【 ဆောင်းပါး 】 မောရစ်ကောလစ်၏ ယိုဒယားဝှိုက် (၂)

ယိုးဒယားဝှိုက်ဆိုသော အမည်နာမအတွက် ရှင်းလင်းထားရပေမည်။ဤအမည်မှာ သူ၏အမည်ရင်းမဟုတ်သော်လည်း ဤအတိုင်းပဲ  (Siamese) ဟု လက်ခံခေါ်ဝေါ်ခဲ့ကြပါသည်။

ဝှိုက်၏ အရွယ်ကောင်းကာလတစ်လျှောက် မှတ်မှတ်ထင်ထင် လုပ်ရပ်များကို ယိုးဒယားတွင်ပြုလုပ်ခဲ့သည် သူ၏ပြုမူလုပ်ဆောင်သည်ချက်များကိုလည်း ယိုး ဒယားဘုရင်လက်တွင် ပြုလုပ်ခဲ့သည်ဖြစ်၍ စာရေးဆရာ သမိုင်းဆရာများက အမည်ပေးထားခြင်းဖြစ်ပါသည်။     

ဝှိုက်သည် အရွယ်ရောက်စ လူငယ်များအတိုင်း တိုတက်ရာတိုးတက်ကြောင်းအတွက် အရှေ့အိန္ဒိယကုမ္ပဏီတွင် တာဝန်ထမ်းရန် အင်္ဂလန်မှ အိန္ဒိယရှိ မဒရပ်မြို့သို့ရောက်ရှိလာ၏။မဒရပ်မှာ အတော်ကြီး ရှတ်ခပ်သည်။ဒတ်ခ်ျ ပေါ်တူဂီ၊ ပြင်သစ်၊ အင်္ဂလိပ် မဟာမေဒင်များသည် အရှုပ်ကြီးရှုပ်နေကြသည်။တစ်ယောက် တစ်ယောက်ကိုလည်း ကလိမ်ကျနေကြသည်။သောက်စားမူးယစ်ကြ၏။လိမ်လည်ကြ၏။မူးယစ်၍ ထိုးကြကြိတ်ကြသည်။

၁၆ ရာစု အရှေ့အိန္ဒိယကုမ္ပဏီမှာ အလုပ်ကို ပီပီပြင်ပြင်မလုပ်ကြသေး အင်္ဂလန်ရှိ ကုန်သည်ကြီးများမှာ ရသ၍ အမြတ်သာလိုချင်ပြီး အရင်းအနှီးမထည့်ချင်ကြသေး၊ ဝှိုက်၏ မျက်စိအောက်မှာ ကုမ္ပဏီကို ဖက်တွယ်နေလျှင် အကျိုးမရှိနိုင်ဟု မြင်လာသည်။သူ့လိုပဲ ရာထူးရာခံရရန် လုပ်ငန်းကြီးကြီးလုပ်ရန်  လောဘကြီးသော "ဖော်လကွန်း" နှင့် ဆက်စပ်မိသွားသောအခါ တိုးတက်ရန် အချိန်တန်ပြီဟု မှတ်ယူလိုက်သည်။ဖော်လကွန်းသည် ယိုးဒယားဘုရင်နှင့် အလွမ်းသင့်နေ၏။မှူးကြီးမတ်ရာများကိုလည်း လာဘ်လာဘပေးကာ စည်းရုံးထားနိုင်သည်။ယိုးဒယားဘုရင်သည် မဟာမေဒင်ကုန်သည်များနှင့် အလုပ်မလုပ်ချင်တော့ပေ။သူတို့ပစ္စည်းကို စိတ်ကြိုက်ဈေးတင်ထားပြီးနောက် ဘုရင့်ပစ္စည်းကိုမူ ဈေးနှိမ်ထားသည် ၎င်းအခြေအနေတွင် အပြောအဆိုမွန်ရည်၍ ဘုရင်ကိုမက်လုံးပေးနိုင်သော "ဖော်လကွမ်း" ကို အားကိုးအားထားပြုလာသည်။ဘာမှမသိသော မှူးကြီးမတ်ရာများကလည်း ဘုရင်အားကိုးပြုသူကို မဆန့်ကျင်နိုင်။ဖော်လကွန်းက လာဘ်လာဘပေးသည်ကို လက်ခံလျက် လိုက်လျောနေရတော့၏။

ဖော်လကွန်းအနေဖြင့် ပညာအထိုက်အလျောက်တတ်သော ချက်ဆို နားခွက်က မီးတောက်သော သူ့ကိုလည်း သစ္စာရှိသောသူတစ်ယောက် ရချင်နေသည်။ဝှိုက်နှင့်တွေ့သောအခါ ဖော်လကွန်း အလိုရှိသောလူ ဖြစ်လာ၏။ဝှိုက်သည် ရှုပ်ထွေးလှသော မဒရပ်ကိုစွန့်ခွာ၍ ယိုးဒယားနန်းတော်သို့ ရောက်သွားသည်။ထိုစဉ်က ဝှိုက်သည် (၃၃) နှစ်သာရှိသေး၏။

ပဲကူး ဟံသာဝတီဘုရင်ကလည်း ဘိတ်သည် အခွန်ဘဏ္ဍာများစွာရသော ဆိပ်ကမ်းဖြစ်နေသည်ကို စိတ်မဝင်စားသေး၊ ဖော်လကွန်း အလိုကျ ဝှိုက်ကို ဘိတ် (မြိတ်) မြို့တွင် တာဝန်ထမ်းစေသည်။ဘုရင့်သင်္ဘောတော်၏ ကပ္ပတိန်ဖြစ်လာသည်။ဘုရင်၏အကြိုက် ဖော်လကွန်း ရည်ရွယ်ချက်မှာ မဟာမေဒင်များကို နှင်ထုတ်လိုသည် အရှေ့အာရှတွင် ခရီးစမ်းနေသော ပြင်သစ်များကို အားပေးလိုသည်။မဟာမေဒင်များကို နှင်စေသည်မှာ အရေးမဟုတ်သော်လည်း အင်္ဂလန်သားဖြစ်ပြီး ပြင်သစ်ဘက် အားပေးနေသည်မှာ သစ္စာဖောက်မှုကြီးဖြစ်နေသည်။

မဒရပ်ရှိ ကုမ္ပဏီလူကြီးကလည်း အသည်းနာလျက် အင်္ဂလန်ကို အစီရင်ခံသည်။ဝှိုက်ကလည်း မိုးရွာတုန်း ရေခံဖို့သာစဉ်းစား၍ ဆိပ်ကမ်းကို သူ့အလိုကျ ထင်တိုင်းကြဲတော့သည်။သူအလိုမကျသော ကပ္ပတိန်နှင့် သင်္ဘောကို ဆိပ်ကမ်းကပ်ခွင့်မပေး။ကြိုက်ဈေးရမှ ကပ်ခွင့်ပေးသည် ဘုရင့်ဆိပ်ကမ်းခွန်ထဲသို့လည်း စာရင်းမထည့် ဝှိုက်သည် ဖော်လကွန်း၏ အစီအမံအရ ဘိတ်ဆိပ်ကမ်းတစ်ခုလုံး၏ "မင်းကြီးချုပ်" ဖြစ်လာသည်။ဖွတ်မိကျောင်းဖြစ် မြစ်မချမ်းသာ ဖြစ်လာတော့၏။

ဘိတ်သည် (၁၆) ရာစုတုန်းက ယိုးဒယားပိုင်ဖြစ်ဖူးသည်။ယိုးဒယား၏ ဝင်ငွေကောင်းသော ဆိပ်ကမ်းလည်း ဖြစ်နေသေးသည်။

ယိုးဒယားဘုရင်၏ ကူးသန်းရောင်းဝယ်ရေးမှာ ရှေးကပင်ကောင်းသည်သာမက ယခုထိလည်းကောင်း၏။တရုတ်ကုန်သည်များမှာ အယုဒ္ဓယသို့လာကြရသည်။ထိုမှ ဘိတ်ဆိပ်ကမ်းသို့ ရောက်လာ၏။မဟာမေဒင်တို့သည် ယိုးဒယားသာမက တရုတ်ကုန်သည်တို့ကိုပင် ခြယ်လှယ်နေကြသည်။ကုန်စည်များမှာ အမျိုးအစားစုံသည် တရုတ်၊ ဂျပန်ကနေ အပြန်အလှန်ကုန်သွယ်သည်များမှာ ပိုးထည်၊ ကြွေထည်၊ စဉ့်အိုး၊ မြေအိုး၊ လက်ဘက်ခြောက်၊ အကြော်စမ္ပာ၊ ကရမက်၊ ငြုတ်ကောင်း၊ သားရေစိမ်း၊ ငှက်သိုက်တို့မှာ အဓိကကုန်စည်ဖြစ်၍ အရောင်းအဝယ်လည်းကောင်း၏။ယိုးဒယားအဖို့ မကောင်းသည်မှာ မဟာမေဒင်တို့ ခြယ်လှယ်နေခြင်းဖြစ်သည်။

ဖော်လကွန်းမှာ မဟာမေဒင်များ အယုဒ္ဓဒယမှ ဖနှောင့်တင်ပါး တစ်သားတည်းပြေးရအောင် လုပ်ချင်၏။ဝှိုက်ကလည်း နားလည်သည်။ညစ်ချင်လျှင် မဟာမေဒင်သင်္ဘောများကို အလွယ်တကူ ဆိပ်ကမ်းကပ်ခွင့် မပေး။အချိန်လည်းဆွဲထားပြီးမှ မြက်မြက်ကလေးလည်းရမှ ကပ်ခွင့်ပြုသည်။မဟာမေဒင်များ ယိုးဒယားဘုရင်သို့ တိုင်သည်ကလည်း ဖော်လကွန်း လျှို့ဝှက်လိုက်သဖြင့် ဘုရင့်ဆီမရောက်။

မဒရပ်မှ အရှေ့အိန္ဒိယကုမ္ပဏီသည် ဖော်လကွန်းနှင် ဝှိုက်တို့က ပြင်သစ်ကို အလေးပေးနေသည့်အတွက် မကျေနပ်ကြ။သို့တိုင် အခြေအငံမရှိသော ကုမ္ပဏီသင်္ဘောများကို ရုပ်ဖျက်၍ ဓါးပြတိုက်သည်။ဘင်္ဂလားပင်လယ်သည် အာရေဗျကျွန်းဆွယ်မှသည် အိန္ဒိယကုန်းမြေကြီးကို ကျော်လွန်လျက် ဟံသာဝတီ ပဲကူး၊ ရေး၊ ဘိတ်၊ ထားဝယ်၊ စူမတြား ဂျာဗားအထိ ကျယ်ဝန်းသည်။ကုန်သည်များ သင်္ဘောများကလည်း အလုံးစုံများပြားလှ၏။အင်္ဂလိပ်သင်္ဘောက ပြင်သစ်အလံတင်၍ မဟာမေဒင်တို့ကို ဓါးပြတိုက်လျှင် ဘာမျှမတတ်နိုင်။ဝှိုက်သည် ကျား ကြီးခြေရာကြီးလာ၏ ပြောမဆုံးအောင် ရှုပ်ရှုပ်ထွေးထွေးတွေလည်းလုပ်လာသည်။ဘိတ်ဆိပ်ကမ်းမှာ ပထဝီဒေသ အားဖြင့် အချက်အချာအလွန်ကျသည်။ ဥရောပ အာရေဗျမှ ကုန်သွယ်သူတို့က ဘိတ်တနင်္သာရီမှ ကွေ့ပတ်ကျော် လွန်၍ စူမတြာ ဂျာဗားဘက်သို့ မသွားချင်။ထိုဘက်က ကုန်သည်များကလည်း ဘိတ်၊ ထားဝယ်အထိသာ သွားချင်၏။ အာရေဗျဘက်သို့ မသွားချင်ကြတော့။သို့နှင့်ပင် ဘိတ်ဆိပ်ကမ်းသည် သင်္ဘောများနှင့် ပြည့်နေသည်၊ ဝှိုက်သည် ဘုရင့်အလုပ်ကို ဟန်ပြသာလုပ်၍ သူ့အလုပ်ကို များများလုပ်သည်။ထိုကာလမှ ကုန်သည်တို့သဘောမှာ စည်းမဲ့ကမ်းမဲ့ ကြုံရာလုပ်တာတွေလည်းရှိ၏။

ရခိုင်ကမ်းမြှောင်ဒေသသည်လည်း ကုန်သည်ဓါးပြလက်က မလွတ်ပါ။ဘုရင်နှင့် အထက်စီးက ဆက်ဆံကြသည်။ဆက်ဆံ၍ အဆင်မပြေလျှင် ကမ်းဘေးက ရခိုင်သားများကိုပင် ဝင်ဖမ်းတတ်သည်။ရောက်လျှင် မြေထဲပင်လယ်ရှိ ကျွန်ဈေးတွင် ကျွန်အဖြစ် ရောင်းချသည်။ရခိုင်ကမ်းရိုးတမ်း၊ တနင်္သာရီကမ်းရိုးတမ်းများမှ ဆင်များတင်၍ ကုန်သွယ်ခြင်းများလည်းရှိ၏။သင်္ဘောဝမ်းထဲတွင် ဆင် (၁၄) ကောင်မှ (၂၆) ကောင်အထိ တင်ဆောင်ကြသည်။နောက်ပိုင်းမှာ မဟာမေဒင်များက ပဲခူး ဟံသာဝတီပိုင်နယ်ထဲတွင် သင်္ဘောတည်ဆောက်တတ်ကြသည်။တစ်ပင်တိုင်သင်္ဘော (၃) စီး တည်ဆောက်နေသည်ကြားလျှင် ဝှိုက်က ရေချခွင့်မပြု၊ လုပ်ပိုင်ခွင့်မရှိပါပဲလျက် ထင်သလိုလုပ်ခဲ့သည်မှာ များပြားလှ၏။

(၁၇) ရာစုအထိ အင်္ဂလိပ်များနေရာမရသေးပါ?အိန္ဒိယမှာ အမြတ်အစွန်းရနေ၍ ယိုးဒယားကို စိတ်မဝင်စားခြင်းလည်းဖြစ်သည်။

ယိုးဒယားဘုရင့်နန်းတော်ရှိ "ဖော်လကွန်း" မှာ ဘုရင်၏ အရင်းနှီးဆုံးမိတ်ဆွေ မင်းဆရာမျှမက တိုင်းပြည်တာဝန် အစစအရာရာတွင် ဝန်ကြီးချုပ်ကဲ့သို့ပင်ဖြစ်နေသည်။ဘိတ်ဆိပ်ကမ်းတွင်လည်း ယုံကြည်ရသူရှိပြီ ဖော်လကွမ်း၏ တာဝန်များသာဖြစ်တော့သည်။သို့သော် ၎င်းမှာ နောက်ပိုင်းတွင် ကံဇာတာမကောင်းပါ။ဝှိုက်ကလည်း ဆရာရင်း ဖော်လကွန်းကို အသုံးချလိုသည်မှအပ သစ္စာမရှိပါ။

ကမ္ဘာကြီးသည်ကား အရင်းရှင်စနစ်ကြီး၏ ကြမ်းတမ်းသောအခြေ၌သာ ရှိနေပါသေးသည်။ဘုရင်သည်လည်းကောင်း၊ ဖော်လကွမ်းတို့ ဝှိုက်တို့သည်လည်းကောင်း၊ တဂျုန်းဂျုန်းဖြင့် လည်ပတ်နေသော အရင်းရှင်စနစ်ကြီး၏ ခွေးသွားစိတ်မျှသာပင်ဖြစ်ပါ၏။

လင်းထင်