【 နိုင်ငံတကာဆောင်းပါး 】 ဟန်ကျိုး အာရှအားကစားပြိုင်ပွဲ လက်ခံကျင်းပမည့် မြို့များအား လေ့လာကြည့်ခြင်း (အပိုင်း ၄)
ဟန်ကျိုး အာရှအားကစားပြိုင်ပွဲ လက်ခံကျင်းပမည့် မြို့များအနက် နင်ပေါ (Ningbo) မြို့သည် ခေတ်မီသောမြို့ဖြစ်ခြင်းနှင့်အတူ အမျိုးမျိုးသော သယ်ယူပို့ဆောင်ရေးအစီအစဉ်များလည်း ရှိနေပါသည်။
ခရီးသွားတို့အတွက် နင်ပေါမြို့သို့ အမြန်ရထား (သို့မဟုတ်) လေယာဉ်ဖြင့်သွားရန် အဆင်ပြေပါသည်။ပြည်တွင်းမြို့များတွင် လေကြောင်းချိတ်ဆက်မှုအပြင် တရုတ်နိုင်ငံ၏ အားသာသော ရထားကွန်ရက်လည်း နင်ပေါမြို့တွင်ရှိပါသည်။ထို့အပြင် မြို့တွင်းချိတ်ဆက်မှုများတွင်တော့ တက္ကစီ၊ ရထား၊ ဘတ်(စ်) နှင့် ရေလမ်းမှလည်း စွယ်စုံသွားလာ လည်ပတ်နိုင်သော မြို့ဖြစ်ပါသည်။ခရီးသွားတို့သည် မြို့တွင်းခရီးစဉ်တွင် နှစ်သက်သော လမ်းကြောင်းမှ လည်ပတ်ကြည့်ရှုနိုင်မည်ဖြစ်ပါသည်။
ထိုနင်ပေါမြို့၏ လည်ပတ်စရာများအား ဆက်လက်ဖော်ပြပေးလိုက်ပါသည် ……
၁။ Ningbo Ocean World
Ningbo Ocean World သည် နင်ပေါမြို့တွင် တည်ရှိသော ခေတ်မီပြတိုက် အဆောက်အဦတစ်ခုဖြစ်ပြီး ရေနေသတ္တဝါတို့ ပြသထားရာ စင်တာတစ်ခုဖြစ်သည်။ Ocean World သည် Ningbo's Children Park ကြီး၏ဘေးတွင် တည်ရှိကာ ပင်လယ်ရေသတ္တဝါများကို အလွန်စိတ်ဝင်စားစရာကောင်းသော နည်းလမ်းဖြင့် ပြသထားခြင်းကြောင့် ကလေး၊ လူကြီးမရွေးအတွက် ဗဟုသုတများစွာအား ဆောင်ကျဉ်းပေးမည်ဖြစ်ပါသည်။
ယင်းတွင် လှပသော သန္တာကျောက်တန်းများ၊ မြူးတူးလှုပ်ရှားလျက်ရှိသော ပင်ဂွင်းများ၊ ကြောက်စရာကောင်း သော ငါးမန်းများ၊ ခင်ချင်စဖွယ် ဖော်ရွေသော ဖျံများနှင့် ငါးမျိုးစိတ် ထောင်ပေါင်းများစွာတို့အား Ningbo Ocean World တွင် တွေ့ရှိနိုင်မည်ဖြစ်ပါသည်။မြင်ကွင်းကျယ် ရှုခင်းကြည့်ပြွန်သုံးခုရှိကာ အရုပ်ဆိုင်များအပါအဝင် စားသောက်ဆိုင်များ၊ ကော်ဖီဆိုင်များနှင့် ဖျော်ဖြေရေးများလည်းရှိပါသည်။
၂။ Old Bund
မြောက်မြစ်ကမ်းပါးဟု သိကြပြီး Old Bund သည် နင်ပေါမြို့ Jiangbei ခရိုင်ရှိ ကမ်းနား နယ်မြေတစ်ခုဖြစ်သည်။ ၁၈၄၀ ခုနှစ်မှ ၁၉၉၀ ခုနှစ်နှောင်းပိုင်းအထိ ဆိပ်ကမ်း၏ နေရာတစ်ခုဖြစ်ခဲ့ပြီး ၎င်း၏သမိုင်းသည် ရှန်ဟိုင်းရှိ Bund မတိုင်မီ နှစ် ၂၀ တွင် စတင်ခဲ့သည်။တရုတ်-ဗြိတိန် နန်ကင်းစာချုပ်ကို ချုပ်ဆိုသောအခါ ၁၈၄၂ ခုနှစ်တွင် ကုန်သွယ်မှုကို ခြေရာခံနိုင်ပြီး နောက်ပိုင်းတွင် နင်ပေါသည် ကုန်သွယ်ဆိပ်ကမ်းတစ်ခု ဖြစ်လာခဲ့သည်။ထိုအချိန်မှစ၍ အနောက်တိုင်းသားများ နင်ပေါသို့ ရောက်လာခဲ့ကြသည်။ယနေ့တွင်တော့ Old Bund သည် လှပသော ဥရောပပုံစံ အဆောက်အအုံအများအပြားကို ဆက်လက်ထိန်းသိမ်းထားဆဲဖြစ်ကာ အများစုမှာ ဘားများနှင့် စားသောက်ဆိုင်များအဖြစ် ပြောင်းလဲလာခဲ့သည်။ယင်းသည် အပန်းဖြေနေရာအဖြစ် အဓိကဆွဲဆောင်မှုတစ်ခုဖြစ်လာပြီး နေ့ခင်းတွင် တိတ်ဆိတ်တည်ရှိရာမှ ယင်း၏ ညနေခင်းတွင် လမ်းသည် အလွန်သွက်လက်လာပြီး ဘားမျိုးစုံမှ ဂီတသံများ လွင့်ပျံနေတတ်သော နေရာလည်းဖြစ်ပါသည်။
၃။ Chinese Fishing Village
တရုတ်တံငါရွာ (Chinese Fishing Village) သည် နင်ပေါအနီးတွင် တည်ရှိပြီး အားလပ်ရက်တွင် စည်ကားသော ကမ်းခြေတစ်ခုဖြစ်ပါသည်။၎င်း၏ သဘာဝကမ်းခြေအပြင်၊ အပန်းဖြေနေရာနှင့် အနောက်တိုင်းပုံစံ မြို့ငယ်လေးလည်းရှိသည်။ဧည့်သည်များသည် ၎င်းတို့၏ မင်္ဂလာဓာတ်ပုံများအတွက် နောက်ခံမြင်ကွင်းအဖြစ် ရှုခင်းများ အသုံးပြုရန် ဤနေရာကို မကြာခဏလာလေ့ရှိသည်။ပင်လယ်လေကို ခံစားပြီး ပင်လယ်စာ စားသုံးရန် အနီးပတ်ဝန်းကျင်မှ ဧည့်သည်အများအပြားလည်းရှိသည်။ Chinese Fishing Village သည် ပိတ်ရက်များနှင့် အားလပ်ရက်များအတွက် အပန်းဖြေရန် နေရာကောင်းတစ်ခုအဖြစ် ညွှန်းဆိုနိုင်သော နင်ပေါ၏ ခရီးသွားနေရာတစ်ခုဖြစ်ပါသည်။
၄။ Danshan Chishui
Yuyao မြို့၏ အနောက်တောင်ဘက်နှင့် Siming တောင်၏ တစ်စိတ်တစ်ပိုင်းတွင် တည်ရှိပြီး Danshan Chishui သည် “စမ်းချောင်းတွင် ထင်ဟပ်သောကျောက်နီများ” ဟူသော စာကြောင်းကို အစွဲပြု၍ အမည်ပေးထားသည်။တောင်ပေါ်၌ တာအိုဘာသာ ကိုးကွယ်ယုံကြည်မှု အများအပြားရှိသည်။နွေရာသီတွင် ဖောင်စီးခြင်းသည် ဤနေရာတွင် ရေပန်းစားပြီး ဆောင်းဦးနှင့် ဆောင်းရာသီတွင် တောင်ပေါ်ရှိ မေပယ်နီရွက်များနှင့် အရသာရှိသော ပန်းသီးများ သီးပွင့်လာသောအခါတွင် သာယာလှပမှုကို ခံစားရန် လာရောက်လည်ပတ်သူများနှင့် စည်ကားသော နေရာတစ်ခုဖြစ်သည်။
၅။ Xiangshan Movie and Television City
Xiangshan ရုပ်ရှင်နှင့် ရုပ်မြင်သံကြားမြို့သည် "The List" ၊ "Condor Heroes" နှင့် "The Blood Sword" ကဲ့သို့သော လူကြိုက်များသော ဇတ်ကားများ ရိုက်ကူးသည့် နေရာဖြစ်သည်။မြို့ကို အဓိကဧရိယာနှစ်ခု ခွဲခြားထားပြီး "Condor Heroes Town" နှင့် "Spring and Autumn Town" ဟူပြီး ရှိပါသည်။
၆။ Highlights of Ninghai Forest Hot Spring
Highlights of Ninghai Forest Hot Spring ကို Tianming တောင် Nanxi ရေပူစမ်းဟု အများအားဖြင့် သိကြပြီး တရုတ်နိုင်ငံ အရှေ့ပိုင်းရှိ ထင်ရှားသော သစ်တောရေပူစမ်းဖြစ်သည်။ဆောင်းရာသီတွင် ပူပြင်းသည့် စမ်းရေတွင် လာရောက်ရေစိမ်သူ များပြားသည်။ရေပူစမ်း ရေကန်အမျိုးအစား နှစ်မျိုးရှိပြီး အိမ်တွင်းနှင့် အပြင်ဘက်တွင်ရှိသည်။ပြင်ပရေကူးကန်များအားလုံးသည် တောင်ကုန်းပေါ်တွင် တည်ဆောက်ထားပြီး သဘာဝနှင့် တစ်သားတည်းရှိသည်။ရေပူစမ်းများဟု နာမည်ကြီးသည့်အပြင် ၎င်း၏ ရှုခင်းသည် အံ့မခန်းလှပပြီး စိမ်းလန်းသော တောင်ကုန်းများနှင့် ကြည်လင်သော ရေများသည် လတ်ဆတ်သော ခံစားမှုကို ပေးစွမ်းလျက်ရှိပါသည်။
၇။ Xikou ရှုခင်းသာဧရိယာ
Xikou ရှုခင်းသာနယ်မြေသည် နှစ်ပေါင်းတစ်ထောင် သမိုင်းကြောင်းရှိပြီး စစ်ဘုရင်ခေတ် ခေါင်းဆောင် ချန်ကေရှိတ်၏ မွေးရပ်မြေဖြစ်သည်။တည်နေရာသည် သဘာဝအတိုင်း လျှို့ဝှက်ဆန်းကြယ်သော ခံစားချက်ကို ပေးစွမ်းနိုင်ပြီး ၎င်းသည် ချောင်းနှင့် ရေတံခွန်များကြောင့် ကျော်ကြားသော Xuedou တောင်နှင့် ကျယ်ဝန်းသော ချောင်းဘေးတွင် တည်ရှိသော မြို့ငယ်လေးနှင့်အတူ ရှိနေပါသည်။ Xuedou သည် တရုတ်နိုင်ငံ၏ ထင်ရှားကျော်ကြားသော ဗုဒ္ဓဘာသာ အဆောက်အဦများတည်ရှိသည့် ကျော်ကြားသော နေရာတစ်ခုဖြစ်ပါသည်။
စာရှုသူများအတွက် ယခုတစ်ခေါက်ဖော်ပြပေးလိုက်ရသည်မှာ ဟန်ကျိုး အာရှအားကစားပြိုင်ပွဲ လက်ခံကျင်းပရာ မြို့တစ်မြို့ဖြစ်သည့် နင်ပေါမြို့၏ ဆွဲဆောင်မှုအချို့ကို ဖော်ပြပေးလိုက်ခြင်းဖြစ်ပါသည်။သမိုင်း၊ ယဉ်ကျေးမှု၊ သဘာဝကို မြတ်နိုးတန်ဖိုးထားသူများအတွက်သာမက ခေတ်မီဖျော်ဖြေရေးများကို စိတ်ဝင်စားသူများအတွက်လည်း နင်ပေါမြို့သည် အဆင်သင့်ရှိနေဖြစ်သည်။
(အပိုင်း (၅) အား ဆက်လက်ဖော်ပြပေးသွားပါမည်။)
မိုးသား