【 ဆောင်းပါး 】 “ပေးရသလောက်တန်လား”

ဖောက်သည်တန်ဖိုး၊ ပေးရသလောက်တန်လား ဆိုသည်မှာ စားသုံးသူ ဝယ်ယူသူများက သင့် အလုပ်ပေါ်တွင် ကျေနပ်မှု အဆင့်အတန်းကို ဆိုလိုသည်။ တန်ဖိုး (Value) ဆိုသော စကားလုံး၏ အဓိပ္ပါယ်ဖွင့်ဆိုမှု အမြောက်အများရှိသည်။ လုပ်ငန်း အတော်များများနှင့် ဝယ်ယူသူ အများစုအတွက် ‌ဈေးနှုန်းဟု သဘောပေါက်ပေလိမ့်မည်။  ဥပမာ- သင်အိမ်ဝယ်သည့်အခါ သင့်အိမ်၏တန်ဖိုးဘယ်‌လောက်ရှိသလဲဟု မေးသည်နှင့်ပမာတူပေမည်၊၊  ရုပ်ဝတ္ထု မဟုတ်သော တစ်စုံတစ်ရာအပေါ် ထားရှိသော တန်ဖိုးဟု သဘောပေါက်နေလိမ့်မည်။ ကုန်ပစ္စည်းရော၊ ဝန်ဆောင်မှု ရောမှာပါ တန်ဖိုးရှိနေသည်၊၊

 

 

“တန်ဖိုး အပြည့်အဝ ဖြည့်ဆည်း ပေးနိုင်လေလေ သင့်ကုမ္ပဏီတွင် ဖောက်သည်အသစ်များစွာ စုစည်းခွင့်ကို ပိုမို ပိုင်ဆိုင်နိုင်လေလေဖြစ်သည်၊၊ သော့ချက်ကတော့ တန်ဖိုးကို အမြဲတန်း ဖြည့်ဆည်းပေးပါ ဆိုတာပါဘဲ”

 

(ဂိုင်း ကာဝါစကီ)

 

ဈေးနှုန်းအပေါ် ကြည့်လွန်းသော ဖောက်သည်များဆီက သင် အမြဲကြားရမည့်စကားသည် “ပေးရသလောက် တန်လား” ဟူ၍ဖြစ်ပြီး၊ အခြားဆန့်ကျင်ဘက်တစ်ခြမ်းမှာ ကြားရသည်မှာကား “ငွေပေးတော့လည်း ကောင်းတာရတာပေါ့” ဆိုသောစကားဖြစ်၏။ လူတို့သည် သူတို့ တန်ဖိုးထားသော အကျိုးကျေးဇူးရမည်ဆိုလျှင် ငွေပေးရတာ ဝန်မလေးဟု အဓိပ္ပါယ် ကောက်ယူနိုင်သည်။

 

အဘိဓာန်ထဲမှာ Value ကို ဘယ်လို အဓိပ္ပါယ်ဖွင့်ထားသလဲ-

 

၁။ ထိုက်တန်ခြင်း၊ အရေးပါခြင်း၊ တန်ရာခြင်း၊ တစ်စုံတစ်ရာအတွက် အသုံးတည့်ခြင်း စသည်တို့ပါဝင်သည်ဟု ခံယူချက်ထားခြင်း။

 

၂။ ပုဂ္ဂိုလ်တစ်ဦးတစ်ယောက်၏ အခြေခံထားသော မူဘောင်စံနှုန်း၊ အပြုအမူ အဆင့်အတန်း။

 

၃။ တစ်စုံတစ်ရာအပေါ် ခန့်မှန်း ငွေတန်ဖိုး။

 

၄။ တစ်စုံတစ်ရာအပေါ် အရေးပါသည်၊ အကျိုးကျေးဇူးများသည်ဟု အထင်အမြင်ရှိခြင်း၊ (သို့မဟုတ်) အကျိုးကျေးဇူးများ ရသောကြောင့် အထင်ကြီးခြင်း။

 

ယင်းသို့ အဓိပ္ပါယ် အမျိုးမျိုးရှိသောကြောင့် Value စာလုံး တစ်လုံးတည်း ဖြစ်သော်လည်း အသုံးပြုသော စာကြောင်းအလိုက် အဓိပ္ပါယ် ပြောင်းသွားနိုင်သည်။ သို့ဖြစ်၍ ဖောက်သည်တန်ဖိုး ဟုဆိုလျှင် ပညာရပ် အသုံးအနှုန်းဘက် ပိုဆန်ပေလိမ့်မည်။

ဖောက်သည်တန်ဖိုး (ဖောက်သည်က ထားသောတန်ဖိုး) ဆိုသည်မှာ ကုန်ပစ္စည်း တစ်ခု သို့မဟုတ် ဝန်ဆောင်မှု တစ်ခု အပေါ် ဖောက်သည်က အလားတူပစ္စည်းများနှင့် နှိုင်းယှဉ်ရာ၌ မည်သို့သဘောထားသည် မည်သို့လက်ခံသည်ကို ဆိုလိုရာရောက်သည်။ တန်သည် (worth) ဆိုရာတွင် ဖောက်သည်က သူတို့ပေးလိုက်သော ငွေတန်ဖိုးနှင့် ထိုက်သင့်သော အကျိုးကျေးဇူးနှင့် ဝန်ဆောင်မှု  ပြန်ရသည်ဟု ခံစားရခြင်းကို ဆိုလိုသည်။ ညီမျှခြင်း ရိုးရိုးလေးချ ကြည့်မည်ဆိုပါက-

 

Customer Value (ဖောက်သည်တန်ဖိုး) = Benefits (အကျိုးကျေးဇူး) - Cost (ကုန်ကျငွေ) 

 

ဤနေရာတွင် ဈေးနှုန်းအပေါ်တွင်သာ ဇောင်းပေး စဉ်းစား၍မရပေ။ ဖောက်သည်သည် ကုန်ပစ္စည်း သို့မဟုတ် ဝန်ဆောင်မှုပေါ်တွင် ငွေကြေးသာမက အချိန်၊ အားထုတ်မှု၊ အခွင့်သာမှု၊ ခွန်အား စသည်စသည်များကိုပါ ပေးဆပ် ရသည်ဖြစ်သည်။ ဖောက်သည်အဖို့ အကျိုးကျေးဇူး (Benefit)သည် အမျိုးမျိုးကွဲပြားနိုင်သောကြောင့် တန်ဖိုး (Value) သည်လည်း ပြောင်းလဲနိုင်သည်။ ဖောက်သည်တစ်ဦးထားသော တန်ဖိုးသည် အခြားတစ်ဦးနှင့် တူနိုင်မည် မဟုတ်ပေ။ တစ်ဦးအတွက် အရေးပါသော အရာသည် အခြားဖောက်သည် (ဝါ) ဖောက်သည် အုပ်စု (Segment) အတွက် အရေးကြီးချင်မှ ကြီးပေမည်။ အကျိုးကျေးဇူးများတွင် အောက်ပါတို့ ပါဝင်သင့်သည်။

 

• ကုန်ပစ္စည်း၏ အရည်အသွေး

 

• ပိုင်ဆိုင်ခွင့် ရခြင်း‌ကြောင့်အားသာချက်များ

 

• ပုံရိပ်အသွင်အပြင် (Image)

 

• ကုမ္ပဏီ၏ တံဆိပ် နှင့် ဆက်စပ်မှု (Affiliation)

 

• ပြဿနာ အဖြေအား ရှင်းလင်းစွာ ရှာဖွေနိုင်ခြင်း

 

• အတွေ့အကြုံ

 

• ကုန်ပစ္စည်း (သို့) ဝန်ဆောင်မှု အသုံးပြုခြင်းကြောင့် ရရှိသော အောင်မြင်မှု

 

• ‌ရေရှည် မှတ်သားစရာများ (ဗဟုသုတ အပါအဝင်)

 

‌ဖောက်သည်တန်ဖိုး - ဘာကြောင့် ဘယ်လို

 

တန်ဖိုးသည် သင့် လုပ်ငန်း၏ အခြားသော ကိစ္စများကဲ့သို့ပင် လုပ်ငန်းစဉ်များ တိုးတက်ဖွံ့ဖြိုးမှု အပေါ်မူတည်၍ ဖန်တီးယူရသောအရာဖြစ်သည်။ သင့် ကုမ္ပဏီ၏ အလေ့အထနှင့် ရည်မှန်းချက်တို့၏ တစ်စိတ်တစ်ပိုင်း လည်း ဖြစ်သည်။ အလေ့အထနှင့် စိတ်နေစိတ်ထားတို့သည် ပြောင်းလဲရန် ခက်ခဲ‌သော်လည်း ယင်းတို့ကို ဖောက်သည် တန်ဖိုးနှင့် ဖောက်သည်ရရှိမည့် အတွေ့အကြုံများ တို့ကို ဖော်ဆောင်ရန်ဘက်ဆီသို့ များစွာဇောင်းပေး၍ ပြောင်းလဲလိုက်ရန်မူ လုံးဝဖြစ်နိုင်ပါသည်။ တန်ဖိုး သို့မဟုတ် တန်ဖိုးထားမှု သည် ဖောက်သည်၏ ရွေ့လျားမှု ခရီးစဉ်  တစ်လျှောက်ပြောင်းလဲလာနိုင်ပါသည်။ သူတို့သည် သင်က သင့်ပစ္စည်း/ တံဆိပ် နှင့် သင်ကမ်းလှမ်းလိုက်သော ဖောက်သည်တန်ဖိုး ကို ပထမအကြိမ် မိတ်ဆက်လိုက်စဉ်ကပင် အချို့တစ်ဝက် လက်ခံရရှိပြီး ဖြစ်သော်လည်း၊ ယင်းတို့ (တန်ဖိုး သို့မဟုတ် တန်ဖိုးထားမှု) သည် သင်နှင့် သင့်ပစ္စည်း/ ဝန်ဆောင်မှု၊ သင့်ဝန်ထမ်းများ၊ စသည်တို့သာမက အခြားဆက်စပ်မှုများကို စတင် ဝယ်ယူသုံးစွဲချိန်တွင်မူ ပြောင်းလဲသွားနိုင်သည်။

 

ဖောက်သည်တန်ဖိုးအား ဆက်သွယ်ပြောဆိုဖော်ဆောင်ခြင်းနှင့် ဖောက်သည်တန်ဖိုးကို တည်ထောင်ခြင်း တို့သည်အရေးကြီးပါသည်။ အဘယ့်ကြောင့်ဆိုသော် သင်ကြိုးပမ်းအားထုတ်၍ ဖော်ဆောင်လိုက်သော ဖောက်သည်တန်ဖိုး ရလာဒ် သည် သင့်ဖောက်သည်က ထားရှိသော ဖောက်သည်တန်ဖိုးနှင့် တစ်ထပ်တည်း ကျမှု ရှိမရှိ အပေါ်တွင် တိုင်းတာသောကြောင့်ဖြစ်သည်။ သတိပြုရန် - ဖောက်သည်သည် သင့် စိတ်ကြိုက်ဖြစ်သောကြောင့် ကုန်ပစ္စည်းကို ဝယ်မည်မဟုတ်၊ သူတို့ကြိုက်သောကြောင့် (သို့မဟုတ်) သူတို့လိုအပ်သောကြောင့်သာ ဝယ်ယူခြင်းဖြစ်သည်။ ဤအချက်သည် သင်မည်သည့်အခါမှ အတင်းအကျပ်လုပ်၍ ရမည့်အရာမဟုတ်ပေ။ သင် နောက်ဆုံးအခေါက် အပြင်ထွက်၍ စားခဲ့သည်ကို ပြန်စဉ်းစားကြည့်ပါ။ သင့်တွင် ကြိုတင်စဉ်းစားထားသော ဆိုင်မရှိခဲ့ဘူး ဆိုကြပါစို့။ သင်သည် သင့်စိတ်ကူးတွင်ပေါ်လာသော တန်ဖိုးထားမှုပေါ်တွင် မူတည်၍ အခြေခံအားဖြင့် အတူတူဖြစ်သောဆိုင်များထဲမှ သင်စားချင်သောဆိုင်ကို ရွေးချယ်ခဲ့သည် မဟုတ်လော။ သင့်ရွေးချယ်မှုသည် သင့်၏ စိတ်ခံစားချက်ပေါ်တွင်သာ အဓိကထား၍ ရွေးချယ်ခြင်းဖြစ်သည်၊၊ ဖောက်သည် တန်ဖိုး (ဖောက်သည်ကထားရှိသော တန်ဖိုး) သည် စိတ်ခံစားချက်၏ လွှမ်းမိုးမှုပေါ်တွင်သာ လုံးလုံးမူတည်သည်၊ အတင်းအကျပ် ချုပ်ကိုင်ခိုင်းယူ၍ မရပါ။ ထိုသို့ဆိုသည့်အတွက် ကြိုးစားမကြည့်ရဲလောက်အောင် ကြောက်မသွားပါနဲဦး။ ဖောက်သည်တန်ဖိုးအား ဆက်သွယ်ပြောဆို ဖော်ဆောင်ခြင်းသည် သင်ထင်သည်ထက် အများကြီး ပိုလွယ်ပါသည်။ ဖောက်သည်နှင့် ရင်းနှီးခိုင်မာသော ဆက်ဆံရေး တည်ဆောက်နိုင်လေလေ၊ ဖောက်သည်ကထားရှိသော ဖောက်သည်တန်ဖိုး (Customer Perceived Value) ပိုမို မြင့်တက်လေလေ ဖြစ်ပါသည်။

 

ဖောက်သည်တန်ဖိုးကို ဘယ်လို ပျိုးထောင်ယူမလဲ။

 

 

ဒါက သင်ထင်ထားတာထက် ပိုလွယ်ပါတယ်။ သင့် ဖောက်သည်များ က သူတို့ ကို ဘာက ဆွဲဆောင်တယ်ဆိုတာ သိပြီးသားပါ။ သူတို့ဆီမှာ သိစိတ်ကိုရော၊ မသိစိတ် အပေါ်မှာပါ လှုံ့ဆော်မှုတွေရှိပြီးသားပါ။ သူတို့ကြုံရတဲ့ပြဿနာကို သူတို့ ကိုယ်တိုင် သိပြီးသားဖြစ်သလို သူတို့လိုအပ်တဲ့ အဖြေကိုပါသိပြီးသားဖြစ်နေနိုင်ပါတယ်။

 

 သင့်အနေနဲ့ ဘယ်လှုံ့ဆော်မှုကို သင့်ဖောက်သည်က တန်ဖိုးထားတယ်ဆိုတာ ကိုသာ သဘောပေါက်ဖို့လိုပါသည်။ စစ်တမ်း နှင့် ဖောက်သည်များနှင့် ပြောဆိုဆွေးနွေးမှုတွေ ပါဝင်တဲ့ မှန်ကန်သော သုတေသန ကနေ ဘယ်အရာက သူတို့ အလေးအထားဆုံးဆိုတာကို တူးဖော်နိုင်မည်ဖြစ်သည်။

 

သင်အားကိုးတန်ဖိုး အထားရဆုံးသော ဖောက်သည်များကို ဂရုစိုက်ပါ။

 

သင့် အရောင်းအင်အား၊ ရင်းမြစ်များ၊ ဆားဗစ်အဖွဲ့များ အားလုံးကို ဖောက်သည် အားလုံးကြားတွင် အညီအမျှ ဖြန့်ချထားပေးပြီး ရလာဒ်ကောင်းများ ရလိမ့်မည် ဟု မျှော်လင့်နေ၍ မရပါ။ သင့်အနေဖြင့် အကျိုးကျေးဇူးများစွာ သင့်ကိုပြန်ပေးမည့် ဖောက်သည်များကို အာရုံစိုက်/ ဂရုစိုက်ရမည်။  ဤသည်မှာ ဖောက်သည်များကို အဘယ့်ကြောင့် အုပ်စုခွဲခြားသတ်မှတ်ရန် အရေးကြီးသည် ဆိုသော နောက်ထပ် အကြောင်းပြချက်တစ်ခု ဖြစ်သည်။ ထို့အတူပင် ဝယ်ယူအားကောင်းသော လက်ရှိဖောက်သည် များထံသို့ ကောင်းမွန်သော ဆက်ဆံရေး ထူထောင်တည်ဆောက်ရန် ရင်းမြစ်များစွာကို ပေးပို့ရမည်။ ထိုသို့ လက်ရှိဖောက်သည်အား ထိန်းထားခြင်းသည် ဖောက်သည် အသစ်ရှာရခြင်းထက် ကုန်ကျစားရိတ် များစွာ သက်သာသည်။ ထို့အပြင် ဝန်ဆောင်မှုကြီးစွာပေးခြင်းသည် ထာဝရ ဖောက်သည်တန်ဖိုးကို မြင့်တက်စေ၍ ဖောက်သည်တိုင်းသည် ရေရှည်တွင် ပိုမိုရင်းနှီးမြှုပ်နှံရကျိုးနပ်သူများ ဖြစ်လာပေမည်။

 

 

သက်ထွန်း (သျှမ်း)

 

 

Source : https://bit.ly/3DN0zUQ

 

Photo Credit: Vapulus