【 တစ်ပတ်အတွင်းနိုင်ငံတကာသတင်းသုံးသပ်ချက် 】ပူတင်နေဝင်ချိန် ရောက်လာပြီလား

ဒီတစ်ပတ်မှာ စိတ်ဝင်စားစရာ နိုင်ငံတကာသတင်းတွေ ဆက်တိုက်ဆိုသလို ဖြစ်ခဲ့ပါတယ်။ ဗြိတိန်ဘုရင်မ အဲလိဇဘက် ၂ ကွယ်လွန်ခဲ့တဲ့ သတင်းရှိခဲ့သလို ဗြိတိန်မှာ ထူးခြားတဲ့ နိုင်ငံရေးအပြောင်းအလဲတွေ ဆက်တိုက်ဖြစ်ခဲ့ပါတယ်။ ယခင်ဝန်ကြီးချုပ် ဘောရစ်ဂျွန်ဆင်နေရာမှာ ဆက်ခံမယ့်သူအဖြစ် ဘဏ္ဍာရေးဝန်ကြီး ဆူနပ်ခ် သတင်းကြီးနေရာကနေ နိုင်ငံခြားရေးဝန်ကြီး လစ်ထရပ်ဇ်က ကပ်နိုင်ပြီး ဝန်ကြီးချုပ်ဖြစ်လာခဲ့တာလည်း ရှိခဲ့ပါတယ်။ ရုရှားရဲ့ စွမ်းအင်ပိတ်ဆို့မှုကြောင့် ဥရောပမှာ စွမ်းအင်အကျပ်အတည်းစခဲ့သလို ကမ္ဘာ့ရေနံ၊ဓာတ်ငွေ့စျေးတွေလဲ ကြီးမြင့်ခဲ့ပါတယ်။ ဒါပေမယ့် ဒီသတင်းတွေကို တစ်ကမ္ဘာလုံး စိတ်ဝင်စားနေတဲ့ ယူကရိန်းကို ရုရှားကျူးကျော်မှု စစ်ပွဲ အလှည့်အပြောင်းသတင်းတွေ လွှမ်းမိုးသွားခဲ့ပါတယ်။

ဒီအလှည့်အပြောင်းက စိတ်ဝင်စားစရာပါ။ ကမ္ဘာ့စစ်အင်အားကြီးနိုင်ငံတွေထဲမှာ တတိယမြောက် နေ ရာမှာရှိတဲ့ နိုင်ငံကြီးတစ်ခုရဲ့စစ်တပ်ဟာ သူ့ ထက်အင်အားနည်းတဲ့ နိုင်ငံကနေ  ဒရောသောပါး ဆုတ်ခွာနေရတယ် ဆိုတာ ဖြစ်တောင့်ဖြစ်ခဲပါဘဲ ။  ယူကရိန်းထိုးစစ်သတင်းတွေနဲ့၊ ရုရှားတပ်ဖွဲ့ တွေ ပိတ်မိနေတယ် ဆိုတဲ့ သတင်း တွေကိုကြည့်ရင် ဒီဖြစ်တောင်ဖြစ်ခဲ အဖြစ်အပျက်ဆီကို ဦးတည်လာနေတာကို ထင်ထင်ရှားရှား တွေ့နေရပါ တယ်။

ရုရှားခေါင်းဆောင်ပူတင်အနေနဲ့ ဒီလို ယူကရိန်းစစ်မှာ ထိခိုက်မှုတွေ ၊ရှုံးနိမ့်မှုတွေ များလာနေတာဟာ ပြည်တွင်းက သူ့ကိုဆန့်ကျင်မှုတိုက်ခိုက်နေသူတွေကို အားကောင်းစေပါတယ်။ ယခုအပတ်ကုန်မှာ  ဒူးမားလွှတ်တော်ကိုယ်စားလှယ်တွေကို ပူတင်ကို နိုင်ငံသစ္စာဖောက်မှုနဲ့ တရားစွဲဖို့ တောင်းဆိုမှု ဖြစ်ခဲ့ပါတယ်။  

ပူတင်ရဲ့ဇာတိမြို့ဖြစ်တဲ့ စိန့်ပီတာစဘတ်မှ မြူနီစပယ်ကိုယ်စားလှယ် အများအပြားဟာ   ဒီတစ်ပတ်မှာ ပူတင်ကို နိုင်ငံတော်သစ္စာဖောက်မှုဖြင့် တရားစွဲဖို့ ဒူးမားလွှတ်တော်ကို တောင်းဆိုခဲ့ပါတယ်။ သတင်းထဲမှာဆိုရင် ပူတင်ကို ရာထူးကနေ ညင်သာစွာ ထွက်ပေးဖို့ အိတ်ဖွင့်ပေးစာပေးပြီးတောင်းဆိုခဲ့တာ ဖြစ်ပြီး  ပူတင်ရဲ့ လက်စ လက်န ကိုတောင် ဂရုမစိုက်ဘဲ ပွင့်ပွင့်လင်းလင်း တောင်းဆိုတဲ့ ဒီဂယက်ကြောင့် ရုရှားမှာ ပူတင်အပေါ် လူကြိက်  နည်းမှုက သိသိသာသာဖြစ်လာနေတဲ့ သဘောဖြစ်နေပါတယ်။ စာထဲမှာဆိုရင် ပူတင်ဟာ အလွဲလွဲအမှား မှားတွေ လုပ်နေပြီး ရုရှားကို ကမ္ဘာ့က နူကလီးယားလက်နက်နဲ့ ခြိမ်းခြောက်နေတဲ့နိုင်ငံအဖြစ်မြင်စေတယ်ဆိုပြီး ဖော်ပြခဲ့တာကိုတွေ့ရပါတယ်။

တကယ်တော့ ပူတင်အနေနဲ့ ပြည်တွင်းချည်းမှာသာ အတိုက်အခံတွေနဲ့ ကြုံနေရတာမဟုတ်ပါဘူး။ ယူက ရိန်းကို ဆင်နွဲနေတဲ့ ကျူးကျော်စစ်ကြောင့် နိုင်ငံတကာကလည်း  ရုရှားကို ဖယ်ကျဉ်ထားလို့ အတော်လေးကို သံ တမန်ရေးရာမှာ သိသိသာသာမြင်သာထင်သာရှိခဲ့ပါတယ်။ ပြီးခဲ့တဲ့ တနင်္လာနေ့က ကျင်းပတဲ့ ရော့စတော့ ညီလာခံ မှာဆိုရင် ယခင် နှစ်တွေက ထိပ်တန်းခေါင်းဆောင်တွေ တက်ရောက်လေ့ရှိပေမယ့် ဒီနှစ်မှာ အိမ်နီးချင်း တရုတ်က ထိပ်တန်းလွှတ်တော်အမတ်ကိုသာစေလွှတ်ခဲ့ပါတယ်။ ဒါကို ကြည့်ရင် ပူတင်အနေနဲ့ သံတမန်ရေးရာမှ အတော် လေးကို  အထိနာနေတာကိုတွေ့ရပါတယ်။ ဒီတစ်ပတ်မှာ ဥရောပသမဂ္ဂက ရုရှားရေနံနဲ့ ဓာတ်ငွေ့ရောင်းချမှုကို စျေးနူန်း ကန့် သတ်မှုဟာ အတော်လေးကို လှုပ်လှုပ်ခတ်ခတ်ဖြစ်လာနေတာကိုတွေ့ရပြီး ဥရောပနိုင်ငံတွေက လက်ခံနေ ကြတာကိုတွေ့ရပါတယ်။စွမ်းအင်ရောင်းချခြင်းကနေ အဓိကနိုင်ငံခြားဝင်ငွေရနေတဲ့ ရုရှားအတွက် ဒီကန့်သတ် ချက်ဟာ ပိတ်ဆို့မှုများစွာကြောင့် အထိနာနေတဲ့ ရုရှားစီးပွားရေးကို ထပ်ထိုးနှက်သလို ဖြစ်စေမှာ သေချာနေပါ တယ်။      

ဒီတစ်ပတ်မှာ ယူကရိန်းစစ်ပွဲအလှည့်အပြောင်းက ကမ္ဘာ့သတင်းတွေရဲ့ ထိပ်တန်းသတင်းဖြစ်ခဲ့ပါတယ်။ အမေရိကန်ဦးဆောင်တဲ့ အနောက်အုပ်စုရဲ့ စစ်လက်နက်ထောက်ပံ့မှုက ရုရှားကျူးကျော်စစ်ကို အဖြေတမျိုးတဖုံ ပြောင်းလဲလာဖို့ အကြောင်းဖန်လာနေပြီ ဖြစ်ပါတယ်။ ပြီးခဲ့တဲ့ အပတ်မှာ ယူကရိန်းသမ္မတက စစ်နဲ့ ပတ်သက်ပြီး မပြောခဲ့ပေမယ့် သမ္မတအကြံပေးဆိုသူက သတင်းကောင်းပြောမယ်ထင်တာဆိုတဲ့ စကားအရိက်အမြွက် သန်းမှု ဟာ ဒီတစ်ပတ်မှာ ဘာကိုဆိုလိုလဲဆိုတာ အဖြေထွက်လာခဲ့ပါတယ်။ ယူကရိန်းပြည်သူတွေရဲ့ ကြံ့ကြံ့ခံ ခုခံမှုတွေ ကြောင့် ရုရှားထိုးစစ်တန့်သွားခဲ့မှုဟာ ယခု စစ်လက်နက်နဲ့ ဘဏ္ဍာရေးအကူအညီတွေ တရစပ်ပေးနေတဲ့ နေတိုး အဖွဲ့ဝင်နိုင်ငံတွေကြောင့် ယူကရိန်းဘက်ကနေ ယခုအခါ ပြန်လှန်ထိုးစစ်ဆင်နွဲနိုင်တဲ့ အနေအထားထိကိုရောက် လာခဲ့ပြီ ဖြစ်ပါတယ်။

စက်တင်ဘာ ၈ ရက်မှာ ကိယက်ဗ်ကို သွားရောက်ခဲ့တဲ့ အမေရိကန်နိုင်ငံခြားရေးဝန်ကြီးရဲ့ခရီးမှာ ဘလင် ကန်က ယူကရိန်းတောင်ပိုင်းနဲ့ အရှေ့ပိုင်းရှိ ရုရှားတပ်တွေကို ပြန်တိုက်ထုတ်ဖို့ ရည်ရွယ်ထားတဲ့ ယူကရိန်းရဲ့ တန် ပြန်ထိုးစစ်ကို အားကောင်းလာစေဖို့အတွက် အသစ်စက်စက် လုံခြုံရေးအကူအညီ ဒေါ်လာ ၂ ဘီလီယံ ပေးအပ်ဖို့ ကတိပြုခဲ့ပါတယ်။ဒါဟာ ရုရှားက ထပ်ခါတလဲလဲစွပ်စွဲနေသလို စစ်ထဲ ပါဖို့ တဲတဲလေးသာ ရှိတော့တဲ့အနေအထား ပါ။ ဒီအနေအထားကို အမေရိကန်က ရအောင်ထိန်းပြီး ရုရှားကိုအမှည်ခြွေနေတဲ့စစ်ပွဲမှာ ယူကရိန်းဘက်က တောင်းသမျှ စစ်လက်နက်နဲ့ ဘဏ္ဍာရေးအကူအညီကို ပေးနေတာဟာ ပူတင်အတွက် အခံရခက်စေသလို မမျှော် လင့်ထားခဲ့တဲ့ နည်းဗျူဟာလည်း ဖြစ်နေခဲ့ပါတယ်။

ယူကရိန်းတန်ပြန်ထိုးစစ်စနိုင်အောင် အမေရိကန်နဲ့ အနောက်အုပ်စုက အရေးပါတဲ့ ထောက်ပို့ကဏ္ဍမှာ ရှိနေချိန်မှာ ရုရှားကတော့ ပြုန်းတီးသွားတဲ့ စစ်လက်နက် လိုအပ်ချက်ကိုဖြည့်ဆည်းဖို့ မြောက်ကိုရီးယားလို့နိုင်ငံဆီ ကနေ ဝယ်နေရတဲ့အထိ ဖြစ်ခဲ့ပါတယ်။ ဒီတစ်ပတ်မှာ အမေရိကန်က ရုရှားစစ်ပွဲထဲမှပါဝင်နေတဲ့ အီရန်ဒရုန်းတွေ ကြောင့် အီရန်ဒရုန်းကုမ္ပဏီကို ပိတ်ဆို့မှု ချမှတ်ခဲ့ပါတယ်။ ဒီအတွက် အီရန်ဘက်က ထုံးစံအတိုင်းငြင်းဆိုခဲ့တာ တွေရှိခဲ့ပေမယ့် ပင်တဂွန်ကထုတ်ပြန်မှုမှာတော့ ပြီးခဲ့တဲ့လက ရုရှားရဲ့ အီရန်လုပ် ဒရုန်းတွေ အများအပြား ပျက်စီး ခဲ့တယ်လို့ ထုတ်ပြန်ခဲ့ပြီး ရုရှားဟာ  အီရန်ဆီကနေ မိုဟာဂျာ ၆ နဲ့ ရှိဟိဒ် စီးရီးထဲက မောင်းသူမဲ့လေယာဉ် (UAV) တွေ ရာနဲ့ချီဝယ်ဖို့ စီစဉ်ထားနိုင်တယ်ပါတယ်။ ရုရှားအနေနဲ့ ယူကရိန်းမှာ ပြုန်းတီးခဲ့တဲ့ တပ်ဖွဲ့ဝင်အင်အားဖြည့် ဆည်းဖို့ ပြည်တွင်းမှာစုဆောင်း ရာမှာ အခက်တွေ့နေတာကိုလည်း တွေ့ရပါတယ်။ ဒါအပြင် အနောက်နိုင်ငံတွေရဲ့ ပိတ်ဆို့အရေးယူမှုတွေဟာ ယူကရိန်းမှာ ပျက်စီးသွားတဲ့ မော်တော်ကားတွေနဲ့ လက်နက်တွေကို အစားထိုးဖို့ ရုရှားရဲ့အစွမ်းအစကို ကန့်သတ်ထားသလိုလည်း ဖြစ်နေခဲ့ပါတယ်။

ဒီလို အခက်အခဲအကျပ်အတည်းတွေကြောင့် ယူကရိန်းတောင်ပိုင်းနဲ့ အရှေ့ပိုင်းမှာ ထိုးစစ်က တန့်သွားခဲ့ တာလည်းဖြစ်ပါတယ်။ မကြာသေးမီက ကျူးကျော်မှု အစောပိုင်းကတည်းက ရုရှားသိမ်းပိုက်ထားတဲ့ ခါဆွန်ဒေသ အပါအဝင် နေရာအများအပြားမှာ ယူကရိန်းက တန်ပြန်ထိုးစစ်တွေ စတင်ခဲ့ပါတယ်။ဒီလိုထိုးစစ်မစတင်က တည်း က ယူကရိန်းတပ်ဖွဲ့တွေဟာ ကြိုတင်ပြင်ဆင်မှုအနေနဲ့ အမေရိကန်ဆီက ထောက်ပံ့တဲ့ HIMARS တွေနဲ့ အမြောက် နဲ့  ခဲယမ်းမီးကျောက်တွေ သိုလှောင်ထားတဲ့ ရုရှားထောက်ပံ့ရေးနယ်မြေတွေကိုတိုက်ခိုက်ခဲ့လို့ အထိနာခဲ့ပါတယ်။

ဒါကြောင့် ရုရှားတပ်ဖွဲ့တွေဟာ ယူကရိန်းထိုးစစ်ကြောင့် အံအားသင့်ခဲ့ရပြီး အလျင်အမြန်ဆုတ်ခွာရသလို ရုရှားတီဗွီတွေက စစ်ကူလာပြီဆိုပြီး စစ်ယာဉ်တန်းတွေလာနေတာကိုပြရတဲ့အထိ စိတ်ဓာတ်ပိုင်းဆိုင်ရာပါပျက် ပြားခဲ့ပါတယ်။ ယူကရိန်းစစ်တပ် အကြီးအကဲကတော့ ၎င်း၏တပ်ဖွဲ့တွေ တန်ပြန်ထိုးစစ်စတင်တဲ့ စက်တင်ဘာလ အစောပိုင်းကနေ ယခုထိ စတုရန်းကီလိုမီတာ ၃၀၀၀ ခန့်ကို ပြန်လည်သိမ်းပိုက်နိုင်ခဲ့တယ်လို့ ပြောခဲ့ပါတယ်။ ဒီ ပြောဆိုချက်ထဲမှာ ယူကရိန်းတပ်တွေဟာ ရုရှားနယ်စပ်ကနေ  ကီလိုမီတာ ၅၀ သာ ကွာဝေးတဲ့ နေရာအထိ ရောက်လာနေပြီ ဆိုပါတယ်။

တန်ပြန်ထိုးစစ်ကြောင့် ရုရှားဘက်က ဆုံးရှုံးမှုကိုပြန်ကြည့်မယ်ဆိုရင် ခါကိဗ့်ဒေသရဲ့ အဓိကခံတပ်ကို စွန့်လွှတ်လိုက်ရသလို့ ကရင်မလင်ကနေ တိုက်ရိုက်ထောက်ပို့တဲ့ ထောက်ပံ့ပို့ဆောင်ရေး အချက်အချာနေရာဖြစ် တဲ့ အစ်ဇီယံမြို့ကိုပါ ဆုံးရှုံးခဲ့ရပါတယ်။ ဒါဟာ ယူကရိန်းကို စကျူးကျော်ခဲ့ကတည်းက ရုရှားအတွက် အဆိုးရွားဆုံး သော ရှုံးနိမ့်မှုများထဲမှ တစ်ခုဖြစ်ခဲ့ပါတယ်။ ယူကရိန်းတပ်ဖွဲ့တွေက ခါကိဗ့်ဒေသက လူနေအခြေချတဲ့ ဒေသ၄၀ ကျော်ကို ပြန်သိမ်းခဲ့တယ်လို့ ခါကိဗ့်ပြည်နယ်အုပ်ချုပ်ရေးမှူးကဆိုပါတယ်။ ရုရှားတပ်ဖွဲ့တွေ အင်အားသင့်စေတဲ့ အရာက ယူကရိန်းတပ်တွေ လျင်မြန်စွာတပ်ရွေ့ခဲ့တာကိုပါ။ ဒီလိုတပ်ရွေ့တာမြန်တဲ့အတွက်  ရုရှားတပ်တွေ အလျင်အမြန်ဆုတ်ခွာခဲ့ရလို လက်နက်နှင့် ခဲယမ်းမီးကျောက် အများအပြား ကျန်ခဲ့ရပါတယ်။

ယူကရိန်းတန်ပြန်ထိုးစစ်က ခါကိဗ်ဒေသမြောက်ပိုင်းသို့ ဦးတည်နေပါတယ်။ ရုရှားတပ်တွေကတော့ ယူကရိန်းအခြေခံအဆောက်အဦးလမ်းတံတားနဲ့ မြို့တွေက အရပ်သားပစ်မှတ်တွေကို ပစ်ခတ်မှုတွေ ပိုလုပ်လာ တယ်လို့ ဆိုပါတယ်။ အထူးသဖြင့် ဇာနိုဟီးယားနူကလီးယားဓာတ်အားပေးစက်ရုံကို ပိတ်ပစ်ရတဲ့အထိ ပစ်ခတ် မှုတွေက စိုးရိမ်စရာဖြစ်လာနေပါတယ်။ ရုရှားဘက်ကတော့ ထုံးစံအတိုင်း အရပ်သားပစ်မှတ်တွေကို ပစ်ခတ် တယ်ဆိုတာကို ငြင်းဆိုခဲ့ပြီး အစ်ဇီယံမြို့ကနေ ဆုတ်ခွာရတာကိုတောင် အစီအစဉ်အရဆောင်ရွက်ခဲ့တယ်ဆိုပြီး ဖော်ပြခဲ့တာကိုလည်းတွေ့ရပါတယ်။

ယူကရိန်းတန်ပြန်ထိုးစစ်နောက်မှာ အနောက်အုပ်စုကရှိနေတဲ့အတွက် ဒါဟာ ပူတင်အတွက် ကောင်းတဲ့ အလားအလာတော့မဟုတ်ပါဘူး။ ပြည်တွင်းမှာလည်း အတိုက်အခံစုဖွဲ့မှုက အတွင်းကနေ ဖြစ်နေတာဖြစ်လို့ ပူတင်ကိုဖယ်ရှားရေးအားကောင်း၊မကောင်းဆိုတာ ယူကရိန်းထိုးစစ်အောင်မြင်မှုပေါ် အများကြီးမူတည်နေပါ တယ်။  နိုင်ငံတကာသတင်းသုံးသပ်မှုတွေမှာတော့ ယူကရိန်းမှာသာ ရုရှားရှုံးနိမ့်ခဲ့မယ်ဆိုရင်  ဒါဟာ ပူတင်ရှုံးနိမ်မှု အဖြစ် ပြောင်းလဲဖို့ ရုရှားပြည်တွင်းက အင်အားစုက ပြောင်းလဲဖို့ ကြိုးစားမှာ ဖြစ်သလို အနောက်အုပ်စုကလည်း လက်ခံပေးနိုင်တယ်ဆိုတဲ့ သုံးသပ်ချက်ကပေါ်ထွက်နေပါတယ်။

ဒီလို အခြေအနေတွေအရ ပူတင်အနေနဲ့ ယူကရိန်းမှာသာ ရှုံးနိမ့်ဖို့ သေချာလာရင် ကမ္ဘာ့ကြီးကို နူကလီး ယားစစ်ပွဲထဲ အပါခေါ်သွားဖို့ ဆိုတာ ဖြစ်လာနိုင်ချေရှိနေတဲ့ အနေအထားဖြစ်နေပါတယ်။ ဒီအတွက် ပူတင်ရဲ့ နိဂုံး လား၊ ရုရှားရဲ့နိဂုံးလား။ ကမ္ဘာကြီးရဲ့နိဂုံးလားဆိုတာ ရင်တမမစောင့်ကြည့်ရတော့မှာ ဖြစ်ပါတယ်။

ဒီတစ်ပတ်မှာ ဒီလိုသတင်းတွေအပြင် ကမ္ဘာ့သတင်းမီဒီယာတွေမှာ ထိပ်တန်းဖြစ်ခဲ့တဲ့ ဗြိတိန်ဘုရင်မကြီး အဲလိဇဘက် ၂ သေဆုံးတဲ့သတင်း၊ မြောက်ကိုရီးယားက နူကလီးယားလက်နက်စွန့်လွှတ်ဖို့မရှိဘူးလို့ပြောခဲ့တဲ့ သတင်း၊ ရန်ပြုလာနိုင်ရင် နျူကလီးယားလက်နက်ကို ဦးစွာ အသုံးပြုနိုင်မယ့် ဥပဒေသစ်ကို မြောက်ကိုရီးယား က အတည်ပြုလိုက်တဲ့သတင်း၊ ဂိုဂရာ-ဟော့စပရင်းမှ တရုတ်နဲ့ အိန္ဒိယ တပ်တွေ ဆိုင်ထားတာကို ရုတ်သိမ်းလိုက်ကြ တဲ့သတင်း၊ ပါပူဝါနယူးဂီနီမှာ ပြင်းအား ၇.၆ အဆင့်ရှိတဲ့ငလျင်လှုပ်ခတ်ခဲ့တဲ့သတင်း၊ တရုတ်ကွန်မြူနစ်ပါတီ ဖွဲ့စည်းပုံပြင်ဆင်မယ်လို အကြိမ် ၂၀ မြောက် ကွန်ဂရက်မှာဆုံးဖြတ်ခဲ့တဲ့သတင်း၊ ဆော်လမွန်ကျွန်းရွေးကောက်ပွဲ ကို ရွှေ့ဆိုင်းလိုက်တဲ့သတင်း၊ ဟေတီမှာ  ကုန်ဈေးနှုန်းမြင့်တက်လို့ ပြည်သူများ ဆန္ဒပြတဲ့သတင်း၊ အင်ဒိုနီးရှားမှာ လောင်စာဆီဈေးနှုန်းကျဆင်းရေးအတွက် ပြည်သူတွေ ဆန္ဒပြတဲ့သတင်း၊ ဂျပန်ဝန်ကြီးချုပ်က လွတ်လပ်ပွင့်လင်း တဲ့ အင်ဒို-ပစိဖိတ်ဒေသကို အတူအကောင်အထည်ဖော်ဖို့ အိန္ဒိယကိုတိုက်တွန်းခဲ့တဲ့သတင်းစတဲ့ သတင်းတွေလဲ ယခုရက်သတ္တပတ်မှာ ဖြစ်ခဲ့တယ်ဆိုတာ တင်ပြရင်း ယခုရက်သတ္တပတ်နိုင်ငံတကာသတင်းသုံးသပ်ချက်ကို ဒီမှာဘဲ ရပ်လိုက်ချင်ပါတယ်။

မင်းထက်