【 နိုင်ငံတကာဆောင်းပါး 】 လုပ်ကြံသတ်ဖြတ်မှု စွပ်စွဲချက် အငြင်းပွားမှု အရှိန်မြင့်လာပြီး အိန္ဒိယက ကနေဒါသံတမန်ကို နှင်ထုတ်

ဗြိတိသျှကိုလံဘီယာမှ ဆစ်ခ် ခွဲထွက်ရေးခေါင်းဆောင် ဟာဒိဆင်းနစ်ဂျာကို ပစ်ခတ်သတ်ဖြတ်မှုနောက်ကွယ်တွင် အိန္ဒိယအစိုးရ ပါဝင်ပတ်သက်နိုင်ကြောင်း ကနေဒါခေါင်းဆောင်က စွပ်စွဲပြီးနောက် သံရုံးမှ အဆင့်မြင့်ထောက်လှမ်းရေးအရာရှိအဖြစ် ဖော်ထုတ်သိရသည့် အိန္ဒိယသံတမန်ကို နှင်ထုတ်ခဲ့သည်ကို အိန္ဒိယနိုင်ငံက လက်စားချေသည့်အနေဖြင့် ကနေဒါသံတမန်တစ်ဦးကို အင်္ဂါနေ့တွင် နှင်ထုတ်လိုက်သည်။

ထိုသတ်ဖြတ်မှုနှင့်ပတ်သက်ပြီး ရက်သတ္တပတ်ပေါင်းများစွာ စုစမ်းစစ်ဆေးပြီးနောက် ကနေဒါဝန်ကြီးချုပ် ဂျပ်စတင်ထရူးဒိုးသည် ထိုလုပ်ကြံသတ်ဖြတ်မှု စွပ်စွဲချက်ကို တနင်္လာနေ့က ပါလီမန်တွင် ပေါက်ကွဲသည့် မိန့်ခွန်းတွင် ပြောကြားခဲ့ခြင်းဖြစ်ပြီး နှစ်နိုင်ငံဆက်ဆံရေးသည် အနိမ့်ဆုံးအဆင့်သို့ ပြိုလဲကျသွားသည်။

မောင်းထုတ်ခံရသော ကနေဒါသံတမန်အမည်ကို အိန္ဒိယအစိုးရကြေညာချက်တွင် ဖော်ပြထားခြင်းမရှိသော်လည်း ဟိန္ဒူစတန်တိုင်းမ်သတင်းစာက ထိုသူသည် ကနေဒါထောက်လှမ်းရေးဌာန၏ နယူးဒေလီစခန်းအကြီးအကဲဖြစ်သည်ဟု ဖော်ပြသည်။

ထရူးဒိုး၏ ကြေညာချက်မတိုင်မီ ရက်သတ္တပတ်များတွင် ကနေဒါသည် ထိုသတ်ဖြတ်မှုကို တုံ့ပြန်ရာတွင် ပူးတွဲဆောင်ရွက်မှု တစ်ခုခုလုပ်ရန် ဝါရှင်တန်အပါအဝင် အနီးကပ်ဆုံး မဟာမိတ်များကို တွန်းအားပေးခဲ့ကြောင်း အနောက်နိုင်ငံအရာရှိတစ်ဦးပြောသည်။သို့သော် ထိုတောင်းဆိုမှု ပယ်ချခံရကြောင်း သံတမန်ရေးအရ အရေးကြီးသော ကိစ္စဖြစ်သောကြောင့် အမည်မဖော်လိုသော ထိုအရာရှိပြောသည်။

ကနေဒါနိုင်ငံခြားရေးဝန်ကြီးဌာန ပြောခွင့်ရသူ အမျိုးသမီးတစ်ဦးက “ဟာဒိဆင်းနစ်ဂျာကို လူသိရှင်ကြားရှုတ်ချဖို့ ကနေဒါက မဟာမိတ်တွေကို ပြောတယ်ဆိုတာ မမှန်ဘူး။ဒါကြောင့် ငြင်းဆိုပါတယ်” ဟု ပြောသည်။

“ကျမတို့က ကျမတို့မဟာမိတ်တွေကို သက်ဆိုင်ရာသတင်းအချက်အလက်တွေကို အရာရှိအဆင့်အပါအဝင် ဆက်လက်အသိပေးသွားမှာဖြစ်ပြီး ကနေဒါလုံခြုံရေးအေဂျင်စီတွေဟာ ဒီကိစ္စကို အဆုံးအထိ လိုက်လံဖော်ထုတ်နိုင်လောက်အောင် လျင်မြန်ပါတယ်” ဟု ပြောခွင့်ရသူအမျိုးသမီး အင်မလီ ဝီလျံ ပြောသည်။

ကနေဒါနိုင်ငံသား နစ်ဂျာကို ဇွန်လ ၁၈ ရက်နေ့က လုပ်ကြံသတ်ဖြတ်ခြင်းကို ယခုလအတွင်း နယူးဒေလီတွင် ကျင်းပသည့် စက်မှုထိပ်သီး နိုင်ငံ ၂၀ ထိပ်သီးဆွေးနွေးပွဲမတိုင်မီ ရက်သတ္တပတ်များက Five Eyes ထောက်လှမ်းရေး သတင်းဖလှယ်သည့် နိုင်ငံများမှ အဆင့်မြင့်အရာရှိအများအပြားနှင့် သီးခြားစီ ဆွေးနွေးခဲ့သည်။

သို့သော် ထိုကိစ္စကို အထက်ပါထိပ်သီးဆွေးနွေးပွဲမတိုင်မီ ဖော်ပြခြင်းမရှိဘဲ ထိုထိပ်သီးဆွေးနွေးပွဲကို အိန္ဒိယဝန်ကြီးချုပ် မိုဒီကို ပွဲထုတ်သည့် အရေးပါသည့်ပွဲအဖြစ် အနောက်နိုင်ငံခေါင်းဆောင်များကမြင်ကြောင်း အနောက်တိုင်းအရာရှိတစ်ဦးပြောသည်။ဘိုင်ဒင်အစိုးရနှင့် မဟာမိတ်များသည် အိန္ဒိယကို တရုတ်နှင့် အာဏာချိန်ညှိပေးမည့် နိုင်ငံအဖြစ်မြင်ပြီး စည်းရုံးသိမ်းသွင်းရန် ကြိုးစားနေသည်။

နှစ်နိုင်ငံဆက်ဆံရေးအခြေအနေမှာ သူမှတ်မိသမျှတွင် အဆိုးဆုံးအခြေအနေအထိ ပြတ်တောက်သွားကြောင်းနှင့် ထိုဇာတ်လမ်းအလုပ်ဖြစ်ရန် အချိန်ယူရလိမ့်မည်ဖြစ်မည်ဖြစ်ကြောင်း အော့တာဝါတက္ကသိုလ်ပါမောက္ခနှင့် ထရူးဒိုး၏ နိုင်ငံခြားရေးမူဝါဒ အကြံပေးဟောင်း ရိုလန် ပါရီ ပြောသည်။

ထိုပြဿနာကို အပြင်းထန်ဆုံးလေးနက်မှုနှင့် ကိုင်တွယ်ရန် ထရူးဒိုးက အိန္ဒိယကို တောင်းဆိုသည်။ “ကျနော်တို့က ရန်စနေတာ တင်းမာမှုမြင့်မားအောင်လုပ်နေတာ မဟုတ်ဘူး။ကျနော်တို့က ကျနော်တို့နားလည်ထားတဲ့အချက်ကို သူတို့ကို ချပြလိုက်တာဖြစ်တယ်” ဟု သတင်းထောက်များကို သူပြောသည်။

ကနေဒါအစိုးရသည် နစ်ဂျာကဲ့သို့သော ဆစ်ခ် ခွဲထွက်ရေးသမားများကို ထောက်ခံနေသည်ဟု အိန္ဒိယက စွပ်စွဲနေသည်မှာ ကာလကြာမြင့်ပြီဖြစ်ပြီး နစ်ဂျာကို အိန္ဒိယအစိုးရက အကြမ်းဖက်သမားအဖြစ် သတ်မှတ်သည်။

ကနေဒါက ထိုပြောဆိုချက်များကို ငြင်းဆန်သည်။

အိန္ဒိယနိုင်ငံခြားရေးဝန်ကြီးဌာနက ထိုသေဆုံးမှုနောက်ကွယ်တွင် နယူးဒေလီပါဝင်ပတ်သက်နေသည်ဆိုသည့် ထရူးဒိုး၏ စွပ်စွဲချက်ကို ပယ်ချပြီး ထိုကိစ္စသည် ကျိုးကြောင်းဆီလျော်မှုမရှိဘဲ နိုင်ငံရေးပယောဂပါကြောင်း ပြောသည်။

ထိုစွပ်စွဲချက်များသည် ကနေဒါတွင် ခိုလှုံခွင့်ပေးထားသည့် ခါလီစတန်နီ အကြမ်းဖက်သမားများနှင့် အစွန်းရောက်များထံမှ အာရုံစိုက်မှုလွှဲပြောင်းရန် ကြိုးစားခြင်းဖြစ်ပြီး အိန္ဒိယနိုင်ငံ၏ အချုပ်အခြာအာဏာနှင့် နယ်မြေတည်တံ့ခိုင်မြဲမှုကို ဆက်လက်ခြိမ်းခြောက်နေကြောင်း ဝန်ကြီးဌာန ကြေညာချက်တွင် ဖော်ပြထားသည်။

အိန္ဒိယလုံခြုံရေးအေဂျင်စီများက နစ်ဂျာကို ၂၀၂၀ ခုနှစ်တွင် အကြမ်းဖက်သမားအဖြစ် သတ်မှတ်ခဲ့သည်။သူသည် အိန္ဒိယ ပန်ဂျပ်ပြည်နယ်မှ တိုက်ခိုက်မှုများကို ထောက်ပံ့နေသည်ဟု လုံခြုံရေးအေဂျင်စီများက စွပ်စွဲသည်။ပန်ဂျပ်ပြည်နယ်တွင် ခွဲထွက်ရေးသမားများသည် ခါလီစတန်ဟု ခေါ်သည့် လွတ်လပ်သော ဆစ်ခ်နိုင်ငံ ထူထောင်ရန် ကြိုးစားနေသည်။အိန္ဒိယအာဏာပိုင်များက နစ်ဂျာသည် ခါလီစတန်ကျားတပ်ဖွဲ့ဟုခေါ်သည့် အဖွဲ့တစ်ခုကို ဦးဆောင်နေသည်ဟု အိန္ဒိယအာဏာပိုင်များပြောပြီး သူ့ကို ကနေဒါမှ လွှဲပြောင်းပေးရန် ၂၀၂၂ ခုနှစ်တွင် တောင်းဆိုသည်။ထိုနှစ်က ပန်ဂျပ်ပြည်နယ်မှ ဟိန္ဒူဘုန်းတော်ကြီးတစ်ပါးကို သတ်ဖြတ်မှုသည် သူနှင့်ပတ်သက်နေသည်ဟု ပြောသည်။

ခါလီစတန်လှုပ်ရှားမှုသည် အိန္ဒိယတွင် ထောက်ခံမှုများရနေပြီး တစ်ကမ္ဘာလုံးမှ အဝေးရောက် ဆစ်ခ် များကလည်း အကြီးအကျယ်ထောက်ခံကြသည်။ ၁၉၈၀ နှင့် ၁၉၉၀ ခုနှစ်များအတွင်း ပန်ဂျပ်ပြည်နယ်ခွဲထွက်ရေး ပုန်ကန်မှုအတွင်း လူထောင်ပေါင်းများစွာ သေဆုံးသည်။ထိုမျှအကြမ်းဖက်တိုက်ခိုက်မှုများ ပြန်လည်ပေါ်ပေါက်လာမည်ကို စိုးရိမ်သောကြောင့် ယခုနှစ်တွင် ခါလီစတန်လိုလားသော စစ်သွေးကြွခေါင်းဆောင်များကို အကြီးအကျယ်လိုက်လံဖမ်းဆီးနေသည်။

ဗန်ကူးပါးမြို့ပြင် ဆစ်ခ်ဘုရားကျောင်းမှ ကားရပ်နားရာနေရာတွင် မျက်နှာဖုံးစွပ်ထားသည့် သေနတ်သမားများက နစ်ဂျာကို မသတ်မီ လများအတွင်း အိန္ဒိယသည် ကြီးမားသော ဆစ်ခ်လူမှုအသိုက်ဝန်းများရှိပြီး ခါလီစတန်လိုလားသော ဆန္ဒပြပွဲများ မကြာခဏဖြစ်ပွားလေ့ရှိသည့် ကနေဒါ၊ သြစတြေးလျ၊ ဗြိတိန်နှင့် အမေရိကန်ပြည်ထောင်စုတို့အပေါ် ဖိအားတိုးမြှင့်ပေးပြီး အိန္ဒိယသံရုံးများ ပြင်ပမှ ဆန္ဒပြပွဲများကို ဖြိုခွဲရန်အပါအဝင် ထိုလှုပ်ရှားမှုကို ဖြိုခွဲရန် တောင်းဆိုသည်။

အိန္ဒိယသံရုံးနေရာများတွင် လုံခြုံရေးတိုးမြှင့်ပေးပြီး ရာဇဝတ်မှုများကို အရေးယူမည်ဖြစ်သော်လည်း ငြိမ်းချမ်းစွာစုဝေးခွင့်နှင့် နိုင်ငံရေးမိန့်ခွန်းပြောဆိုခွင့်ကို ၎င်းတို့နိုင်ငံများတွင် ခွင့်ပြုကြောင်း အိန္ဒိယကို ၎င်းတို့အစိုးရများက ပြောကြားခဲ့ကြောင်း ကနေဒါနှင့် အခြားအနောက်နိုင်ငံအရာရှိများ ပြောသည်။

ထရူးဒိုးသည် ထိုစွပ်စွဲချက်ကို အားလုံးအတွက် ကသိအအောက်ဖြစ်မည့်အချိန်တွင် ထုတ်ဖော်ပြောဆိုခဲ့ခြင်းဖြစ်သည်။ဘိုင်ဒင်အစိုးရဦးဆောင်သည့် အနောက်နိုင်ငံများသည် အိန္ဒိယကို ပထဝီနိုင်ငံရေးနှင့် ကုန်သွယ်ရေးမိတ်ဖက်အဖြစ်နှင့် တရုတ်ကို အာဏာချိန်ညှိပေးမည့် နိုင်ငံအဖြစ် စည်းရုံးသိမ်းသွင်းရန် ကြိုးစားနေကြသည်။အိန္ဒိယနိုင်ငံတွင် ပို၍ပို၍ အာဏာရှင်ဆန်လာခြင်းအတွက် ၎င်းတို့က မိုဒီကို ဝေဖန်ခြင်း မရှိကြပေ။

ယခုအငြင်းပွားမှုသည် လူ့အခွင့်အရေးနှင့် ဒီမိုကရေစီကို အလေးထားသည့် တန်ဖိုးအခြေပြု နိုင်ငံခြားရေးမူဝါဒ ချမှတ်ထားသည့် ဘိုင်ဒင်အစိုးရအတွက် အကျပ်အတည်းဖြစ်ကြောင်း ဝီလဆင်စင်တာမှ တောင်အာရှသုတေသီ မိုက်ကယ် ကူဂယ်မန် ပြောသည်။

“အမေရိကန်ပြည်ထောင်စုက သံတမန်ရေးကြိုးတန်းမှာ လမ်းလျှောက်ရတာပဲ။ကနေဒါက မဟာမိတ်နဲ့ အိမ်နီးချင်းဖြစ်ပြီး အိန္ဒိယက အဓိကကျတဲ့ သေနင်္ဂဗျူဟာ မိတ်ဖက်ဖြစ်တယ်။ကနေဒါကို ထောက်ခံဖို့ ဝါရှင်တန်အတွက် ဖိအားတွေဖြစ်လာနိုင်ပြီး တစ်ချိန်တည်းမှာပဲ အိန္ဒိယနဲ့ဆက်ဆံရေးကို အကြီးအကျယ် တန်ဖိုးထားနေရတယ်” ဟု သူရှင်းပြသည်။

ကနေဒါသည်လည်း တရုတ်သြဇာကို ချိန်ညှိရန်အတွက် အိန္ဒိယနှင့် ဆက်ဆံရေး ပိုမိုနက်ရှိုင်းအောင် ကြိုးစားနေသည်။လွန်ခဲ့သောနှစ်တွင် ထရူးဒိုးအစိုးရသည် အင်ဒို-ပိစိဖိတ် သေနင်္ဂဗျူဟာကို ထုတ်ပြန်ခဲ့ပြီး အိန္ဒိယကို ကနေဒါ၏ ရည်မှန်းချက်များ အကောင်အထည်ဖော်ရာတွင် အရေးပါသော မိတ်ဖက်အဖြစ် ဖော်ပြထားပြီး အိန္ဒိယနှင့် စီးပွားရေးဆက်ဆံရေး တိုးတက်စေရန် ကတိပြုသည်။

“အိန္ဒိယနဲ့ ကနေဒါမှာ ဒီမိုကရေစီနဲ့ ဗဟုဝါဒ တူညီတဲ့ အစဉ်အလာနဲ့ စည်းမျဉ်းအခြေပြု နိုင်ငံတကာစနစ်နဲ့ နိုင်ငံတကာဝါဒ၊ စီးပွားရေးဆက်ဆံရေးတိုးချဲ့ဖို့ အပြန်အလှန်အကျိုးစီးပွားနဲ့ ကျယ်ပြန့်ကြီးမားနေတဲ့ ပြည်သူခြင်း ဆက်စပ်မှု ဘုံကတိကဝတ်တွေရှိတယ်” ဟု Strategy မှ စာရေးဆရာများ ပြောသည်။

သို့သော် ထိုဆက်ဆံရေးများ၏ ရှုပ်ထွေးမှုများကို စက်မှုထိပ်သီးနိုင်ငံ ၂၀ အစည်းအဝေးတွင် အထင်အရှားတွေ့ရသည်။ထရူးဒိုးသည် မိုဒီနှင့် ၂ ဦးချင်း တွေ့ဆုံဆွေးနွေးမှုလုပ်ရန် အစီအစဉ်တစ်ခုတွင် ငြင်းပယ်ခံရသည်။၎င်းတို့ ၂ ဦးသည် ထိုထိပ်သီးဆွေးနွေးပွဲမှ သီးခြားအစည်းအဝေးတစ်ခုတွင် မိုဒီက ကနေဒါမှ အိန္ဒိယဆန့်ကျင်ရေး အစွန်းရောက်များနှင့်ပတ်သက်ပြီး လွန်စွာစိုးရိမ်ကြောင်း ပြောခဲ့သည်ဟု မိုဒီ၏ရုံးက ပြောသည်။တစ်ချိန်တည်းတွင် ထရူးဒိုးကလည်း သူသည် နစ်ဂျာနှင့်ပတ်သက်သည့် စွပ်စွဲချက်များကို မိုဒီနှင့် တိုက်ရိုက်ပြောခဲ့ကြောင်း တနင်္လာနေ့တွင်ပြောသည်။နှစ်နိုင်ငံအကြား ကုန်သွယ်ရေးဆွေးနွေးပွဲများ ယခုလအတွင်း ရပ်ဆိုင်းသွားသည်။

ထရူးဒိုးသည် ထိုစွပ်စွဲချက်ကိစ္စကို သမ္မတ ဘိုင်ဒင်နှင့် ဗြိတိန်ဝန်ကြီးချုပ် ရီရှီ ဆူနက်ခ်နှင့်လည်း ဆွေးနွေးခဲ့ကြောင်း ကနေဒါအရာရှိများပြောသည်။ဝါရှင်တန်သည် ထိုစွပ်စွဲချက်နှင့်ပတ်သက်ပြီး နက်နက်ရှိုင်းရှိုင်း စိုးရိမ်ကြောင်း အိမ်ဖြူတော်အမျိုးသားလုံခြုံရေးကောင်စီ ပြောခွင့်ရသူ အမျိုးသမီး အန်ဒရီယန် ဝပ်ဆင် ပြောသည်။ကနေဒါအနေဖြင့် စုံစမ်းစစ်ဆေးမှုများ ဆက်လက်ပြုလုပ်ရန်နှင့် ကျူးလွန်သူများကို ဥပဒေရှေ့မှောက်ခေါ်ဆောင်ရန် အရေးကြီးကြောင်း ဝပ်ဆင်က ကြေညာချက်တစ်စောင်တွင် ပြောသည်။

သြစတြေးလျ နိုင်ငံခြားရေးဝန်ကြီး ပင်နီဝေါင်းက သူမ၏နိုင်ငံသည် ထိုပြဿနာကို အိန္ဒိယနှင့် အဆင့်မြင့် အရာရှိအဆင့် ဆွေးနွေးမည်ဖြစ်ကြောင်းပြောဆိုပြီး နက်ရှိုင်းသော စိုးရိမ်ပူပန်မှုကို ဖော်ပြခဲ့ကြောင်း ပြောခွင့်ရသူတစ်ဦး ပြောသည်။

ဗြိတိန်နိုင်ငံခြားရေးဝန်ကြီး ဂျိမ်းစ် ကလယ်ဗာလီက X တွင် ရေးသားခဲ့သည့် ပို့စ်တစ်ခုတွင် သူ၏နိုင်ငံသည် ကနေဒါလွှတ်တော်တွင် ပြောကြားခဲ့သည့် လေးနက်သော စွပ်စွဲမှုအတွက် ကနေဒါမိတ်ဆွေများနှင့် ပုံမှန်ဆက်သွယ်ခဲ့ကြောင်းပြောသည်။

“ကနေဒါရဲ့ စုံစမ်းစစ်ဆေးမှု ဆက်လက်လုပ်ကိုင်ပြီး ကျူးလွန်သူတွေကို တရားဥပဒေရှေ့မှောက်ပို့ဖို့ အရေးကြီးတယ်” ဟု အိန္ဒိယကို မဖော်ပြဘဲ သူဆက်လက်ရေးသားခဲ့သည်။ဗြိတိန်နိုင်ငံသည် အိန္ဒိယနှင့် ကုန်သွယ်ရေးဆွေးနွေးပွဲများ ရပ်ဆိုင်းမည်မဟုတ်ကြောင်း Reuters သတင်းက ဖော်ပြသည်။

ကာလီစတန်ထောက်ခံသူများ ကနေဒါတွင်ရှိနေခြင်းသည် နှစ်နိုင်ငံအကြား ကင်ဆာတစ်ရှူးဖြစ်နေသည်မှာ နှစ်ပေါင်းများစွာကြာပြီဖြစ်သော်လည်း ယခု နယူးဒေလီကို စွပ်စွဲချက်များသည် မှန်ကန်ပါက ပြည်ပစွက်ဖက်မှုကို ဂရုစိုက်သော အခြားနိုင်ငံများနှင့် ဆက်ဆံရေးကို ပိုမိုထိခိုက်စေမည်ဖြစ်ကြောင်း စင်ကာပူအမျိုးသားတက္ကသိုလ်မှ အိန္ဒိယ-ကနေဒါ ဆက်ဆံရေးလေ့လာသူ ကာသစ်နာချီယက်ပန် ပြောသည်။

နိုင်ငံ၏ရေးရာများတွင် တရုတ်နှင့် အခြားနိုင်ငံများ ဝင်ရောက်စွက်ဖက်မှုများကို အများပြည်သူရှေ့တွင် စုံစမ်းစစ်ဆေးမည်ဖြစ်ကြောင်း ထရူးဒိုးအစိုးရက ယခုလအတွင်းကြေညာသည်။ Globe and Mail သတင်းစာက ပေကျင်းက ရွေးကောက်ပွဲစွက်ဖက်မှုများရှိသည်ဟု ဖော်ပြပြီးနောက် အတိုက်အခံပါတီများကလည်း စုံစမ်းစစ်ဆေးရန် တောင်းဆိုသည်။

ကနေဒါမြေပေါ်တွင် ၎င်းတို့ကို ထိပါးခြိမ်းခြောက်ရန် ပြည်ပအစိုးရများက လုပ်နေသည်ဆိုသည့် ၎င်းတို့၏ ပြောဆိုချက်များကို ကနေဒါအစိုးရက အလေးအနက်ကိုင်တွယ်ရန် ပျက်ကွက်ကြောင်း အိန္ဒိယ၊ တရုတ်နှင့် အီရန်မှ ထွက်ခွာလာသည့် အဝေးရောက်လူမှုအသိုက်အဝန်းများက ပြောသည်။ကနေဒါထောက်လှမ်းရေးအရာရှိများ အိန္ဒိယသည် စွက်ဖက်မှုရင်းမြစ်တစ်ခုဖြစ်သည်ဟု သတ်မှတ်ထားသည်။

“ပစ်မှတ်ထား သတ်ဖြတ်တယ်ဆိုတာ နိုင်ငံတစ်နိုင်ငံမှာ ပြည်ပစွက်ဖက်မှု ပထမဆင့်မဟုတ်ဘူး” ဟု ကနေဒါလုံခြုံရေးထောက်လှမ်းရေးဌာနမှ သုတေသီဟောင်း ဂျက်ဆီကာ ဒေးဗစ် ပြောသည်။ “ဒါက တကယ်ဇာတ်ရှိန်မြင့်လာတာ။ဒီလိုဖြစ်ရပ်တွေ ကနေဒါမှာမဖြစ်အောင် ဖော်ထုတ်တားဆီးဖို့ ကနေဒါရဲတပ်ဖွဲ့နဲ့ ထောက်လှမ်းရေးမှာ တာဝန်ရှိတယ်ဆိုတဲ့ အမြင်အရကြည့်ရင်း ဒါဟာပျက်ကွက်မှုပဲ” ဟု သူပြောသည်။

အိန္ဒိယအစိုးရသည် ကနေဒါမှ ပြည်သူများကို ထိပါးပစ်မှတ်ထားရန် လုပ်ဆောင်နေသည်ကို ၎င်းတို့အဖွဲ့အစည်းက သတိပေးနေသည်မှာ ကြာပြီဖြစ်သောကြောင့် ထရူးဒိုး၏ ကြေညာချက်သည် နာကျင်စရာကောင်းသော်လည်း တုန်လှုပ်စရာမကောင်းကြောင်း ကနေဒါ မွတ်ဆလင်များ အမျိုးသားကောင်စီမှ အမှုဆောင်ချုပ် စတီဖင် ဘရောင်း ပြောင်းသည်။

“သူတို့တွေက ဒီမှာ ကနေဒါနိုင်ငံသားတွေကို နေ့ခင်းကြောင်တောင် သတ်ဖြတ်နေတယ်။ဒါလုံးဝလက်မခံနိုင်ဘူး” ဟု သတင်းထောက်များကို သူပြောသည်။

တနင်္လာနေ့က ထရူးဒိုး၏ ကြေညာချက်အပြီးတွင် အတိုက်အခံခေါင်းဆောင်များ ညီညွတ်စွာဖြင့် ထိုစွပ်စွဲချက်များသည် မှန်ကန်ပါက ကနေဒါနိုင်ငံ၏ အချုပ်အခြာအာဏာကို လက်မခံနိုင်စရာ ချိုးဖောက်ခြင်းဖြစ်ကြောင်း ပြောသည်။အင်္ဂါနေ့တွင် ကနေဒါ ကွန်ဆာဗေးတစ်ပါတီခေါင်းဆောင် ပီယာ ပွိုင်လီဘာက ထရူးဒိုးအနေဖြင့် အချက်အလက်အားလုံးကို ရှင်းလင်းရန်နှင့် စွပ်စွဲချက်အတွက် အထောက်အထားပေးရန်လိုကြောင်း ပြောလိုက်သည်။

ထိုကိစ္စဆွေးနွေးမှုများသည် ပိုမိုသဘောထားကွဲစရာများဖြစ်လာမည့် လက္ခဏာဖြစ်သည်။

Linko
Ref - Washingtonpost | India expels Canadian diplomat as dispute over alleged assassination escalates