【 ဆောင်းပါး 】“ပြည်သူနဲ့ အတူဆိုရင်………. ”

အလုပ်ကနေ အိမ်အပြန်တိုင်း ဘူတာရုံလမ်းကနေပြန်ရပါတယ်။အဲဒီနေရာရောက်တိုင်း စိတ်တော် တော်ညစ်ရပါတယ်။ ရထားလာတဲ့ အတွက် တံခါးပိတ်ထားချိန်မှာ သွားလို့ မရတဲ့ လမ်းဘက်ကကားတွေ  ဗဟိုလမ်းပေါ်ကို အတင်းတိုးပြီး ပိတ်ထားတာမျိုုး ခဏခဏ တွေ့ရပါတယ်။အဲဒီလို အခါမျိုးမှာ လမ်းဟို ဘက်ဒီဘက် အကုန်ပိတ်ကုန်ပြီး လိုင်းကားတွေ တက္ကစီတွေ ဆိုက်ကားတွေ ဒုက္ခရောက်ကုန်တော့ပါတယ်။ ကားလမ်းကို ပိတ်ထားတဲ့ ကားကတော့ အဲကွန်းဖွင့်ထားတဲ့ သူ့ကားထဲမှာ  တဟီးဟီးတဟားဟားနဲ့ သူတို့ မဟုတ်သလို။ ကိုယ်လည်း သွားမရ ဘယ်သူမှလည်း သွားလို့မရအောင်လုပ်တဲ့  အောက်တန်းကျတဲ့ ဒီလုပ်ရက်ကို ရှက်ရကောင်းမှန်းမသိတဲ့   ဒီလူတွေနဲ့  ဒီလိုလုပ်ရပ်တွေ ခဏခဏမြင်ရတဲ့အခါ ငါတို့တိုင်းပြည်မှာ   ဒီလိုလူတွေများနေလို့ ငါတို့ အခုလို ရှေ့တိုးမရ နောက်ဆုတ်မရ အခြေအနေဖြစ်နေတာလားလို့ တွေးမိပါတယ်။

 

 

 

လက်ရှိနိုင်ငံရေးအခြေအနေကို ဒီလိုဖြစ်နပါတယ်။ ဘာတစ်ခုမှ အားရစရာမရှိပါဘူး။ အရင်က အပြစ်ကျူး လွန်ခဲ့သူတွေကို ခွင့်လွှတ်ပေးထားရတယ်။ခိုးထားတဲ့သူတွေရဲ့ ခိုးရာပါပစ္စည်းတွေ ကို မထိ မပါး အောင် ဘောင်ဝင်အောင် လုပ်ပေးနေရတယ်။လူအခွင့်အရေးတွေ ယခင်ကထက် ဆုံးပါးလာတယ်။မီဒီယာ တွေလွတ်လပ်ခွင့် ဆုံးရှုံးလာတယ်။အရပ်ဘက်အဖွဲ့အစည်းတွေရဲ့ အခန်းကဏ္ဍ လျော့ပါးလာတယ်။ယခင်လိုဘဲ အများစုဟာ ကြပ်တည်းမှုတွေအောက်မှာ လူးလိမ့်နေရတုန်းပါဘဲ။

ဒီအခြေအနေတွေဟာ ဒီမိုကရက်တစ်တွေကို အစိုးရတစ်ရပ်ဖြစ်လာဖို့ မဲပေးတင်မြောက်ခဲ့သူတွေ လိုချင်တဲ့ အခြေအနေ မဟုတ်ပါဘူး။ လက်ရှိမှာ ယခင်ကထက် ပိုပြီး လုံခြုံမှု ကင်းမဲ့လာတယ်လို့  ပြည်သူတွေ ခံစားနေရတဲ့ အချိန်အခါဖြစ်နေပါတယ်။ နိုင်ငံရေး ၊လူမှုရေး၊အုပ်ချုပ်ရေးဆိုင်ရာမှာ ဘယ်လိုမှ ချိတ်ဆက်လုပ် နိုင်ဖို့ မလွယ်တဲ့ ၂၀၀၈ ဖွဲ့စည်းပုံနဲ့ သွားနေတဲ့ အရပ်သားအစိုးရလက်ထက်မှာ ဘာကိုမှ အကောင်းဘက်ကနေ မျှော်လင့်လို့မရဘဲ သံကန်လန့်ကာအောက်က နေရတဲ့ ဆိုဗီယက်ခေတ်က ရုရှားပြည်သူတွေ ခံစားရသလိုမျိုး ကျွန်တော်တို့ ပြီးခဲ့တဲ့ ၅နှစ်သက်တမ်းမှာ စိတ်မလုံမခြုံမှု ခံစားနေရတာအမှန်ပါဘဲ။

 

 

 

ဘာကြောင့်လဲ……။ဒီမေးခွန်းက အများစု မေးချင်ကြတဲ့ မေးခွန်းဖြစ်နေပါတယ်။အမှန်အတိုင်း ကျွန် တော်တို့ အားနာမှုတွေ ကြောက်ရွှံမှုတွေကို ခွာချပြီး သုံးသပ်ကြည့်မယ်ဆိုရင် အဖြေက ရှင်းရှင်း လေးပါ။ မြန်မာနိုင်ငံမှာ ပြဋ္ဌာန်းထားတဲ့ အရပ်ဘက် ဥပဒေအများစုက ပြည်သူတွေအတွက် ကောင်းမွန်တယ်လို့ ဆိုလို့ရပေမယ့် ဒီဥပဒေတွေဟာ အသက်ဝင်မှု နည်းပါတယ်။ ဒီအစား  ပြည်သူကို လှုပ်မရအောင်ချုပ်ထားနိုင်တဲ့ ဥပဒေတွေက အသက်ဝင်မှု အား အလွန် ကောင်းနေပါတယ်။

 

 

 

ဒီအဖြစ်တွေ မြင်တော့ ယနေ့ခေတ် မြောက်ကိုရီး ယား၊ဆီးရီးယား စတဲ တတိယကမ္ဘာနိုင်ငံတွေကို သွားမြင်မိပါတယ်။ တတိယကမ္ဘာနိုင်ငံတွေ ဖြစ်တဲ့  အာရှ၊အာဖရိက ၊လက်တင်အမေရိက စတဲ့မဖွံဖြိုးသေးတဲ့ အဲဒီနိုင်ငံတွေမှာ  လက်နက်ကိုင်အဖွဲ့အစည်းတွေ ၊အုပ်ချုပ်သူတွေဟာ ပြည်သူတွေကို ကုပ်ခွစီးထားပြီး ကျေးဇူး ရှင်သဖွယ် ပဒေသရာဇ်စနစ်အတိုင်း  ပြုမှုကျင့်ကြံကြပါတယ်။ဒါပေမယ့် ပြည်သူတွေက သူတို့ကို ဒီလိုမြင်နေ ပါတယ်လို့ ပြောလို့ မရသလို ပြောခဲ့ရင် အသက်တစ်ချောင်းဟာ သူတို့ အာဏာစက်ထဲမှာ လက်နက်တစ်လက် လောက်တောင် တန်ဖိုးမရှိပါဘူး။ဒါပေမယ့် သူတို့တွေက ပြည်သူကို အမြဲတမ်းကယ်တင်နေတဲ့သူ ၊ပြည်သူတွေ အတွက် ဒုက္ခ ဆင်းရဲ အမြဲခံပေး နေရတဲ့သူ၊ သမိုင်းအရ ပြည်သူ့အသက်အိုးအိမ်စည်းစိမ် တွေကို အသက်ပေး ကာကွယ် စောင့်ရှာက်ရတဲ့သူအဖြစ် ပြယုဂ်တွေနဲ့ မှိုင်းတိုက်လေ့ရှိပါတယ်။ လွတ်လပ်စွာ ပြောဆို ရေး သားနိုင်ခွင့်၊ လွတ်လပ်စွာ ဟောပြောခွင့် ဆိုတာတွေ အသာထား အာဏာရှင်တွေ အာဏာပိုင်တွေရှေ့မှာ နှာချေမိရင် တောင် အသတ်ခံရမယ့် အခြေအနေတွေပါ။ဒီအခြေအနေကို ကျွန်တော်တို့  ကြုံခဲ့ရဘူးပါတယ်။ မကြာသေးတဲ့ ဆယ်စုနှစ်တွေမှာပါ။ ဒါကို လက်မခံနိုင်လို့ အရပ်သားအစိုးရကို တင်မြှောက်ခဲ့တာပါ။

 

 

 

၂၀၀၈ ဖွဲစည်းပုံအခြေခံဥပဒေဘောင်အတွင်းက ကျင်းပတဲ့ ၂၀၁၂ ကြားဖြတ်ရွေးကောက်ပွဲနဲ့ ၂၀၁၅ ၊၂၀၂၀ အထွေထွေရွေးကောက်ပွဲတွေကို ဝင်ပြိုင်ပြီး အရပ်သားအစိုးရဖြစ်လာတဲ့ NLD လက်ထက်မှာ အများစု မျှော်မှန်းထားတာက ပြတ်သားတဲ့ ပါတီမူဝါဒတွေနဲ့ လျှင်မြန်ပြီး အဂတိတရားကင်းစင်တဲ့ အုပ်ချုပ်ရေး အာဏာစက် အမြန်အကောင်အထည်ဖော်လာလိမ့်မယ်ဆိုတဲ့ အထင်ဘဲဖြစ်ပါတယ်။ပြီးတော့ အစိုးရက ကြော်ငြာခဲ့တဲ့ ရင်ကြားစေ့ရေးကြောင့် အတော်လေး နားလည်မှု ရလာမယ်၊ တစ်ဖက်ကလည်း ပြည်သူကိုမျက်နှာမူပြီး ပြင်လာလိမ့်မယ်ဆိုတဲ့ အထင်တွေ ရှိခဲ့ပါတယ်။ အထူးသဖြင့် ပြည်တွင်းငြိမ်းချမ်းရေး အားကောင်းလာမယ်ဆိုတဲ့ အယူအဆပါဘဲ။ ဒါပေမယ့် ထင်ထားသမျှ အကုန်လွဲခဲ့ပါတယ်။ 

 

 

 

ဒီလိုပါဘဲ လွှတ်တော်ထဲမှာလည်း ရှုံးနိမ့်သွားတဲ့ ပါတီကိုက အားကောင်းတဲ့ အတိုက်အခံ ၊ပြည်သူတွေရဲ့ အကျိုးစီးပွား ကြည့်ပြီး လွှတ်တော်ထဲမှာ ချက်ကျလက်ကျ ထောက်ပြနိုင်တဲ့ အာဏာရ ပါတီက ထိန်းချုပ်ထားတဲ့ အစိုးရအဖွဲ့ ကို လမ်းမချော်အောင် ထောက်ပြနိုင်တဲ့ အတိုက်အခံဖြစ်လာလိမ်မယ်လို့ ယူဆထား ကြပါတယ်။ အတိုက်အခံနဲ့  အဏာရ ပါတီကြား ရင့်ကျက်တဲ့ ယှဉ်ပြိုင်မှုကို မြင်ရလိမ့်မယ်လို့ မျှော်မှန်းထားကြပါတယ်။ ဒါလည်းထင်ထားသမျှ လွဲခဲ့ပါတယ်။ 

လက်တွေ့မှာ အရပ်သားအစိုးရသက်တမ်းတစ်ခုကနေ နောက်သက်တမ်းတစ်ခုကိုကူးပါတော့မယ်။ ဒါပေမယ့် ရင်ကြားစေ့ရေးမှာ တစ်ဘက်အဖွဲ့က ပျော့ပျောင်းသလောက် တစ်ဘက်က  ပိုပြီးတင်းတင်းမာမာ ပြောနေ ဆိုနေတာတွေ၊ မိုက်ကြေးခွဲနေတာတွေကို မြင်နေရသလို တိုင်းရင်းသားလက်နက်ကိုင်အဖွဲ့တွေက ပိုပြီးသာတိုးလာခဲ့ပါတယ်။ ပြည်သူတွေ ထင်ထားသမျှ မဖြစ်လာခဲ့ပါဘူး။ တက်တက်စင်အောင် လွဲခဲ့ပါတယ်။ 

 

 

 

ပွင့်ပွင့်လင်းလင်း ပြောရရင် အရပ်သားအစိုးရလက်ထက်မှာ အစိုးရရဲ့ သြဇာအာဏာ လျော့ကျ လာခဲ့ တယ်ဆိုတာ ငြင်းလို့ မရခဲ့ပါဘူး။ ဘယ်သူက အစိုးရလဲဆိုတာကို ဝေခွဲမရနိုင်အောင် ဒီလိုစင်ပြိုင်သဘောမျိုး ပြောဆိုလုပ် ဆောင်လာတာတွေကို  ပြည်သူက ဒီလိုလုပ်တဲ့ ဖြစ်ချင်တာဖြစ် ပြတ်ပြတ်သားသား ကိုင်တွယ်စေချင်နေပါတယ်။ ဒီလိုလုပ်လာရင်လည်း အရပ်သားအစိုးရနောက်က ပြည်သူအများစုက မားမားမတ်မတ်ရပ်ဖို့ အသင့်အနေအထား ရှိခဲ့ပါတယ်။ ဒါကို မြင်သာချင်ရင် ပြီးခဲ့တဲ့ ရွေးကောက်ပွဲ အခင်းအကျင်းကို ကြည့်ရင်မြင် ပါလိမ်မယ့် ။ 

 

 

 

အရပ်သားအစိုးရလက်ထက် နောက်ပိုင်းနှစ်တွေမှာ နေ့စဉ်ဖြစ်ပွားနေတဲ့ လုယက် သတ်ဖြတ်မှု တွေ၊ဖမ်းမိလို့ မကုန်နိုင်တဲ့ မူးယစ်ဆေးဝါးတွေ၊ယခင်လိုဘဲ အာဏစက်ပြင်းနေတဲ့ အာဏာရှင် ဟောင်း တွေ။ဒါတွေကို နေ့စဉ်တွေ့လာရတဲ့အခါ  ပြည်သူတွေ စိတ်ထဲ အကြောက်တရားပြန်ဖြစ်လာသလို   အာဏာရှင်တွေက ငါတို့ကို နှစ်ပေါက်တစ် ပေါက် ရိုက်လိုက်ပြီဆိုတဲ့ စိတ်ခံစားမှုက ဖြစ်လာခဲ့တာတွေလည်းရှိပါတယ်။ အရပ်သားအစိုးရကို လည်း တခြားသောအစိုးရများနည်းတူ အာဏာစက်ပိုပြင်းတဲ့ အဖွဲ့အစည်းတွေကို ပိုင်ပိုင်နိုင်နိုင်ကိုင်တွယ် ထားနိုင်တဲ့ အစိုးရမျိုးဖြစ်စေချင်ကြပါတယ်။ 

 

 

ဒါပေမယ့် ဒါတွေ အားလုံးကို လုပ်မရအောင် တားဆီးထားမှုတွေ ရှိပါတယ်။  ဒါဟာ  ၂၀၀၈ ဖွဲစည်းပုံအခြေခံဥပဒေ အရ ဘာပဲ။ ၂၀၀၈ ဖွဲ့စည်းပုံ အခြေခံ ဥပဒေက ဒီမိုကရေစီစနစ်စစ်စစ်ကို သွားမယ်ဆိုရင် မဖြစ်နိုင်အောင် ခက်ခဲထားတာတွေ ပိတ်ဆို့ ထားတာတွေ အများကြီး ရှိနေပါတယ်။ ဘယ်လောက်တောင် တလွဲတစ်ချော်ဖြစ်နေသလဲဆိုတာကို ဒီအချက်တွေကိုကြည့်ရင် သိနိုင်ပါ တယ်။ ယခု အမျိုးသားရေးအမည်ခံတွေက လက်ရှိ ပြည်ထောင်စုဝန်ကြီးကို နူတ်ထွက်ပေးဖို့ တောင်းဆိုတာမျိုးတွေ၊ ပမာဏ ကြီးမားတဲ့ မူးယစ်ဆေးဝါးဖမ်းမိတာတွေ၊ ရုပ်ပျက်ဆင်းပျက်နိုင်လွန်းတဲ့  အလွဲသုံးစားမှုတွေ၊ အစိုးရကို လမ်းဘေးက သာသာတွေက စော်ကားနေတာမှာ အရေးယူဖို့ ခက်ခဲနေတာတွေကိုကြည့်ရင် သိသာပါတယ်။ 

 

 

 

ဒါတွေ အားလုံးက  စဉ်းစားကြည့်ရင့် ဘာကြောင့်ဆိုတာကို တွေ့ပါလိမ့်မယ်။တစ်ချိန်တုန်းက တုပ်တုပ် မှ မလှုပ်အောင် အာဏာစက်ပြင်းတဲ့ သူတွေ/ရာထူးပါဝါရှိတဲ့သူတွေကို ဝေဖန်လို့ရ ယခု ရလား/မရလားဆိုတာကို ကြည့်ရင် သိပါလိမ့်မယ်။ဒီလိုပါဘဲ ဝေဖန်လိုရခဲ့ရင်လည်း အားနည်းချက်ကို ထောက် ပြလို့ ရမှာမဟုတ်ဘဲ ချီးမွမ်းတာတွေ အောင်မြင်တာတွေကိုသာ ရေးတာမျိုး ပြောတာမျိုးသာ ဖြစ်ပါလိမ့်မယ်။

လက်ရှိမှာ နိုင်ငံကို တည်ငြိမ်တိုးတက်အောင်လုပ်နေတဲ့နေရာမှာ ဗာဟီရတွေနဲ့ အချိန်ကုန်နေတဲ့ သူတွေ၊ ချီးကသေးကစပြီး အထအနကောက်ပြီး တရားတဘောင်လုပ်တဲ့သူတွေ ၊မင်း သားကြီး မကရရင် ပတ်မကြီးထိုး ဖောက်မယ်ဆိုတဲ့သူတွေ ၊ဗလတပြတပြနဲ့ လုပ်လိုက်ရမလားဆိုပြီး ခဏခဏခြိမ်းခြောက်တဲ့သူတွေ ၊ငါလည်းမသွားရရင် မင်းလည်းမသွားရဘူးဆိုပြီး ကန့်လန့်တိုက်နေတဲ့သူတွေ တစ်ကယ်ကော ဘယ်သူအတွက် စဉ်းစားပြီးလုပ်နေတာလဲဆိုတာ ပြည်သူတွေက စဉ်းစားနေကြပါတယ်။

 

 

 

လက်ရှိမှာ ပြန်လည်ရင်ကြားစေ့ရေးဆိုတာ ရှိသင့်ပေမယ့် ယခင်အာဏာရှင်တွေ အဲဒီဘက်ကလူတွေ ဘာလုပ်လုပ်နူတ်ဆိတ်နေရမယ့် ဆိုတဲ့ သဘောကတော့ သိပ်အလုပ်မဖြစ်သလို အခွင့်ထူးခံပေးနေသလို ဖြစ် နေခဲ့ပါတယ်။ဒါအပြင် အာဏာရပါတီရော၊အာဏာမရပါတီရော၊မျိုးချစ်ရော၊မျိုးမချစ်ရော ပြည်သူတွေဝေဖန်ရင် ပြည်သူတွေထောက်ပြရင် တရားတဘောင်လုပ်တာတွေ တရားစွဲတာတွေ ဒါတွေကို အစိုးရက မတားဆီးရင် ၊ မကာကွယ်ပေးနိုင်ရင်  ပြည်သူတွေ စိတ်ထဲ နိုင်ငံရေးမှာ အရပ်သားအစိုးရအပေါ် အားကိုးရာမဲ့စေပါတယ်။ အုပ်ချုပ်သူတွေ အာဏာပိုင်တွေကို ရွံ့မုန်းစေပါတယ်။ဒါမျိုးတွေ များ လာရင် ပြည်သူက ဖယ်ကြဉ်လာပါလိမ့်မယ်။ ဒါမျိုးဖြစ်လာအောင် ဘယ်သူကပုံဖော်နေသလဲ ဆိုတာ ရှင်းရှင်းလင်းလင်းသိသင့်ပါတယ်။ 

 

 

 

ပြည်သူနှင့်အတူဆိုတာ ကောင်းပါတယ်။ဒါပေမယ့် မူဝါဒတွေ အကောင် အထည်ဖော်မယ်ဆိုရင် ပြည်သူနဲ့အတူမရပ်တည်ခဲ့တဲ့ သူတွေကို ဘယ်လိုအရေးယူသင့်တယ်ဆိုတာကိုလည်း ၂၀၂၀ နောက်ပိုင်း အစိုးရသက်တမ်းသစ်မှာ ဦးစားပေးထည့်သွင်းစဉ်းစားရတော့မှာ ဖြစ်ပါတယ်။ ဒီလိုအရေးယူရာမှာလည်း ရင်ကြားစေ့ရေးကို အခြေခံပြီး  ယခင်လူတွေတော့ ကင်းလွတ်စေဆိုတာတော့ မဖြစ်သင့်ပါ ဘူး။ခံစရာရှိတိုင်း ပြည်သူတွေဘဲ ခံခံနေရတာ  နှစ်ပေါင်း ရာချီနေပြီ ထင်ပါတယ်။ လာမယ့် ၅ နှစ် ပြည်သူနဲ့ အတူဆိုတဲ့ အစိုးရဖြစ်ဖို့ဆိုရင်  အနည်းဆုံးတော့ ပြည်သူနဲ့ တစ်သားတည်း ရပ်တည်ကြောင်း ပြဖို့ ၊ လုပ်သင့်လုပ်ထိုက်တာကို လုပ်ပြရဲဖို့ တော့ လိုပါတယ်။

 

 

 

မောင်ဦးလွင်

 

 

( Zawgyi  )