【 အလှအပနှင့် ကျန်းမာရေး 】 ဆီးချိုအကြိုအဆင့်နဲ့ ဆီးချိုရောဂါက အတူတူပဲလား ?

ဆီးချိုအကြိုအဆင့်ဆိုတာကတော့ ဆီးချိုရောဂါမဖြစ်ခင် ကြားကာလအဆင့်ကို ခေါ်တာဖြစ်ပါတယ်။

သွေးတွင်းသကြားဓာတ်က ပုံမှန်ရှိသင့်တဲ့ပမာဏထက် များပေမယ့် ဆီးချိုရောဂါဖြစ်တဲ့အဆင့်ထိ မရောက်သေးတဲ့ ကြားအခြေအနေကို ဆီးချိုအကြိုလို့ ခေါ်ကြတာဖြစ်ပါတယ်။

ဆီးချိုအကြိုအဆင့်မှာ ဆေးဝါးများနဲ့ကုသဖို့ မလိုသေးဘဲ နေထိုင်မှုပုံစံပြုပြင်ပြောင်းလဲခြင်းနဲ့ အဓိက ကုသလေ့ရှိပါတယ်။

           သွေးတွင်းသကြားဓာတ်ပမာဏ ဘယ်လောက်ရှိရင် ဆီးချိုအကြိုအဆင့်လို့ သတ်မှတ်တာပါလဲ ?

မနက်စာမစားမီ သွေးတွင်းသကြားဓာတ် ၁၀၀ - ၁၂၅ ကြား၊
နေ့လယ်စာ/ညစာစားပြီး ၂ နာရီအကြာတွင်ရှိသော သွေးတွင်းသကြားဓာတ် ၁၄၀-၁၉၉ ကြား၊ HbA1c - ၅.၇-၆.၄ ကြား ပမာဏကို ဆီးချိုအကြိုအဆင့်လို့ သတ်မှတ်ပါတယ်။

           ဆီးချိုအကြိုအဆင့်မှာ ဘယ်လိုလက္ခဏာတွေ ပြနိုင်သလဲ ?

ဆီးချိုအကြိုအဆင့် အခြေအနေဟာ များသောအားဖြင့် လက္ခဏာမပြတတ်ဘဲ ကျန်းမာရေးစစ်ဆေးမှုပြုလုပ်ခြင်း၊ သွေးတွင်းသကြားဓာတ်စစ်ဆေးခြင်းကနေ သိရှိကြတာများပါတယ်။

ဆီးချိုအကြိုအဆင့်ကနေ ဆီးချိုရောဂါဖြစ်ပြီဆိုရင်တော့ -
           -    ဆီးမကြာခဏသွားခြင်း
           -    ရေငတ်ခြင်း၊ ရေမကြာခဏ‌သောက်ခြင်း
           -    များများစားသော်လည်းဆာလောင်ခြင်း
           -    ပင်ပန်းနွမ်းနယ်ခြင်း
           -    ခြေ၊ လက်များ ထုံကျဉ်ခြင်း
           -    အနာမကျက်ခြင်း
           -    ကိုယ်အလေးချိန်ကျဆင်းခြင်း
           -    မျက်စိအမြင်အာရုံဝေဝါးခြင်း စတဲ့ လက္ခဏာတွေ ခံစားရနိုင်ပါတယ်။

           ဘယ်လိုလူတွေမှာ ဆီးချိုအကြိုအဆင့် ဖြစ်နိုင်ခြေများပါသလဲ ?

           -    အသက်အရွယ်ကြီးသူများ
           -    အဝလွန်သူများ
           -    ကိုယ်လက်လှုပ်ရှားမှုနည်းသူများ
           -     မိသားစုမျိုးရိုးထဲတွင် ဆီးချိုရောဂါရှိသူများ
           -    ကိုယ်ဝန်ဆောင်ဆီးချိုရောဂါဖြစ်ဖူးသူများ
           -    Polycystic Ovary Syndrome (PCOS) လို့ခေါ်တဲ့
           သားဥအိမ်တွင် အရည်အိတ်ရှိသူများ
           -    Obstructive sleep apnea (OSA) လို့ခေါ်တဲ့ အိပ်တဲ့အချိန်မှာ
           အသက်ရှူပိတ်သောရောဂါရှိသူများ
           -    ဆေးလိပ်သောက်သူများ
           -    သွေးတိုးရောဂါ၊ သွေးတွင်းအဆီများခြင်း စသော ရောဂါရှိသူများ
           -    သွေးတွင်း သကြားဓာတ်များစေသော ဆေးဝါးများ သောက်သုံးနေသူများ (ဥပမာ - စတီးရွိုက်ပါသော ဆေးများ) စတဲ့သူတွေမှာ ဖြစ်နိုင်ခြေများပါတယ်။

           ဆီးချိုအကြိုအဆင့်ကို ဘယ်လိုကုသမှုခံယူရမလဲ ?

ဆီးချိုအကြိုအဆင့်ဖြစ်နေသူတွေအနေနဲ့ အစား‌အသောက်၊ အနေအထိုင် ပြုပြင်ပြောင်းလဲမှု ပြုလုပ်မယ်ဆိုရင်တော့ ဆီးချိုရောဂါအဖြစ် မပြောင်းသွားအောင် ထိန်းထားနိုင်ပါတယ်။

ဒါကြောင့် -
           -    ကိုယ်လက်လှုပ်ရှားမှု နေ့စဉ်ပြုလုပ်ပါ။
           -    ချိုသောအစားအစာများ စားသုံးခြင်းကို ရှောင်ကြဉ်ပါ။
           -    ဟင်းသီးဟင်းရွက် များများစားပါ။
           -    အဝမလွန်အောင် ဂရုစိုက်ပါ။
           -    သွေးတွင်းအဆီများသူများ၊ သွေးတိုးရောဂါရှိသူများအနေနဲ့ ဆရာဝန်နဲ့တိုင်ပင်ပြီး ကုသမှုခံယူပါ။
           -    ဆေးလိပ်သောက်ပါက ဆေးလိပ်ဖြတ်ပါ။
           -    OSA လို့ခေါ်တဲ့ အိပ်ချိန်မှာ အသက်ရှူပိတ်တတ်သောရောဂါရှိသူတွေအနေနဲ့ ဆရာဝန်နဲ့တိုင်ပင်ပြီး ကုသမှုခံယူပါ။
           -    မိမိရဲ့ သွေးတွင်းသကြားဓာတ်ပမာဏကို မကြာခဏစစ်ဆေးပါ။
           -    ဆီးချိုအကြိုအဆင့်ရှိသူတွေဟာ ဆီးချိုရောဂါ ဖြစ်နိုင်ခြေများသူများဖြစ်လို့ ဆရာဝန်နဲ့ ပုံမှန်ပြသပြီး စစ်ဆေးမှုခံယူနေဖို့ လိုပါတယ်။
           -    အစားအသောက် အနေအထိုင်ပြောင်းလဲပြီးတဲ့နောက်မှာ သွေးတွင်း သကြားဓာတ်မထိန်းနိုင်ဘူးဆိုရင်တော့ ဆေးဝါးကုသမှု လိုအပ်မှာဖြစ်ပါတယ်။

Dr.Phyu
Photo Credit - freepik