【 အနုပညာ 】အနုပညာတစ်ဖက် ပရဟိတတစ်ဖက် လုပ်ဆောင်သွားမယ့် သရုပ်ဆောင် ဝေလု

ပြည်တွင်းက Free to Air ရုပ်သံလိုင်းတစ်ခုမှာ ပြသနေတဲ့ “မမှီဝဲနဲ့ကင်းအောင်နေ”လို့ နာမည်ရတဲ့ ဇာတ်လမ်းတွဲ မှာ ဦးထွန်းသက်အဖြစ်သရုပ်ဆောင်နေတဲ့ ဝေလု ဟာ အနုပညာအလုပ်တွေနဲ့အတူ ပရဟိတ အလုပ်တွေ ကိုလည်း ဆက်လက်လုပ်ကိုင်သွားဖို့ စီစဉ်ထားတယ်လို့ ပြောပါတယ်။

 

သူဟာ မျက်စိအတုလှူဒါန်းကူညီတာတွေအပြင် Wheel Chair လှူတာတွေ၊ လေမှုတ်မွေ့ယာ လှူဒါန်းပေး တာတွေ၊ သူ့ကိုအကူအညီတောင်းလာ သူတွေကို တတ်နိုင်သလောက် လှူဒါန်းတာတွေကို လုပ်ကိုင်နေတယ်လို့ သိရပါတယ်။

 

 “ဒီလိုအလှူလေး စတင် ဖြစ်ခဲ့တာက နယ်မှာဇာတ်ကားသွားရိုက်တဲ့ရွာမှာ ကော်ဖီမစ်တွေ၊ ကြက်ဥတွေ ရောင်းတဲ့ကလေးက ကျွန်တော့်လည်း အရမ်းလည်းချစ်တယ်၊ သူနဲ့ခင်မင်ပြီး ကူညီခဲ့တာကနေ စတင်ခဲ့တာပါ၊ ကျွန်တော်က ပရဟိတလုပ်နေတာမဟုတ်ဘူး၊ ဖောင်ဒေးရှင်းထောင်တာလည်းမဟုတ်ဘူး၊ ကျွန်တော်က တခြားသူတွေရဲ့ လိုအပ်တာလေးကို ဖြည့်ဆည်းပေးနေတာ၊ ကျွန်တော်ကျန်းမာနေရင်ကူညီမယ်၊ ကျွန်တော့်လက်ထဲမှာ ပိုက်ဆံရှိနေရင် ကူညီမှာပဲ၊ အလှူရှင်တွေ ပံ့ပိုးတာ အကူအညီပေးတာတွေရှိရင်လည်း ကျွန်တော်လုပ်နေမှာပဲ၊ ရှေ့ဆက်ပြီးတော့လည်း ကျွန်တော် အသက်ရှင်နေသရွေ့ ကူညီနေမှာပဲ၊ ကားရိုက် တွေလည်း ပါးတဲ့အချိန်မှာ ကူညီဖြစ်ခဲ့တယ်၊ ကျွန်တော့်ကို ကိုယ့်လောကထဲမှာပဲ တိုက်ခိုက်မှုတွေလည်း အများကြီးခံရတယ်၊ ဒီကောင် စောက်ပိုတွေလုပ်နေတယ်တို့၊ နာမည်ကြီးချင်လို့တို့ အစုံပဲလေ၊ ကိုယ့်လောကသားတွေထဲမှာ လှောင်ပြောင် ကြတာ၊ ဒါကလည်း ကျွန်တော်တို့လူမျိုးတွေမှာ ဖြစ်လေ့ဖြစ်ထ ရှိသလို ဖြစ်နေပြီ၊ ကောင်းတာလုပ်ရင် ပြောချင်ကြတယ်၊ ကျွန်တော်ကတော့ ကိုယ်လုပ်ချင်တဲ့ဟာကို တစိုက်မတ်မတ်နဲ့လုပ်နေတာဖြစ်ပါတယ်”လို့ ၎င်းက ရှင်းပြပါတယ်။

 

လက်ရှိကာလအထိ မျက်စိတုလှူဒါန်းကူညီခဲ့သူ ၂၀၀ နီးပါးရှိခဲ့သလို Wheel Chair ၁၄ လုံးလှူပြီးသွားပြီး ဆက်လက် လှူဒါန်းဖို့ Wheel Chair တွေ ပြင်ဆင်ထားပေမယ့် ကိုယ်တိုင်သွားရောက်ချင်သလို COVID ကာလလည်း ဖြစ်တဲ့အတွက် Wheel Chair လှူဒါန်းတာ ခေတ္တဆိုင်းထားပေမယ့် မကြာခင်လှူဒါန်းပေးသွားဖို့ ပြင်ဆင်ထားကြောင်း သိရပါတယ်။

 

 “ကျွန်တော်ဝါသနာပါတဲ့ ဒီ အနုပညာအလုပ်ကိုလည်း လုပ်နေမှာပဲ၊ အဲ့ဒီလို လုပ်နေရင်းနဲ့ ကျွန်တော့်လက်ထဲ ပိုက်ဆံရှိရင်ရှိသလို တစ်ဖက်ကလည်း အကူအညီတောင်းတဲ့သူတွေကို လှူနေဦးမှာပါပဲ၊ ကျွန်တော်ပြောရဲပါတယ်၊ ကျွန်တော်အသက်ရှင်နေသရွေ့ကူညီနေဦးမယ်၊ ဒါအသေအချာပဲ”လို့ သူက ဆက်လက်ရှင်းပြခဲ့ပါတယ်။ ရုပ်သံဇာတ်လမ်းတွဲတွေအတွက် ဆက်လက်ရိုက်ကူးဖို့အစီအစဉ်တွေလည်း ရှိသလို ယခုအခါ COVID ကာလဖြစ်နေတာကြောင့် အိမ်မှာနေရင်းလိုအပ်တဲ့ပြင်ဆင်မှုတွေကို လုပ်ဆောင်နေရ တယ်လို့ သိရပါတယ်။

 

မင်းခေတ်လင်း

(ဓာတ်ပုံ- ဝေလု)

ရန်ကုန်၊ ဒီဇင်ဘာ ၂၃ 

 

(  Zawgyi  )