【 ပြည်တွင်း 】အချိန်ပိုင်း ပြန်လည်ရောင်းချခွင့်ပြုထားသည့် မန္တလေး သီရိမာလာငါးဈေးအရောင်းအဝယ် အေးစက်နေ

ရေထွက်ကုန်ပစ္စည်းတွေဖြစ်တဲ့ ငါး၊ ပုစွန် အဓိက လက်ကား ဖြန့်ဖြူး ရောင်းချနေတဲ့ မန္တလေးမြို့ အောင်မြေသာစံမြို့နယ် ကမ်းနားလမ်းရှိ သီရိမာလာဈေးကို အချိန်ပိုင်းဖြင့် ပြန်လည်ရောင်းချခွင့်ပြုလျက်ရှိရာ လာရောက်ဝယ်ယူ သူနည်းပါးတဲ့အတွက် အရောင်းအဝယ် အေးနေတယ်လို့ သိရပါတယ်။ 

 

လက်ရှိမှာ သီရိမာလာငါးဈေးကို ပြန်လည်ဖွင့်လှစ်ထားသော်လည်း ကိုဗစ်ကာလဖြစ်တဲ့အတွက် ဈေးသို့လာ ရောက်ဝယ်သူ အရေအတွက်မှာ ပုံမှန်ထက်နည်းပါးသလို အချိန်ပိုင်းဖြင့်ဖွင့်လှစ်ရသည့်အတွက် အရောင်းအဝယ် မှာလည်း ပုံမှန်ထက်ကျဆင်းနေခြင်းဖြစ်တယ် လို့  ရွှေပင်လယ်ငါးပုစွန်ရောင်းဝယ်ရေးလုပ်ငန်း  ပိုင်ရှင် ဦးဝင်းညွန့်က ပြောပါတယ်။ 

 

“ဈေးကွက်အခြေနေမှာ အရောင်းအဝယ်က အေးတာပေါ့။ ဆိုင်တွေကလည်းအခုမှ ပြန်ဖွင့်တာဆိုတော့ လာမဝယ် ကြသေးဘူး။အခုဈေးတွေပြန်ဖွင့်ပေမယ့် လူတွေက မသွားရဲမလာရဲကြသေးတော့ဝယ်တဲ့သူနည်းတာပေါ့။ နောက်ပြီး ပင်လယ်ထွက်ကုန်ပစ္စည်းက ဒီရာသီမှာရှားတယ်။ ရှာရခက်တော့ ဒီကိုရောက်ရင် ဈေးကမြင့်သွားတယ်။ ရခိုင် က နေလာတာဆိုတော့ လမ်းစရိတ်ကလည်းကြီးတာပေါ့။ ဒီကာလက ပုံမှန်ထက် ရောင်းအားကျတယ်။ ထက်ဝက် နီးပါးကိုကျသွားတယ်။ ပင်လယ်ထွက်ကုန် အဓိကသုံးတာက စားသောက်ဆိုင်တွေပေါ့။ ပင်လယ်ထွက်ကုန်ကို ကျွန်တော်တို့ဆီမှာ ဟော့ပေါ့ဆိုင်တွေက သုံးတာများတယ်။ စားသောက်ဆိုင်တွေ ပိတ်ထားရတော့ အရောင်းအဝယ်က တစ်ဝက်လောက်ကျတယ် ။ ဈေးဖွင့်ချိန်ကလည်း အကန့်အသတ်ရှိတော့ ရောင်းဖို့အချိန်သိပ်မရတော့ အရင်လောက်မရောင်းရဘူးပေါ့” လိုပြောခဲ့ပါတယ်။

 

COVID-19 ကူးစက်ဖြစ်ပွားသူဦးရေ များလာတဲ့အတွက် ကူးစက်မှု ထိန်းနိုင်ရန် သီရိမာလာဈေးကဈေးကို ၂၀၂၀ ခုနှစ် ဒီဇင်ဘာ ၁၂ရက်မှ ၁၈ရက်အထိ ယာယီပိတ်ခဲ့ရပြီး ပြန်လည်ရောင်းချခွင့်ပြုခဲ့တာ ဖြစ်ပါတယ်။ သီရိမာလာငါးဈေးကို ပုံမှန်အားဖြင့် ၂၄နာရီ ဖွင့်လှစ်ရောင်းချခွင့်ပြုခဲ့သော်လည်း လက်ရှိတွင် အချိန်အကန့်အသတ်ဖြင့် နံနက် ၄ နာရီမှ ၆နာရီအထိတစ်ကြိမ်နှင့် နံနက် ၁၁နာရီမှ ည ၈နာရီတစ်ကြိမ်ဖြင့် နှစ်ကြိမ် ဖွင့်လှစ်ရောင်းချခွင့် ပြုထားတယ်လို့ သိရပါတယ်။

 

သီရိမာလာဈေးမှာ လက်ကားဈေးကြီး ဖြစ်ကာ မန္တလေးမြို့အပြင် အထက်မြန်မာပြည်ရှိ မြို့များသို့လည်း တင်ပို့ ရောင်းချနေသည့် ဈေးတစ်ခုဖြစ်ပြီး လက်ရှိတွင် ဈေးအား စည်ပင်သာယာရေး ကော်မတီမှ တစ်ရက်လျှင် ဖွင့်လှစ် ချိန် နှစ်ချိန်ကန့်သတ်ကာ ဖွင့်လှစ်ခွင့်ပြုထားတာဖြစ်ပါတယ်။ 

 

သီရိမာလာဈေးတွင် ရေထွက်ကုန်နှင့် ပန်း၊ ဟင်းသီးရွက် လက်ကား‌ ရောင်းချသည့် ဆိုင်ခန်းပွဲရုံပေါင်း ၄၇၀ ကျော်ရှိ ကာ၊ ပျံကျဈေးသည်ပေါင်း ၂၀၀ ခန့်ကျော်ရှိတယ်လို့ သိရပါတယ်။ 

 

 

ကိုအောင်မှူး(မန္တလေး)

မန္တလေး၊ ဇန်နဝါရီ ၂၃

 

(  Zawgyi  )