【 နိုင်ငံတကာဆောင်းပါး 】 ဦးနှောက်ဆေးခံထားရသော ထရမ့်

နိုဝင်ဘာရွေးကောက်ပွဲတွင် ဒေါ်နယ်ထရမ့် နိုင်ခြင်းသည် ကိုရီးယားစစ်ပွဲအတွင်း မန်ချူးရီးယားတွင် ဦးနှောက်ဆေးခံခဲ့ရသော အမေရိကန်များအကြောင်း ဝတ္တုနှင့် ရုပ်ရှင် မန်ချူးရီးယားကိုယ်စားလှယ်ကဲ့သို့  ဝါရှင်တန်တွင် ရုရှား၏ အာဏာယန္တရားကို ထူထောင်ပေးပြီး အမေရိကန်ပြည်ထောင်စု၊ ယူကရိန်းနှင့် အနောက်နိုင်ငံများအတွက် ကပ်ဆိုးဖြစ်သည်။

ထရမ့်နိုင်လျှင် သူသည် ၂၀၂၅ ခုနှစ် ဇန်နဝါရီလ ၂၀ ရက်နေ့တွင် အိမ်ဖြူတော်သို့ ရောက်လာမည်ဖြစ်ပြီး ၂၀၁၇ ခုနှစ်က သမ္မတဖြစ်ခဲ့သည်ထက် ပိုမိုအန္တရာယ်များမည်ဖြစ်သည်။

သူသည် ခါးသည်းနာကျဉ်းစွာဖြင့် ၂၀၂၀ ရွေးကောက်ပွဲတွင် သူ၏မဲများ ခိုးယူသည်ဟု သူစွပ်စွဲသည့် အစိုးရအသိုက်အဝန်းမှ လူများကို လက်စားချေမည်ဖြစ်သည်။ထို့အပြင် သူသည် သူ၏ ပထမရာထူးသက်တမ်းအတွင်းက စော်ကား (သို့မဟုတ်) အထင်သေးသည့် ဥရောပခေါင်းဆောင်များကိုလည်း လက်စားချေမည်ဖြစ်သည်။ထို့အပြင် သူ့ကို ပထမဆုံး စွဲချက်တင်ရသည့် အပေးအယူဖြစ်သည့် ယူကရိန်းလည်း ခံစားရမည်ဖြစ်သည်။

လက်တွေ့တွင် ယူကရိန်းသည် အောက်လွှတ်တော်မှ သူကိုထောက်ခံသူ လက်တစ်ဆုပ်စာ၏ ကျေးဇူးကြောင့် အကူအညီများ နှောင့်နှေးနေသည်မှာ ၃ လကျော်ကြာနေပြီဖြစ်သည်။ထိုကိစ္စကို မဲခွဲရန် ကြိုးစားပါက အောက်လွှတ်တော်ဥက္ကဋ္ဌကို ဖြုတ်ချမည်ဟုပင် ၎င်းတို့ ခြိမ်းခြောက်နေပြီဖြစ်သည်။

အမေရိကန်ပြည်ထောင်စု၊ ဥရောပနှင့် ယူကရိန်းတို့သည် ထရမ့်၏ ရေရှည်မိတ်ဆွေ ဗလာဒီမာ ပူတင် ပြုစုထားသည့် ရန်သူစာရင်းဝင်ဖြစ်သည်။ထိုနိုင်ငံများသည် ပူတင်၏ လွန်စွာမုန်းတီးမှုကို ခံရသည့် နိုင်ငံများလည်းဖြစ်သည်။ထို့ကြောင့် ၎င်းတို့သည် တစ်နိုင်ငံနှင့် တစ်နိုင်ငံ မျက်စပစ်နေကြသည်။၎င်းတို့အတွက် ကြားခံ (သို့မဟုတ်) လျှို့ဝှက်သဘောတူညီချက် မလိုပေ။ ၂၁ ရာစု၏ တတိယဆယ်စုနှစ်တွင် ပူတင်နှင့် ထရမ့် မည်သည်တို့ကိုလုပ်မည်ကို ၎င်းတို့ ကောင်းစွာသိကြသည်။

သူသမ္မတဖြစ်ပြီး ၂၄ နာရီအတွင်း ယူကရိန်းစစ်ပွဲကို ရပ်ဆိုင်းမည်ဖြစ်ကြောင်း သမ္မတလောင်း ထရမ့် နေ့စဉ်နီးပါး ကတိပြုနေသည်။ထိုကိစ္စသည် ယူကရိန်းသို့ အမေရိကန်လက်နက်တင်ပို့မှုရပ်မည်ဟု ပြောနေခြင်းဖြစ်သည်။ထို့နောက် ပထမ ၁၂ ရက်အတွင်း သူသည် ပူတင်၏ ၂၀၂၁ ခုနှစ် ဒီဇင်ဘာလက ပူတင်က မြောက်အတ္တလန္တိတ်စာချုပ်အဖွဲ့သို့ပေးပို့သော ရာဇသံကို လိုက်လျောမည်ဖြစ်သည်။ (၂၀၂၂ ခုနှစ် ဖေဖော်ဝါရီလက ယူကရိန်းစစ်ပွဲအစက ဟော့စတိုမယ်တွင် ရှုံးနိမ့်ပြီးနောက် ပူတင်သည် ထိုရာဇသံကို ထပ်မပြောရဲတော့ပေ။)

၂၀၂၅ ခုနှစ် ဇန်နဝါရီလ ၂၅ ရက်နေ့မှစတင်ကာ ဗဟိုဥရောပနိုင်ငံများတွင် အရေးမပါဟု ထင်ရသည့် ဖြစ်ရပ်များ ဖြစ်လာမည်ဖြစ်သည်။ထို့နောက် အခြေအနေသည် တစတစ တုန်လှုပ်စရာကောင်းလာမည်။

လတ်ဗီးယားနိုင်ငံ မြို့တော် ရီဂါတွင် အဖနိုင်ငံတော်ကာကွယ်ရေးစစ် စစ်ပြန်များ ချီတက်လာသည်ကို တွေ့ရမည်ဖြစ်သည်။အက်စတိုးနီးယားနိုင်ငံ နာဗာတွင် စစ်သားများသည် တောတွင်းမှ ထွက်လာပြီး အက်စတိုနီးယားနိုင်ငံ သင်္ကေတများကို စတင်ဖျက်ဆီးမည်ဖြစ်သည်။အက်စတိုးနီးယားနိုင်ငံ မြို့တော် တာလင်းတွင် ရုရှားလိုလားသော ဆန္ဒပြသူများနှင့် ရဲ ထိပ်တိုက်တွေ့ပြီး သေဆုံးမှုများဖြစ်လာမည်။
ထို့နောက် မော်စကိုသည် မြောက်အတ္တလန္တိတ်စာချုပ်အဖွဲ့ဝင် ဒါဇင်ဝက်သို့ ပြင်းထန်သော သတိပေးချက်များ ထုတ်ပြန်ပြီး ထိုနိုင်ငံများသည် ရုရှားမုန်းတီးမှု လှုံ့ဆော်သည်ဟု စွပ်စွဲကာ ထိုနိုင်ငံများတွင် နာဇီဝါဒ ပြန်လည်ခေါင်းထောင်ထစေမည်ဖြစ်သည်။တစ်ချိန်တည်းတွင် အမျိုးသားလုံခြုံရေးကောင်စီ ဥက္ကဋ္ဌ ဒီမီထရီ မက်ဗီဒက်က ရုရှားအနေဖြင့် အကန့်အသတ်ရှိသော နျူကလီးယားတိုက်ခိုက်မှုလုပ်ရန် အဆိုပြုမည်ဖြစ်သည်။

နိုင်ငံအားလုံးက ဝါရှင်တန်နှင့် ဘရပ်ဆဲလ်ကို စောင့်ကြည့်နေမည်ဖြစ်သည်။ထရမ့်သည် ပြဇာတ်ဆန်ဆန် နှုတ်ဆိတ်နေပြီး ထိုဖြစ်ရပ်များအတွက် မည်သည့်မှတ်ချက်မျှပေးမည် မဟုတ်ပေ။မြောက်အတ္တလန္တိတ်စာချုပ်အဖွဲ့ ဌာနချုပ်သည် အဖွဲ့၏ ပဋိ့ညာဉ် အပိုဒ် ၄ နှင့် ၅ ကို ကျင့်သုံးရန် အဖွဲ့ဝင်နိုင်ငံများ၏ တောင်းဆိုမှုများ ပြည့်လျှံနေမည်ဖြစ်သော်လည်း ဦးဆောင်အဖွဲ့ဝင်နိုင်ငံဖြစ်သည့် အမေရိကန်ပြည်ထောင်စုသည် ဆွေးနွေးမှုများတွင်ပါဝင်မည် မဟုတ်သောကြောင့် မည်သည့်သဘောထားမျှ ထုတ်ပြန်နိုင်မည် မဟုတ်ပေ။

ဇန်နဝါရီလ ၂၅ ရက်နေ့ ညနေတွင် ဟန်ဂေရီ၊ ဆလိုဗေးနီးယားနှင့် ဘူလ်ဂေးရီးယားတို့သည် မြောက်အတ္တလန္တိတ်စာချုပ်အဖွဲ့မှ နုတ်ထွက်ကြောင်း ကြေညာမည်ဖြစ်သည်။ဇန်နဝါရီလ ၂၆ ရက်နေ့တွင် အမေရိကန်သမ္မတ ဒေါ်နယ်ထရမ့်သည် ကမ္ဘာတစ်ဝန်းမှ ရုပ်သံများတွင် ပေါ်လာပြီး သူသည် သူ့မိတ်ဆွေ ဗလာဒီမာ ပူတင်၏ ဖိတ်ကြားမှုကြောင့် မော်စကိုသို့သွားမည်ဖြစ်ကြောင်း ကြေညာမည်ဖြစ်သည်။ထို့နောက် ၎င်းတို့သည် ဥရောပတွင် လာမည့်ဆယ်စုနှစ်များတွင် ငြိမ်းချမ်းလုံခြုံစေမည့် သဘောတူညီချက်ရကြမည်ဖြစ်သည်။
ထို့နောက် သူသည် လုံခြုံရေးအာမခံချက်ကို အကောင်အထည်ဖော်ရန် တောင်းဆိုနေသည့် မြောက်အတ္တလန္တိတ်စာချုပ်အဖွဲ့ဝင်များကို မင်းတို့ သဘောကျသွားပြီလားဟု မေးမည်ဖြစ်သည်။

ပူတင်သည် ထရမ့်ကို လေဆိပ်တွင် ကိုယ်တိုင်ကြိုဆိုမည်ဖြစ်ပြီး ကားတစ်စီးတည်းဖြင့် ကရင်မလင်နန်းတော်သို့သွားပြီး အချိန်မဖြုန်းဘဲ သမိုင်းဝင် သဘောတူညီချက် အသေးစိတ်များကို ဆွေးနွေးမည်ဖြစ်သည်။

ပူတင်နှင့် တစ်ညလုံး အလုပ် လုပ်ပြီး ထရမ့်သည် ဝါရှင်တန်သို့ ပြန်လာမည်ဖြစ်သည်။သူသည် သူ့ကိုကြိုဆိုနေသူများကို နှုတ်ဆက်ရန် သမ္မတ၏ လေယာဉ်ပေါ်မှ ဆင်းလာမည်ဖြစ်ပြီး လက်တစ်ဖက်ကိုမြှောက်ကာ နှုတ်ဆက်ပြီး ကျန်လက်တစ်ဖက်တွင် စာရွက်စာတမ်းအများအပြားကို ကိုင်ထားမည်ဖြစ်သည်။

ထို့နောက် နာရီအတန်ကြာသောအခါ ထိုစာရွက်စာတမ်းများပါ အကြောင်းအရာများကို နိုင်ငံသို့ မိန့်ခွန်းပြောမည်ဖြစ်သည်။

“မိတ်ဆွေ အမေရိကန်နိုင်ငံသားတို့။လွန်ခဲ့တဲ့ ရာစုနှစ်လယ်က တည်ထောင်ခဲ့တဲ့ မြောက်အတ္တလန္တိတ်စာချုပ်အဖွဲ့ဟာ ဥရောပမှာ လုံခြုံရေးနဲ့ တည်ငြိမ်ရေး ထိန်းသိမ်းဖို့ တာဝန်ကို မထမ်းဆောင်နိုင်တော့ဘူးလို့ ကျနော်နဲ့ ကျနော့်မိတ်ဆွေ အရေးပါတဲ့ ပထဝီနိုင်ငံရေး မိတ်ဖက် ဗလာဒီမာတို့ ကောက်ချက်ချခဲ့တယ်။ဒီအဖွဲ့ရဲ့ မိုက်မဲတဲ့ တိုးချဲ့မှုကြောင့် ဥရောပမှာ ကြီးမားတဲ့ စစ်ပွဲတစ်ခု ဖြစ်စေခဲ့တယ်။ဒီအဖွဲ့ဟာ ပြုပြင်ပြောင်းလဲရေးကို ပင်ကိုယ်ကတည်းက ဆန့်ကျင်တယ်။ဒါကြောင့် ဥရောပမှာ လုံခြုံရေးအာမခံချက်ပေးနိုင်အောင် အခြားအဖွဲ့အစည်းတွေ လိုအပ်နေတယ်။တိတိကျကျပြောရရင် အမေရိကန်ပြည်ထောင်စုနဲ့ ရုရှားဖက်ဒရေးရှင်းပဲ။ကျနော်တို့ရဲ့ ပထမဆုံးခြေလှမ်းကတော့ ယူကရိန်းစစ်ပွဲကို ချက်ခြင်းရပ်ဖို့ပဲ။ယူကရိန်းကို လက်နက်ပို့တာတွေရပ်ဖို့ ကျနော်အမိန့်ပေးထားပြီးပြီ။ရုရှားနဲ့ ယူကရိန်း နယ်မြေတည်တံ့ခိုင်မြဲမှုကို ရုရှားနိုင်ငံဖွဲ့စည်းပုံ အခြေခံဥပဒေထဲကအတိုင်း အသိအမှတ်ပြုဖို့ ဥပဒေတစ်ရပ်ကို ကွန်ဂရက်မှာ ကျနော်တင်သွင်းမှာဖြစ်တယ်။ဗလာဒီမာကလည်း ရုရှားသိမ်းပိုက်ထားတဲ့ နယ်မြေအားလုံးကိုပေးတဲ့၊ ယူကရိန်းနိုင်ငံထဲက ရုရှားစကားပြောသူတွေရဲ့ အခွင့်အရေးကို အာမခံတဲ့ ချစ်ကြည်ရင်းနှီး အိမ်နီးချင်းကောင်းပီသရေး သဘောတူစာချုပ်လက်မှတ်ထိုးတဲ့ ယူကရိန်းက ဘယ်အစိုးရကိုမဆို အသိအမှတ်ပြုဖို့ အသင့်ပဲ” ဟု ပြောမည်ဖြစ်သည်။

“ဗလာဒီမာက လတ်ဗီးယား၊ လစ်သူ‌ရေးနီးယားနဲ့ အက်စတိုးနီးယားတို့နဲလည်း အလားတူ စာချုပ်တွေ ချုပ်ဖို့ ရည်ရွယ်တယ်။သူတို့သဘောတူရင် သူက နယ်မြေတွေ တောင်းဆိုမယ်။ဒါဟာ ရုရှားရဲ့ လုံခြုံရေးအတွက် အရေးပါတယ်။နာဗာဒေသကို ရုရှားကို ပြန်ပေးပြီး ဆူဝေါလ်ကီနယ်မြေကို ရုရှားနဲ့ ဘီလာရုစ်ကို ပြန်ပေးပြီး ရုရှားပိုင်နက် ကာလီနင်ဂရက်နဲ့ တစ်ဆက်တည်းဖြစ်စေမယ်” ဟုလည်း သူပြောမည်ဖြစ်သည်။

ထိုသို့သောအခြေအနေဖြင့် အနောက်နိုင်ငံများသည် စစ်ရေးစွမ်းရည် သာလွန်သော်လည်း မကောင်းဆိုးရွားအင်အားစုများက အကျပ်ကိုင်သည့် ကမ္ဘာစစ်တွင် ရှုံးနိမ့်သွားမည်ဖြစ်သည်။

NaYoe
Ref - Kyiv Post | OPINION: Trump as a ‘Manchurian Candidate’