【 ပြည်တွင်း 】တစ်နှစ်နီးပါးကြာပိတ်ထားရတဲ့ မန္တလေးကျောက်ဝိုင်းကို ကျန်းမာရေးစည်းကမ်းချက်တွေနဲ့အညီ ပြန်လည်ဖွင့်ခွင့်ရဖို့တိုင်းအစိုးရအဖွဲ့ထံ တင်ပြထား

တစ်နှစ်နီးပါးကြာပိတ်ထားရတဲ့ မန္တလေးကျောက်ဝိုင်းကို ကျန်းမာရေးစည်းကမ်းချက်တွေနဲ့အညီ ပြန်လည်ဖွင့်ခွင့်ရဖို့ အတွက် ကျောက်ဝိုင်းအကျိုးတော်ဆောင်များက မန္တလေးတိုင်းဒေသကြီးအစိုးရအဖွဲ့ထံသို့ တင်ပြထားတယ်လို့ သိရပါတယ်။

အဆိုပါ ကျောက်ရောင်းဝယ်ရေးဈေးကွက်(ကျောက်ဝိုင်း)ကို ပြီးခဲ့သည့်နှစ် မတ်လ ၂၄ ရက်နေ့မှ စတင်၍ ကိုဗစ်ရောဂါဖြစ်ပွားမှုကြောင့် ပိတ်ထားခဲ့ရတာပါ။ ထို့ကြောင့် ယခုဆိုပါက အချိန်ကာလအားဖြင့် တစ်နှစ်နီးပါးကြာမြင့်လာသည်အထိ ကျောက်ဝိုင်းကို ပိတ်ထားရသည့်အတွက် ကျောက်ဝယ်ရောင်းသမားများ၏ မိသားစုတွေရဲ့စားဝတ်နေရေးပိုင်းတွေမှာ အခက်အခဲတွေကို ကြုံတွေ့လာနေရတဲ့အတွက် ကျန်းမာရေးနဲ့လျော်ညီစွာ ကျောက်ဝိုင်းကို ပြန်လည်ခင်းကျင်းပြီး ဖွင့်ခွင့်ပေးဖို့အတွက် တင်ပြထားခြင်းဖြစ်တယ်လို့လည်း မန္တလေးမြို့ အခြေစိုက် ကျောက်ဝိုင်း အကျိုးဆောင်များက ဆိုပါတယ်။

 

 

“ကျွန်တော်တို့ ပြန်လည်ဖွင့်နိုင်ဖို့အတွက် ကျောက်ဝိုင်း အကျိုးဆောင်တွေအနေနဲ့ တိုင်းဒေသကြီးကိုစာတင်ထားပါတယ်။ စာကတော့ ၂၁ ရက်နေ့ကစပြီးတော့တင်ပေးထားပါတယ်။ ဒါလည်း အခုဆိုရင် ဇန်နဝါရီ ၄ ရက်နေ့က စစ်ဆေးရေးအဖွဲ့များနဲ့လာရောက်စစ်ဆေးသွားပါတယ်။ ကျွန်တော်တို့ကျောက်ဝိုင်းကြီးဖွင့်ဖို့အတွက်ကတော့ ကျန်းမာရေးဝန်ကြီးဌာနက ညွှန်ကြားထားတဲ့အတိုင်း လက်ဆေးရည်သုံးဖို့ Mask တပ်ဖို့ Face shield တွေတပ်ဖို့ စတာတွေကို ညွှန်ကြားချက်အတိုင်းဆောင်ရွက်သွားမှာဖြစ်ပါတယ်။ ကျွန်တော်တို့အနေနဲ့ကတော့တတ်နိုင်သလောက်ပေါ့နော်၊ ကျွန်တော်တို့ ကြိုးပမ်းပေးပြီး ကျန်းမာရေးဝန်ကြီးဌာနက မည်သို့ဆောင်ရွက်ရမည်ကို ညွှန်ကြားလာတာနဲ့ ညွှန်ကြားချက်အတိုင်း ကျောက်ဝိုင်းကိုစဖွင့်ပြီဆိုတာနဲ့ ကျောက်သမားဝင်ခွင့်ကဒ်လေးတွေလည်း ကိုယ်စီလုပ်ပေးထားပါတယ်။ မလုပ်ရသေးတဲ့လူတွေကိုလည်း ထပ်လုပ်ပေးဖို့စီစဉ်ထားပြီး ကျောက်သမားမှန်ရင်ဝင်ခွင့်ကဒ်နဲ့ ဝင်ခွင့်ပေးမှာဖြစ်ပါတယ်”လို့ မဟာအောင်မြေကျောက်မြတ်ရတနာရောင်းဝယ်ရေးစခန်း ဒုတိယ ဥက္ကဋ္ဌ ဦးကျော်ကျော်ဦး ကဆိုပါတယ်။

 

အဆိုပါ ကျောက်ဝိုင်း ပြန်လည်ဖွင့်လှစ်ခွင့်ရရေးနဲ့ပတ်သက်လို့ ကျောက်ဝိုင်းအကျိုးတော်ဆောင်အဖွဲ့၊ မန္တလေးကျောက်မျက်လုပ်ငန်းရှင်များအသင်းနှင့် ပူးတွဲပြီးတော့ဆောင်ရွက်နေကြသလို သက်ဆိုင်ရာ တိုင်းဒေသကြီး အာဏာပိုင်အဖွဲ့များကလည်း မြေပြင်ကွင်းဆင်း စစ်ဆေးဆောင်ရွက်မှုတွေကို ပြုလုပ်နေကြတာတွေရှိတယ်လို့ မဟာအောင်မြေမြို့နယ်၊ ပြည်သူ့လွှတ်တော်ကိုယ်စားလှယ် ဦးငြိမ်းသစ် က ဆိုပါတယ်။ 

“ဒီကျောက်ဝိုင်းဖွင့်လှစ်ရေးကတော့ ကျောက်သမားအတော်များများရဲ့ လိုလားတဲ့ဆန္ဒတစ်ခုပါပဲ။ ကျောက်ဝိုင်းကလည်းပဲ ဒီနှစ်ရှည်လကျော်ကြာသွားပြီပေါ့နော်။ တစ်နှစ်နီးပါးလောက် ကျောက်ဝိုင်းကို ပိတ်ထားတာပေါ့နော်။ ပိတ်ထားရတဲ့အခါမှာ ကျောက်သမားတွေရဲ့ စားဝတ်နေရေးကလည်း အခက်အခဲဖြစ် လာတာကိုတွေ့ရပါတယ်။ နောက်ပြီးကျတော့ ကျောက်ဝိုင်းကသာဖွင့်လှစ်ထားရတာပေါ့နော်။

 

တချို့ ကျောက်သမားတွေက ကျောက်ဝိုင်းရဲ့အပြင်ဘက်မှာရှိတဲ့ လမ်းတွေမှာ ဘုန်းကြီးကျောင်းတွေမှာ နောက်ပြီးကျတော့မြောင်းဘောင်တွေမှာဆိုရင်လည်းပဲသူတို့ရောင်းချနေကြတာတွေ့ရတယ်ပေါ့နော်။ ရောင်းချနေတဲ့အခါမှာလူအုပ်ပေါင်း တစ်ရာ၊နှစ်ရာမကဘူးပေါ့နော်။အဲ့ ဒီလူအုပ်တွေနဲ့ထောင်ဂဏန်းလောက်ထိ ရောင်းချနေကြတာကိုတွေ့ရတယ်။ တွေ့ရတဲ့အခါကျတော့လည်း သူတို့ကို mask တပ်ဖို့ hand gel ဆေးဖို့ social distancing နဲ့ကိုက်ညီအောင်ရောင်းချဖို့ဆိုတာဘယ်သူကမှ လမ်းညွန်မှုမပေးနိုင်ဘူး။ ဒါတွေကို တကယ်လို့ စည်ပင်ကနေပြီးတော့ အဲ့လိုရောင်းချဖို့လမ်းညွန်လိုက်မယ်ဆိုရင်လည်း သူတို့ကို တရားဝင်ခွင့်လွှတ်ထား သလိုခွင့်ပြုထားသလိုဖြစ်သွားမယ်။  ထူးခြားတာလေးတစ်ခုပြောရမယ်ဆိုရင် ဒီကျောက်ဝိုင်းတွေ ပြင်ပမှာ ဘုန်းကြီးကျောင်းတွေရဲ့ ဘေးမှာမြောင်း၊ချောင်းဘေးတွေမှာ သူတို့ လုပ်နေတာတွေဆိုရင် အလွန်အင်မတန် အန္တရယ်ကြီးပါတယ်။ ဒါတွေကိုမြို့တော်စည်ပင်ကလည်းတင်ပြထားတာရှိတယ်။ လမ်းဘေးဝဲယာမှာ ကျောက်ဝိုင်းက ကျောက်သမားတွေနဲ့စည်ကားနေတာကို ဝန်ကြီးချုပ်ကိုယ်တိုင်တွေ့ပါတယ်။ ဒါကြောင့်သူတို့အတွက်တော့ တစ်ခုခုစီစဉ်မှဖြစ်တော့မယ်ဆိုတာကို ဝန်ကြီးချုပ်ကသဘောထားရှိပါတယ်။” 

 

ကျောက်ဝိုင်းပြန်လည်ဖွင့်လှစ်ခွင့်ရပါက ပြန်ကျခင်းကျောက်ဝိုင်းကို မနက် ၅ နာရီမှ ၉ နာရီအထိ လည်းကောင်း၊ လွှာကျပ်လက်ကောက်ကို မနက် ၉ နာရီမှ ၁၂ နာရီအထိ ဖွင့်လှစ်လုပ်ကိုင်ဖို့စီစဉ်ထားပြီး ဖြတ်သွေးကိုတော့ တစ်နေကုန်ဆောင်ရွက်ဖို့ စီစဉ်ထားတယ်လို့ ကျောက်ဝိုင်းအကျိုးဆောင်များက ဆိုပါတယ်။ ယင်းကျောက်ဝိုင်းကြီး အတွင်းမှာဆိုရင်တော့ တရားဝင်ဆိုင်ခန်းပေါင်း ၁၁၁ ခန်းရှိပြီး ပြန်ကျဆိုင်ခန်းများကတော့ ၆၁၆ ခန်းအထိရှိကာ  ပုံမှန်ကာလများမှာဆိုပါက လူဦးရေက နေ့စဉ်သိန်းချီဝင်ရောက်ပြီး အရောင်း၊အဝယ် ပြုလုပ်နေကြတဲ့ ကျောက်ဈေးကွက်ကြီးတစ်ခုလည်း ဖြစ်ပါတယ်။

 

 

ကိုအောင်မှူး(မန္တလေး)

မန္တလေး၊ ဇန်နဝါရီ ၁၈ 

 

(  Zawgyi  )