【 နိုင်ငံတကာဆောင်းပါး 】 တရုတ်ကျန်းမာရေးလုပ်သားများကို အိုက်ခ်မန်းနှင့် ခိုင်းနှိုင်းခဲ့သည့် နယူးယောက်တိုင်းမ်စ်

【 နိုင်ငံတကာဆောင်းပါး 】 တရုတ်ကျန်းမာရေးလုပ်သားများကို အိုက်ခ်မန်းနှင့် ခိုင်းနှိုင်းခဲ့သည့် နယူးယောက်တိုင်းမ်စ်

နယူးယောက်တိုင်းမ်စ် သတင်းဌာနက ဇန်နဝါရီလ ၁၃ ရက်နေ့တွင် ဖော်ပြခဲ့သော သတင်းဆောင်းပါးတစ်ပုဒ်တွင် သတင်းထောက် လီယွမ်သည် တရုတ်၏ ရှီအန်းမြို့တွင် ကိုဗစ်-၁၉ ကူးစက်မှုကို အောင်မြင်စွာတိုက်ဖျက်နိုင်ခဲ့မှု နောက်ကွယ်တွင်ရှိနေသော ပြည်သူ့ကျန်းမာရေးနှင့် ဆေးဘက်ဆိုင်ရာဝန်ထမ်းများကို ဂျူးလူမျိုးများကို လူမျိုးတုန်းသတ်ဖြတ်ခြင်းကို ဦးဆောင်ခဲ့သည့် နာဇီခေါင်းဆောင် အက်ဒေါ့ဖ် အိုက်ခ်မန်းနှင့် ထပ်တူပြ ဖော်ပြခဲ့တာကို တွေ့ရပါတယ်။  

လူပေါင်း ၁၃ သန်း နေထိုင်သော ရှီအန်းမြို့တွင် ကိုဗစ်တိုက်ဖျက်ရေး ကမ်ပိန်းသည် အသက်တစ်ချောင်း ဆုံးရှုံးမှုမရှိဘဲ ကူးစက်မှု ၂,၀၀၀ ဖြင့် အဆုံးသတ်ထိန်းချုပ်နိုင်ခဲ့သည်။နာဇီခေါင်းဆောင် အိုက်ခ်မန်း၏ ဂျူးလူမျိုးများကို လူမျိုးတုန်းသတ်ဖြတ်ခြင်းသည် ဂျူးလူမျိုးသန်းချီ အသက်ဆုံးရှုံးခဲ့ရပါတယ်။

ထိုဆောင်းပါးတွင် အစုလိုက်အပြုံလိုက် ပိုးစစ်ဆေးခြင်း၊ ထိတွေ့မှုခြေရာခံခြင်း၊ သီးသန့်ခွဲထားခြင်း၊ ကာကွယ်ဆေးထိုးခြင်းမှ စတင်ပြီး လော့ခ်ဒေါင်းများကို အဆင်ပြေစေရန် ကူညီပေးနေသော တရုတ်လူမျိုးသန်းနှင့်ချီကာ ပစ်မှတ်ထားရေးသားထားခြင်းဖြစ်သည်။သို့သော် ထိုသူတို့၏ လုပ်ဆောင်ချက်များကြောင့် တရုတ်တွင် ကိုဗစ်ကူးစက်မှုမှာ တစ်သိန်းနှင့် သေဆုံးသူမှာ ၅ ထောင်အောက်သာ ရှိခဲ့ပါတယ်။

စီချွမ်ပြည်နယ် ချန်းဒူမြို့တွင်နေထိုင်ပြီး စာသင်ကြားနေသော ပီတာ ဟက်စလာ က ပထမဆုံး လော့ခ်ဒေါင်းနှင့်ပတ်သက်ပြီး သက်ဆိုင်ရာဝန်ထမ်းများ၏ အခန်းကဏ္ဍကို ဖော်ပြခဲ့ရာမှာ “ကျွန်တော်က မူဝါဒအသစ်တွေကို လူတွေကငြင်းဆန်ကြလားလို့မေးတော့ ကွန်မြူနစ်ပါတီရဲ့ လော့ခ်ဒေါင်းတာဝန်ခံက ခေါင်းခါပြတယ်။ ၉၀ ရာခိုင်နှုန်းက သဘောတူကြတယ်တဲ့။အဆင်မပြေဘူးလို့ထင်တဲ့ လူတွေတော့ရှိတာပေါ့။အချို့တွေက အပြင်ထွက်လိုတယ်။ဒါပေမဲ့ အများစုကတော့ စည်းကမ်းလိုက်နာကြတယ်” လို့ ဖြေပါတယ်။

“ကျွန်တော့်အမြင်ကတော့ သူချဲ့ကားပြီးပြောနေတာ မဟုတ်ဘူး။အားလုံးပူးပေါင်းဆောင်ရွက်ကြတာဟာ လော့ခ်ဒေါင်းစနစ်ရဲ့ အံ့အားသင့်ဖွယ်အဖြစ်ဆုံး အချက်ပဲ။ဝူဟန်မှာဆိုရင် အစိုးရဟာ ကူးစက်ရောဂါပညာရှင် အသင်းပေါင်း ၁,၈၀၀ ကို စေလွှတ်ခဲ့တယ်။တစ်သင်းမှာ အဖွဲ့ဝင် အနည်းဆုံးငါးဦးပါပြီး ကူးစက်ခံရသူတွေကို ခြေရာခံဖို့ဖြစ်တယ်။ကမ္ဘာ့ကျန်းမာရေးအဖွဲ့ရဲ့ အစီရင်ခံစာအရလည်း ကူးစက်မှုကို ထိန်းချုပ်နိုင်တာဟာ တရုတ်ပြည်သူတွေရဲ့ အတူပူးပေါင်းဆောင်ရွက်မှုကြောင့်ဖြစ်တယ်လို့ ဖော်ပြထားတယ်” လို့ ဆိုပါတယ်။

ထိုအချက်နှင့် လုံးဝဆန့်ကျင်ဘက်ဖြစ်နေတာက အိုက်ခ်မန်း၏ အကြောင်းကို ဝီကီပီးဒီးယားက ဖော်ပြထားတာပါ။ဝီကီပီဒီးယားမှာ “အိုက်ခ်မန်းနဲ့ သူ့ဝန်ထမ်းတွေဟာ ဂျူးလူမျိုးတွေကို ဓာတ်ငွေ့များနဲ့သတ်ဖြတ်မယ့် သုတ်သင်ရေးစခန်းတွေကို ပို့ဆောင်ခဲ့ရာမှာ တာဝန်ရှိပါတယ်။ဂျာမနီဟာ မတ်လ ၁၉၉၄ ခုနှစ်မှာ ဟန်ဂေရီကို ကျူးကျော်ခဲ့ပြီး အိုက်ခ်မန်းဟာ ဂျူးလူမျိုးတွေ နေရပ်ပြန်ပို့ခြင်းကို ဦးဆောင်ခဲ့ပါတယ်။အများစုကိုတော့ အော့ဇဝှစ် (Auschwitz) စခန်းကို ပြန်ပို့ခဲ့ပြီး ၇၅ ရာခိုင်နှုန်းဟာ ရောက်ရောက်ချင်းမှာပဲ သတ်ဖြတ်ခံရခဲ့ပါတယ်။

“ထိုကဲ့သို့ သယ်ယူပို့ဆောင်ခြင်းတွေကို ဇူလိုင်လ ၁၉၄၄ ခုနှစ်မှာ ရပ်တန့်လိုက်ချိန်မှာ ဟန်ဂေရီမှာရှိတဲ့ ဂျူးလူမျိုးပေါင်း ၇၂၅,၀၀၀ ဦးအနက် ၄၃၇,၀၀၀ ဦးဟာ သတ်ဖြတ်ခံရပြီးဖြစ်ပါတယ်။နောက်ပိုင်းမှာ စစ်ဆေးခံခဲ့ရတဲ့ အိုက်ခ်မန်းရဲ့ လက်ထောက်တစ်ဦးဖြစ်သူ ဒိုက်တာဝစ်လိုင်ဆန်ရဲ့ အဆိုအရ အိုက်ခ်မန်းဟာ လူပေါင်း ၅ သန်းလောက်ကို ချယ်လှယ်ကစားရတဲ့ စိတ်ကျေနပ်မှုဟာ အတိုင်းမသိကောင်းမွန်တာကြောင့် အုတ်ဂူထဲရောက်ရင်တောင် ရယ်မောနေနိုင်ကြောင်း ပြောခဲ့တယ်လို့ သိရပါတယ်” လို့ ဖော်ပြထားပါတယ်။

နယူးယောက်တိုင်းမ်စ်၏ လီယွမ် က ထိုအဖြစ်အပျက်နှစ်ခုကို မည်ကဲ့သို့များ ထပ်တူပြုနိုင်ပါသလဲ။ထိုကဲ့သို့ ဖော်ပြခဲ့သည့် သတင်းဆောင်းပါးကိုလည်း စစ်ဆေးသင့်ပါတယ်။  

ဆောင်းပါး၏ ခေါင်းစဉ်ကိုက  “တရုတ်၏ ကိုဗစ်သုညမူဝါဒကို ဖြစ်သည့်နည်းနှင့် အကောင်အထည်ဖော်နေသော သန်းချီပါဝင်သည့် စစ်တပ်” လို့ နယူးယောက်တိုင်းစ်မှာ  ဖော်ပြထားပါတယ်။

“အစိုးရမှာတော့ ကိုဗစ်သုညမူဝါဒကို မဖြစ် ဖြစ်တဲ့နည်းနဲ့ အကောင်အထည်ဖော်ပေးမယ့် လူမှုဝန်ထမ်းစစ်တပ်ရှိနေပါတယ်။ရှီအန်းတွင် ဖြစ်ပျက်ခဲ့သော ဝမ်းနည်းဖွယ်အဖြစ်အပျက်များအရ ကွာရန်တင်းစည်းမျဉ်းများကို အကောင်အထည်ဖော်နေသူများက ဘာကြောင့် ဒီလိုပြုမူရတာလဲဆိုတာနဲ့ပတ်သက်ပြီး တရုတ်ပြည်သူတွေ မေးခွန်းထုတ်လာကြပါတယ်” ဟု ဆောင်းပါးတွင် ဖော်ပြထားပါတယ်။

ဝမ်းနည်းဖွယ်အဖြစ်အပျက်များဆိုသည်ကို ဆောင်းပါးရှင်က အကြောင်းအရာသုံးမျိုးဖြင့် ဖော်ပြထားပါတယ်။

ပထမဖြစ်စဉ်က  ရင်ဘတ်နာနေသော အမျိုးသားတစ်ဦးကို ဆေးရုံတင်ရန် ခြောက်နာရီနောက်ကျခဲ့ခြင်းကြောင့် နှလုံးရောဂါဖြင့် သေဆုံးသွားခဲ့တာ။ဆေးရုံတင်ခွင့်ရရန် နောက်ကျရခြင်းမှာ ထိုအမျိုးသားနေထိုင်သော ခရိုင်က အလယ်အလတ်အဆင့် အန္တရာယ်ရှိသော နေရာဖြစ်နေပါတယ်။

ဒုတိယဖြစ်ရပ်မှာ ကိုဗစ်စစ်ဆေးချက်ကို အတည်မယူနိုင်ဘူးဟုဆိုကာ ဆေးရုံတင်ခွင့်နောက်ကျခဲ့သော ကိုယ်ဝန်သည်အမျိုးသမီးတစ်ဦး ကလေးပျက်ကျပြီးမှ ဆေးရုံတက်ခွင့်ရခဲ့ခြင်း။

တတိယဖြစ်စဉ်မှာ ညမထွက်ရအမိန့်ကို ချိုးဖောက်မိသော လူငယ်တစ်ဦးနှင့်  လုံခြုံရေးများ ခိုက်ရန်ဖြစ်ပွားခဲ့ခြင်း။

ပထမဖြစ်စဉ်နှစ်ခုမှာ ဝမ်းနည်းဖွယ်ဖြစ်ပြီး လက်မခံနိုင်သော အမှားဖြစ်ပါတယ်။တတိယတစ်ခုကမူ ဝေဖန်ရန်မှာ ခက်ခဲပါတယ်။သို့သော် သေစေလောက်သော ဒယ်လ်တာမျိုးကွဲ ပျံ့နှံ့မှုကြောင့် လူပေါင်းသန်းချီ ခြိမ်း ခြောက်ခံနေရသော မြို့တစ်မြို့မှာ အမှားအနည်းနှင့်အများတော့ရှိမည်မှာ အမှန်ပင်။ထိုဖြစ်စဉ်များကို အဆိုးဝါးဆုံးဖြစ်ရပ်ဟုဆိုနိုင်ပါက ရှီအန်း၏ ဆေးရုံများနှင့် ပြည်သူ့ကျန်းမာရေးအလုပ်သမားများကို ချီးကျူးရမည့် အခြေအနေဖြစ်ပါတယ်။

မည်သို့ပင်ဖြစ်စေ ထိုဖြစ်ရပ်များမှာ ဝမ်းနည်းဖွယ်ဖြစ်ပြီး လူမှုကွန်ရက်တွင် ဝေဖန်မှုများကြောင့် တာဝန်ရှိသူများက သက်ဆိုင်သူများကို အရေးယူဆောင်ရွက်ခဲ့ပါတယ်။လူများစွာက ဝေဖန်သောကြောင့် ဆေးရုံများကို ယာယီပိတ်ကာ လုပ်ငန်းစဉ်များကို စစ်ဆေးခဲ့ပြီး တာဝန်ရှိသူများကို အပြစ်ပေးခဲ့ပါတယ်။ဆေးရုံတစ်ရုံသည် မည်သို့အခြေအနေအောက်ရောက်နေပါစေ လူနာတစ်ဦးတစ်ယောက်ကိုမျှ ငြင်းဆိုခွင့်မရှိကြောင်း တစ်နိုင်ငံလုံးတွင် ကြေညာပြီးဖြစ်ပါတယ်။

ထိုဖြစ်စဉ်သုံးခုကို အခြေတည်ပြီး သက်ဆိုင်သော အချက်အလက်များကို လျစ်လျူရှုကာ သတင်းထောက် လီ က ဆက်လက်ရေးသားသည်မှာ ---

“တရုတ်ပညာရှင်တွေဟာ ရှီအန်းလိုမျိုး အရေးကိစ္စတွေကြုံသောအခါ ငြီးငွေ့စရာကောင်းအောင် မကောင်းဆိုးဝါးလုပ်ရပ်များကို လုပ်လေ့ရှိကြပါတယ်။ဒဿနပညာရှင် ဟန်နာ အရန့်ဒ် ဖော်ပြခဲ့သလို အက်ဒေါ့ဖ် အိုက်ခ်မန်းဟာ သာမန်လူတစ်ယောက်ဖြစ်ပေမယ့် တစ်ကိုယ်ရေကြီးပွားတိုးတက်မှုကို အသည်းအသန်ရှာဖွေသောကြောင့် ဂျူးလူမျိုးတုန်းသတ်ဖြတ်ခြင်းကို ပုံဖော်သည်အထိဖြစ်ခဲ့ရသော နာဇီခေါင်းဆောင်တစ်ဦး၏ အဖြစ်အပျက်နှင့် တူညီနေခြင်းဖြစ်ပါတယ်” ဟု ဆိုပါတယ်။

“လုပ်ငန်းခွင်မှာ ရာထူးတိုးလို၍ဖြစ်စေ၊ နာခံလိုက်နာပြီး မျက်နှာရချင်၍ဖြစ်စေ အာဏာရှင်မူဝါဒများကို အကောင်အထည်ဖော်လိုနေကြသော အရာရှိများနှင့် အရပ်သားများရှိနေသည်ကို တရုတ်ပညာရှင်များက နားလည်ထားကြပါတယ်” ဟုလည်း ရေးသားထားပါတယ်။

ထိုကဲ့သို့ နာမည်မဖော်ပြထားသော တရုတ်ပညာရှင်များက မည်သူတွေဖြစ်သလဲဆိုတာ မရှင်းလင်းပေ။တရုတ်၏ ကပ်ရောဂါကိုင်တွယ်ပုံကို ဂုဏ်ယူနေကြသော တရုတ်ပညာရှင်များ ပြည်တွင်းနှင့် ပြည်ပတွင် များစွာရှိသည်ကတော့ သေချာပါတယ်။

နိဂုံးချုပ်ပြောရလျှင် ဆောင်းပါး၏ ဆိုလိုရင်းကို ခေါင်းစဉ်တွင်ဖော်ပြထားပြီး သက်ဆိုင်ရာ ဥပမာအနည်းငယ်ဖြင့် ပုံဖော်ထားတာကို တွေ့ရပါတယ်။ထိုဥပမာများကို အခြေခံကြည့်လျှင် ဖြစ်စဉ်တစ်ခုလုံးကို ကိုယ်စားပြုနိုင်သည့်သဖွယ် ထင်မြင်ယူဆပြီး အချက်အလက်အမှန်နှင့် ဝေးကွာစွာ နိဂုံးချုပ်ထားပါတယ်။

လွန်ခဲ့သော နှစ်ပေါင်းများစွာက နိုအမ် ချွမ်စကီးဟုခေါ်သော ဘာသာဗေဒပညာရှင်တစ်ဦးက နယူးယောက်တိုင်းမ်စ်၏ ဆောင်းပါးများကို အဆုံးသတ်နေရာမှ စဖတ်ရန် အကြံပြုခဲ့သည်။အဆုံးသတ်တွင်သာ အမှန်တကယ်သော အချက်အလက်များကို ဖော်ပြထားသောကြောင့်ဖြစ်သည်။
တစ်ခါတစ်ရံတွင် နောက်ဆုံး၌ပင် အချက်အလက်အမှန်များကို ထည့်မထားသောကြောင့် ကြီးမားသော အလိမ်အညာစာတမ်းကြီးတစ်ခုသာ ဖြစ်သွားခဲ့ရသည်။

အဆိုးများအနက် ကောင်းမွန်သောအချက်များ အွန်လိုင်းတွင်ရေးသားထားသော မှတ်ချက်များသည် လီ၏ ဆောင်းပါးမှာ အခြေမဲ့ပြီး အဓိပ္ပာယ်မရှိကြောင်း ဖော်ပြနေသည်ကို တွေ့ရပါတယ်။အမေရိကန်ပြည်သူများသည် နယူးယောက်တိုင်းမ်စ် အယ်ဒီတာများ ယူဆသလို အလွယ်တကူ အလိမ်မခံကြပေ။အမေရိကန်၏ မီဒီယာများ အထူးသဖြင့် နယူးယောက်တိုင်းမ်စ်တွင် တရုတ်မကောင်းကြောင်းများ နေ့စဉ် မနားမနေ ရေးသားနေသည်မှာ ပဋိပက္ခနှင့် စစ်ပွဲအထိ ဦးတည်ပေးနိုင်သည်။

စာရေးဆရာ ကိတ်တလင်း ဂျွန်စတုန်း ပြောသကဲ့သို့ “ဗုံးမကြဲမီ စာနှင့်တိုက်ခိုက်သည်” ဟုပင် ဖြစ်နေပါတယ်။

နယူးယောက်တိုင်းမ်စ်သည် ယခုအချိန်တွင် တရုတ်ဆန့်ကျင်ရေးစာသားများနှင့် အမေရိကန်နှင့် တရုတ်တို့ကို ရန်တိုက်ပေးနေတာဖြစ်ပါတယ်။

နောက်ဆုံးတွင် မေးရမည်မှာ တရုတ်ဆန့်ကျင်ရေးကို အားပေးဖို့ ဘာကတွန်းအားဖြစ်စေသလဲဆိုသော အချက်ပင်။အမေရိကန်၏ ကမ္ဘာလုံးဆိုင်ရာလွှမ်းမိုးမှု ဆုံးရှုံးသွားမည်ကို ကြောက်ရွံ့၍လား သို့မဟုတ် သာမန်ထက်ထူးခြားသည်ဟု ယူဆနေသူများ၏ မိမိကိုယ်ကိုယ်သာ မှန်ကန်သည်ဟု မောက်မာနေခြင်းလား သို့မဟုတ် အသက်မွေးဝမ်းကြောင်း တိုးတက်စေရေးအတွက် မကောင်းသောအစီအစဉ်ဖြင့် ရိုးရှင်းစွာတွန်းတင်နေခြင်းဖြစ်ပါသလား။  

ဆွေဇင်
Ref : NYT equates China's health workers with Adolf Eichmann - Asia Times
ဇန်နဝါရီ - ၃၀