【 အလှအပနှင့်ကျန်းမာရေး 】အူမကြီးကင်ဆာအကြောင်းသိကောင်းစရာ
အူမကြီးကင်ဆာကတော့ လူတွေကိုခြိမ်းခြောက်နေတဲ့ ကင်ဆာတွေထဲက အမျိုးအစားတစ်ခုဖြစ်ပါတယ်။
အူမကြီးကင်ဆာဟာ အူနံရံမှာအလုံးအကျိတ်စဖြစ်ရာက ကင်ဆာအဆင့်သို့ ပြောင်းလဲသွားတာဖြစ်ပါတယ်။ ဒါကြောင့် အူမကြီးကင်ဆာရဲ့လက္ခဏာတွေကို သိရှိပြီး စောစီးစွာကုသမှုခံယူဖို့အရေးကြီးပါတယ်။
အူမကြီးကင်ဆာရဲ့ရောဂါလက္ခဏာတွေကတော့
၁- ဝမ်းသွားတဲ့အလေ့အကျင့်ပြောင်းလဲကာဝမ်းချုပ်လိုက်၊
ဝမ်းလျှောလိုက်ဖြစ်ခြင်း၊
၂- ဝမ်းသွားရာတွင်သွေးပါခြင်း
၃- ဝမ်းသွားပြီးနောက်တွင်ဝမ်းကျန်နေသည်ဟုခံစားရခြင်း
၄- မကြာခဏဝမ်းဗိုက်အောင့်ခြင်း
၅- ကိုယ်အလေးချိန်ကျဆင်းခြင်း
၆- အစားအသောက်ပျက်ခြင်း
စတဲ့ရောဂါလက္ခဏာတွေကိုခံစားရတတ်ပါတယ်။
ဒီလိုလက္ခဏာတွေခံစားရပြီဆိုရင်တော့ ကျွမ်းကျင်တဲ့ဆရာဝန်ထံသွားရောက်စစ်ဆေးပြီး ကုသမှုခံယူဖို့လိုပါတယ်။ဒါမှသာကင်ဆာမပျံ့သွားခင်ခွဲစိတ်ကုသမှုခံယူနိုင်မှာဖြစ်ပါတယ်။
ဘယ်လိုလူတွေမှာအူမကြီးကင်ဆာခံစားရနိုင်ချေများပါသလဲ?
၁- အသက်အရွယ်ကြီးသူများ
၂- မိသားစုမျိုးရိုးထဲတွင်အူမကြီးကင်ဆာရောဂါရှိသူများ
၃- အူတွင်အလုံးအကျိတ်များဖြစ်သောမျိုးရိုးလိုက်သောရောဂါရှိသူများ
၄- ကိုယ်လက်လှုပ်ရှားမှုနည်းသူများ
၅- ဆီးချို ရောဂါရှိသူများ
၆- ဝမ်းချုပ်လေ့ရှိသူများ
၇- အမျှင်ဓါတ်နည်း၍ အဆီများသောအစားအသောက်စားလေ့ရှိသူများ
၈- ဆေးလိပ်သောက်သူများ
၉- အရက်သောက်သူများ
၁၀- အဝလွန်သူများ
၁၁- ဓါတ်ရောင်ခြည်ကုသမှုခံယူထားသူများ စတဲ့သူတွေမှာအူမကြီးကင်ဆာဖြစ်နိုင်ချေပိုများပါတယ်။
အူမကြီးကင်ဆာမဖြစ်အောင် ဘယ်လိုကာကွယ်ကြမလဲ?
- အူမကြီးကင်ဆာရောဂါဟာအစောပိုင်းအဆင့်မှာ လက္ခဏာမပြတတ်ပဲ ကင်ဆာအဆင့်ရောက်မှသာ ရောဂါဖြစ်မှန်းသိကြတာ များပါတယ်။
ဒါကြောင့်အူမကြီးကင်ဆာဖြစ်မှန်း စောစီးစွာသိရှိနိုင်ဖို့ မိသားစုမျိုးရိုးထဲတွင် အူမကြီးကင်ဆာရှိသူများ၊ အသက် ၄၅နှစ်အထက်ရှိသူများအနေနဲ့ ပုံမှန်ကျန်းမာရေးစစ်ဆေးမှုကို
ခံယူပြီး အူမကြီးကင်ဆာရှိမရှိစစ်ဆေးသင့်ပါတယ်။
- အမျှင်ဓါတ်ပါသော အသီး၊ ဟင်းသီးဟင်းရွက်၊ အစေ့အဆန်များကိုများများစားသုံးပါ။
- ဆေးလိပ်ဖြတ်ပါ။
- အရက်အလွန်အကျွံသောက်ခြင်းကိုရှောင်ကြဉ်ပါ။
- ကိုယ်အလေးချိန်ကိုပုံမှန်အတွင်းရောက်အောင်ထိန်းသိမ်းပါ။
စတဲ့ကျန်းမာရေးနဲ့ လိုက်လျောညီထွေတဲ့ အပြုအမူတွေကို လိုက်နာကျင့်သုံးသင့်ပါတယ်။
အူမကြီးကင်ဆာကိုဘယ်လိုကုသနိုင်ပါသလဲ?
ရောဂါရဲ့အဆင့် အခြေအနေပေါ်မူတည်ပြီး ခွဲစိတ်ကုသခြင်း၊ ဓါတ်ရောင်ခြည်ဖြင့် ကုသခြင်း၊ ကင်ဆာဆေးသွင်းကုသခြင်း စသဖြင့် နည်းအမျိုးမျိုးနဲ့ကုသနိုင်ပါတယ်။
အူမကြီးကင်ဆာမျိုးရိုးရှိသူတွေ ဒါမှမဟုတ် အူမကြီးကင်ဆာလက္ခဏာတွေ ခံစားနေရတယ်လို့ သံသယရှိသူတွေအနေနဲ့ ကျွမ်းကျင်တဲ့ဆရာဝန်ထံ သွားရောက်စစ်ဆေးကုသမှုခံယူကြဖို့ တိုက်တွန်းလိုပါတယ်။
Dr.Phyu
Photo credit - Everlywell