နိုင်ငံအကြီးအကဲမဖြစ်တာ ဒီပုဒ်မကြောင့်ဆိုပြီး စိတ်ခံစားမှုကိုရှေ့တန်းတင်ပြင်ဆင်တာကို စိတ်မကောင်းဖြစ်ဟု ပြည်ခိုင်ဖြိုးအမတ် ဆို

အိမ်ထောင်ဖက်ရွေးချယ်မှုအရ နိုင်ငံအကြီးအကဲမဖြစ်တာကို ဒီပုဒ်မကြောင့်ဆိုပြီး စိတ်ခံစားမှုကိုရှေ့တန်းတင်တာကို စိတ်မကောင်းဖြစ်မိဟု ပြည်ခိုင်ဖြိုးပါတီ၏ လွှတ်တော်အမတ်ဖြစ်သူ မက်မန်းမဲဆန္ဒနယ်မှ ဦးတင်အေး က ပြောဆိုလိုက်ပါတယ်။

 

ယင်းကဲ့သို့ ပြောဆိုမှုကို ဒီကနေ့ကျင်းပတဲ့ ပြည်ထောင်စုလွှတ်တော် အစည်းအဝေးတွင် ဖွဲ့စည်းပုံအခြေခံဥပဒေကို ဒုတိယအကြိမ်ပြင်ဆင်သည့် ဥပဒေကြမ်းပါ ပုဒ်မ-၂၆၂၊ ပုဒ်မခွဲများအပေါ် ဆွေးနွေးခဲ့ရာမှာ ၎င်းက အထက်ပါအတိုင်း ထည့်သွင်းပြောကြားခဲ့ခြင်းဖြစ်ပါတယ်။

 

“ခေတ်ကာလနဲ့လျော်ညီတဲ့ ဖွဲ့စည်းပုံအခြေခံဥပဒေတွေကို ပြင်ဆင်ရာမှာ မှန်ပေမဲ့ နိုင်ငံရဲ့ပကတိအခြေအနေနဲ့ အတိတ်ဖြစ်စဉ်များကိုသုံးသပ်ပြီး နိုင်ငံရေးပါတီအသီးသီးမှ ကိုယ်စားလှယ်အားလုံးဟာ တစ်စုတစ်ဖွဲ့၊ ပုဂ္ဂိုလ်တစ်ဦးတစ်ယောက်အတွက် ပြင်ဆင်ချက်မျိုးမဖြစ်စေဘဲ တစ်နိုင်ငံလုံးရှိ တိုင်းရင်းသားပြည်သူလူထုများအတွက် အမှန်တစ်ကယ်လိုအပ်တဲ့ ပြင်ဆင်မှု၊ ဖြည့်စွက်မှုမျိုးဖြစ်ဖို့ အရေးကြီးပါတယ်။” လို့ မက်မန်းမဲဆန္ဒနယ်၊ လွှတ်တော်ကိုယ်စားလှယ် ဦးတင်အေး က ပြောကြားခဲ့တာပါ။

 

ဒါ့အပြင် "နိုင်ငံတော်သမ္မတနှင့် ဒုတိယသမ္မတများအတွက် အရည်အချင်းသတ်မှတ်ချက်ဖြစ်တဲ့ ပုဒ်မခွဲကိုပယ်ဖျက်ဖို့ တင်သွင်းလာတာတွေ့ရတော့ တော်တော်လေးအံ့သြမိကြောင်း၊ နိုင်ငံတော်သမ္မတ၊ ဒုတိယသမ္မတတို့ဟာ နိုင်ငံတော်ရဲ့ဥသျှောင်ဖြစ်သလို နိုင်ငံသားများ၏ အားကိုးအားထားရာ အမျိုးသားခေါင်းဆောင်လည်းဖြစ်ပါကြောင်း၊ နိုင်ငံတော်အကြီးအကဲအဖြစ် ဆောင်ရွက်မည့် နိုင်ငံတော်သမ္မတ၊ ဒုတိယသမ္မတများဟာ အထူးသဖြင့် နိုင်ငံတော်နှင့် နိုင်ငံသားများအပေါ် သစ္စာစောင့်သိစောင့်သိ ရိုသေသူဖြစ်ရမှာဖြစ်ကြောင်းကိုလည်း ၎င်း၏ဆွေးနွေးချက်မှာ ထည့်သွင်းပြောကြားခဲ့ပါတယ်။

 

“ဒါဟာ ပြည်သူများက လုံးဝဥဿုံချွင်းချက်မရှိ ယုံကြည်အားနိုင်သူဖြစ်ရေးနှင့် သံသယမပွားနိုင်စေရေးအတွက် လိုအပ်တာကြောင့် ပြဋ္ဌာန်းထားခြင်းဖြစ်ပါတယ်။၂၀၀၈ ဖွဲ့စည်းပုံအခြေခံဥပဒေကျမှ ထူးပြီးပြဋ္ဌာန်းထားတာမဟုတ်ပါဘူး။ဘယ်သူဘယ်ဝါ လူပုဂ္ဂိုလ်တစ်ဦးတစ်ယောက်ကိုမှ ရည်ရွယ်ပြီးရေးဆွဲခဲ့ခြင်းမဟုတ်ဘူးဆိုတာ နားလည်ဖို့လိုပါတယ်။အိမ်ထောင်ဖက်ရွေးချယ်မှုအရ နိုင်ငံအကြီးအကဲမဖြစ်တာကို ဒီပုဒ်မကြောင့်ဆိုပြီး စိတ်ခံစားမှုကိုရှေ့တန်းတင် ရမယ်ရှာလက်ညှိးထိုး၊ ဝေဖန်ပြောဆိုနေသံတွေကြားရတော့ အင်မတန်မှစိတ်မကောင်းဖြစ်ရပါတယ်။” လို့ ပြည်ခိုင်ဖြိုးအမတ် ဦးတင်အေး က ပြောပါတယ်။

 

အဆိုပါဆွေးနွေးချက်နှင့် ပတ်သက်၍ NLD ပါတီမှ အမျိုးသားလွှတ်တော် ကိုယ်စားလှယ် ဦးအောင်ကြည်ညွန့် က “အိမ်ထောင်ဖက်ရွေးချယ်တာ မှားယွင်းမိတာကို ရမယ်ရှာပြီးတော့ ဖွဲ့စည်းပုံအခြေခံဥပဒေပြင်ဆင်ဖို့ ကြိုးစားတယ်ဆိုတဲ့ စကားရပ်မျိုးဟာ ဒီကနေ့အခြေအနေမျိုးအပေါ် ပြောသင့်ပြောထိုက် ပြောအပ်တဲ့ကိစ္စမဟုတ်ပါဘူး။ဒါဟာ အပြန်အလှန်အငြင်းပွားမှုတွေ ပိုပြီးကြီးထွားနိုင်တာဖြစ်တဲ့အတွက် ယင်းစကားရပ်ကို နုတ်ပယ်ပေးဖို့အပြင် ဒီလိုကိစ္စရပ်မျိုး နောက်ထပ်မပြုလုပ်နိုင်ရေးကို နာယကကြီးအနေနဲ့ ထိန်းချုပ်ပေးသင့်ပါတယ်။” လို့ ပြည်ထောင်စုလွှတ်တော် နာယကထံသို့ ကန့်ကွက်ကြောင်း တင်ပြခဲ့ပါတယ်။

 

ထိုသို့တင်ပြမှုနှင့်ပတ်သက်ပြီး ပြည်ထောင်စုလွှတ်တော် နာယက က လုံးကောက်ဆောင်ရွက်ပြီး ဥပဒေနှင့်မညီညွတ်သည်များကို ထုတ်ပယ်သွားမှာဖြစ်တယ်လို့လည်း ပြန်လည်ပြောကြားပေးခဲ့ပါတယ်။

 

KO

နေပြည်တော်၊ ဖေ‌ဖော်ဝါရီ - ၂၆

 

( Zawgyi )