရာနေရာတစ်ခုလည်းဖြစ်ပါတယ်။

ထို့အတူ ဒေသတွင်းစီးပွားရေးတွင်လည်း အရေးပါသောအခန်းကဏ္ဍမှ ပါဝင်နေပါတယ်။ ဖွံ့ဖြိုးတိုးတက်သော ငါးဖမ်းလုပ်ငန်းကို ပံ့ပိုးပေးကာ စိုက်ပျိုးရေးနှင့် စက်မှုလုပ်ငန်းအတွက် ရေအရင်းအမြစ်ကို ပံ့ပိုးပေးကာ ၎င်း ရဲ့ သဘာဝအလှနှင့် ယဉ်ကျေးမှုအမွေအနှစ်များကြောင့် ခရီးသွားလုပ်ငန်းကို ဆွဲဆောင်လျက်ရှိပါတယ်။

ကန်တော်ကြီးနှင့် အနီးပတ်ဝန်းကျင်ဒေသများသည် ဆန်၊ လက်ဖက်နှင့် ပိုးထည်ကဲ့သို့သော ကောက်ပဲသီးနှံများ ထွက်ရှိသည့် အရေးပါသော စိုက်ပျိုးရေးဒေသတစ်ခုလည်း ဖြစ်ပါတယ်။ဒီရေကန်ကြီးထဲမှာပဲ  ချယ်ရီပန်းများဖြင့် နာမည်ကျော်ကြားသည့် ရေပေါ်ကျွန်းတစ်ခုရှိလည်းရှိပါတယ်။

ယွမ်ထိုကျူကျွန်းငယ် (Yuantouzhu) သည် ထိုက်ဟူရေကန်အတွင်းသို့ ထိုးထွက်လျက်ရှိသော ကျွန်းဆွယ်တစ်ခု ဖြစ်ပြီး လိပ်ဦးခေါင်းမော့နေသည့် သဏ္ဌာန်ရှိသည့် ရေထဲသို့ငေါထွက်နေသော ဧရာမကျောက်တုံးကြောင့် အမည်တွင်တာ ဖြစ်ပါတယ်။ ယင်းကျွန်းဆွယ်အတွင်းမှာ အမျိုးပေါင်း (၁၀၀) ကျော်ရှိသည့် ချယ်ရီပင် ၃၀၀၀၀ ကျော်ကို စိုက်ပျိုးထားရှိပါတယ်။

နှစ်စဉ် မတ်လလယ်မှ ဧပြီလလယ်အထိ ကာလသည် ချယ်ရီပန်းများရဲ့အလှကို ကြည့်ရှုခံစားရန် အကောင်းဆုံးအချိန်ဖြစ်ပြီး လာရောက်ကြည့်ရှုသူတွေနဲ့လည်း စည်ကားလေ့ရှိပါတယ်။ ပန်းရောင်တိမ်တိုက်ကဲ့သို့သော ချယ်ရီပန်းပွင့်များဟာ သစ်ပင်အပြည့် လှပဝေဆာစွာ ပွင့်ဖူးနေကြပြီး ကန်ရေပြင် နှင့် ကြွေကျလာ သည့် ချယ်ရီပွင့်ဖတ်များဖြင့် အပြိုင်အဆိုင်လှပနေတဲ့ ရှုခင်းတွေကြောင့် စိတ်ဝင်တစားလာရောက် လည်ပတ်သူတွေများတာ ဖြစ်ပါတယ်။

ဒါကြောင့်ပဲ ယွမ်ထိုကျူကျွန်းဆွယ်ဟာ တရုတ်နိုင်ငံရဲ့ ချယ်ရီပန်း ကြည့်ရှုခံစားရန် နေရာကောင်းတစ်ခု ဖြစ်လာခဲ့ပြီး နှစ်စဉ်ခရီးသွားဧည့်သည်အများအပြားကို ချယ်ရီပန်းရှုခင်းအလှများ လာရောက်ကြည့်ရှုရန် ဆွဲဆောင်လျက် ရှိနေတာ ဖြစ်ပါတယ်။

ထိုက်ဟူရေကန်ကြီးဟာ တရုတ်နိုင်ငံရှိ အရေးပါသော သဘာဝနှင့် ယဉ်ကျေးမှုဆိုင်ရာ ပိုင်ဆိုင်မှုတစ်ခုဖြစ်ပြီး ၎င်း၏ ရှုခင်းများ၊ သမိုင်းဝင်နေရာများနှင့် ဂေဟစနစ်ဆိုင်ရာ အရေးပါမှုများဖြင့် လာရောက်လည်ပတ်သူများကို ဆွဲဆောင်လျက်ရှိနေပါတယ်။

သဘာဝပတ်ဝန်းကျင်ဆိုင်ရာ စိန်ခေါ်မှုများ ရှိနေသော်လည်း ရေကန်၏ သဘာဝအရင်းအမြစ်များကို ထိန်းသိမ်းရန်နှင့် ဒေသတွင်း ရေရှည်တည်တံ့ခိုင်မြဲသော ဖွံ့ဖြိုးတိုးတက်မှုကို မြှင့်တင်ရန်အတွက် ထိန်းသိမ်းရေးနှင့် ပြန်လည်ထူထောင်ရေး ကြိုးပမ်းမှုများ လုပ်ဆောင်နေတယ်လို့ သိရပါတယ်။

ခန့်မောင်