【 ဆောင်းပါး 】 အချိန်ကို ပိုင်နိုင်စွာ ထိန်းကွပ်စီမံပါ

လူတိုင်း သာတူညီမျှရထားတဲ့ ပိုင်ဆိုင်မှုလည်းဖြစ် အဖိုးအတန်ဆုံးလည်းဖြစ်တာကတော့ - တန်ဖိုးရှိရှိ အသုံးပြုလို့ရပေမယ့် သိမ်းဆည်းစုဆောင်းထားလို့မရတဲ့၊ ကုန်သွားရင် အစားပြန်မရတဲ့၊ မြတ်နိုးစွာ ထွေးပိုက်ထားချင်ပေမယ့် တားဆီးလို့မရ ကုန်လွန်သွားရင် ပြန်လိုချင်လို့ မရနိုင်တဲ့အရာ - အဲဒါကတော့ တစ်ရက်ကို ၂၄ နာရီ လူတိုင်းစေ့ အပိုအလိုမရှိ ညီညီမျှမျှရထားတဲ့ “အချိန်” ပဲ ဖြစ်ပါတယ်။

လူတစ်ဦးနဲ့ တစ်ဦး၊ အဖွဲ့အစည်းတစ်ခုနဲ့ တစ်ခု ပိုသာတယ်၊ ပိုအောင်မြင်တယ်ဆိုတာက အဲဒီအချိန်ကို ဘယ်လိုအသုံးပြုသလဲ၊ အသုံးချသလဲဆိုတာပေါ်မှာ မူတည်ပြီး ကွဲပြားသွားရတာပါ။ဒါကြောင့်လည်း ဒီအချက်ကိုသိတဲ့ ကျွန်တော်တို့အားလုံးဟာ အချိန်ကို ဘယ်လို ပိုင်ပိုင်နိုင်နိုင် အကျိုးရှိရှိ အသုံးချရမယ်ဆိုတာကို အချိန်လု လုပ်ရတယ်၊ အချိန်နဲ့ အပြေးပြိုင်ပြီး လုပ်ရတယ်ဆိုတဲ့ အသုံးအနှုန်းတွေနဲ့ အမောတကော ကြိုးကုပ်အားထုတ်ကြရတာဖြစ်ပါတယ်။ဒီလိုနဲ့ အချိန်ကုန်လူပမ်း အကျိုးမရှိဖြစ်ရတဲ့ အခြေအနေမျိုးကို ကျော်လွှားနိုင်ပြီး၊ အချိန်ကို အထိရောက်ဆုံး ပိုင်နိုင်စွာ ထိန်းကွပ်အသုံးချနိုင်အောင် ကိုယ်စွမ်းဉာဏ်စွမ်းရှိသမျှ ကြိုးစားအားထုတ်ကြရတာဖြစ်ပါတယ်။

အထိရောက်ဆုံး အသုံးချတတ်တဲ့ လူ၊ အဖွဲ့အစည်းက ပင်ပန်းတကြီး မလုပ်ရဘဲ သာသာယာယာနဲ့ အောင်မြင်မှု၊ ကြွယ်ဝမှု အသီးအပွင့်တွေကို ခံစား စံစားနိုင်ကြတာဖြစ်ပါတယ်။ဒီအတွက်လည်း “မိုးရွာတုန်း ရေခံ” ၊ “လသာတုန်း ဗိုင်းငင်” ၊ “အချိန်ရှိခိုက် လုံ့လစိုက်” ဆိုတဲ့ မြန်မာ့ဆိုရိုးစကားတွေ၊ လမ်းပြစကားတွေ ပေါ်ပေါက်လာခဲ့တာဖြစ်ပါတယ်။

အပြောလွယ်လျက် အလုပ်ခက်ဆိုသလို၊ “ဟုတ်ပါပြီ၊ ဒါဆိုရင် အချိန်ကို ဘယ်လိုအသုံးချပြီး အောင်မြင်ချမ်းသာတဲ့သူ၊ တိုးတက်အောင်မြင်တဲ့ အဖွဲ့အစည်းဖြစ်အောင် ဘယ်လိုလုပ်ရမှာတဲ့လဲ။”

အခုဆောင်းပါးမှာ အချိန်အတိုင်းအတာတစ်ခုအတွင်းမှာ အလုပ်များများ အောင်မြင်ပြီးဆုံးအောင် ဆောင်ရွက်နိုင်ရုံမက မိမိကိုယ်ပိုင်ဘဝအတွက် အချိန်နဲ့ အလုပ်ချိန် မျှတပြီး အရည်အသွေးကောင်းတဲ့ အချိန်ကို ကျွမ်းကျင်စွာ ကိုင်တွယ်စီမံနိုင်ဖို့အတွက် ကျွန်တော်လေ့လာခဲ့ပြီး လက်တွေ့အသုံးချ အောင်မြင်ခဲ့တဲ့ နည်းလမ်းတွေကို ဝေမျှပေးမှာဖြစ်ပါတယ်။

အချိန်ကို ထိရောက်အောင်မြင် ကျွမ်းကျင်စွာ ကိုင်တွယ်စီမံတာကို စကားလုံးနည်းနည်းနဲ့ အဓိပ္ပာယ်ဖွင့်ရရင်တော့ “သင့်အလုပ်တွေကို ခွဲခြမ်းစိတ်ဖြာပြီး တိကျတဲ့ အချိန်အကန့်အသတ် တစ်ခုချင်းစီမှာ ပြီးရမည့်အလုပ်တွေကို ကြိုတင်သတ်မှတ်ပြီး၊ အဲဒီသတ်မှတ်ချက်အတိုင်း ပြီးစီးအောင် လုပ်ကိုင်ခြင်း” လို့ ပြောရမှာဖြစ်ပါတယ်။အလုပ် အစနဲ့ အဆုံး ပြီးရမယ့်အချိန် (Deadline) ကို သတ်မှတ်ပြီး အဲဒီအချိန်အတွင်း လုပ်ဆောင်ရမယ့် လုပ်ငန်းအဆင့်ဆင့်ကို အရည်အသွေးပြည့်မီစွာ ပြီးဆုံးအောင် လုပ်ဆောင်သွားရမှာဖြစ်ပါတယ်။

           (၁) တိကျသေချာတဲ့ ပန်းတိုင် သတ်မှတ်ပါ။

တိကျတဲ့ ပန်းတိုင်မချဘဲ အလုပ် လုပ်ခြင်းဟာ အချိန်ဖြုန်းရာကျပြီး လိုချင်တဲ့ အရည်အသွေးရှိတဲ့ အောင်မြင်မှု မဖြစ်အောင် ကိုယ်တိုင်ဖန်တီးမိနေတဲ့ အတားအဆီးတစ်ခုဖြစ်ပါတယ်။တိကျသေချာတဲ့ ပန်းတိုင်ကို သတ်မှတ်တဲ့နေရာမှာ အကောင်းဆုံး စနစ်ကတော့ SMART Goal ပဲ ဖြစ်တယ်ဆိုတာ ထပ်မံသတိပေးလိုက်ပါတယ်။

“တိကျပြီး၊ တိုင်းတာလို့ရတဲ့၊ အောင်မြင်တန်ရာတဲ့၊ လက်တွေ့လုပ်ဆောင်နိုင်ရာတဲ့ ပန်းတိုင်ကို၊ လုပ်ရမယ့်အချိန် - ပြီးရမယ့်အချိန်နှင့်တကွ တိကျစွာ ချမှတ်ခြင်း” လို့ SMART Goal ကို နားလည်မှတ်သားနိုင်ပါတယ်။စိတ်ကူးယဉ်ဆန်ပြီး၊ ကြည့်ကောင်းအောင် တန်ဆာဆင်ထားပြီး လက်တွေ့မလုပ်ဆောင်နိုင်တဲ့ အထက်လူကြီးအကြိုက် ပန်းတိုင်ကို ချမှတ်လုပ်ဆောင်ခြင်းဟာ အချိန်ကို (လူနဲ့ လုပ်အားကို) အလဟဿဖြုန်းတီးခြင်းသက်သက်သာဖြစ်ပါတယ်။တစ်ခါတလေ မိမိပရောဂျက်အတွက် အရေးကြီး ချက်ခြင်းလုပ်ရမယ့် အလုပ်ကို လုပ်ရမယ့်အချိန် ပြီးရမယ့်အချိန်မှာ မပြီးနိုင်ဘဲ အခြားအရေးသိပ်မကြီးတဲ့ အလုပ်တွေ၊ ကြားဖြတ်အရေးပေါ် အလုပ်တွေနဲ့ပဲ အချိန်ကုန်ပြီး အကျိုးရလဒ်ကောင်းနဲ့ ဝေးရတာမျိုးကလည်း မလိုလားအပ်ပါဘူး။ကျွန်တော်လည်း လုပ်နေတာပဲ၊ အလုပ်တွေက ဝန်နဲ့အားနဲ့မမျှဘဲ မပြီးနိုင်တော့ဘူးဆိုတဲ့ ငြီးသံ၊ တောင်းပန်သံတွေကို အခါခါကြားဖူးနေတယ် မဟုတ်လား။သူတို့ကို စိတ်ပဲ ဆိုးရမလား၊ သနားပဲ သနားရမလား၊ မိမိကပဲ ခိုင်းမိတာ ငါ့အမှားပါလို့ ကိုယ့်ကိုယ်ကိုယ်ပဲ အပြစ်တင်ရမလား မသိဘဲ အကြံအိုက်ဖူးပါသလား။အခုပြောပြတဲ့ နည်းလေးတွေနဲ့ ဖြေရှင်းလိုက်ပါ။

           (၂) လုပ်ငန်းတာဝန်ကို အရေးကြီးမှုအလိုက် အဆင့်သတ်မှတ် လုပ်ဆောင်ပါ။

အရင်က ပြောပြခဲ့သလို မိမိလုပ်ရမယ့် လုပ်ငန်းကြီးကို လုပ်ငန်းတာဝန်အသေးလေးတွေ ဦးစားပေးအဆင့်အလိုက် ပိုင်းထုတ်လိုက်ပြီး၊ အဲဒီလုပ်ငန်းအဆင့်ဆင့်တွေက ဘယ်အလုပ်က ပထမဦးစားပေးဆောင်ရွက်ရမယ့် အလုပ်၊ ဘယ်အလုပ်က ဦးစားပေးဆောင်ရွက်စရာမလိုတဲ့ အလုပ် စသဖြင့် ပိုင်းခြားသတ်မှတ်ပြီး၊ ဘယ်အလုပ်ကို ဘယ်အချိန်မှာပြီးအောင် (ဘယ်သူက) လုပ်ရမယ်ဆိုတာကို တိတိကျကျ သတ်မှတ်ပြီး လုပ်ဆောင်ရမှာဖြစ်ပါတယ်။ (ဒီနည်းက ၃၄ ယောက်မြောက် အမေရိကန်သမ္မတ အိုင်စင်ဟောင်ဝါရဲ့ ထိရောက်လှတဲ့ နည်းဖြစ်ပြီး၊ ယနေ့ထိ ခေတ်မီအသုံးဝင်နေဆဲ နည်းစနစ်တစ်ခုဖြစ်ပါတယ်။ The Eisenhower four-quadrant, power matrix လို့ နာမည်ကျော်ပါတယ်။)

၁။    အရေးကြီး၊ ချက်ခြင်းလုပ်ရမယ့်အလုပ် - မိမိလုပ်ရမယ့် စီမံကိန်း (Project) ရဲ့ ဘယ်တာဝန်က အရေးကြီးပြီး ချက်ခြင်းလုပ်ရမယ့် အလုပ်၊ ဘယ်အချိန်မှာ ပြီးအောင်လုပ်ရမယ်ဆိုတာ သတ်မှတ်ပါ။ (မိမိကိုယ်တိုင်လုပ်ရမယ့် အလုပ်ဖြစ်ပါတယ်။)
၂။    အရေးကြီး၊ ချက်ခြင်း လုပ်စရာမလို - အချို့အလုပ်တွေက အရေးကြီးပေမယ့် အချိန်ပေးရမယ် ဒါမှမဟုတ် အခြေအနေတစ်ခုခု စောင့်ရဦးမယ် စတဲ့ အကြောင်းကြောင့် ချက်ခြင်းလုပ်စရာမလိုတဲ့ အလုပ်တွေ ပါပါတယ်။ (Plan သေချာ ရေးဆွဲပြီး နောင်မဖြစ်မနေဆောင်ရွက်ရမယ့် လုပ်ငန်းဖြစ်ပါတယ်။)
၃။    အရေးမကြီး၊ ချက်ခြင်းလုပ်ရမယ့်အလုပ် - အချို့အလုပ်တွေက မိမိလက်ရှိလုပ်နေတဲ့ Project အတွက် အရေးမကြီးပေမယ့် မိမိအထက်လူကြီးက (သူ့အတွက် အရေးတကြီး ချက်ခြင်းလိုအပ်လို့) ခိုင်းတဲ့ အလုပ်ဖြစ်လို့ ချက်ခြင်းလုပ်ရမယ့် အလုပ်အဖြစ် ချက်ခြင်းကြားဖြတ်လုပ်ဆောင်ရမှာဖြစ်တယ်။ Contingency Plan ဆိုပါတော့။ (အခြားသူကို မိမိကိုယ်စားလုပ်ပေးရန် တာဝန်လွှဲပြောင်းလုပ်နိုင်တဲ့ လုပ်ငန်းဖြစ်ပါတယ်။)
၄။    အရေးမကြီး၊ ချက်ခြင်းလုပ်စရာမလို - တေးမှတ်ထားပြီး၊ နောင်ဆင်ခြင်ကြည့်ပြီး လုပ်စရာမလိုတော့ရင် စာရင်းကနေ ဖယ်ထုတ်ပစ်လိုက်လို့ရတဲ့ လုပ်ငန်းဖြစ်ပါတယ်။

           (၃) အနှောင့်အယှက်များကို ရှောင်ရှားပါ။

မိမိမှာရှိတဲ့ လိမိတက်အချိန် (Limited time) တစ်နေ့ ၂၄ နာရီမှာ ၈ နာရီကို ရုံးအလုပ် (မိမိလုပ်ခလစာယူ တာဝန်ခံထားတဲ့ ကုမ္ပဏီ/ အဖွဲ့အစည်းရဲ့ အလုပ်) လုပ်ဖို့ သတ်မှတ်ထားပါတယ်။ဒီ ၈ နာရီမှာ ထမင်းစားချိန်၊ ဆေးလိပ်သောက်ချိန်၊ လ္ဘက်ရည်ကော်ဖီသောက်ချိန်၊ အခြား ဗာဟီရလုပ်ရတဲ့အချိန် စတာတွေ ဖဲ့ပေးရပါသေးတယ်။အဲဒီကြားထဲမှာ အလဟဿ အချိန်ဖြုန်းနေသလိုဖြစ်စေတဲ့ ကိစ္စတွေ ရှိလာနိုင်သေးပါတယ်။ဥပမာ - အရေးကြီးဖောက်သည်က ကုမ္ပဏီကို ကိစ္စရှိလို့လာရင်း မိမိကို ဝင်တွေ့နှုတ်ဆက်ပြီး အလာပသလာပပြောခြင်း (အားထားရတဲ့ ဖောက်သည်မို့ ငြင်းဖို့ကလည်း အခက်)၊ ငွေစာရင်းဌာနက စာရင်းတစ်ခုကို မရှင်းလို့ မိမိကိုလာတွေ့မေးမြန်းခြင်း၊ အထက်လူကြီးက သူခိုင်းထားတဲ့ကိစ္စနဲ့ပတ်သက်ပြီး သိချင်တာတွေ ခေါ်မေးခြင်း၊ စသဖြင့် မိမိအလုပ်ချိန်ထဲက ဖဲ့ပေးရမယ့် အချိန်တွေ ပေါ်လာနိုင်သလို။ IT ခေတ်ဖြစ်တဲ့အတွက် ချက်ခြင်းအကြောင်းပြန်သင့်တဲ့ အီးမေးလ်ဝင်လာခြင်း၊ ဖုန်းဝင်လာခြင်း၊ အွန်လိုင်းအစည်းအဝေးခေါ်ခြင်း၊ လူမှုကွန်ရက်များ၊ သတင်းပလက်ဖောင်းများကို ဝင်ကြည့်မိရာက အချိန်များစွာကုန်သွားခြင်း စတဲ့ အနှေင့်အယှက်များစွာ ကြုံလာနိုင်ပါသေးတယ်။ဒါတွေထဲကတော့ ကိုယ်က ရှောင်နိုင်သမျှ အလုပ်ချိန်ထဲမှာမလုပ်ဖို့ ကိုယ်တိုင် စည်းကမ်းသတ်မှတ် ရှောင်ရှားရမှာဖြစ်ပါတယ်။

အထက်ကပြောပြခဲ့တာတွေကတော့ အချိန်ကို ကျွမ်းကျင်စွာ ကိုင်တွယ်စီမံနိုင်တဲ့ အခြေခံလေးတွေဖြစ်ပါတယ်။အခုနောက်ပိုင်းမှာ အချိန်ကို ထိရောက်စွာ စီမံနိုင်တဲ့ နည်းစနစ်အသစ်တွေ ပေါ်ပေါက်လာတတ်ပါတယ်။အဲဒီအနက်က စိတ်ဝင်စားစရာကောင်းပြီး၊ အသုံးပြုသူများပြားလာနေတဲ့ နည်းစနစ် (၂) ခုကို ဖောက်သည်ချ မျှဝေပေးလိုက်ပါတယ်။အဲဒါတွေက -

•    Two-Minute Rule (နှစ်မိနစ် စည်းမျဉ်း) နဲ့
•    the 80/20 Principle (၈၀/၂၀ စည်းမျဉ်း) တို့ ဖြစ်ပါတယ်။

           နှစ်မိနစ် စည်းမျဉ်း

လုပ်ငန်းတိုင်းရဲ့ အခက်ဆုံးအပိုင်းက စတင်ဖို့ အစခက်ခြင်းပဲဖြစ်ပါတယ်။စမိပြီဆိုရင် ဆက်လုပ်ဖို့နဲ့ ပြီးစီးအောင်လုပ်ဖို့ ပိုလွယ်ကူသွားလေ့ရှိပါတယ်။အလုပ်စလုပ်ဖို့ မုဒ်မဝင်သေးလို့၊ ပျင်းလို့ပဲဖြစ်ဖြစ်၊ လုပ်ရမယ့် လုပ်ငန်းက ကြီးလေးတဲ့အတွက် အားထုတ်အချိန်ယူရမှာကိုတွေးပြီး စိတ်လေးကာ ဟိုရွှေ့ဒီရွှေ့လုပ်ရင်း အချိန်ပိုကုန်သွားတတ်တာက သဘာဝပါပဲ။

ဒီလိုဟာလေးတွေကို ကျော်လွှားနိုင်ဖို့ အလုပ်ပိုတွင်ရေး အကြံပေးပညာရှင် စာရေးဆရာ ဒေးဗစ် အယ်လန် (David Allen) က အကြံပေးမိတ်ဆက်ပေးခဲ့တဲ့ နည်းလေးပါ။သူက နှစ်မိနစ် စည်းမျဉ်း (Two-Minute Rule) လို့ အမည်ပေးထားပါတယ်။အခြေခံကတော့ အလုပ်ကိုကြည့်ပြီး နှစ်မိနစ် (တင်စားထားတာပါ၊ မြန်မြန်ပြီးနိုင်မယ့် အလုပ်ကို ဆိုလိုချင်တာပါ) နဲ့ ပြီးနိုင်မယ့် အလုပ်ကိုရှာပြီး ပြီးအောင် အရင်လုပ်လိုက်ရမယ့် နည်းပါ။လုပ်ငန်းလေးတွေ အများကြီးပိုင်းခြားခွဲထုတ်ထားတဲ့ အနက်ကမှ ချက်ခြင်းမြန်မြန် (နှစ်မိနစ်) နဲ့ ပြီးနိုင်မယ့် အလုပ်လေးတွေကို အရင်ပြီးအောင်လုပ်ပစ်တဲ့ နည်းပါ။အဲလိုလုပ်ခြင်းဖြင့် မွစာကြဲနေတဲ့ လုပ်ငန်းအသေးလေးတွေကို စုပြုံမလာခင် ရှင်းလိုက်နိုင်လို့ အဲဒီအလုပ်လေးတွေလုပ်ဖို့ စိတ်ရောက် စိတ်ရှုပ်နေတာမျိုး မရှိတော့ဘဲ၊ အလုပ်တွေ ပြီးကုန်ပြီဆိုတဲ့ စိတ်ခံစားမှုရရှိပြီး၊ ပိုခက် ပိုအချိန်ယူရမယ့် အလုပ်တွေလုပ်ဖို့ စိတ်တက်ကြွလာစေတဲ့၊ ပိုအာရုံစိုက်လုပ်လာစေနိုင်တဲ့ နည်းပါ၊ လက်တွေ့မှာ သိပ်အသုံးဝင် ထိရောက်လို့ လူကြိုက်များနေပါတယ်။

ဒေးဗစ်အယ်လန်က နောက်ထပ်အကြံပေးထားတာက လုပ်ရမယ့် လုပ်ငန်းရဲ့ ဝန်ထုတ်ဝန်ပိုးကြီးကို တစ်လံတစ်လျား မျှော်တွေး စိတ်လေးပြီး ဘာမှစမလုပ်ဖြစ်ဘဲ နေမယ့်အစား စလို့လွယ်တာနဲ့ စလုပ်တဲ့ အကျင့်ကို တည်ဆောက်ယူဖို့ဖြစ်ပါတယ်။

သူပေးထားတဲ့ ဥပမာတွေက -

-    မအိပ်ခင် စာတစ်မျက်နှာ ပြီးအောင်ဖတ်ပါ။ (စာအုပ်အထူကြီးတွေ၊ အစီရင်ခံစာအရှည်ကြီးတွေ၊ လေ့လာရမယ့် နည်းပညာအသစ်တွေ ဖတ်ရဦးမယ်လို့  စိတ်လေးပြီး စမဖတ်ဖြစ်ဘဲ နေမယ့်အစား၊ တစ်မျက်နှာ ဖတ်မယ်လို့ စိတ်ပိုင်းဖြတ်ပြီး ဖတ်လိုက်ရာကအစ စိတ်ဝင်စားပြီး စာမျက်နှာအများကြီး ဖတ်ပြီးသွားနိုင်သလို၊ အနည်းဆုံးဖတ်ရမယ့် စာကို တစ်မျက်နှာလေးဖတ်ပြီးသွားတာက လုံးဝမဖတ်မိတာထက်စာရင် အချိန်ကို ထိရောက်အောင် အသုံးချနိုင်တာ ဖြစ်ပါတယ်တဲ့။)
-    မိနစ် ၃၀ ယောဂကျင့်ရဦးမယ်လို့ တွေးပြီး မစဖြစ်ဘဲနေရင် ယောဂဖျာကို အရင်ဖြန့်ခင်းမယ်လို့ စလုပ်ကြည့်လိုက်ပါတဲ့။
-    အဲလိုပဲ မိနစ် ၃၀ လမ်းလျှောက် (အပြေး) ထွက်ရဦးမယ်လို့ တွေးနေမယ့်အစား ဝတ်စုံလဲပြီး လမ်းလျှောက်ဖိနပ်ကို ကြိုးချည်တာနဲ့ စလိုက်ပါ။

လွယ်တာနဲ့ စလုပ်တဲ့ အကျင့်လေးကို လုပ်ကြည့်ပါ၊ နောက်လုပ်ရမယ့် အလုပ်တွေ ဆက်လုပ်ဖို့ သူ့ဖာသာဖြစ်လာပါလိမ့်မယ်လို့ အကြံပေးထားပါတယ်။

သူနောက်ထပ်ပြောပြတာက စလုပ်ဖို့ပဲ ခက်တာပါ၊ ၂ မိနစ်လုပ်တဲ့ အကျင့်ကို လေ့ကျင့်ကြည့်ပါ။အလေ့အကျင့်ဖြစ်သွားရင် စွဲသွားပြီး၊ ပြန်ဖျက်ဖို့ ခက်ပါတယ်တဲ့။

၈၀/၂၀ စည်းမျဉ်း

နောက်တစ်နည်းက ၈၀/၂၀ စည်းမျဉ်း (80/20 Principle) ပါ။ဒီနည်းကို ပါရီတို စည်းမျဉ်း (Pareto Principle) လို့လည်း ခေါ်ကြပါသေးတယ်။စတင်မိတ်ဆက်ပေးခဲ့တဲ့ အီတလီလူမျိုး စီးပွားရေးပညာရှင် ဗေလ်ဖရီဒို ပါရီတို (Vilfredo Pareto) ရဲ့ အမည်ကို အစွဲပြုပြီး ခေါ်ကြတာဖြစ်ပါတယ်။သူ့နည်းရဲ့ အခြေခံက အလုပ်ရဲ့ ၂၀ ရာခိုင်နှုန်းကို လုပ်ရုံနဲ့ အကျိုးကျေးဇူး ၈၀ ရာခိုင်နှုန်းကို ဖော်ဆောင်ပေးမယ့် လုပ်ငန်းတွေကို ဉာဏ်ကိုလွှာသုံး ရွေးချယ်ပြီး လုပ်ဆောင်တဲ့နည်းပါ။အဲလိုလုပ်ဆောင်ခြင်းဖြင့် အချိန်ကုန်သက်သာသလောက် အကျိုးများတဲ့ အလုပ်တွေကို ပြီးစီးစေမှာဖြစ်သလို၊ ငွေအရင်းအနှီး နည်းနည်းနဲ့ အကျိုးများတဲ့ လုပ်ငန်းတွေကို ရွေးလုပ်နိုင်တယ်လို့ ဆိုပါတယ်။ဒါကြောင့် အလုပ်ထဲမှာ နစ်မြှုပ် အချိန်ကုန်မယ့်အစား ပိုအဖိုးတန်မယ့် အချိန်ပိုတွေ မိမိကိုယ်ပိုင်ရရှိလာမှာဖြစ်သလို အခြားတန်ဖိုးရှိတဲ့ နေရာတွေမှာ အချိန်ပိုပေးလာနိုင်မှာဖြစ်လို့ သိပ်ထိရောက်တဲ့ နည်းစနစ်အဖြစ် လူကြိုက်များလာတာဖြစ်ပါတယ်။

သူ့ရဲ့ ၈၀/၂၀ နည်းကို ဆင့်ပွားအသုံးပြုတဲ့ နည်းစနစ်တွေ အများကြီးပေါ်ပေါက်ခဲ့ပါတယ်။ဥပမာ အချို့က ရုံးခန်းတွင် အလုပ်ချိန် ၂၀ ရာခိုင်နှုန်းပဲ သုံးပြီး ၈၀ ရာခိုင်နှုန်းကို ဈေးကွက်ထဲမှာ ဖောက်သည်တွေနဲ့တွေ့ဖို့ အသုံးချတာ၊ ဒါမှမဟုတ် မိမိရဲ့ အရောင်းအဖွဲ့တွေနဲ့အတူ အလုပ် လုပ်ဖို့ အသုံးချတာ။ရင်းနှီးမြှုပ်နှံငွေ ၂၀ ရာခိုင်နှုန်းကနေ အမြတ် ၈၀ ရာခိုင်နှုန်းရမယ့် လုပ်ငန်းကို ရွေးလုပ်တာ စသဖြင့် ဉာဏ်ရှိရင်ရှိသလို ဉာဏ်ကိုလွှာသုံးကြတဲ့ နည်းစနစ်တွေလည်း ပေါ်ပေါက်ခဲ့ပါတယ်။အဓိက ကတော့ work hard (များများလုပ်) ကနေ work smart (ဉာဏ်ပါပါလုပ်) တဲ့ နည်းဖြင့် မိမိရဲ့အချိန်ကို ကျွမ်းကျင်စွာ စီမံကိုင်တွယ်တဲ့ နည်းစနစ်တစ်ခုဖြစ်ပါတယ်။

အချိန်ကို ကျွမ်းကျင်စွာ ကိုင်တွယ်စီမံခြင်းဟာ ရေရှည်လုပ်ရမယ့် စီမံခန့်ခွဲမှုတစ်ခုဖြစ်ပါတယ်။စိတ်ပိုင်းဖြတ်မှု၊ စည်းကမ်းရှိမှု၊ ပြုလွယ်ပြောင်းလွယ် လွှဲပြောင်းကျင့်သုံးနိုင်မှုတို့လည်း လိုအပ်ပါတယ်။တိကျရှင်းလင်းတဲ့ ပန်းတိုင်ချမှတ်ခြင်း၊ အလုပ်အရေးကြီးမှုအလိုက် အဆင့်ခွဲခြားလုပ်ကိုင်ခြင်း၊ အချိန်ဇယားဆွဲ အချိန်ကန့်သတ်သတ်မှတ်ခြင်း၊ အနှောင့်အယှက်များကို ရှောင်ရှားခြင်း၊ နည်းပညာအသစ်များကို အံဝင်အောင် အသုံးချခြင်းဖြင့် လူတိုင်းက ထိရောက်တဲ့ အကျိုးကျေးဇူးတွေ ရမယ့်အပြင် လုပ်ငန်းခွင်နဲ့ ပုဂ္ဂိုလ်ရေးအချိန်တွေကို မျှတစွာ သုံးစွဲနိုင်တဲ့အတွက် ပိုမိုအဓိပ္ပာယ်ရှိပြီး ပိုမိုပျော်ရွှင်သာယာတဲ့ ဘဝတွေကို ပိုင်ဆိုင်လာ နိုင်ကြပါစေကြောင်း ဆန္ဒပြုလိုက်ပါတယ်။

မေတ္တာဖြင့် ....

သက်ထွန်း (သျှမ်း)