【 အလှအပနှင့်ကျန်းမာရေး 】သိုင်းရွိုက်ဟော်မုန်းများခြင်း(Hyperthyroidism)
သိုင်းရွိုက်ဂလင်း (Thyroid Gland)ဆိုတာကတော့ လည်ပင်းအရှေ့မှာရှိပြီး သိုင်းရွိုက်ဟော်မုန်း (Thyroid Hormone)ထုတ်လုပ်ပေးတဲ့ လိပ်ပြာပုံသဏ္ဌာန် အင်္ဂါအစိတ်အပိုင်းတစ်ခုပဲဖြစ်ပါတယ်။
သိုင်းရွိုက်ဟော်မုန်းကတော့ခန္ဓာကိုယ် အပူချိန်၊သွေးဖိအား၊နှလုံးခုန်နှုန်း စတဲ့ဇီဝကမ္မဖြစ်စဉ်တွေကို ထိန်းချုပ်ပေးတဲ့ဟော်မုန်းအမျိုးအစားဖြစ်ပါတယ်။
သွေးထဲမှာရှိတဲ့ သိုင်းရွိုက်ဟော်မုန်းပမာဏဟာ ပုံမှန်ထက်ပိုများနေမယ်ဆိုရင်တော့ သိုင်းရွိုက်ဟော်မုန်းများသော ရောဂါဖြစ်စေပါတယ်။
ရောဂါလက္ခဏာတွေကတော့
- နှလုံးခုန်နှုန်းမြန်ခြင်း၊ရင်တုန်ခြင်း
- လက်တုန်ခြင်း
- ကိုယ်အလေးချိန်ကျဆင်းခြင်း
- အစားစားချင်စိတ်များခြင်း၊အလွန်အမင်းစားသောက်ခြင်း
- ရာသီဥတုပူသောဒဏ်ကိုခံနိုင်ရည်မရှိခြင်
- အလွန်အမင်းချွေးထွက်ခြင်း
- လက်ဖဝါးပူနွေးစိုစွတ်ခြင်း
- ပင်ပန်းနွမ်းနယ်ခြင်း၊ကြွက်သားများအားနည်းခြင်း
- အမျိုးသမီးများတွင်ဓမ္မတာမမှန်ခြင်း
- စိတ်တိုလွယ်၊ဒေါသထွက်လွယ်ခြင်း
- ဝမ်းမကြာခဏသွားခြင်း
- ပုံမှန်ထက်ပို၍မျက်လုံးပြူးလာခြင်း
- လည်ပင်းကြီးခြင်း
(လည်ပင်းရှိသိုင်းရွိုက်အရွယ်အစားကြီးလာပါက အသက်ရှူလမ်းကြောင်းကိုဖိခြင်းကြောင့် အသက်ရှူရ ခက်ခဲခြင်း၊အစာပြွန်ကိုဖိခြင်းကြောင့် အစာမျိုရခက်ခဲခြင်း) စတဲ့ရောဂါလက္ခဏာတွေကို ခံစားရနိုင်ပါတယ်။
သိုင်းရွိုက်ဟော်မုန်းများသောရောဂါကိုစစ်ဆေးဖို့အတွက်
- ရောဂါရာဇဝင်မေးမြန်းခြင်း၊စမ်းသပ်စစ်ဆေးခြင်းများအပြင်
- သွေးတွင်းသိုင်းရွိုက်ဟော်မုန်းပမာဏတိုင်းတာခြင်း
- သိုင်းရွိုက်ဂလင်းကို အာထရာဆောင်းရိုက်ခြင်း
- ရေဒီယိုအိုင်အိုဒင်းသိုင်းရွိုက် (Radioiodine Scan)စစ်ဆေးခြင်း စတဲ့နည်းလမ်းတွေနဲ့စစ်ဆေးနိုင်ပါတယ်။
သိုင်းရွိုက်ဟော်မုန်းများတဲ့ရောဂါကိုဘယ်လိုကုသမလဲ?
သိုင်းရွိုက်ဟော်မုန်းများခြင်းကို
- ဆေးဝါးများဖြင့်ကုသခြင်း
- ရေဒီယိုအိုင်အိုဒင်း( Radioiodine)ဖြင့်ကုသခြင်း
- ခွဲစိတ်ကုသခြင်း စတဲ့နည်းလမ်းတွေနဲ့ကုသနိုင်ပါတယ်။
သိုင်းရွိုင်ဟော်မုန်းများသောရောဂါကိုမကုသဘဲထားပါက
- နှလုံးခုန်နှုန်းမမှန်ခြင်း၊နှလုံးအားနည်းခြင်း
- လေဖြတ်ခြင်း
- အရိုးပွခြင်း
- မျက်စိအမြင်အာရုံထိခိုက်ခြင်း စတဲ့နောက်ဆက်တွဲဆိုးကျိုးတွေခံစားရနိုင်ပါတယ်။
အရေးကြီးတဲ့အချက်ကတော့ သိုင်းရွိုက်ဟော်မုန်းဟာများလွန်းလျှင်လည်းရောဂါဖြစ်စေနိုင်သလို နည်းလွန်းလျှင်လည်းရောဂါဖြစ်စေနိုင်ပါတယ်။ဒါကြောင့် သိုင်းရွိုက်ရောဂါရှိသူတွေအနေနဲ့ မိမိရဲ့သိုင်းရွိုက်ဟော်မုန်းပမာဏကို ပုံမှန်အတွင်းရှိစေဖို့ ဆေးပုံမှန်သောက်ပြီး၊ဟော်မုန်းဆရာဝန်နဲ့ပုံမှန်စစ်ဆေးကုသမှုခံယူ ဖို့လိုပါတယ်။
Dr.Phyu
Photo credit- Houston Sinus Surgery