【 အလှအပနှင့်ကျန်းမာရေး 】နှလုံးကြွက်သားပုပ်ခြင်း
နှလုံးကြွက်သားပုပ်ခြင်း သို့မဟုတ် Heart Attack လို့ခေါ်ကြတဲ့ ရုတ်တရက်နှလုံးတိုက်ခိုက်ခံရခြင်း ရောဂါဟာ ရုတ်တရက်အသက် ဆုံးရှုံးနိုင်တဲ့ရောဂါဖြစ်ပါတယ်။
ဘာကြောင့် နှလုံးကြွက်သားပုပ်ရတာလဲ?
နှလုံးကိုပေးပို့နေတဲ့သွေးကြောတွေမှာ အဆီ၊ကိုလက်စထရောတွေပိတ်ရာကနေ အဆီခဲတွေဖြစ်ပြီး နှလုံးသွေးကြောကျဉ်းရောဂါကို ဖြစ်စေပါတယ်။
အဆီခဲတွေ အရွယ်အစားကြီးရာကနေပေါက်ထွက်ပြီး သွေးခဲခြင်းကြောင့် နှလုံးကို သွေးပေးပို့နေတဲ့လမ်းကြောင်းပိတ်ဆို့ပြီးနှလုံးကြွက်သား၊နှလုံးတစ်သျှူးများ သွေးမရရှိတဲ့အခါမှာတော့ နှလုံးကြွက်သားပုပ်ခြင်းကိုဖြစ်စေပါတယ်။
နှလုံးဟာအသက်ရှင်ဖို့ အဓိကအစိတ်အပိုင်းဖြစ်တဲ့အတွက် အချိန်မီကုသမှုမခံယူရင်တော့ အသက်သေဆုံးနိုင်ပါတယ်။
ဒါကြောင့် နှလုံးကြွက်သားပုပ်ခြင်းရဲ့လက္ခဏာတွေကို စောစီးစွာသိရှိပြီး ကုသမှုခံယူဖို့လိုပါတယ်။
နှလုံးကြွက်သားပုပ်ခြင်းရဲ့လက္ခဏာတွေကတော့
၁- ရင်ဘတ်ကိုညှစ်ထား၊ဖိထားသကဲ့သို့ရင်ဘတ်အောင့်ခြင်း
၂- ရင်ဘတ်အောင့်ခြင်းအပြင် မေးရိုး၊ပုခုံး၊လက်မောင်း၊လက်ဖျံ၊ရင်ခေါင်း စတဲ့နေရာများတွင်နာကျင်မှုခံစားရခြင်း
၃- ချွေးစေးများထွက်ခြင်း
၄- ပျို့ခြင်း၊အန်ခြင်း
၅- ခေါင်းမူး၍ ရင်ပြည့်ရင်ကယ်ခံစားရခြင်း
၆- အသက်ရှူရခက်၍မောခြင်း
စတဲ့လက္ခဏာတွေခံစားရပြီဆိုရင်တော့ နီးစပ်ရာဆေးရုံကို အမြန်သွားရောက်ဖို့ လိုအပ်ပါတယ်။
ရုတ်တရက် နှလုံးတိုက်ခိုက်ခံရနိုင်ချေများတဲ့ သူတွေကတော့
၁- အသက်အရွယ်ကြီးသူများ
၂- ဆေးလိပ်သောက်သူများ
၃- သွေးတိုးရောဂါရှိသူများ
၄- ဆီးချိုရောဂါရှိသူများ
၅- သွေးတွင်းအဆီ၊ကိုလက်စထရောပမာဏများသူများ
၆- အဝလွန်သူများ
၇- ကိုယ်လက်လှုပ်ရှားမှုနည်းသူများ
၈- မိသားစုမျိုးရိုးထဲတွင်နှလုံးကြွက်သားပုပ်ခြင်း၊
နှလုံးတိုက်ခိုက်ခံရခြင်းဖြစ်ဖူးသူများ
၉- စိတ်ဖိစီးမှုများသူများ
၁၀- ကိုကင်း (Cocaine)၊ အမ်ဖက်တမင်း (Amphetamine) စသောမူးယစ်ဆေးဝါးသုံးစွဲသူများ စတဲ့သူတွေမှာ အဖြစ်များပါတယ်။
နှလုံးသွေးကြောကျဉ်းခြင်းကြောင့် ရုတ်တရက်နှလုံးတိုက်ခိုက်ခံရခြင်းမဖြစ်အောင် ကာကွယ်နိုင်တဲ့နည်းတွေကတော့
၁- ဆေးလိပ်ဖြတ်ပါ။
၂- ကိုယ်အလေးချိန်ကိုပုံမှန်အတွင်းရောက်အောင်ထိန်းသိမ်းပါ
၃- ကိုယ်လက်လှုပ်ရှားမှု နေ့စဉ်ပြုလုပ်ပါ
၄- အဆီ၊အငန် စတာတွေကို လျော့စားပါ။
၅- သွေးတိုး၊ဆီးချို၊သွေးတွင်းအဆီများခြင်းစသောရောဂါတွေကို ဆရာဝန်နဲ့သေချာစွာပြသပြီးကုသမှုခံယူပါ။
၆- ဆရာဝန်ညွှန်ကြားထားသောဆေးများကိုပုံမှန်သောက်သုံးပါ။
နှလုံးသွေးကြောပိတ်ခြင်းကြောင့်ဖြစ်သောနှလုံးကြွက်သားပုပ်ခြင်းကို ဘယ်လိုကုသနိုင်ပါသလဲ။
နှလုံးသွေးကြောထဲသို့ stent ထည့်ခြင်း၊ သွေးကြောပိတ်နေသော နေရာကိုကျော်၍ သွေးစီးဆင်းစေရန် လမ်းကြောင်းလွှဲပေးခြင်း၊ နှလုံးသွေးကြောတွင် ပိတ်နေသော သွေးခဲကိုဖျော်ခြင်း စတဲ့နည်းလမ်းတွေနဲ့ကုသနိုင်ပါတယ်။
နှလုံးကြွက်သားပုပ်ခြင်းဟာ အသက်အန္တရာယ်ရှိတာဖြစ်လို့ အချိန်မီသိရှိပြီး ဆေးရုံကို စောလျင်စွာရောက်ရှိဖို့ အင်မတန်မှအရေးကြီးပါတယ်။
ဒါကြောင့်မိမိမှာ ရုတ်တရက်နှလုံးတိုက်ခိုက်ခံရတဲ့လက္ခဏာတွေခံစားရပါက အမြန်ဆုံးဆေးရုံကိုသွားရောက်ဖို့တိုက်တွန်းလိုပါတယ်။
Dr.Phyu
Photo credit- Shutterstock.com
