【 အလှအပနှင့်ကျန်းမာရေး 】မေးခိုင်ရောဂါအကြောင်းသိကောင်းစရာ
မေးခိုင်ရောဂါဆိုတာကတော့ ဘက်တီးရီးယားပိုးကြောင့်ဖြစ်တဲ့ ရောဂါဖြစ်ပါတယ်။ခန္ဓာကိုယ်ထဲကို မေးခိုင်ပိုးဝင်ရောက်ပါက မေးရိုးမှာရှိတဲ့ကြွက်သားများတောင့်သွားခြင်းကြောင့် မေးခိုင်ရောဂါလို့ခေါ်ကြတာဖြစ်ပါတယ်။
မေးခိုင်ပိုးဝင်ရောက်ပါက ခန္ဓာကိုယ်အတွင်းရှိ အာရုံကြောစနစ်ကို ထိခိုက်စေပါတယ်။မေးခိုင်ပိုးကြောင့် ကြွက်သားများကိုတောင့်သွားစေနိုင်ပြီး အသက်ရှူကြွက်သားများကို ထိခိုက်ခြင်းကြောင့် အသက်အန္တရာယ်ရှိတဲ့ ရောဂါတစ်မျိုးဖြစ်ပါတယ်။
မေးခိုင်ရောဂါရဲ့လက္ခဏာတွေကတော့
- ခေါင်းကိုက်ခြင်း
- မေးရိုးရှိကြွက်သားများတောင့်ခြင်းကြောင့်မေးရိုးလှုပ်မရခြင်း
- လည်ပင်းရှိကြွက်သားများတောင့်ခြင်း
- အစာမျိုပြွန်ရှိကြွက်သားများတောင့်ခြင်းကြောင့် အစာမျို၍မရခြင်း
- ဝမ်းဗိုက်ကြွက်သားများတောင့်ခြင်း
- တက်ခြင်း
- အသက်ရှူရခက်ခဲခြင်း-စတဲ့ရောဂါလက္ခဏာတွေခံစားရနိုင်ပါတယ်။
မေးခိုင်ရောဂါ ဘယ်လိုကနေကူးစက်နိုင်သလဲ?
မေးခိုင်ရောဂါပိုးဟာ အောက်ဆီဂျင်မရှိသော အခြေအနေမှာပွားများနိုင်တဲ့ရောဂါပိုးအမျိုးအစားဖြစ်ပါတယ်။
မေးခိုင်ပိုးကူးစက်နိုင်တဲ့အခြေအနေတွေကတော့
- ခန္ဓာကိုယ်ရှိ ဒဏ်ရာတွင်မြေကြီး၊ရွှံ့စသော အညစ်အကြေးများဝင်ရောက်ခြင်း
- သံစူးခြင်းကဲ့သို့သောခန္ဓာကိုယ်တွင်နက်သောဒဏ်ရာ၊ကြီးမားသောဒဏ်ရာရခြင်း
- တိရစ္ဆာန်အကိုက်ခံရခြင်း (ခွေးကိုက်ခံရခြင်း)
- မီးလောင်ဒဏ်ရာ
- ခန္ဓာကိုယ်အပြင်ဘက်သို့ဖောက်၍အရိုးကျိုးခြင်း
- မသန့်ရှင်းသောခွဲစိတ်ကုသမှုမှတစ်ဆင့်မေးခိုင်ပိုးဝင်ခြင်း
- မသန့်ရှင်းသောသွားကုသခြင်းကြောင့် မေးခိုင်ပိုးဝင်ခြင်း
- မွေးကင်းစကလေးငယ်များတွင် ချက်ကြိုးမှမေးခိုင်ပိုးဝင်ခြင်း
- မသန့်ရှင်းသောဆေးထိုးအပ်၊ဆေးထိုးပြွန်များသုံးစွဲခြင်း စတာတွေကြောင့် မေးခိုင်ရောဂါကူးစက်နိုင်ပါတယ်။
မေးခိုင်ရောဂါဖြစ်ပြီဆိုပါက အသက်ရှူကြွက်သားများထိခိုက်ခြင်းကြောင့် အသက်အန္တရာယ်ဆုံးရှုံးရနိုင်ပါတယ်။
ဒါကြောင့် မေးခိုင်ပိုးမဝင်အောင်ကြိုတင်ကာကွယ်ဖို့ အရေးကြီးပါတယ်။
မေးခိုင်ပိုးမဝင်ရောက်အောင်
- ကလေးငယ်များတွင်မေးခိုင်ကာကွယ်ဆေးထိုးနှံပေးခြင်း
- ကိုယ်ဝန်ဆောင်မိခင်ကို မေးခိုင်ကာကွယ်ဆေးထိုးနှံပေးခြင်း
- ခန္ဓာကိုယ်တွင်ကြီးမားသောနက်သောဒဏ်ရာများနှင့်၊ မေးခိုင်ရောဂါပိုးဝင်ရောက်နိုင်သောအခြေအနေများတွင် မေးခိုင်ကာကွယ်ဆေးထိုးနှံရန်လိုအပ်ပါတယ်။
သတိပြုရမယ့်အချက်တွေကတော့
- မိမိခန္ဓာကိုယ်တွင်ဒဏ်ရာရရှိပါက ရေနှင့်ဆပ်ပြာအသုံးပြု၍ ဒဏ်ရာကိုသေချာစွာဆေးကြောသန့်စင်ပါ။
- ဒဏ်ရာကို သန့်ရှင်းသောပတ်တီးစဖြင့်ဖုံးအုပ်၍နီးစပ်ရာ ဆေးရုံ၊ဆေးခန်းသို့သွားရောက်ပြသပြီးကုသမှုခံယူပါ။
- ဒဏ်ရာအတွင်းသို့ အခြားသောအရည်များ၊ဆီများလောင်းခြင်း၊ အမှုန့်များသိပ်ခြင်း ကိုရှောင်ကြဉ်ပါ။
(ဒဏ်ရာအတွင်းသို့ မေးခိုင်ပိုးသာမက၊အခြားသောဘက်တီးရီးယားပိုးမွှားများဝင်ရောက်နိုင်တာဖြစ်လို့ရှောင်ကြဉ်ဖို့လိုပါတယ်။)
Dr.Phyu
Photo credit - freepik