【 အနုပညာ 】လာမယ့်အပတ်ထဲ အွန်လိုင်းဖျော်ဖြေပွဲပြုလုပ်ဖို့ပြင်ဆင်နေတဲ့ မိုရီဆာကီဝင်း

လာမယ့် အပတ်ဒီဇင်ဘာ ၂၂ ရက်လောက်မှာ ပြည်တွင်းက ပရိသတ်တွေအတွက် အွန်လိုင်းဖျော်ဖြေပွဲတစ်ခုကို ပြုလုပ်ဖို့ ပြင်ဆင်ထားတယ်လို့ မိုရီဆာကီဝင်းက ပြောပါတယ်။

 

သူဟာ တေးသီချင်းပိုင်းသာမက သရုပ်ဆောင်ပိုင်းကိုလည်း ပါဝင်လုပ်ကိုင်လာသူဖြစ်သလို မြန်မာမိန်းကလေး ပရိသတ်တွေရဲ့ အားပေးမှုကို အခိုင်အမာရရှိထားသူတစ်ဦးလည်းဖြစ်သလို ပြည်ပမှာအနေများပေမယ့် ပြည်တွင်းက ကြော်ငြာတွေမှာ ပါဝင်ခွင့်ရသူတစ်ဦးလည်းဖြစ်လာခဲ့ပါတယ်။

 

 “ကျွန်တော်ချစ်ရတဲ့ ပရိသတ်များ အတွက် အထူး Online Live Stream ပွဲလေးကို စီစဉ်ထားပါတယ်။ ဒီဖျော်ဖြေပွဲဟာ မြန်မာနိုင်ငံက ပရိသတ်တွေအတွက် ပထမဆုံး ဖျော်ဖြေခွင့်ရတဲ့ ပွဲလည်းဖြစ်ပါတယ်၊ ကျွန်တော်ဟာ ပြည်ပမှာနေထိုင်တာ များပေမယ့် မြန်မာနိုင်ငံသားတစ်ယောက်ပါ၊ ကိုယ့်မြန်မာပရိသတ်တွေအတွက်ကိုပဲ စဉ်းစားမိပါတယ်”လို့ ၎င်းက ရှင်းပြပါတယ်။

 

သူ့ရဲ့ပွဲဟာ ပထမဆုံးအကြိမ် Online Live Stream ပွဲလေးဖြစ်သလို မြန်မာပရိသတ်တွေကို ခရစ္စမတ် လက်ဆောင် အနေနဲ့ကျင်းပတဲ့ပွဲလည်းဖြစ်ပြီး ပရိသတ်တွေအနေနဲ့ ပျော်ရွှင်မှုတွေ၊ စိတ်လှုပ်ရှားဖွယ်ကောင်းတဲ့ အစီအစဉ်တွေနဲ့အတူ၊ အထူးလက်ဆောင်လေးတွေလည်း ပေးသွားဖို့ရှိတယ်လို့ သိရပါတယ်။

 

 “ဒီဖျော်ဖြေပွဲ လေးကို ဒီဇင်ဘာလ ၂၂ ရက်နေ့ မြန်မာစံတော်ချိန် ည ၇နာရီခွဲမှာ စတင်ဖျော်ဖြေသွားမယ်၊ အွန်လိုင်း ကနေတဆင့် လက်မှတ်ဝယ်ယူပြီးတော့ ကြည့်ရမယ်၊ လက်မှတ်တစ်စောင်ကို ငွေကျပ် ၅၀၀၀ ကျသင့်မှာ ဖြစ်ပါတယ်၊ အခုလို လက်မှတ် ဝယ်ယူထားတဲ့ ပရိသတ်တွေ အနေနဲ့ အကြောင်းကြောင်းကြောင့် ဒီဇင်ဘာ ၂၂ ရက်ပွဲကို မကြည့်လိုက်ရဘူးဆိုရင် နောက်တစ်ရက်ဖြစ်တဲ့ ဒီဇင်ဘာလ ၂၃ ရက် ည ၁၁ နာရီလောက်အထိ ကြည့်ရှုခွင့်ရအောင် စီစဉ်ပေးမှာပါ၊ အားပေးကြည့်ရှုကြပါဦးလို့လည်း ပြောချင်ပါတယ်” လို့ ၎င်းက ဆက်လက် ရှင်းပြပါတယ်။

 

သူဟာ ဂျပန်နိုင်ငံမှာ အနေများသူတစ်ယောက်လည်း ဖြစ်သလို မြန်မာနိုင်ငံကို မကြာခဏပြန်လာလေ့ရှိပြီး မြန်မာနိုင်ငံက ကြော်ငြာလုပ်ငန်းတွေမှာသာမကဘဲ ရုပ်ရှင်ဇာတ်ကားကြီးတွေထဲမှာလည်း ပါဝင်ခွင့်ရလာသူ တစ်ဦးလည်းဖြစ်သလို တေးသီချင်းတွေကိုလည်း ပိုင်နိုင်စွာသီဆိုနိုင်တဲ့ မြန်မာအမျိုးသမီး ပရိသတ်တွေရဲ့ အသည်းစွဲ အနုပညာရှင်တစ်ဦးလည်း ဖြစ်တယ်လို့ သိရပါတယ်။

 

 မင်းခေတ်လင်း

(ဓာတ်ပုံ- Morisaki Win)

ရန်ကုန်၊ ဒီဇင်ဘာ ၁၃ 

 

(  Zawgyi  )