【 အလှအပနှင့်ကျန်းမာရေး 】“ Tomato Flu (ခရမ်းချဉ်သီးတုပ်ကွေး)”
ဒီအပတ်မှာတော့ ခရမ်းချဉ်သီးတုပ်ကွေးလို့ခေါ်ကြတဲ့ Tomato Flu အကြောင်းပြောပြပေးချင်ပါတယ်။
ဘာလို့ ခရမ်းချဉ်သီးတုပ်ကွေးလို့ခေါ်ရလဲဆိုတော့ ခန္ဓာကိုယ်ပေါ်မှာခရမ်းချဉ်သီးပုံစံနဲ့တူတဲ့ အနီရောင်အဖုလေးတွေပေါက်လာတာဖြစ်လို့ ခရမ်းချဉ်သီးတုပ်ကွေးလို့ခေါ်တာဖြစ်ပါတယ်။
ခရမ်းချဉ်သီးတုပ်ကွေးဟာအခု အိန္ဒိယနိုင်ငံမှာ ဖြစ်ပွားနေတဲ့ ရောဂါဖြစ်ပါတယ်။
အိန္ဒိယနိုင်ငံတောင်ပိုင်း ပြည်နယ်တစ်ခုက ကလေးတွေမှာစတင်ဖြစ်ပွားတာဖြစ်ပါတယ်။
ခရမ်းချဉ်သီးတုပ်ကွေးရဲ့ရောဂါလက္ခဏာတွေကတော့ သွေးလွန်တုပ်ကွေး၊ဆင်တုပ်ကွေး၊Hand-Foot-Mouth disease လို့ခေါ်တဲ့ ကလေးတွေမှာဖြစ်တဲ့ လက်ဖဝါး-ခြေဖဝါး-ပါးစပ် လို့ခေါ်တဲ့ရောဂါ စတဲ့ရောဂါလက္ခဏာတွေနဲ့ဆင်တူပါတယ်။
ရောဂါလက္ခဏာတွေကတော့
၁- ကိုယ်အပူချိန်မြင့်ခြင်း
၂- ပင်ပန်းနွမ်းနယ်ခြင်း
၃- ခန္ဓာကိုယ်တွင် နာကျင်သော အနီရောင်အရည်ကြည်ဖုများပေါက်ခြင်း
၄- ဝမ်းလျှောခြင်း
၅- အော့အန်ခြင်း
၆-ခန္ဓာကိုယ်ကိုက်ခဲခြင်း
၇- ခြေဆစ်လက်ဆစ်များရောင်ရမ်းခြင်း စတဲ့ရောဂါလက္ခဏာတွေခံစားရနိုင်ပါတယ်။
ခရမ်းချဉ်သီးတုပ်ကွေးဟာ ဗိုင်းရပ်စ်ကြောင့်ဖြစ်တဲ့ရောဂါတစ်မျိုးဖြစ်ပြီးကလေးတွေမှာအဓိက ကူးစက်ဖြစ်ပွားတဲ့ရောဂါဖြစ်ပါတယ်။
ခရမ်းချဉ်သီးတုပ်ကွေးဟာ အခြားတုပ်ကွေးရောဂါများကဲ့သို့ ပဲ လျင်မြန်စွာ ကူးစက်ပျံ့နှံ့နိုင်ပါတယ်။
ဒါကြောင့် ရောဂါလက္ခဏာခံစားနေရပြီဆိုရင်တော့ ၅ ရက် မှ ၇ ရက်ခန့် သီးခြားနေထိုင်ဖို့လိုပါတယ်။
ခရမ်းချဉ်သီးတုပ်ကွေးရောဂါကိုဘယ်လိုကုသရမလဲ?
ခရမ်းချဉ်သီးတုပ်ကွေးရာဂါကုသဖို့အတွက်သီးသန့်ဆေးဝါးရယ်လို့တော့မရှိပါဘူး။ ဆင်တုပ်ကွေးနဲ့သွေးလွန်တုပ်ကွေးရောဂါကဲ့သို့ပဲ အနားယူခြင်း၊ ရေဓါတ်ဖြည့်တင်းပေးခြင်း၊အဖျားကျဆေးများပေးခြင်းစတဲ့
ရောဂါလက္ခဏာသက်သာစေတဲ့ နည်းလမ်းများနဲ့ကုသနိုင်ပါတယ်။
ခရမ်းချဉ်သီးတုပ်ကွေးမကူးစက်အောင်ဘယ်လိုကာကွယ်ကြမလဲ?
ယခုအချိန်ထိတော့ခရမ်းချဉ်သီးတုပ်ကွေးရဲ့ကာကွယ်ဆေးတော့ မပေါ်ပေါက်သေးပါဘူး။
ရောဂါကူးစက်ပုံဟာ Hand-Foot-Mouth disease လို့ခေါ်တဲ့ ကလေးတွေမှာဖြစ်တဲ့ လက်ဖဝါး-ခြေဖဝါး-ပါးစပ် လို့ခေါ်တဲ့ရောဂါကူးစက်ပုံခြင်းဆင်တူပါတယ်။
ရောဂါကူးစက်မခံရအောင်
- တစ်ကိုယ်ရည်သန့်ရှင်းရေးကိုနေ့စဉ်ပြုလုပ်ပါ။
- ရောဂါကူးစက်ခံထားရသူများနှင့် ခပ်ခွာခွာနေထိုင်ပါ။
- ရောဂါဖြစ် နေသူ၏ခန္ဓာကိုယ်ရှိအနီရောင်အဖုများကိုထိတွေ့ကိုင်တွယ်ခြင်းကိုရှောင်ကြဉ်ပါ။
- ကလေးတွေမှာအဓိကဖြစ်ပွားတာဖြစ်လို့ရောဂါရှိနေသောကလေးငယ်၏ကစားစရာ၊အသုံးအဆောင်ပစ္စည်းများကိုထိတွေ့ခြင်းကို
ရှောင်ကြဉ်ပါ။
- ရေများများသောက်ပါ။
- အာဟာရပြည့်ဝအောင်စားသောက်ပါ။
- အိပ်ရေးဝဝအိပ်ပါ။
- ကလေးငယ်များ၏ကစားစရာ၊အသုံးအဆောင်ပစ္စည်းများကို မကြာခဏသန့်ရှင်းရေးပြုလုပ်ပေးပါ။
မိမိကလေးမှာခရမ်းချဉ်သီးတုပ်ကွေးရောဂါခံစားနေရတယ်လို့သံသယရှိပါက တတ်ကျွမ်းနားလည်တဲ့ ဆရာဝန်ထံမှာသွားရောက်ပြသပြီး ကုသမှုခံယူပါလို့တိုက်တွန်းလိုပါတယ်။
Dr.Phyu
Photo credit-The Sun