【 နိုင်ငံတကာဆောင်းပါး 】 တရုတ်နှစ်သစ်ကူးနဲ့ အန်ပေါင်းပေးခြင်းဓလေ့

တရုတ်နှစ်သစ်ကူးဆိုတော့ အမှတ်ရမိတဲ့ တစ်ခုခုထဲမှာ ပီတိခံစားမှုနဲ့ ပြည့်စုံတဲ့ အနီရောင်စာအိတ်လေးတွေလည်း ပါဝင်မယ် ထင်ပါတယ်။

တရုတ်အနွယ်ဝင်တွေရှိတဲ့ ဘယ်ဒေသမှာပဲဖြစ်ပါစေ ဒီလိုအနီရောင်စာအိတ်လေးတွေက အချိန်အခါမီ ထွက်ပေါ်လာတတ်ပါတယ်။

ဒါကြောင့် ကျေးလက်ဒေသက မြန်မာအသိုင်းအဝန်းကပါ အန်ပေါင်း (သို့) ဟုန်ပေါင်း ဆိုတဲ့ စာအိတ်နီနီလေးကို မုန့်ဖိုးဆိုတဲ့ သဘောလောက်တော့ အကြမ်းဖျင်းသိကြတာ တွေ့ရမှာဖြစ်ပါတယ်။အခုတစ်ခေါက်မှာ နှစ်သစ်ကူးအကြောင်းနဲ့ဆက်စပ်လို့ တရုတ်လူမျိုးတွေရဲ့ အန်ပေါင်း (သို့) ဟုန်ပေါင်းဆိုတဲ့ စာအိတ်နီနီလေးတွေ ပေးကြတဲ့ ဓလေ့ကို ဖော်ပြပေးလိုပါတယ်။

အန်ပေါင်း တကယ်တော့ (Hóngbāo) လို့ လူသိများတဲ့ ဒီအရပ်အခေါ်ဟာ တရုတ်လိုဆို  (Hóng) အနီရောင်ဖြစ်ပြီး (bāo) ကတော့ အထုပ်ဖြစ်ပါတယ်။ဆိုတော့ ဟုန်ပေါင်းက လွယ်လွယ်ဆို (စာအိတ်) လို့လည်း ဆိုကြပါတယ်။ဒီအိတ်လေးတွေကို တရုတ်မျိုးနွယ်တွေက မွေးနေ့၊ လက်ထပ်မင်္ဂလာ၊ နှစ်သစ်ကူးမင်္ဂလာပွဲတွေမှာ ပေးကြလေ့ရှိတာပါ။ဒီလိုပေးရာမှာ အကြမ်းဖျင်းကတော့ ကြီးသူကနေ ငယ်သူကို၊ အလုပ်ရှင်ကနေ ဝန်ထမ်းတွေကို ပေးတဲ့ ငွေသားလက်ဆောင်ထုပ်လေးတွေဖြစ်ပါတယ်။

ဟုန်ပေါင်း ဘာလို့ပေးတာလဲ မြန်မာအယူအဆ ဘာနဲ့တူလဲ ?

ဟုန်ပေါင်းကို နောက်တစ်မျိုး  Yāsuìqián လို့လဲ ခေါ်ကြတယ်လို့လည်း ဆိုပါတယ်။ Yāsuìqián ဖြစ်လာပုံကတော့ ဟိုး .. အရင် နှစ်သစ်မကူးခင် ညတစ်ညမှာ Suì ဆိုတဲ့ ဘီလူးကြောင့်  ကလေးငယ်တွေဟာ လန့်နိုးပြီး ငိုကြွေးတာ၊ အပြင်းဖျားတာနဲ့ ရူးနှမ်းသွားတာတွေ ကြုံခဲ့ရတယ်လို့ ဆိုကြပါတယ်။ဒါပေမဲ့ အသက်ကြီးကာမှ ကလေးရတဲ့ ဇနီးမောင်နှံတစ်စုကတော့ နှစ်မကူးခင် ညမှာ ကလေးကို မအိပ်အောင် ကြေးအသပြာ ၈ ပြားနဲ့ ချော့မြှူကစားကြပါတယ်။နောက်တော့ သူတို့လည်း ပင်ပန်းအိပ်ပျော်သွားကြပါတယ်။အသပြာ ၈ ပြားကိုတော့ ခေါင်းအုံးအေက်မှာ ထားမိကြပါတယ်။ Suì ဘီလူး လာတဲ့အခါမှာ   ကလေးအနားကို ကပ်လိုက်ပေမယ့် ဘီလူးဟာ လန့်ပြေးသွားခဲ့တယ်လို့ ဆိုပါတယ်။အဲဒီကစလို့ Suì ဘီလူးကို ဖိနှိပ်နိုင်တဲ့ Yāsuìqián လို့ ခေါ်ဆိုခဲ့ကြတယ်လို့ ဒဏ္ဍာရီပုံပြင်နဲ့အတူ ပြောစမှတ်ရှိကြပါတယ်။

ဒီလိုဆိုတော့ အန်ပေါင်း (သို့) ဟုန်ပေါင်းက မြန်မာအသိုင်းအဝန်းက ခမည်းပေးတာနဲ့ နည်းနည်းဆင်မယ် ထင်ပါတယ်။ခမည်းပေးတာကတော့ ရှေးက မင်္ဂလာအခါကိစ္စနဲ့ နာဖျားမကျန်းရင် ယတြာအနေနဲ့ ပြုလုပ်ကြတာဖြစ်ပါတယ်။နောက်ပိုင်းတော့ ခမည်းပေးတာဆိုရင် မမာကျန်းလို့ ခမည်းလိုလို့ ပေးတာလို့ မြန်မာတွေက နားလည်ကြပါတယ်။ဒါကိုကြည့်ရင် ကလေးတွေကို အန္တရာယ်ကင်းစေတဲ့ မူလရည်ရွယ်ချက်ချင်းတူပြီး ဗေဒင်နဲ့ အရှေ့တိုင်းအယူအဆ ပုံစံတွေရဲ့ တူညီတဲ့သဘောကို မြင်တွေ့ရမှာဖြစ်ပါတယ်။

နောက်ပိုင်းအနေနဲ့တော့ အန်ပေါင်းနဲ့ ခမည်း ကွဲပြားချက်တွေရှိပြီး အန်ပေါင်းက အခြားသူတွေကိုလည်း ပေးနိုင်တာဖြစ်ပါတယ်။ခမည်းကတော့ သွေးရင်းတွေကို ပေးကြတာများပါတယ်။နောက်တစ်ချက်ကတော့ အန်ပေါင်းက ငွေကြေးပေးတာဖြစ်ပေမယ့် ခမည်းကတော့ တွက်ချက်မှုအလိုက်ဖြစ်နိုင်ပြီး မြေ၊ ရွှေ၊ ကျောက် စတဲ့ အမျိုးမျိုးလုပ်ဆောင်ပေးရတာဖြစ်ပါတယ်။ဒါပေမဲ့ အန်ပေါင်း(သို့) ဟုန်ပေါင်းမှာလည်း အယူအဆ လျှို့ဝှက်ချက်တွေရှိပါတယ်။

ကိန်းဂဏန်းအယူအဆ ……

တရုတ်လူမျိုးတို့ကလည်း အရှေ့တိုင်းသားတွေဖြစ်ကြတော့ လောကီယူဆချက်တွေလည်း ကျယ်ပြန့်ကြပါတယ်။အဲဒါကြောင့် အန်ပေါင်းပေးရင်လည်း ပေးတဲ့ သတ်မှတ်ပုံစံရှိကြပါတယ်။အဲဒီမှာ အရင်ဆုံးသတိထား လုပ်ဆောင်ကြတာက ယေဘူယျ စုံဂဏန်းကိုပေးကြပြီး မဂဏန်းကို ရှောင်ရတာဖြစ်ပါတယ်။ထပ်ပြီး သတိထား လုပ်ဆောင်ကြတာက စုံဖြစ်ပေမယ့်  ၄ ဂဏန်း စီဆိုတဲ့ အသံထွက်က စိဆိုတဲ့ သေစကားနဲ့ဆင်လို့ မသုံးကြတာကို သတိထားရမှာဖြစ်ပါတယ်။ဒါ့အပြင် အန်ပေါင်းမှာ မျိုးနွယ်အလိုက် မတူညီတဲ့ အယူအဆတွေလည်း ရှိကြပါတယ်။ဆယ်ပြည့်ဂဏန်းကို မသုံးတာ တွေ့ရပြီး ၂ မကြိုက်တာနဲ့၊ ၆ မကြိုက်တဲ့ မျိုးနွယ်အလိုက် အယူအဆတွေလည်းရှိကြပါတယ်။ဒါပေမဲ့လည်း ယေဘူယျအနေနဲ့ ၂၊ ၆၊ ၈ စတဲ့ စုံကဏန်းတွေကို အဆင်ပြေသလို ပေးလေ့ရှိပြီး တချို့ကလည်း ၉ ဂဏန်းကို မဂဏန်းဆိုပေမယ့် ပေးကြလေ့ရှိနေပြန်ပါတယ်။

ဘာတွေသတိပြုရမလဲ ?

အန်ပေါင်းပေးရင် ငွေစက္ကူအသစ်လေးတွေက လက်ခံသူကို ပီတိတိုးစေလို့ အသစ်လေးတွေ ရွေးပေးကြပါတယ်။အဟောင်းတွေမှာ ရောဂါကပ်ပါနိုင်လို့လည်းဖြစ်ပါတယ်။နှစ်အလိုက် ၁၂ ရာသီအကောင်လေးတွေ ပြောင်းလဲတတ်တာကိုလည်း သတိပြုရမှာဖြစ်ပါတယ်။တစ်ယောက်တည်းသမား၊ အိမ်ထောင်မပြုရသေးဘူးဆိုပေမယ့် အကြီးက အငယ်တွေကို ပေးရမှာဖြစ်ပါတယ်။လက်ခံသူဟာလည်း ပေးသူရှေ့ ဖွင့်မကြည့်ဖို့ ဆိုစကားရှိပြီး မိဘဘိုးဘွား ကန်တော့ရင် တစ်နှစ်ထက် တစ်နှစ် တိုးပေးရတယ်လို့ ဆိုပါတယ်။သားသမီး၊ တူ/တူမတွေကိုပေးရင် အချင်းချင်း စိတ်ဝမ်းမကွဲအောင် ညီမျှတဲ့ ငွေပမာဏဖြစ်ဖို့လိုတယ်လို့ ဆိုပါတယ်။အသက်အရွယ်ကြီးသူနဲ့ ပြိုင်တူအငယ်တွေအတွက် အန်ပေါင်းပေးရင် အငယ်လုပ်သူက အကြီးထက်ပိုတဲ့ပမာဏ မပေးရဘူးဆိုတာလည်းရှိပါတယ်။

ဘယ်လိုပေးကြလဲ ဘယ်သူတွေရလဲ ?

မူလရည်ရွယ်ချက်က ကလေးသူငယ်တွေကို အန္တရာယ်ကင်းအောင် ပေးကြတာပဲဖြစ်ပါတယ်။ဒါပေမဲ့လည်း ပီတိခံစားချက်နဲ့ ပျော်ရွှင်မှုကြောင့် ကျယ်ပြန့်လာပါတယ်။အန်ပေါင်းကို အိမ်ထောင်ရှိသူက အိမ်ထောင်မရှိသူကို ပေးကြပြီး အသက် ၂၅ အထက်၊ ဝင်ငွေရှိသူဟာ အိမ်ထောင်မပြုရသေးပေမယ့် ကလေးငယ်တွေနဲ့ အလုပ်က ဝန်ထမ်း၊ အလုပ်သမားတွေကို ပေးလို့ရတယ်လို့ ဆိုပါတယ်။ချွင်းချက်အနေနဲ့ တရုတ်ပြည်မြောက်ပိုင်းဒေသများမှာတော့ အန်ပေါင်းကို အသက်ငယ်သူ ၂၅ နှစ်အောက်ပဲ ပေးကြတယ်လို့ ဆိုပါတယ်။

နှစ်သစ်ကူးအတွက် ခြင်္သေ့အက၊ နဂါးအကတွေ ကပြသူတွေကိုလည်း ပေးလေ့ရှိပြီး မူလအန္တရာယ်ကင်းစေဖို့ ရည်ရွယ်ချက်အတိုင်း မင်္ဂလာပွဲတော်တွေမှာ လူကြီးက လူငယ်တွေကို ပေးလေ့ရှိပါတယ်။

မိုးသား