【 နိုင်ငံတကာဆောင်းပါး 】Two Session ဆွေးနွေးပွဲများနှင့် တရုတ်နိုင်ငံ

အမျိုးသား ပြည်သူ့ကွန်ဂရက် (NPC) နှင့် တရုတ်ပြည်သူ့ နိုင်ငံရေး အတိုင်ပင်ခံကွန်ဖရင့် (CPPCC)တို့မှာ နှစ်စဉ်ကျင်းပလေ့ရှိသည့် တရုတ်နိုင်ငံ၏ အရေးကြီးသော နိုင်ငံရေးအစည်းအဝေးပွဲများ ဖြစ်သည်။

အမျိုးသားပြည်သူ့ကွန်ဂရက် (NPC) သည် တရုတ်နိုင်ငံ၏ ထိပ်တန်းဥပဒေပြုအဖွဲ့ဖြစ်ပြီး ဥပဒေများအတည်ပြုခြင်း၊ အဓိက အစိုးရဆုံးဖြတ်ချက်များကို အတည်ပြုခြင်းနှင့် ထိပ်တန်းအရာရှိများကို ရွေးချယ်ခြင်း တို့ အတွက် တာဝန်ရှိသည်။

တရုတ်ပြည်သူ့ နိုင်ငံရေး အတိုင်ပင်ခံကွန်ဖရင့် CPPCC သည် တရုတ်နိုင်ငံရှိ နိုင်ငံရေးပါတီများ၊ အဖွဲ့အစည်းများနှင့် အဖွဲ့ပေါင်းစုံမှ ကိုယ်စားလှယ်များဖြင့် ဖွဲ့စည်းထားသည့် နိုင်ငံရေးအကြံပေးအဖွဲ့ဖြစ်သည်။

၎င်းသည် အစိုးရအား မူဝါဒဆိုင်ရာ ဆုံးဖြတ်ချက်များနှင့် ပတ်သက်၍ အကြံပေးပြီး နိုင်ငံရေးလုပ်ငန်းစဉ်တွင် ပြည်သူများ၏ ပူးပေါင်းပါဝင်မှုအတွက် ပလက်ဖောင်းတစ်ခုပံ့ပိုးပေးသည်။

အဆိုပါဆွေးနွေးပွဲများကို နှစ်စဉ် ပုံမှန်အားဖြင့် မတ်လတွင်ကျင်းပလေ့ရှိပြီး ၎င်းတို့မှတစ်ဆင့် တရုတ်နိုင်ငံ၏ နိုင်ငံရေးနှင့် စီးပွားရေးမူဝါဒများ ဦးတည်ချက်ကို နားလည်နိုင်သဖြင့် အရေးကြီးသည့် ဆွေးနွေးပွဲများလည်း ဖြစ်သည်။ ထို့ကြောင့် NPC နှင့် CPPCC အစည်းအဝေးများကို ပြည်တွင်းနှင့် နိုင်ငံတကာ အကဲခတ်များက အနီးကပ်စောင့်ကြည့်လေ့ရှိပြီး ၎င်းတို့မှတစ်ဆင့် တရုတ်နိုင်ငံ၏ ခေါင်းဆောင်မှုဆိုင်ရာ ဦးစားပေးများနှင့် ရည်မှန်းချက်ပန်းတိုင်များကို ထိုးထွင်းသိမြင်စေနိုင်သည်။

မကြာသေးမီနှစ်များအတွင်းကျင်းပခဲ့သည့် NPC နှင့် CPPCC အစည်းအဝေးများကိုကြည့်လျှင် စီးပွားရေးဖွံ့ဖြိုးတိုးတက်မှု၊ လူမှုဖူလုံရေး၊ သဘာဝပတ်ဝန်းကျင် ကာကွယ်ရေးနှင့် နိုင်ငံတော်လုံခြုံရေးအပါအဝင် ကိစ္စရပ်များအပေါ် အာရုံစိုက်ခဲ့ကြသည်။

အမျိုးသားပြည်သူ့ကွန်ဂရက် (NPC) သည် တရုတ်နိုင်ငံတွင် ထိပ်တန်းဥပဒေပြုအဖွဲ့ဖြစ်ပြီး ငါးနှစ်တစ်ကြိမ် ရွေးကောက်တင်မြှောက်ခံရသော အဖွဲ့ဝင် ၃၀၀၀ ခန့်တက်ရောက်ကြသည်။ NPC သည် ဥပဒေများ ပြဋ္ဌာန်း ခြင်း၊ ဖွဲ့စည်းပုံအခြေခံဥပဒေကို ပြင်ဆင်ခြင်းနှင့် အဓိကမူဝါဒဆိုင်ရာ ဆုံးဖြတ်ချက်များချမှတ်ခြင်းတို့အတွက် တာဝန်ရှိသည်။

NPC အစည်းအဝေးသည် ပုံမှန်အားဖြင့် နှစ်ပတ်ခန့်ကြာမြင့်ပြီး ထိုအချိန်တွင် တရုတ်နိုင်ငံတစ်ဝန်းမှ ကိုယ်စားလှယ်များသည် အစည်းအဝေးများတက်ရန်နှင့် ဥပဒေပြုရေးဆိုင်ရာ အဆိုပြုချက်များကို မဲပေးရန်ပေကျင်းမြို့၌ စုဝေးကြသည်။

NPC ၏ ဆုံးဖြတ်ချက်များသည် စည်းနှောင်မှုရှိပြီး တရုတ်နိုင်ငံ၏ နိုင်ငံရေးနှင့် စီးပွားရေးအခင်းအကျင်းအပေါ် သိသာထင်ရှားသော သက်ရောက်မှုရှိသည်။မကြာသေးမီနှစ်များအတွင်း NPC သည် စီးပွားရေးဖွံ့ဖြိုးတိုးတက်မှု၊ သဘာဝပတ်ဝန်းကျင် ကာကွယ်ရေး၊ အမျိုးသားလုံခြုံရေးနှင့် လူမှုဖူလုံရေးအပါအဝင် ကိစ္စရပ်များအပေါ် အာရုံစိုက်ခဲ့သည်။

အထူးသဖြင့်၊ တရုတ်နိုင်ငံသည် ဝင်ငွေမညီမျှမှုနှင့် သဘာဝပတ်ဝန်းကျင် ပျက်စီးယိုယွင်းမှုဆိုင်ရာ စိုးရိမ်မှုများကို ကိုင်တွယ်ဖြေရှင်းစဉ်တွင် ၎င်း၏ မြင့်မားသော တိုးတက်မှုနှုန်းကို ဆက်လက်ထိန်းသိမ်းထားရန် ကြိုးပမ်းနေသောကြောင့် တရုတ်၏စီးပွားရေးမူဝါဒများသည် ကျင်းပပြီးစီးခဲ့သော NPC အစည်းအဝေးများတွင် အဓိကဆွေးနွေးမှုတစ်ခုဖြစ်ခဲ့သည်။တရုတ်နိုင်ငံ၏ စီးပွားရေးနှင့် နိုင်ငံရေး ပါဝါဆက်လက်ကြီးထွားလာနေသဖြင့် နိုင်ငံတကာ လေ့လာသူများကလည်း NPC ကို အနီးကပ် စောင့်ကြည့်နေပါသည်။

ယခုကျင်းပနေသည့် ၁၄ ကြိမ်မြောက် အမျိုးသားပြည်သူ့ကွန်ဂရက် (NPC) အစည်းအဝေးအတွင်း  လာမည့် ၅ နှစ်တာ သက်တမ်း (၂၀၂၃- ၂၀၂၇ ) အတွက် ဦးဆောင်မည့် အစိုးရအဖွဲ့ကို ခန့်အပ်မည်ဖြစ်ရာ နိုင်ငံတကာ ကလည်း စောင့်ကြည့်နေသည်။ ၁၄ ကြိမ်မြောက် အမျိုးသားပြည်သူ့ကွန်ဂရက် (NPC)က ပြုလုပ်ခဲ့သော ဆုံးဖြတ်ချက်များသည် တရုတ်နိုင်ငံ၏ အခြားနိုင်ငံများနှင့်ဆက်ဆံရေးနှင့် ကမ္ဘာ့စီးပွားရေးအတွက်ကျယ်ပြန့်စွာသက် ရောက်မှုရှိနိုင်သည်။

၁၄ ကြိမ်မြောက် အမျိုးသားပြည်သူ့ကွန်ဂရက် (NPC) နှင့် တရုတ်ပြည်သူ့ နိုင်ငံရေး အတိုင်ပင်ခံ ကွန်ဖရင့် (CPPCC)တို့ကို ယခုမတ် ၄ရက်နှင့် ၅ရက်မှစကာ စတင်ကျင်းပနေပြီဖြစ်သည်။

မတ်လ ၄ ရက်နေ့ ညနေ ၃ နာရီတွင် ပေကျင်း ပြည်သူ့ခန်းမဆောင်ကြီး၌ ၁၄ ကြိမ်မြောက် တရုတ်ပြည် သူ့ နိုင်ငံရေး အတိုင်ပင်ခံ ကွန်ဖရင့် ပြည်လုံးဆိုင်ရာကော်မတီ ပထမ အကြိမ် အစည်းအဝေးကို ဖွင့်လှစ်ခဲ့ရာ တရုတ်ကွန်မြူနစ်ပါတီ ဗဟိုကော်မတီ အထွေထွေ အတွင်းရေးမှူး၊ တရုတ်နိုင်ငံသမ္မတ၊ ဗဟိုစစ်ရေးကော်မရှင် ဥက္ကဋ္ဌ ရှီကျင့်ဖျင်အပါအဝင် ပါတီနှင့် နိုင်ငံတော် ခေါင်းဆောင်များသည် ဖွင့်ပွဲ အခမ်းအနားသို့ တက်ရောက် ခဲ့ကြသည်။

မတ်လ ၅ရက်နေ့ နံနက်၉နာရီအချိန်တွင် ၁၄ကြိမ်မြောက် တရုတ်ပြည်လုံးဆိုင်ရာ ပြည်သူ့ ကွန်ဂရက် ပထမအကြိမ် အစည်းအဝေး ဖွင့်ပွဲအခမ်းအနားကို ပြည်သူ့ခန်းမ ဆောင်ကြီး၌ ကျင်းပခဲ့ရာ တရုတ်ကွန်မြူနစ်ပါတီ ဗဟိုကော်မတီ အထွေထွေ အတွင်းရေးမှူး၊ တရုတ်နိုင်ငံသမ္မတ၊ ဗဟိုစစ်ရေးကော်မရှင် ဥက္ကဋ္ဌ ရှီကျင့်ဖျင် အပါအ ဝင် တရုတ်ကွန်မြူနစ်ပါတီနှင့် နိုင်ငံတော် ခေါင်းဆောင်များ၊ အသစ် ရွေးချယ်တင်မြှောက်ခံရသည့် တရုတ်ပြည် လုံးဆိုင်ရာ ပြည်သူ့ကွန်ဂရက် ကိုယ်စားလှယ် ၃၀၀၀ ခန့်သည် ဖွင့်ပွဲအခမ်းအနားသို့ တက်ရောက်ခဲ့ကြသည်။

ယခုကျင်းပသည့် ၁၄ ကြိမ်မြောက် အမျိုးသား ပြည်သူ့ကွန်ဂရက် (NPC) နှင့် တရုတ်ပြည်သူ့ နိုင်ငံရေး အတိုင်ပင်ခံ ကွန် ဖရင့် (CPPCC)မှာ နိုင်ငံတကာအခြေအနေများအရ အရေးပါသည့်နေရာတွင်ရှိနေသည့် တရုတ် နိုင်ငံ၏အခန်းကဏ္ဍကြောင့် နိုင်ငံတကာ၏စိတ်ဝင်စားမှုမှာ အခြားအချိန်များနှင့် မတူ စိတ်ဝင်စားမှုမြင့်မားနေ သည်။ ထို့ပြင် ယခုကျင်းပနေသည့် အစည်းအဝေးနှစ်ရပ်က ချမှတ်မည့် မူဝါဒများနှင့် ရွေးချယ်မှုများကလည်း တရုတ်နိုင်ငံကို လာမည့် ရာစုသစ်အဝင် နောက်ထပ်နှစ်တစ်ရာသို့ ကူးပြောင်းသည့်အစကို  ဦးဆောင်ရမည့်သူများ ကို တာဝန်အပ်နှင်းမည် ဖြစ်သဖြင့် စိတ်ဝင်စားစရာကောင်းနေခဲ့သည်။

အစည်းအဝေးနှစ်ရပ် မကျင်းပခင်ကပင် ယခုအစည်းအဝေးနှစ်ရပ်ကိုကြိုတင်ပြင်ဆင်ခဲ့ပြီး ဖေဖော်ဝါရီလ ၂၆ ရက်မှ ၂၈ ရက်အထိ ပေကျင်းတွင် ကျင်းပခဲ့သည့်တရုတ်ကွန်မြူနစ်ပါတီ အကြိမ် (၂၀) မြောက် ဗဟိုကော်မတီ ဒုတိယ အကြိမ်မျက်နှာစုံညီအစည်းအဝေးက ယခုအစည်းအဝေးနှစ်ရပ်သို့ တင်ပြမည့် နိုင်ငံတော်အဖွဲ့အစည်း ခေါင်းဆောင် လက်ရွေးစင်အမည်စာရင်းနှင့် (၁၄) ကြိမ်မြောက် ပြည်သူ့နိုင်ငံရေးအတိုင်ပင်ခံကွန်ဖရင့် ပထမ အကြိမ်အစည်းအဝေးသို့တင်ပြမည့် ပြည်သူ့နိုင်ငံရေးအတိုင်ပင်ခံကွန်ဖရင့် ပြည်လုံးဆိုင်ရာ ကော်မတီ ခေါင်း ဆောင်လက်ရွေးစင်စာရင်းကို ကျယ်ကျယ်ပြန့်ပြန့် အကြံပြုချက်တောင်းခံ၍ အပြန်အလှန်ချင့်ချိန်ဆွေးနွေး ညှိနှိုင်းထားသည့် အခြေခံကာ စစ်ဆေးအတည်ပြုခဲ့သည်။

၂၀၂၂ ခုနှစ် အောက်တိုဘာလတွင် တရုတ်ကွန်မြူနစ်ပါတီ အကြိမ် (၂၀) မြောက် နိုင်ငံလုံးဆိုင်ရာ ကိုယ်စားလှယ်ညီလာခံတွင် အဖွဲ့အစည်း ပြုပြင်ပြောင်းလဲမှုအားနက်ရှိုင်းစွာဖော်ဆောင်ခဲ့သည်။ထို့ကြောင့် ယခုကျင်းပနေသည့် အစည်းအဝေးနှစ်ရပ်မှာ ခေတ်သစ်တရုတ်ပြည်၏ ဒုတိယနှစ်တရာခရီးအတွက်အရေးပါသည့် အစည်းအဝေးလည်းဖြစ်သလို နိုင်ငံတကာအတွက်လည်း အရေးကြီးသည့် တရုတ်နိုင်ငံ၏မူဝါဒများကို မြင်ရဖို့ရှိ နေသည်။

တရုတ်နိုင်ငံသည် လက်ရှိဖြစ်ပေါ်နေသော ကမ္ဘာ့နိုင့်ငံရေးအကျပ်အတည်းတွင် ကြားနေဖြစ်သဖြင့် နိုင်ငံတကာက ယခုကျင်းပနေသည့် အစည်းအဝေးနှစ်ရပ်မှာ ထွက်ပေါ်လာမည့် အခင်းအကျင်းက လက်ရှိနိုင်ငံ တကာအခြေအနေအပေါ် မည်သို့သက်ရောက်မည်ကို စောင့်ကြည့်နေကြမည်ဖြစ်လေသည်။ ထိုသည်က တရုတ် နိုင်ငံမှာ ကမ္ဘာ့အတွက် မည်သည့်အခန်းကဏ္ဍတွင်ရှိနေသည်ကို ပြနေခြင်းပင်ဖြစ်လေသည်။

လင်းသစ်အောင်