【 ဆောင်းပါး 】 “အရေးကြီးတာတွေအပေါ်မှာ အာရုံစူးစိုက်ပါ”
မန်နေဂျာများဟာ လုပ်ငန်းများ ပြီးစီးအောင်မြင်ဖို့၊ လုပ်ငန်းအဖွဲ့အစည်းရဲ့ ရည်မှန်းချက်ပန်းတိုင် ရောက်ရှိအောင်မြင်ဖို့အတွက် အဓိကတာဝန်ရှိသူများဖြစ်ကြပြီး၊ စီမံခန့်ခွဲမှုတာဝန်တွေသာမက ခေါင်းဆောင်မှုအခန်းကဏ္ဍ ခေါင်းဆောင်မှုတာဝန်တွေကိုပါ ထမ်းဆောင်ကြရသူများဖြစ်ပါတယ်။
ခေါင်းဆောင်မှုဆိုတာဟာ စိန်ခေါ်မှုများကို ကျော်လွှားဖို့၊ စဉ်ဆက်မပြတ် ပြောင်းလဲမှုကို လက်ခံဖို့၊ ပန်းတိုင်ရောက်ရှိ အောင်မြင်ဖို့အတွက် အခြားသူများကို လှုံ့ဆော်ပေးဖို့နဲ့၊ ခိုင်မာပြီးထိရောက်တဲ့ အသင်းအဖွဲ့များကို တည်ဆောက်နိုင်တဲ့ စွမ်းရည်များ အရည်အချင်းများပဲဖြစ်ပါတယ်။
မန်နေဂျာတစ်ယောက်အနေနဲ့ ခေါင်းဆောင်မှုတာဝန်တွေကို ထမ်းဆောင်ရတဲ့အခါမှာ လုပ်ငန်းအဖွဲ့အစည်းရဲ့ ရည်မှန်းချက်ပန်းတိုင် ရောက်ရှိအောင်မြင်ဖို့၊ မိမိရဲ့အသင်းအဖွဲ့ (Team) ဟာ အဖွဲ့အစည်းရဲ့ မျှော်မှန်းချက် (Vision) နဲ့ တန်ဖိုးများ (Values) ကို လိုက်နာစေဖို့နဲ့၊ လုပ်ငန်းအဖွဲ့အစည်းအတွက် အခွင့်အလမ်းသစ်တွေ ရှာဖွေဖော်ဆောင်တာ အစရှိတဲ့ များမြောင်လှတဲ့တာဝန်တွေကို ထမ်းဆောင်ကြရပါတယ်။များမြောင်လှတဲ့ ခေါင်းဆောင်မှုတာဝန်တွေကို ထမ်းဆောင်ရတဲ့အခါမှာ မန်နေဂျာများဟာ ဆက်သွယ်ရေးလမ်းကြောင်းမှာ နစ်မြုပ်နေနိုင်ပါတယ်။တောင်းဆိုချက်များ (Requests)၊ အလုပ်တာဝန်အသစ်များ (New Tasks) နဲ့ အစပျိုးမှုများ (Initiatives) မှာ နစ်မြုပ်နေနိုင်ပါတယ်။လုပ်စရာအလုပ်တွေများလို့ အဓိကကျတဲ့အလုပ်တွေ၊ အရေးကြီးတဲ့အလုပ်တွေ မပြီးမှာ မလုပ်ဖြစ်မှာ စိုးရိမ်ရပါတယ်။တကယ်အရေးကြီးတာက အောင်မြင်မှုပါ။ဒါ့ကြောင့် ကိုယ့်အောင်မြင်မှုအတွက် ကိုယ့်ဌာနအောင်မြင်မှုအတွက် ကိုယ့်အဖွဲ့အစည်းအောင်မြင်မှုအတွက် ဘာတွေကအရေးကြီးသလဲဆိုတာကို အသိအမှတ်ပြုထားဖို့နဲ့၊ အဲဒီအရေးကြီးတာတွေအပေါ်မှာ အာရုံစူးစိုက်မှုအပြည့်ရှိဖို့၊ အချိန်ကိုစီမံခန့်ခွဲတတ်ဖို့၊ ဦးစားပေးအစီအစဥ်တွေ ချမှတ်တတ်ဖို့ အထူးလိုအပ်လှပါတယ်။
အချိန်ကို စီမံခန့်ခွဲမှု
ခေါင်းဆောင် မန်နေဂျာများအနေနဲ့ “အရေးကြီးတာ” နဲ့ “အရေးတကြီးလုပ်ဖို့လိုတာ” ကို ခွဲခြားတတ်ဖို့ လိုပါတယ်။
“အရေးကြီးတာ” ဆိုတာ အရေးထားလုပ်ရမယ့်အလုပ်တွေ (Importance) ကို ဆိုလိုပြီး၊ “အရေးတကြီးလုပ်ဖို့လိုတာ” ဆိုတာ အမြန်ဆောင်ရွက်ရမယ့်အလုပ်တွေ ချက်ချင်းလုပ်ရမယ့်အလုပ်တွေ (Urgent) ကို ဆိုလို ပါတယ်။ Importance နဲ့ Urgent ကို ကွဲဖို့ လိုအပ်ပါတယ်။အချို့အလုပ်တွေက အလွန်အရေးကြီးသလို အမြန်ဆောင်ရွက်ဖို့ လိုအပ်ကြပါတယ်။ High Importnace : High Urgency ဖြစ်ပါတယ်။အချို့အလုပ်တွေကျတော့ အလွန်အရေးကြီးပေမယ့် အမြန်ဆောင်ရွက်ဖို့ မလိုအပ်သေးပါ။ High Importance : Low Urgency ဖြစ်ပါတယ်။အချို့အလုပ်တွေကျတော့ အရေးမကြီးပေမယ့် အမြန်ဆောင်ရွက်ပေးဖို့ လိုအပ်ကြပါတယ်။ High Urgency : Low Importance ဖြစ်ပါတယ်။အချို့အလုပ်တွေကျတော့ အရေးမကြီးသလို အမြန်ဆောင်ရွက်ပေးဖို့လည်း မလိုအပ်ပါ။ Low Urgency : Low Importance ဖြစ်ပါတယ်။အဓိကကျတဲ့ အလုပ်တွေကို စာရင်းပြုစုပြီး အရေးကြီးမှု၊ အမြန်လိုမှုအလိုက် ဦးစားပေးအစီအစဥ်များ အချိန်ဇယားများ သတ်မှတ်လုပ်ဆောင်ရမှာဖြစ်ပါတယ်။စည်းကမ်းရှိစွာ ချဉ်းကပ်ရမှာဖြစ်ပါတယ်။ရိုးရှင်းသောဖြေရှင်းချက်မှာ နေ့ရက်တိုင်း၏အဆုံးတွင် "လုပ်ရန်" စာရင်းတစ်ခု “To do List” ရေးရန် ဖြစ်ပါတယ်။အဲဒီနောက်မှာတော့ “To do List” ကို စိစစ်ရမှာဖြစ်ပါတယ်။
စာရင်းပါ အကြောင်းအရာတစ်ခုစီကို မျှော်မှန်းချက် (Vision)၊ တန်ဖိုးများ (Values)၊ အဓိကရည်မှန်းချက်များ (Key Objectives) နဲ့ နှိုင်းယှဥ်တိုက်ဆိုင်ပြီး အကဲဖြတ်ရမှာဖြစ်ပါတယ်။ဦးစားပေးအစီအစဉ်တစ်ခုစီကို နံပါတ်စဉ်တပ်ရမှာဖြစ်ပါတယ်။တစ်နည်းအားဖြင့်ဆိုရရင် အလုပ်များကို အမျိုးအစားခွဲကြည့်ရမှာဖြစ်ပါတယ်။အောက်မှာ ဖော်ပြထားတဲ့ ခေါင်းစဉ်လေးခုအောက်မှာ စနစ်တကျ အမျိုးအစားခွဲကြည့်ရမှာဖြစ်ပါတယ်။
၁။ အရေးမကြီး သို့သော် အမြန်ဆောင်ရွက်ရန်လို (High Urgency : Low Importance)
၂။ အရေးလည်းမကြီး၊ အမြန်လည်းမလို (Low Urgency : Low Importance)
၃။ အရေးလည်းကြီး၊ အမြန်လည်းလို (High Urgency : High Importance)
၄။ အရေးကြီး သို့သော် အမြန်မလိုသေး (Low Urgency : High Importance)
အလုပ်တွေကို ဘယ်လိုဦးစားပေးမလဲ
၁။ အရေးမကြီး သို့သော် အမြန်ဆောင်ရွက်ရန်လို (High Urgency : Low Importance)
အချို့အလုပ်တွေက အရေးပါမှုနည်းပါးသော်လည်း အမြန်ဆောင်ရွက်ရန် လိုအပ်ပါတယ်။ဥပမာအနေနဲ့ပြောရရင် ဖုန်းခေါ်ဆိုမှုများနဲ့ အီးမေးလ်များ ဖြစ်ပါတယ်။ဖုန်းခေါ်ဆိုမှုများနဲ့ အီးမေးလ်များ ဝင်လာပါက ချက်ချင်းကိုင်တွယ်ဖြေရှင်းဖို့ လိုအပ်ပါတယ်။အချို့အလုပ်တွေက ကိုယ့်အမြင် (Vision) နဲ့ မကိုက်ညီပေမယ့် အခြားသူများရဲ့ ဦးစားပေးများ အစီအစဥ်များ အလုပ်များ (Priorities) ဖြစ်နေရင် ကိုယ့်အတွက် အရေးမပါလှပေမယ့် သူ့အတွက် အရေးကြီးနေတာကြောင့် အမြန်ဆောင်ရွက်ပေးရတာမျိုးတွေရှိပါတယ်။အခုလို ကိစ္စတွေအတွက် ဘယ်လို Action မျိုး လုပ်ဆောင်သင့်ပါသလဲ။အဖြေက တာဝန်လွှဲအပ် ဆောင်ရွက်စေသင့်ပါတယ်။အခုလိုကိစ္စတွေအတွက် ခေါင်းဆောင်မန်နေဂျာရဲ့ တန်ဖိုးရှိတဲ့အချိန်တွေကိုသုံးရင် ဘာဖြစ်မလဲ။ကိုယ်လုပ်ရမယ့် ဦးစားပေးရမယ့် အလုပ်တွေ ပစ်ထားပြီး သူများရဲ့ ဦးစားပေးအလုပ်တွေကို လိုက်လုပ်နေရတဲ့အတွက် ခေါင်းဆောင် မန်နေဂျာမှာ ပြတ်သားတဲ့ ပန်းတိုင်မရှိတဲ့သဘောဖြစ်သွားတာ၊ အကျပ်အတည်းတွေကို စီမံခန့်ခွဲရတ၊ စိတ်မထိန်းနိုင်မှုတွေ၊ ဗလောင်းဗလဲ ဆက်ဆံရတာမျိုးတွေ ဖြစ်ပေါ်လာနိုင်ပါတယ်။
၂။ အရေးလည်းမကြီး၊ အမြန်လည်းမလို (Low Urgency : Low Importance)
အချို့အလုပ်တွေက အရေးပါမှုနည်းပါးသလို အမြန်ဆောင်ရွက်ရန်လည်း မလိုအပ်ပါ။ဥပမာအနေနဲ့ပြောရရင် အဆင့်နိမ့်အစည်းအဝေးများ (Low-level meeting) ၊ အချိန်ဖြုန်းမှုများ (Time-wasting) နဲ့ အာရုံစူးစိုက်မှုမရှိဘဲ ရှာဖွေခြင်း (Unfoused browsing) တို့ ဖြစ်ပါတယ်။အခုလိုကိစ္စတွေအတွက် ဘယ်လို Action မျိုး လုပ်ဆောင်သင့်ပါသလဲ။အဖြေကထားခဲ့ပါ။အခုလိုကိစ္စတွေအတွက် ခေါင်းဆောင်မန်နေဂျာရဲ့ တန်ဖိုးရှိတဲ့အချိန်တွေကိုသုံးရင် ဘာဖြစ်မလဲ။မရောင်ရာဆီလူးနေတာဖြစ်လို့ ကိုယ့်တာဝန်တွေ ပျက်ကွက်မယ်။အလုပ်တွေပြီးအောင် မလုပ်နိုင်တော့ဘူး။အခြားသူတွေအပေါ် အားကိုးမှုတိုးလာမယ်။ကိုယ့်အလုပ် ကိုယ့်တာဝန် ကိုယ့်ရာထူးအတွက် မလုံခြုံမှုဖြစ်ပေါ်လာနိုင်ပါတယ်။
၃။ အရေးလည်းကြီး၊ အမြန်လည်းလို (High Urgency : High Importance)
အချို့အလုပ်တွေက အလွန်အရေးကြီးသလို အမြန်ဆောင်ရွက်ဖို့လည်း လိုအပ်ကြပါတယ်။ဥပမာအနေနဲ့ပြောရရင် အကျပ်အတည်းများကို ကိုင်တွယ်ဖြေရှင်းခြင်း (dealing with crises) ၊ အချိန်အရေးပါသော ပရောဂျက်များမှာ နီးနီးကပ်ကပ်ပါဝင်ခြင်း (closely involved with time-critical projects) နဲ့၊ အဓိကအစည်းအဝေးများ တက်ရောက်ခြင်း (attending keys meetings) တို့ ဖြစ်ပါတယ်။အခုလို ကိစ္စတွေအတွက် ဘယ်လို Action မျိုး လုပ်ဆောင်သင့်ပါသလဲ။အဖြေက ယခုချက်ချင်းဆောင်ရွက်ပါ။အချိန်အစီအစဉ်ကို ပြန်လည်သုံးသပ်ပါ။အခုလိုကိစ္စတွေအတွက် ခေါင်းဆောင်မန်နေဂျာရဲ့ တန်ဖိုးရှိတဲ့အချိန်တွေကို သုံးရင် ဘာဖြစ်မလဲ။စဉ်ဆက်မပြတ် အကျပ်အတည်းစီမံခန့်ခွဲမှု (Constant crisis management) ပင်ပန်းနွမ်းနယ်ခြင်းနှင့် စိတ်ဖိစီးမှု (Exhaustion and stress) ရေရှည်မှာ ပူလောင်မှု (Burnout over the long-term) ဖြစ်ပေါ်လာနိုင်ပါတယ်။ခေါင်းဆောင်မန်နေဂျာရဲ့ တန်ဖိုးရှိတဲ့အချိန်တွေကို အခုလိုကိစ္စတွေအတွက် ဦးစားပေးလုပ်ဆောင်ရမှာဖြစ်ပါတယ်။
၄။ အရေးကြီး သို့သော် အမြန်မလိုသေး (Low Urgency : High Importance)
အချို့အလုပ်တွေက အလွန်အရေးကြီးသလို အမြန်ဆောင်ရွက်ဖို့လည်း လိုအပ်ကြပါတယ်။ဥပမာအနေနဲ့ပြောရရင် ကြိုတင်စီစဉ်ခြင်း (Planning Ahead) ၊ ပြဿနာများကို ကြိုတင်ခန့်မှန်းခြင်း (Anticipating problems)၊ အသင်းအဖွဲ့ကို လမ်းညွှန်လေ့ကျင့်ပေးခြင်း (Guiding and training the team) ၊ တာဝန်လွှဲအပ်ဆောင်ရွက်ခြင်း (delegating) ၊ ဆက်ဆံရေးတည်ဆောက်ခြင်း (Building relationships) တို့ ဖြစ်ပါတယ်။အခုလိုကိစ္စတွေအတွက် ဘယ်လို Action မျိုး လုပ်ဆောင်သင့်ပါသလဲ။အဖြေက အချိန်ဇယားဆွဲ ဆောင်ရွက်ပါ။ အခုလိုကိစ္စတွေအတွက် ခေါင်းဆောင်မန်နေဂျာရဲ့ တန်ဖိုးရှိတဲ့အချိန်တွေကို သုံးရင် ဘာဖြစ်မလဲ။ခေါင်းဆောင် မန်နေဂျာအနေနဲ့ ခြုံငုံသုံးသပ်ချက် (Overview) ပြုလုပ်နိုင်ပြီး အနာဂတ်အမြင် (Vision) ကို ထင်ဟပ်လာစေပါမယ်။ဘာတွေကတော့ ဖြစ်မြောက်အောင်မြင်ခဲ့ပြီ ဘာတွေကတော့ ဆက်လက်လုပ်ဆောင်ရမယ်။ဘယ်လောက်သုံးစွဲပြီးလို့ Balance ဘယ်လောက်တော့ကျန်သေးတယ်ဆိုတာတွေကို သိလာမှာဖြစ်ပါမယ်။
စမတ်ကျကျ အလုပ်လုပ်ပါ
ခေါင်းဆောင်မန်နေဂျာအနေနဲ့ စမတ်ကျကျ အလုပ်လုပ်ဖို့ လိုအပ်ပါတယ်။ဆောင်ရန် ရှောင်ရန်များ (တစ်နည်းအားဖြင့်) လုပ်ရမယ့် အလုပ်များနဲ့ မလုပ်ရမယ့်အချက်များကို ရှင်းရှင်းလင်းလင်းသိထား သတ်မှတ်ထားဖို့ လိုအပ်ပါတယ်။
လုပ်ဆောင်ရမယ့် အချက်တွေကတော့ .......
စံချိန်စံညွှန်းများ တိုးတက်စေခြင်း။ (Improving standards)
ကွန်ရက်များတည်ဆောက်ခြင်း။ (Building networks)
အချိန်တွေကို ဘယ်လိုသုံးစွဲခဲ့တယ်ဆိုတာကို မှတ်တမ်းတင်ခြင်း ခွဲခြမ်းစိတ်ဖြာခြင်း။
(Recording and analyzing how you spend your time)
ကြာချိန်နှင့်ပတ်သက်ပြီး လက်တွေ့ကျကျဖြစ်ခြင်း။ (Being realistic about durations) တို့ ဖြစ်ပါတယ်။
မလုပ်ရမယ့် အချက်တွေကတော့ .......
• လွှဲအပ်နိုင်တဲ့ အလုပ်တွေကို လုပ်နေခြင်း။ (Doing work you could delegate)
• ရုံးမှ ဘယ်တော့မှ မထွက်ခွာခြင်း။ (Never leaving your office)
• လှုံ့ဆော်မှုရှိမှ တုံ့ပြန်ခြင်း။ (Reacting to stimuli as they arrive) Reactive, Active, Proactive ဆိုပြီး သုံးမျိုးသုံးစားရှိပါတယ်။အမြဲ active ဖြစ်နေဖို့ လိုပါတယ်။ Proactive ဖြစ်ရင် ပိုကောင်းပါတယ်။
• တိကျသောအချိန်ဇယားမရှိဘဲ စတင်ခြင်း (Starting without a clear schedule) တို့ ဖြစ်ပါတယ်။
လမ်းကြောင်းပေါ် ပြန်တက်
အလုပ်တွေလွတ်သွားတာ (ဒါမှမဟုတ်) နှောင့်နှေးသွားတာ။သတ်မှတ်ရက်အတွင်း မပြီးတာ။ထင်မထားတဲ့ ပြသနာတွေ ထပ်တလဲလဲဖြစ်နေတာတွေဟာ အချိန်စီမံခန့်ခွဲမှု မှားယွင်းခြင်းရဲ့ လက္ခဏာများဖြစ်ပါတယ်။မူလအကြောင်းအရင်းကို မဖြေရှင်းနိုင်ရင် သင်ရဲ့လုပ်ငန်းခွင်ဘဝသည် မကြာခင်မှာ ထိန်းမနိုင်သိမ်းမရ ဖြစ်သွားနိုင်ပါတယ်။အချိန်စီမံခန့်ခွဲမှု မှားယွင်းခြင်းဟာ သင်ရဲ့စွမ်းအင်နဲ့ တီထွင်ဖန်တီးနိုင်စွမ်းကို အတားအဆီးဖြစ်စေပါတယ်။အချိန်စီမံခန့်ခွဲမှု မှားယွင်းခြင်းရဲ့ လက္ခဏာများကို စတင်သတိပြုမိပြီဆိုတာနဲ့ သင့်လုပ်လက်စအလုပ်တွေကို ရပ်လိုက်ပါ။အချိန်အနည်းငယ်ယူပါ၊ သင့်အတွေးတွေကို ပြန်လည်အာရုံစိုက်ပါ။
ဗျူဟာမြောက် လုပ်ဆောင်ကိုင်တွယ်ဖြေရှင်းရန် အချိန်အနည်းငယ်အတွင်း အစီအစဉ်ဆွဲပြီး သင့်အဖွဲ့အတွင်း ကိုယ်စားလှယ်အဖွဲ့ကို တိုးတက်ကောင်းမွန်လာစေရန် သင်လုပ်ဆောင်နိုင်သည်များကို စဉ်းစားပါ။တိုးတက်ဖို့ သင်ဘာတွေလုပ်နိုင်သလဲ။အရာရာအားလုံးကို တစ်ယောက်တည်း ဒိုင်ခံဆောင်ရွက်နေမယ်ဆိုရင် အချိန်မလောက်နိုင်ပါ။ကိုယ်တိုင်ကိုယ်ကျဆောင်ရွက်သင့်သည့် အလုပ်များကို ကိုယ်တိုင်ဆောင်ရွက်ပြီး တာဝန်ခွဲပေးသင့်သည့် အလုပ်များကို တာဝန်ခွဲဝေဆောင်ရွက်စေရမှာဖြစ်ပါတယ်။တာဝန်ခွဲဝေဆောင်ရွက်စေဖို့အတွက် သင့်ရဲ့အဖွဲ့ဝင်များရဲ့ လုပ်ကိုင်ဆောင်ရွက်စွမ်း တိုးတက်လာဖို့ ဘာတွေလုပ်ပေးဖို့ လိုအပ်မလဲ စဥ်းစားရမှာဖြစ်ပါတယ်။အရည်ချင်းမြှင့်တင်ပေးရမှာဖြစ်ပါတယ်။အလုပ်တွေ အချိန်မီပြီးစီးနိုင်ရေးအတွက် ဖြစ်နိုင်ခြေရှိသော အတားအဆီးများကို ဖြတ်ကျော်ရန် အဖွဲ့အတွက် အချိန်ပေးရမှာဖြစ်ပါတယ်။အရေးပေါ်အခြေအနေများအတွက် စုစုပေါင်း ပရောဂျက်အချိန်၏ အနည်းဆုံး ၁၀ ရာခိုင်နှုန်းကို ကြိုတင်ဖယ်ထားရမှာဖြစ်ပါတယ်။
ဘယ်လိုလွှဲအပ်မလဲ
တာဝန်ခွဲဝေဆောင်ရွက်ခြင်း လွှဲအပ်ခြင်းဆိုသည်မှာ လူများကို မိမိတို့၏ကိုယ်ပိုင်ရှာဖွေခွင့်ကို ပေးခြင်းဖြစ်ပါတယ်။မန်နေဂျာတစ်ဦးအနေနဲ့ ရှိသမျှလုပ်ငန်းအားလုံးကို မိမိတစ်ဦးထဲ သိမ်းကြုံးဆောင်ရွက်ဖို့ဆိုတာ မဖြစ်နိုင်ပါ။မိမိလက်အောက်ဝန်ထမ်းများကို တာဝန်ခွဲဝေအပ်နှင်းဖို့၊ လုပ်ပိုင်ခွင့်အာဏာ ခွဲဝေဆောင်ရွက်ဖို့ လိုပါတယ်။တာဝန်ခွဲဝေဆောင်ရွက်နိုင်ခြင်းသည် အရေးကြီးတဲ့ စီမံခန့်ခွဲမှုအရည်အချင်းတစ်ရပ်လည်းဖြစ်ပါတယ်။တာဝန်ခွဲဝေဆောင်ရွက်ခြင်း (Delegation) ဖြင့် အလုပ်တွေ ပိုမိုပြီးမြောက်ပါတယ်။တာဝန်ခွဲဝေ အပ်နှင်းခံရတဲ့ ဝန်ထမ်းများအတွက် အတွေ့အကြုံကောင်းတွေ ရလာနိုင်ပါတယ်။သိသင့်သိထိုက်တာတွေ ပိုသိလာပါမယ်။အရည်အသွေး တိုးတက်မြင့်မားလာနိုင်ပါတယ်။ဆုံးဖြတ်ချက်တွေ ကောင်းကောင်းချမှတ်လာနိုင်တယ်။အခွင့်အလမ်းတွေရလာမယ်။ရာထူးတိုးဖို့ အလားအလာတွေ ဖြစ်လာနိုင်ပါတယ်။တာဝန်ခွဲဝေအပ်နှင်းပေးတဲ့ မန်နေဂျာအတွက်လည်း နေရာတကာ အသေးစိတ်လိုက်ပါနေစရာ မလိုတော့တဲ့အတွက် အချိန်ပိုတွေရလာမယ်။အရေးကြီးကိစ္စတွေ၊ မဟာဗျူဟာချမှတ်ရမယ့်ကိစ္စတွေမှာ အာရုံစူးစိုက် ဆောင်ရွက်လာနိုင်ပါတယ်။ပိုမိုကောင်းမွန်တဲ့ စဉ်းစားသုံးသပ်ချက်တွေ ချမှတ်လာနိုင်မှာဖြစ်ပါတယ်။တာဝန်ခွဲဝေဆောင်ရွက်မယ့် တာဝန်တစ်ခုကို လွှဲအပ်တော့မယ်ဆိုရင်တော့ ကိုယ်တာဝန်လွှဲအပ်ရမယ့်သူကို ဂရုတစိုက်ရွေးချယ်ဖို့ လိုအပ်ပါလိမ့်မယ်။အကဲဖြတ်ဖို့ လိုအပ်ပါလိမ့်မယ်။
(တာဝန်တစ်ခုကို လွှဲအပ်တော့မယ်ဆိုရင် ကိုယ်တာဝန်လွှဲအပ်ရမယ့်သူကို ဘယ်လိုဂရုတစိုက်ရွေးချယ်ရမယ်။ ဘယ်လိုအကဲဖြတ်ရမယ်ဆိုတာကို လာမယ့်ဆောင်းပါးမှာ ဆက်လက်ဆွေးနွေးပေးပါမယ်။)
မှူးခန့်စံ
