【 နိုင်ငံတကာဆောင်းပါး 】 သံတမန်ရေးရာအသိအမှတ်ပြုခံရရေး စက်တင်ဘာတိုက်ပွဲ

【 နိုင်ငံတကာဆောင်းပါး 】 သံတမန်ရေးရာအသိအမှတ်ပြုခံရရေး စက်တင်ဘာတိုက်ပွဲ

မြန်မာနိုင်ငံ စီးပွားရေးမြို့တော် ရန်ကုန်တွင် ပြည်သူများသည် ကိုဗစ်ကူးစက်ခံရသော မိသားစုဝင်များနှင့် မိတ်ဆွေများအတွက် ဆေးရုံကုတင်ရရှိရေးနှင့် အောက်ဆီဂျင်ရရှိရေးအတွက် စုပြုံတိုးဝှေ့နေကြသည်။သုဿန်တွင် အလောင်းများပုံနေသည်။

မျှော်လင့်ချက်ကင်းမဲ့လောက်အောင် စီးပွားကျဆင်းနေပြီး ပြည်သူများအကြားတွင် သေမင်းဗိုင်းရပ်စ် ကူးစက်နေသောအချိန်တွင် အသိအမှတ်ပြုမခံရသော အာဏာသိမ်းထားသည့် စစ်တပ်သာမက နိုင်ငံတကာသြဇာသက်ရောက်မှုရသော စင်ပြိုင်အစိုးရကပါ ကပ်ရောဂါကိုတွန်းလှန်အောင် မလုပ်ဆောင်နိုင်သလို နိုင်ငံရေးအကျပ်အတည်းကိုလည်း ဖြေရှင်းနိုင်ခြင်းမရှိပေ။

စစ်အုပ်စုသည် ဖေဖေါ်ဝါရီလ ၁ ရက်နေ့ အာဏာသိမ်းမှုအပြီးတွင် နိုင်ငံကိုထိန်းချုပ်နိုင်ရန် ကြိုးစားနေသော်လည်း အာဏာသိမ်းမှုကြောင့် လူထုဆန္ဒပြပွဲများနှင့် လူမှုအာဏာဖီဆန်ရေးလှုပ်ရှားမှု ပေါ်ပေါက်လာသည်။လူပေါင်း ၉၀၀ ကျော်ကို စစ်တပ်ကသတ်ဖြတ်ပြီး ထောင်ပေါင်းများစွာ ဖမ်းဆီးခံထားရသည်။

တစ်ချိန်တည်းတွင် ဖြုတ်ချခံ ဒေါ်အောင်ဆန်းစုကြည်အစိုးရမှ ပြည်ပရောက် (သို့မဟုတ်) ပုန်းအောင်းနေသူများဖြင့် ဖွဲ့စည်းထားသည့် အမျိုးသားညီညွတ်ရေးအစိုးရသည်လည်း နိုင်ငံကို ပြန်လည်ထိန်းချုပ်ရန် ကြိုးစားရာတွင် တိုးတက်မှုမရသလောက်ဖြစ်နေသည်။

ယခုအခါ ထိုပြိုင်ဖက်အုပ်စု ၂ ခုသည် ကုလသမဂ္ဂတွင် အဓိကကျသည့် သံတမန်ရေးတိုက်ပွဲအတွက် အားယူနေကြသည်။ကုလသမဂ္ဂ ခန့်အပ်အတည်ပြုရေးကောင်စီသည် စက်တင်ဘာလတွင် အစည်းအဝေးကျင်းပရန် စီစဉ်ထားပြီး နှစ်ဖက်စလုံးက ၎င်းတို့အသိအမှတ်ပြုခံရရန် ကြိုးစားနေသည်။

မြန်မာနိုင်ငံ၏ ကုလသမဂ္ဂဆိုင်ရာ အမြဲတမ်းကိုယ်စားလှယ် ဦးကျော်မိုးထွန်းသည် ဒေါ်အောင်ဆန်းစုကြည်အစိုးရကို ဆက်လက်သစ္စာခံပြီး ထိုသို့သစ္စာခံခြင်းကို ဖေဖေါ်ဝါရီလက အထွေထွေညီလာခံမိန်ခွန်းဖြင့် ဖေါ်ပြလိုက်သည်။

သူ့ကိုဖယ်ရှားရန် စစ်ကောင်စီ၏ အားထုတ်မှုများသည် လက်ရှိအချိန်အထိ အချည်းနှီးသာဖြစ်နေသော်လည်း ယခုလတွင်မူ စစ်တပ်တွင် ၂၆ နှစ်လုပ်ကိုင်ပြီးနောက် ယခုနှစ်မှထွက်လိုက်သော အောင်သူရိန် ကို စစ်ကောင်စီ နိုင်ငံခြားရေးဝန်ကြီး ဝဏ္ဏမောင်လွင် က ဦးကျော်မိုးထွန်းနေရာတွင် အစားထိုးရန် ယခုလအတွင်း ကြိုးစားလာသည်။

ရန်ကုန်နှင့် ဗမာလွှမ်းမိုးသော ဒေသများတွင် အမျိုးသားညီညွတ်ရေးအစိုးရ NUG သည် သြဇာမကြီးမားလှသော်လည်း စစ်သားများနှင့် ဗိုလ်ချုပ်များကို နိုင်ငံကိုအုပ်ချုပ်ရန်မသင့်တော်ကြောင်း ကောင်းကောင်းသိသည်ဟု NUG အစိုးရ အဖွဲ့ဝင် ဒေါက်တာဆာဆာ က အယ်လ်ဂျာဇီးယာသတင်းဌာနနှင့် ထုတ်ဖေါ်ပြောကြားခြင်းမရှိသောနေရာမှ အွန်လိုင်းတွေ့ဆုံမေးမြန်းခန်းတွင်ပြောသည်။

“ဒါတွေက မအောင်မြင်တဲ့ စစ်အာဏာသိမ်းမှုနဲ့ ကျဆုံးသွားတဲ့ စစ်ကောင်စီပဲ” ဟု NUG နိုင်ငံတကာပူးပေါင်းဆောင်ရွက်ရေးဝန်ကြီးနှင့် ပြောခွင့်ရသူ ဒေါက်တာဆာဆာ ပြောသည်။

 “သူတို့က အစိုးရရဲ့ ဘယ်ယန္တရားကိုမှ မလည်ပတ်နိုင်ဘူး။ကျန်းမာရေး၊ ပညာရေး၊ စီးပွားရေး ဘာမှလုပ်လို့မရဘူး” ဟုလည်း သူပြောသည်။

ဒေါက်တာဆာဆာ၏ ဝေဖန်ချက်များသည် ဇူလိုင်လ ၂၆ ရက်နေ့က ထုတ်ပြန်သည့် ကမ္ဘာ့ဘဏ်၏ နောက်ဆုံးစီးပွားရေးအစီရင်ခံစာကို ထင်ဟပ်နေသည်။ထိုအစီရင်ခံစာတွင် စစ်အာဏာသိမ်းမှုနှင့် ကိုဗစ်ကြောင့်  မြန်မာ့စီးပွားရေးသည် ယခုနှစ်အတွင်း ၁၈ ရာခိုင်နှုန်း ကျုံ့သွားပြီး ဆင်းရဲနွမ်းပါးမှု နှစ်ဆတိုးမည်ဟု သတိပေးထားသည်။

အကျပ်အတည်းများသည် အသက်များ၊ အသက်မွေးဝမ်းကြောင်းများ၊ ဆင်းရဲနွမ်းပါးမှုနှင့် အနာဂတ်စီးပွားရေးတိုးတက်မှုများအတွက် လွန်စွာထိခိုက်သည့် လက္ခဏာများရှိကြောင်း ကမ္ဘာ့ဘဏ် သတိပေးထားသဖြင့် စစ်ကောင်စီ မညှာမတာဝေဖန်သည့် အကဲဖြတ်ချက်ဖြစ်နေသည်။

စီးပွားရေးသည် လွတ်လွတ်ကျွတ်ကျွတ် ကျနေကြောင်း မြန်မာနိုင်ငံတွင်း ဒေါ်လာသန်းပေါင်းများစွာ ရင်းနှီးမြှုပ်နှံခဲ့သော ရန်ကုန်အခြေစိုက် နိုင်ငံခြားရင်းနှီးမြှုပ်နှံသူတစ်ဦးပြောသည်။

“စစ်ကောင်စီက ဘယ်လိုမှကို အုပ်ချုပ်လို့မရဘူး။နိုင်ငံရေးပြဿနာအပြင် ကပ်ရောဂါကြောင့်ဖြစ်တဲ့ လော့ခ်ဒေါင်းပိတ်ဆို့မှုကြောင့်ဖြစ်တဲ့ စီးပွားရေးပြတ်တောက်မှုကိုလည်း သူတို့မစီမံနိုင်ဘူး” ဟု ထိုရင်းနှီးမြှုပ်နှံသူကပြောသည်။

သို့သော် ကမ္ဘာ့ဘဏ်၏ ထိုသို့ပြင်းထန်သော သတိပေးချက်သည် NUG အပေါ်တွင်လည်း ဖိအားတိုးစေသည်။ထိုစင်ပြိုင်အစိုးရသည် လူသားချင်းစာနာမှုအကူအညီကို တလုံးတစည်းတည်း ထုတ်ပြန်နိုင်ခြင်းမရှိသေးသလို စစ်ကောင်စီထိန်းချုပ်ဒေသများသို့ နိုင်ငံတကာအကူအညီများကို မည်သို့ပေးသင့်သည်ကိုလည်း ရှင်းလင်းပြောကြားနိုင်ခြင်းမရှိသေးပေ။

အသိအမှတ်ပြုခံရရေးတိုက်ပွဲ

နိုင်ငံရေးအကျပ်အတည်းရှည်ကြာပြီး ကျန်းမာရေးအကျပ်အတည်း ပိုမိုနက်ရှိုင်းလာသည်နှင့်အမျှ NUG သည် ကြေညာချက်ထုတ်ရုံနှင့် ၎င်းကအကောင်အထည်မဖေါ်နိုင်သော မူဝါဒများကို ကြေညာရုံထက် တက်ကြွသောအခန်းကဏ္ဍမှပါရန် နယ်ပယ်ကျဉ်းလာသည်။

NUG ကို ဧပြီလအလယ်က ဒေါ်အောင်ဆန်းစုကြည်၏ အမျိုးသားဒီမိုကရေစီအဖွဲ့ချုပ်မှ အများစုဖြစ်သော ရွေးကောက်ခံ လွှတ်တော်ကိုယ်စားလှယ် ၂၀ ဖြင့် လျှို့ဝှက်ဖွဲ့စည်းသည်။

အချို့သည် နိုင်ငံပြင်ပတွင်ရှိနေပြီး အချို့သည် မြန်မာစစ်အုပ်စုကို ဆန့်ကျင်နေသည်မှာ ဆယ်စုနှစ်များစွာကြာပြီဖြစ်သည့် တိုင်းရင်းသားလက်နက်ကိုင်များထိန်းချုပ်သည့် နယ်စပ်ဒေသတွင် ခိုလှုံနေသည်။

ဗီဒီယိုဖြင့် သံတမန်ရေးကိုသုံးပြီး ဒေသခံလူမှုအသိုက်အဝန်းများနှင့်ဆက်သွယ်ရန် နိုင်ငံတွင်းတွင် ကျန်ရှိနေသူများမှာ ဒုတိယသမ္မတတစ်ယောက်၊ ဝန်ကြီးချုပ်နှင့် အစိုးရအဖွဲ့ဝင်အများအပြားဖြစ်ကြောင်း ဒေါက်တာဆာဆာ က ပြောသည်။ NUG အစိုးရအဖွဲ့သည် နိုင်ငံတွင်းမှ လုံးဝထွက်ခွာရန် အစီအစဉ်မရှိကြောင်း ၎င်းတို့၏ရုံးသည် ကွန်ပျူတာအတွင်းတွင် တည်ရှိသောကြောင့် e-government အစိုးရဖြစ်ကြောင်း သူပြောသည်။

ပြည်ပထောက်ခံမှုရှိသည့် လက္ခဏာအဖြစ်နှင့် နိုင်ငံတကာထောက်ခံမှုရရန်အတွက် NUG သည် ပရာ့ဂ်နှင့် ဝါရှင်တန်ဒီစီအနီးတွင် ရုံးခန်းများဖွင့်ထားသည်။ကုလသမဂ္ဂနှင့် မြန်မာသံရုံးများတွင် စစ်တပ်ကခန့်အပ်သူများနှင့် အားပြိုင်နေသည့် NUG ကိုယ်စားလှယ်များလည်းရှိသည်။

ပြည်ပနိုင်ငံရေးသမားများထံမှ ထောက်ခံမှုရရှိသော်လည်း ပြည်ပအစိုးရများသည် NUG အစိုးရကို ထောက်ခံရန် လုပ်ဆောင်ခြင်းမရှိပေ။
အာဆီယံသည် ဧပြီလကကျင်းပသည့် ထိပ်သီးဆွေးနွေးပွဲတွင် NUG ကို အရာရှိများကို ဖိတ်ခေါ်ရန် ငြင်းဆန်ပြီး စစ်ခေါင်းဆောင် မင်းအောင်လှိုင်ကိုသာ ဖိတ်ခေါ်သည်။

အချို့ကလည်း NUG ၏  ကမ္ဘာတဝှမ်းအစိုးရများနှင့် လွှတ်တော်များအကြား အဆက်အသွယ်များသည့် အမည်မခံသည့် အသိအမှတ်ပြုခြင်းဖြစ်ကြောင်း ပြောကြားသည်။

“သူတို့က စစ်ကောင်စီထက် ပိုမိုအဓိပ္ပါယ်ရှိတဲ့ ဆက်ဆံရေးတွေကိုတောင် ထူထောင်ထားနိုင်တယ်” ဟု မြန်မာနှင့် အရှေ့တောင်အာရှနိုင်ငံများတွင် သံအမတ်တာဝန်ယူခဲ့သော အငြိမ်းစား ဒတ်ချ်သံတမန် လေတစ်တာ ဗန်ဒန် အက်စ်ဆမ်ဟု ပြောသည်။

သူထောက်ပြသည့်အတိုင်း အမှန်တရားမှာ လွန်ခဲ့သော ၆ လက အာဏာသိမ်းပြီနောက် စစ်အုပ်စု၏ စစ်ကောင်စီသည် ၎င်းတို့၏အာဏာသိမ်းမှုကို ခိုင်မာအောင်လုပ်ဆောင်နိုင်ခြင်းမရှိသေးပေ။

“အာဏာသိမ်းတယ်ဆိုတာ အချိန်တိုအတွင်း ထိရောက်တဲ့ ထိန်းချုပ်မှုတွေနဲ့ ပြင်းထန်တဲ့လုပ်ဆောင်မှုတွေကို အမြန်အဆန်လုပ်ရမှာ။
ဒါမျိုးဖြစ်မလာရင် စစ်အာဏာသိမ်းမှု ကျဆင်းတယ်။မြန်မာနိုင်ငံမှာဖြစ်နေတာက အဲဒါမျိုးပဲ” ဟုလည်း သူပြောသည်။

“စစ်ကောင်စီကို ထောက်ခံတာဟာ အကောင်းဆုံးလို့ လူသိရှင်ကြားဆုံးဖြတ်လိုက်တဲ့နိုင်ငံဟာ တရုတ်တစ်နိုင်ငံပဲရှိတယ်ဆိုတာ ထင်ရှားသွားပြီ” ဟုလည်း သူပြောပြီး အာရှနိုင်ငံအများအပြားသည် ခြံစည်းရိုးခွထိုင်နေကြောင်းလည်း သူပြောသည်။

စစ်ကောင်စီကို အပြည့်အ၀အသိအမှတ်ပြုသည့် သဘောဆောင်သည့် မည်သည့်လုပ်ရပ်မဆိုကိုလုပ်နေသော မည်သည့်နိုင်ငံမဆိုကို အခြားနိုင်ငံများက သတိပေးနေစေကာမူ ရန်ကုန်ရှိ တရုတ်သံရုံးသည် တရုတ်အထူးကိုယ်စားလှယ် ချန်ဟိုင်နှင့် စစ်အုပ်စုအကြီးအကဲ တွေ့ဆုံအပြီးတွင် မင်းအောင်လှိုင် ကို နိုင်ငံအကြီးအကဲအဖြစ် ရည်ညွှန်းသော ကြေညာချက်တစ်စောင် ထုတ်ပြန်သည်။

တစိချိန်တည်းတွင် တရုတ်နိုင်ငံသည် မြန်မာနိုင်ငံမှ ပတ်သက်သူအားလုံးနှင့် ထိတွေ့ဆက်ဆံရန် ကြိုးစားသော်လည်း NUG ကို အေးစက်စက်ဖြစ်နေကြောင်း ဒေါက်တာဆာဆာ၏ သဘောထားအရ သိရသည်။

“တရုတ်နိုင်ငံက ပါဝင်ပတ်သက်သူတွေကြားမှာ NUG က သြဇာသက်ရောက်ဖို့ ဘာမှမတွေ့ဘူး” ဟု အမေရိကန်ပြည်ထောင်စု ငြိမ်းချမ်းရေးအင်စတီကျုမှ ဂျေဆင်တာဝါ ပြောသည်။

စစ်အုပ်စုကို ဘေကျင်းနှင့် မော်စကိုက တိတ်တဆိတ်ပေးနေသောထောက်ခံမှု အထူးသဖြင့် လက်နက်များရောင်းချခြင်းသည် စစ်ကောင်စီကို ပိုမိုရှည်ကြာစွာ အာဏာချုပ်ကိုင်ထားစေနိုင်သော်လည်း မြန်မာပြည်သူများက ဗိုလ်ချုပ်များကို ယုံကြည်မှုရှိမည်မဟုတ်ကြောင်း ဒေါက်တာဆာဆာ ပြောသည်။

“မြန်မာပြည်သူတွေက ဒီနှစ်နိုင်ငံဟာ လူသတ်သမားတွေကို ဘယ်လိုထောက်ခံသလဲဆိုတာကိုမမေ့တော့ စစ်ကောင်စီကို သူတို့ပေးတဲ့ထောက်ခံမှုတိုင်းဟာ တရုတ်နဲ့ ရုရှားကို ဆန့်ကျင်မှုတွေပဲဖြစ်မယ်” ဟု သူ သတိပေးသည်။

သို့သော် စစ်အာဏာမသိမ်းမီက စစ်အုပ်စုက ရိုဟင်ဂျာများအပေါ် ၂၀၁၇ ခုနှစ်က ကျူးလွန်သည့် စစ်ရာဇဝတ်မှု စွပ်စွဲချက်များကို ဒေါ်အောင်ဆန်းစုကြည် က ကာကွယ်ခြင်းသည်လည်း NUG ကို များစွာထိခိုက်နစ်နာစေသည်။

သံအမတ်ကြီး ဦးကျော်မိုးထွန်းသည် ရိုဟင်ဂျာများ၏ ကံကြမ္မာနှင့်ပတ်သက်ပြီး အမေရိကန် ကွန်ဂရက်လွှတ်တော်တွင်  တာဝန်မခံသောကြောင့် ဆန့်ကျင်မှုနှင့် ရင်ဆိုင်ရသည်။ရိုဟင်ဂျာကိုယ်စားပြုမှုမပါလျှင်နှင့် လူမျိုးစုသုတ်သင်မှုရပ်ဆိုင်းရန် ကတိမပြုလျှင် NUG ကို မထောက်ခံရန် ကယ်လီဖိုးနီးယားမှ ကွန်ဂရက်လွှတ်တော်အမတ် တက်ဒ်လျှူ က မေလအစောပိုင်းတွင်ပြောသည်။

ရိုဟင်ဂျာများကို အသိအမှတ်ပြုရေးနှင့်ပတ်သက်သည့် အစိုးရအဖွဲ့အတွင်း ကွဲလွဲမှုသည် ဒေါက်တာဆာဆာ က ရိုဟင်ဂျာများကို အသိအမှတ်ပြုရန် တွန်းအားပေးသောအခါ ထိပ်တန်းရောက်လာသည်။ NUG အတွင်းပိုင်း နိုင်ငံရေးကိုသိရှိသော သံတမန်များအဆိုအရ NLD အမာခံ သစ္စာခံများသည် နောက်တန်းရောက်ပြီး လွန်စွာပေါက်ကွဲနေသည်ဟု သိရသည်။

သို့သော် သူ၏ပြုပြင်ပြောင်းလဲရေး စိတ်အားထက်သန်မှုနှင့်အတူ ဒေါက်တာဆာဆာသည် ထိုတိုက်ပွဲတွင် အနိုင်ရသည်။
အခြေခံလူ့အခွင့်အရေးများနှင့် ဒီမိုကရေစီသဘောတရားများအရ ရိုဟင်ဂျာများသည် နိုင်ငံသားဖြစ်ခွင့်ရှိကြောင်း NUG က ဇွန်လတွင်ကြေညာသည်။

သည်ဟိဂ်တွင် လူမျိုးတုံးသတ်ဖြတ်မှု စွပ်စွဲချက်များအတွက် ဒေါ်အောင်ဆန်းစုကြည် က စစ်အုပ်စုကိုကာကွယ်သော်လည်း ယခုထူးခြားသည့် အပြောင်းအလဲမှာ NUG က နိုင်ငံတကာတရားရုံးကို ထောက်ခံနေခြင်းဖြစ်သည်။

ထိုအပြောင်းအလဲများနှင့်ပတ်သက်ပြီး ဒေါ်အောင်ဆန်းစုကြည် က လွန်စွာပျော်ရွှင်မည်ဖြစ်ကြောင်း ဒေါက်တာဆာဆာ ပြောသည်။

“အတိတ်မှာဖြစ်ခဲ့တာတွေကို ပြန်ဖျက်လို့မရဘူး။ဒါပေမယ့် ကျနော်တို့ရဲ့ခေါင်းဆောင်မှုက ပြောင်းလဲသွားပြီဖြစ်တယ်” ဟု သူပြောသည်။

ရိုဟင်ဂျာနှင့်ပတ်သက်သော အတိတ်က မူဝါဒများကို ပြောင်းပြန်လှန်ရန် NUG ၏ ဆုံးဖြတ်ချက်သည် ၎င်းတို့ရင်ဆိုင်နေရသည့် နိုင်ငံရေးအကျပ်အတည်းကို ဖေါ်ပြနေကြောင်း လူ့အခွင့်အရေးလှုပ်ရှားသူ ချယ်ရီ ဇဟော ပြောသည်။

“ဒီလိုလုပ်လိုက်ရင် နိုင်ငံတကာထောက်ခံမှု ပိုမိုရလိမ့်မယ်လို့ သူ့အကြံပေးတွေက သူ့ကိုပြောလိုက်တာဖြစ်နိုင်တယ်” ဟု သူပြောသည်။

ဒေါက်တာဆာဆာသည် NLD သို့ မကြာသေးမီကမှဝင်ရောက်လာပြီး ချင်းပြည်နယ်မှဖြစ်သောကြောင့် NLD အမာခံများနှင့်မတူဘဲရှိနိုင်ကြောင်း NUG နှင့် နီးစပ်သော အဆက်အသွယ်ရှိသည့် နိုင်ငံခြားအဆင့်မြင့်အရာရှိတစ်ဦးပြောသည်။
သို့သော် တစ်ချိန်တည်းတွင် NLD အမာခံများသည် သူ၏တိုးတက်သော နိုင်ငံရေးမကြိုက်နှစ်သက်စေကာမူ အောင်မြင်မှုအခွင့်အရေးအတွက် လက်မလွှတ်နိုင်ကြောင်းလည်း သူပြောသည်။

စင်ပြိုင်အစိုးရဆိုသည်မှာ မြန်မာနိုင်ငံတွင် အသစ်အဆန်းမဟုတ်ပေ။ ၁၉၉၀ ခုနှစ်က တည်ထောင်ခဲ့သည့် ဒေါ်အောင်ဆန်းစုကြည်၏ မောင်နှမဝမ်းကွဲ ဒေါက်တာစိန်ဝင်း ဦးဆောင်သည့် အမေရိကန်ပြည်ထောင်စုအခြေစိုက် ပြည်ထောင်စုမြန်မာနိုင်ငံ အမျိုးသားညွှန့်ပေါင်းအစိုးရကို ၂၀၁၂ ခုနှစ်ရောက်မှသာ ဖျက်သိမ်းခဲ့ခြင်းဖြစ်သည်။

တိုင်းရင်းသားဒေသများနှင့် နယ်စပ်ဒေသများတွင် တည်ထောင်ထားသောကြောင့် NUG သည် ယခင်စင်ပြိုင်အစိုးရများနှင့်မတူဘဲ မြေပြင်မှပြည်သူများနှင့် ဖြစ်ရပ်များနှင့် ပိုမိုဆက်စပ်မှုရှိမည်ဟု မျှော်လင့်နေသည်။

စစ်တပ်ကချုပ်ကိုင်ထားသည့် မြန်မာအများစုနေထိုင်သောဒေသများတွင် NUG သည် ခုခံရေးလှုပ်ရှားမှုများ၊ သပိတ်များနှင့် နိုင်ငံတကာအရေးယူပိတ်ဆို့မှုများကို သြဇာသက်ရောက်နေဆဲဖြစ်သည်။

NUG သည် ယခင်အဝေးရောက်အစိုးရများထက် ပိုမိုစနစ်တကျရှိနိုင်သော်လည်း ၎င်းတို့သည် အလားတူ တရားဝင်ရေးစိန်ခေါ်မှုနှင့် ရင်ဆိုင်ရပြီး ပဋိပက္ခရှည်ကြာသောအခါ ဆက်စပ်ပတ်သက်မှုသည်လည်း  စိန်ခေါ်မှုရကြောင်း မြန်မာအရေးကျွမ်းကျင်သူ ဒေးဗစ် ပက်သီဆင် ပြောသည်။

သံတမန်ရေး ထိုးစစ်

ထိုသို့ဆက်စပ်ပတ်သက်မှုကို လာမည့် စက်တင်ဘာလတွင် ကုလသမဂ္ဂတွင် စမ်းသပ်မည်ဖြစ်သည်။

“NUG က လျှပ်တပြက်ဆန္ဒသူတွေရဲ့ ထောက်ခံမှုရှိနိုင်တယ်။အကုန်လုံးမဟုတ်ပေမယ့် အချို့ဒေသခံ လူမှုအသိုက်အဝန်းတွေ၊ ပြည်သူကာကွယ်ရေးတပ်တွေနဲ့ စစ်ကောင်စီတပ်တွေလက်မှာ ရက်စက်ကြမ်းကြုတ် လူမဆန်တဲ့လုပ်ရပ်တွေကို ခံစားနေရတဲ့ ပြည်သူတွေရဲ့ထောက်ခံမှုရှိတယ်။ဒေါက်တာဆာဆာ ပြောတဲ့အတိုင်း သူတို့က e-government ပဲ ဖြစ်နေသေးတယ်” ဟု ဝါရှင်တန်တက္ကသိုလ်မှ မြန်မာ့အရေးကျွမ်းကျင်သူ မာရီကယ် လာဟန် ပြောသည်။

Linko
Ref : Al Jazeera: Six months after Myanmar coup, battle for diplomatic recognition
သြဂုတ် - ၆