【 နိုင်ငံတကာဆောင်းပါး 】 ပူတင်နှင့် အင်တာဗျူးမှ အဓိကအချက်များ

သောကြာနေ့တွင် ထုတ်လွှင့်ခဲ့သော နှစ်နာရီကြာ အင်တာဗျူးတစ်ခုတွင် ရုရှားသမ္မတ ဗလာဒီမာ ပူတင်သည် လက်ယာယိမ်းဖြစ်သော အမေရိကန် ရုပ်သံတင်ဆက်သူ တက်ကာ ကာလ်ဆန်နှင့်အတူ အမေရိကန်၊ ယူကရိန်းတို့နှင့်ပတ်သက်ပြီး အမျိုးမျိုးဆွေးနွေးခဲ့ကြသည်။

ယခုအချိန်တွင် အမေရိကန်၌ ရီပတ်ဘလစ်ကန်များက ပူတင်ကို သနားညှာတာနေကြပြီး ယူကရိန်းကို စစ်ရေးနှင့် ငွေရေးကြေးရေး အကူအညီကို တားဆီးထားသည့် အချိန်လည်းဖြစ်သည်။

တင်ဆက်သူ ကာလ်ဆန်က အမေရိကန်ပြည်သူများအနေဖြင့် ရုရှား၏အမြင်ကိုလည်း သိရှိရန် အရေးကြီးသောကြောင့် အင်တာဗျူးလုပ်ခဲ့ခြင်းဖြစ်ကြောင်းနှင့် အမေရိကန်သတင်းဌာနများက ယူကရိန်း၏ အမြင်ကိုသာ ဦးစားပေးနေပြီး ယူကရိန်းသမ္မတ ဗိုလိုဒီမာ ဇီလင်စကီး၏ အဖြေများသည် အမေရိကန်ကို စစ်ပွဲအတွင်းသို့ ပိုမိုနက်ရှိုင်းစွာ ပါဝင်စေနေသည်ဟု ဆိုသည်။

အင်တာဗျူးတွင် ပူတင်ပြောခဲ့သော အဓိကအချက်များအနက် တစ်ခုမှာ အမေရိကန်က ရုရှားကို ဆန့်ကျင်တိုက်ခိုက်နေခြင်းဖြစ်ပြီး အနောက်နိုင်ငံများက ရုရှားအပေါ် မမျှတစွာ ဆက်ဆံသည်ဟု ဆိုခြင်းဖြစ်သည်။အမေရိကန်သည် ရုရှားအပေါ် ရင်းနှီးခင်မင်သည့် ခေါင်းဆောင်များကို ဖြုတ်ချနေသည့်အပြင် ရုရှားဆန့်ကျင်ရေးအတွက် ကြီးမားသော စစ်ဆင်မှုကိုလည်း စီစဉ်နေသည်ဟု စွပ်စွဲခဲ့သည်။

ယူကရိန်းကို ကျူးကျော်ရခြင်းမှာလည်း ထိုစစ်ဆင်မှုကို ဟန့်တားရန်ဖြစ်သည်ဟု ဆိုသည်။ထို့အပြင် ကျူးကျော်စစ် စတင်ပြီးနောက် ၂၀၂၂ ခုနှစ်တွင် ရုရှား-ဥရောပ ဓာတ်ငွေ့ပိုက်လိုင်း Nord Stream တိုက်ခိုက်ခံရမှုမှာလည်း အမေရိကန်၏ လက်ချက်သာဖြစ်သည်ဟု ဆိုသည်။

ရုရှားတွင် ထိန်းသိမ်းခံထားရသော အမေရိကန် သတင်းထောက် အီဗန် ဂါရှ်ကိုဗစ်ချ်ကို ပြန်လွှတ်ရန် ကာလ်ဆန်က တိုက်တွန်းသောအခါ ပူတင်က ရုရှားဘက်မှ အချက်ပြခဲ့သော်လည်း အနောက်နိုင်ငံများက မတုံ့ပြန်ကြောင်းနှင့် ရုရှားမှ ခွဲထွက်ရေးသမားကို သတ်ဖြတ်မှုဖြင့် ဂျာမနီတွင် ဖမ်းဆီးခံထားရသော ဗာဒင်ကရာဆီဗို့နှင့် လဲလှယ်လိုကြောင်း ဆိုသည်။

ပူတင်သည် တစ်ဖက်တွင် အမေရိကန်ကို တိုက်ခိုက်နှိမ့်ချပြီး တရုတ်ကိုမူ ချီးကျူးခဲ့သည်။အမေရိကန်တွင် သမ္မတက ဆုံးဖြတ်ပိုင်ခွင့်မရှိဘဲ ဗဟိုထောက်လှမ်းရေးအေဂျင်စီကဲ့သို့သော အေဂျင်စီများက ကြိုးကိုင်နေကြောင်းကို ပြောဆိုခဲ့သည်။ထို့အပြင် အမေရိကန်သည် နယ်စပ်ပြဿနာ၊ ရွှေ့ပြောင်းရေးပြဿနာနှင့် အကြွေးပြဿနာများ ရှိနေချိန်တွင် ပြည်တွင်း၌ ပါတီနှစ်ခုအကြား ရန်ပွဲဖြင့်သာ အချိန်ကုန်နေကြောင်းလည်း ဝေဖန်ခဲ့သည်။

တစ်ဖက်တွင်မူ မကြာသေးခင်အချိန်မှစတင်ပြီး ရုရှား၏ အဓိကမဟာမိတ်ဖြစ်လာသော တရုတ်အား ပူတင်က ချီးကျူးခဲ့သည်။အနောက်နိုင်ငံများက အားကောင်းသော တရုတ်ကို ရုရှားထက် ပို၍ကြောက်ရွံ့ကြောင်း၊ သို့သော်လည်း တရုတ်၏ အားကောင်းလာမှုကို ဟန့်တားနိုင်မည်မဟုတ်ကြောင်း ဆိုသည်။
 
အင်တာဗျူးတစ်လျှောက်တွင် ပူတင်သည် သမိုင်းကြောင်းများကို ပြန်လည်ညွှန်းဆိုပြီး ယူကရိန်းသည် ရုရှားမှ တည်ဆောက်ထားခြင်းဖြစ်ပြီး သမိုင်းကြောင်းအရ ယူကရိန်းကို ရုရှားက ပိုင်ဆိုင်ကြောင်း ဆိုသည်။ယူကရိန်းကျူးကျော်စစ်ကို ကာကွယ်ပြောဆိုခဲ့ပြီး ရုရှား၏ ပန်းတိုင်မှာ စစ်ပွဲကို အမြန်ဆုံးရပ်တန့်ရန်ဖြစ်သည်ဟု ဆိုသည်။ယူကရိန်းကို ကျူးကျော်ရခြင်းမှာ နာဇီအမြစ်တွယ်နေမှုကို ဖြတ်တောက်ရန် ဖြစ်သည်ဟုလည်း ပြောခဲ့သည်။

အမေရိကန်အနေဖြင့် ယူကရိန်းကို လက်နက်ထောက်ပံ့ခြင်း ရပ်တန့်လျှင် စစ်ပွဲရပ်တန့်နိုင်ကြောင်း ပြောဆိုပြီး ယူကရိန်းဘက်မှ နယ်မြေများကို အညံ့ခံပေးအပ်ရမည့် သဘောတူညီချက်တစ်ခုကိုလည်း ကမ်းလှမ်းခဲ့သည်။

ပူတင်သည် ရုရှား၏ စွမ်းရည်နှင့်ပတ်သက်ကာ ယုံကြည်မှုပြင်းထန်ခဲ့ပြီး ရုရှားကို စစ်မြေပြင်တွင် အနိုင်ယူ၍မရကြောင်း အနောက်နိုင်ငံများက သိသည်ဟု ဆိုသည်။အနောက်နိုင်ငံများအနေဖြင့် မည်သူက အင်အားအာဏာရှိသည်ကို သဘောပေါက်လာပြီဖြစ်သောကြောင့် ဆွေးနွေးရမည့်အချိန် ဖြစ်ပြီဟုလည်း ပြောခဲ့သည်။

ရုရှားသမ္မတ ဗလာဒီမာ ပူတင်သည် အင်တာဗျူးမှတစ်ဆင့် ရီပတ်ဘလစ်ကန် လွှတ်တော်အမတ်များနှင့် မဲပေးသူများကို တောင်းဆိုတိုက်တွန်းမှုများ ပြုလုပ်ခဲ့သည်။ယခုအခါတွင် အမေရိကန်၏ ယူကရိန်းအပေါ် ထောက်ပံ့ပေးမှုနှင့်ပတ်သက်ပြီး ကြီးမားစွာ အမြင်ကွဲလွဲနေကြသောအချိန်လည်းဖြစ်သည်။

ပူတင်သည် သမ္မတဟောင်း ဒေါ်နယ်ထရမ့်ကိုလည်း နှစ်သက်ကြောင်းကို ဖော်ပြခဲ့သည်။

အမေရိကန်ပြည်တွင်းပြဿနာအပြင် အရှေ့အလယ်ပိုင်းပြဿနာနှင့် ရှုပ်ထွေးနေပြီး ယူကရိန်း၏ တန်ပြနိထိုးစစ်ကလည်း ထူးခြားမှုမရှိသေးသည့်အချိန်တွင် ပူတင်သည် အင်တာဗျူးမှတစ်ဆင့် နိုင်ငံတွင်း ယုံကြည်ချက်ဖြည့်တင်းရန် ရည်ရွယ်ခြင်းဖြစ်သည်။

အမေရိကန်၏ ရီပတ်ဘလစ်ကန်ပါတီဝင်များသည် တစ်ချိန် တစ်ခါက ရုရှားအား အကြီးအကျယ် ဆန့်ကျင်ခဲ့ကြသည့်တိုင် ယခုအခါတွင်မူ ရုရှားအား စာနာသနားမှုများ ဖြစ်ပေါ်နေပြီး အမေရိကန်၏ နိုင်ငံခြားရေးမူဝါဒနှင့်ပတ်သက်ပြီး အငြင်းပွားမှုများစွာကို ဖြစ်ပေါ်စေနေကြောင်း နယူးယောက်ခ်တိုင်းမ်စ်မှ အန်တွန်ထရိုအီယန်နော့စကီးက ဆိုသည်။

ရုရှားဘက်မှလည်း နာဇီက ကျရှုံးခဲ့သလို အကြမ်းဖက်မှုများကိုသုံးပြီး နယ်မြေသိမ်းပိုက်ခြင်းမျိုးထက် စိတ်တူကိုယ်တူဖြစ်မည့် လက်ယာယိမ်း မဟာမိတ်များကို လိုက်လံရှာဖွေနေခြင်းဖြစ်ပြီး အထူးသဖြင့် ရုရှား၏ ကျူးကျော်စစ်မှ ဉာဏ်ကောင်းမွန်ခြင်းဖြစ်သည်ဟု ချီးကျူးခဲ့သည့် ဒေါ်နယ်ထရမ့်ကဲ့သို့ လူစားမျိုးများကို ရှာဖွေ လက်တွဲနေခြင်းဖြစ်သည်။

ပူတင်က အနောက်လူ့အဖွဲ့အစည်းသည် ပိုမိုလက်တွေ့ကျသော်လည်း၊ ရုရှားတို့သည် “အခြေခံ ကိုယ်ကျင့်တရား တန်ဖိုးများ” ကို ပို၍စိုးရိမ်နေကြသည်ဟု ပူတင်က အနောက်တိုင်းယဉ်ကျေးမှုကို ထိခိုက်ကာ ပူတင်က ပြောကြားခဲ့သည်။

ပူတင်နှင့် အင်တာဗျူးအပြီးတွင် ကာလ်ဆန်သည် ၈ ရာစုသို့ ပြန်သွားသော ပူတင်၏ သမိုင်းသင်ခန်းစာများကို နိဂုံးချုပ်ကောက်ချက်ချကာ ယူကရိန်းအပေါ် ရုရှား၏ သမိုင်းဝင် တောင်းဆိုမှုများသည် “ရိုးသားသော” တွေးခေါ်မှုမှ ဆင်းသက်လာသည်ဟု ရယ်စရာကောင်းလောက်အောင် ကောက်ချက်ချခဲ့သည်။

NaYoe
Ref - Outlookindia | US Plots Against Russia, Ukraine's Surrender, History Lessons, Declining USA: Top Points From Vladimir Putin's Interview To Tucker Carlson