【 တစ်ပတ်အတွင်း နိုင်ငံတကာသတင်းသုံးသပ်ချက် 】 ပုန်ကန်မှုနဲ့ ရှေ့တိုးလာတဲ့ ယူကရိန်းတန်ပြန်ထိုးစစ်

ယခုတစ်ပတ် နိုင်ငံတကာသတင်းတွေက ယခင်တစ်ပတ်ကဖြစ်ခဲ့တဲ့ ရုရှားရဲ့ မအောင်မြင်တဲ့ ပုန်ကန်မှုသတင်း နောက်ဆက်တွဲတွေကပဲ ကမ္ဘာ့မီဒီယာတွေထက်မှာ နေရာယူခဲ့ပါတယ်။

ဝဂ္ဂနာတပ်တွေ ဘီလာရုစ်ကို ရောက်သွားမှုနဲ့အတူ ရုရှားသမ္မတ ပူတင်ဘက်က ပြည်တွင်းမှာ ပြန်လည်အာဏာတည်ဆောက်မှုတွေ အရေးယူမှုတွေက သတိပြုမိစရာဖြစ်ခဲ့ပါတယ်။တစ်ဆက်တည်းမှာပဲ ဒီပုန်ကန်မှုနဲ့ပတ်သက်ပြီး အနောက်နိုင်ငံတွေရဲ့ သုံးသပ်မှုကလည်း စိတ်ဝင်စားစရာကောင်းခဲ့ပါတယ်။ယူကရိန်းတန်ပြန်ထိုးစစ်ကလည်း အရှိန်ရလာနေပြီဖြစ်လာလို့ ရုရှားပြည်တွင်းရေးပြဿနာက ဘယ်လောက်ထိ ရုရှားကျူးကျော်စစ်ကို ထိရောက်မလဲဆိုတာ ဒီတစ်ပတ်မှာ အထူးသုံးသပ်ချင်စရာပါ။  

စိတ်ဝင်စားဖို့ကောင်းတဲ့ ရုရှား-ယူကရိန်း သတင်းတွေကြောင့် ဒီတစ်ပတ်မှာလည်း ဒီသတင်းတွေကိုပဲ ဆက်လက်ဖော်ပြချင်ပါတယ်။

           သတင်းပျောက်နေတဲ့ ရုရှားဗိုလ်ချုပ်ကြီး

ဝဂ္ဂနာတပ်တွေ ရော့စတော့ဗ်ကနေ မော်စကိုထိ ချီတက်လာနေချိန်မှာ မော်စကိုနဲ့ ပရီဂိုရှင်အကြား ပြဿနာကို ပြဿနာကို ငြိမ်းချမ်းစွာဖြေရှင်းဖို့ မေတ္တာရပ်ခံခဲ့တဲ့ ရုရှားလေတပ် ဒု-ဗိုလ်ချုပ်ကြီး ဆာဂေး ဆူရိုဗီကင်တစ်ယောက် ပြဿနာတွေပြီးချိန်မှာ ပျောက်ဆုံးသွားခဲ့ပါတယ်။

ဆူရိုဗီကင်ဟာ ဝဂ္ဂနာပိုင်ရှင် ပရီဂိုရှင် ပုန်ကန်မှာကို ကြိုသိပြီး သတင်းထိမ်ချန်ခဲ့တဲ့အတွက် ဖမ်းဆီးခံလိုက်ရပြီဆိုတဲ့ သတင်းတွေ ဇွန် ၂၈ ရက်မှာ ထွက်ပေါ်ခဲ့သလို သူ့လေတပ်ကနေ ဝဂ္ဂနာတပ်တွေကိုပစ်ဖို့ အမိန့်မလိုက်နာတဲ့ လေယာဉ်မှူး ၄ ဦးကိုလည်း အမိန့်ဖီဆန်မှုနဲ့ အရေးယူထားတယ်ဆိုတဲ့ သတင်းတွေ ထွက်လာခဲ့ပါတယ်။

ရုရှားစစ်တပ်က လေတပ်စစ်ဦးစီးချုပ်အဖြစ် သိထားကြတဲ့ ဆူရိုဗီကင်ဟာ ခေသူတော့မဟုတ်ပါဘူး။ရုရှားမှာ အတော်လေးဂယက်ရိုက်ခဲ့တဲ့ ချေချင်းညာစစ်ပွဲနဲ့ ဆီးရီးယားစစ်ပွဲတွေမှာ လက်သံပြောင်ခဲ့တဲ့သူပါ။ဆူရိုဗီကင်ရဲ့ သတင်းတွေ ပျောက်ဆုံးနေမှုနှင့်ပတ်သက်ပြီး ကရင်မလင်ပြောရေးဆိုခွင့်ရှိသူ ပက်စကော့ဗ်က ရုရှားစစ်တပ်ကိုသာ သွားမေးဖို့ သတင်းမီဒီယာတွေကို ပြောခဲ့ပါတယ်။ဒါဟာ မော်စကိုအနေနဲ့ မဖြေနိုင်တဲ့ သတင်းတွေကြရင် လွှဲချနေကြ လုပ်ရိုးလုပ်စဉ်တစ်ခုပါ။

ရုရှားအစိုးရအနေနဲ့ ကြေးစားစစ်တပ်ရဲ့ ပုန်ကန်မှုကြောင့် ပြည်တွင်းမှာရော ပြည်ပမှာပါ နိုင်ငံရေးအရ အတော်လေးကို ထိခိုက်ခဲ့ပါတယ်။မော်စကိုနားအထိ ကပ်လာပြီးမှ ပြန်လှည့်သွားခဲ့တဲ့ ဝဂ္ဂနာတပ်ဖွဲ့ရဲ့ ဆုံးဖြတ်ချက်အတွက် ကျေးဇူးတင်ကြောင်း ပြောရတဲ့အထိ ပူတင်ရဲ့ အနေအထားက  ထိုးဆင်းသွားခဲ့ပါတယ်။ဒါဟာ သဘောထားတင်းမာသူတွေအတွက် လက်မခံချင်စရာပါ။ဒါကိုလည်း ပူတင်က သိပါတယ်။သဘောထားတင်းမာတဲ့ ရုရှားဗိုလ်ချုပ်ဟောင်းတွေကတော့ လက်နက်ကိုင်ပုန်ကန်မှု နိုင်ငံတော်သစ္စာဖောက်မှုလို့ သမ္မတကိုယ်တိုင်က လူသိထင်ရှား ကြိမ်းဝါးပြောဆိုခဲ့ပြီး အချိန်တိုတိုလေးမှာပဲ သစ္စာဖောက်သူတွေနဲ့ စေ့စပ်ဆွေးနွေးပွဲလုပ်တာဟာ ရုရှားစစ်တပ်ရဲ့ ဂုဏ်သိက္ခာကို ပိုမိုကျဆင်းအောင်လုပ်တဲ့ သစ္စာဖောက်လုပ်ရပ်လို့ လူမှုကွန်ရက်တွေမှာ ရေးခဲ့ပါတယ်။  

မော်စကိုမရောက်ခင် ပြန်လှည့်သွားတဲ့ ပရီဂိုရှင်တပ်တွေဟာ ဘီလာရုစ်ဘက်ကို ရောက်သွားခဲ့ပါတယ်။ဒီအတွက် ပူတင်ဟာ ပုန်ကန်မှုနဲ့ တရားစွဲဆိုထားတာတွေကို ပြန်ရုပ်သိမ်းပေးခဲ့ရသလို ဝဂ္ဂနာတပ်တွေကိုလည်း ရွေးချယ်မှု ၃ ခု ပေးခဲ့ရပါတယ်။ဒါက ရုရှားစစ်တပ်ထဲဝင်မလား၊ ဘီလာရုစ်ကိုသွားမလား၊ မိသားစုဝင်တွေဆီပြန်မလားဆိုပြီးပါ။တကယ်အမြတ်ထွက်သွားတာက ပရီဂိုရှင်နဲ့ နီးကပ်တဲ့ ဆက်ဆံရေးရှိတဲ့ ဘီလာရုစ်သမ္မတ လူကာရှန်ကိုဖြစ်ပြီး ဝဂ္ဂနာတပ်တွေကို သူ့နိုင်ငံထဲမှာ အခြေစိုက်ခွင့်ပေးပြီး သိမ်းယူလိုက်တဲ့သဘော ဖြစ်သွားလို့ပါပဲ။

လူကာရှန်ကိုကိုယ်တိုင် ဘီလာရုစ်စစ်တပ် အရည်အသွေးမြင့်တက်လာနိုင်တယ်ဆိုပြီး ပြောခဲ့ပါတယ်။ဒါ့အပြင် ရမ်းကားတဲ့ ဝဂ္ဂနာတပ်ဖွဲ့ဝင်တွေကြောင့် ဘီလာရုစ်ပြည်သူတွေ စိုးရိမ်မှာစိုးတဲ့အနေအထားကိုလည်း ရုရှားထောင်ထဲကနေ စစ်သားလုပ်ခိုင်းခဲ့တဲ့ အကျဉ်းသားလူမိုက်တွေက ယူကရိန်းမှာ အကုန်သေကုန်ပြီ။ဒီကို လာမယ့်အထဲမှာ အကျဉ်းသားစစ်သားတွေ မပါတော့လို့ ဘီလာရုစ်နိုင်ငံနဲ့ ဘီလာရုစ်စစ်တပ်အတွက် အသုံးဝင်ပါလိမ့်မယ်လို့ ဇူလိုင် ၁ ရက်က ပြောခဲ့ပါတယ်။

ဝဂ္ဂနာပုန်ကန်မှုကို ပူတင်ဘက်က ဒီအတိုင်းလွှတ်ပေးလိုက်တာတော့ မဟုတ်ပါဘူး။ရုရှားလေတပ်စစ်ဦးစီးချုပ် ဆူရိုဗီကင်ကို ထိန်းသိမ်းခဲ့သလို မော်စကိုနားအထိ ချီတက်လာတဲ့ ဝဂ္ဂနာတပ်ဖွဲ့ယာဉ်တန်းမှာ Pantsir S 1 လေကြောင်းရန်ကာကွယ်ရေးစနစ် တပ်ဆင်ထားတဲ့ ကားတစ်စီးပါလာတာကိုလည်း စစ်ဆေးဖို့ ဆိုပါတယ်။ဒါ့အပြင် ပရီဂိုရှင်ကိုပေးခဲ့တဲ့ ထောက်ပံ့ပေးမှုတွေ ငွေကြေးအလွဲသုံးစားမှု ရှိ/မရှိ စစ်ဆေးရမယ်ဆိုပြီးလည်း ပြောခဲ့ပါတယ်။

ပရီဂိုရှင် ပုန်ကန်မှုဟာ ပူတင်ရဲ့ကျူးကျော်စစ်နဲ့ ရုရှားစစ်တပ်အရည်အချင်းကို စွဲချက်တင် ဆုံးဖြတ်ပေးလိုက်တဲ့ပွဲလို့ အမေရိကန်ဗဟိုထောက်လှမ်းရေး အကြီးအကဲ ဝီလျံ ဘမ်းစ်က ပြောခဲ့သလို ပရီဂိုရှင်ရဲ့ လက်နက်ကိုင်ပုန်ကန်ဖို့ ကြိုးစားမှုနဲ့ ပူတင်ရဲ့ယူကရိန်းကျုးကျော်စစ်နဲ့ပတ်သက်လို့ ရုရှားအစိုးရတွင်းက မကျေလည်မှုတွေဟာ အမေရိကန်အတွက်တော့ ထောက်လှမ်းရေးသတင်းပေးတွေ စုဆောင်းဖို့ မဟာအခွင့်အရေးကြီးရခဲ့သလို ရတဲ့အခွင့်အရေးကို လက်လွှတ်ဆုံးရှုံးခံမှာမဟုတ်ဘူးလို့  ပြောခဲ့ပါတယ်။

လက်ရှိမှာ ပူတင်အစိုးရဟာ ရုရှားပြည်တွင်းမှာ တရားဝင်ရပ်တည်ခွင့်ရထားတဲ့ ဝဂ္ဂနာအုပ်စုရဲ့ စစ်သားစုဆောင်းခွင့်နဲ့ ဌာနချုပ်တွေ၊ ဝါဒဖြန့်မှုတွေကို ရုပ်သိမ်းခဲ့သလို ဖျက်ဆီးမှုတွေ လုပ်နေရပါတယ်။ဒါဟာ ဒီဘက်ခေတ်မှာ ရုရှားလို့ နိုင်ငံကြီးတစ်ခုအတွက် အချိန်အတော်ကြာကြာ ခြောက်လှန့်နေဦးမယ် ခြိမ်းခြောက်မှုဖြစ်ရပ် ဖြစ်နေသလို နောက်ဆက်တွဲသတင်းတွေ ခပ်စိပ်စိပ်ကြားရဖွယ်ရှိနေပါသေးတယ်။

           ယူကရိန်းတန်ပြန်ထိုးစစ်အခြေအနေ

ပြီးခဲ့တဲ့လက စခဲ့တဲ့ ယူကရိန်းတန်ပြန်ထိုးစစ်ဟာ ထင်သလောက် ရှေ့မတိုးလာဘဲဖြစ်နေရာကနေ ဝဂ္ဂနာပုန်ကန်မှုအပြီးမှာ သိသိသာသာ ရှေ့တိုးလာနေတာကို တွေ့ရပါတယ်။အစောပိုင်းက ဘတ်ခ်မွတ်လိုနေရာမှာ ဝဂ္ဂနာတပ်တွေရှိနေတဲ့အတွက် ခက်ခက်ခဲခဲတိုက်နေရာကနေ ဇွန် ၂၄ ရက်နောက်ပိုင်းမှာ တိုးတက်မှုတွေက မြန်ဆန်လာခဲ့ပါတယ်။

ရုရှားဘက်က အရပ်ဘက်ပစ်မှတ်တွေကို ဆက်တိုက်ပစ်ခတ်နေရာမှာ ယူကရိန်း ဒိုးနက်စ်ဒေသ (ခရာမာတော့စ်) ခရန်မာအောစ်မြို့လယ် စားသောက်ဆိုင်နဲ့ ဖိနပ်ဆိုင်တန်းကို ရုရှားကဒုံးကျည်ထိမှန်လို့ ကလေး ၃ ဦးအပါအဝင် ၁၁ ဦးသေဆုံးခဲ့ပါတယ်။အဆိုပါစားသောက်ဆိုင်ကို ဒုံးကျည်ထိမှန်လို့ ယူကရိန်းအဆင့်မြင့်ဗိုလ်ချုပ်နှစ်ဦး၊ ပြည်ပစစ်အကြံပေး ၂၀ နဲ့ အရာရှိကြီးငယ် ၅၀ သေဆုံးသွားကြောင်း ရုရှားကာကွယ်ရေးဝန်ကြီးဌာန ပြောခွင့်ရ ဗိုလ်ချုပ် အီဂို ကိုနာရှန်ကော့ဗ်က ပြောခဲ့ပါတယ်။ဒါပေမဲ့ ဒီတိုက်ခိုက်ခံရမှုမှာ ကိုလံဘီယာနိုင်ငံသား ၃ ဦးပါဝင်ကြောင်း ကိုလံဘီယာနိုင်ငံခြားရေးဝန်ကြီးဌာနက ဇွန် ၂၈ ရက်မှာ သတင်းထုတ်ပြန်ပြီးမှာတော့ ဒီလိုဒဏ်ရာရတာဟာ မဆင်မခြင်သွားလာမှုတွေကြောင့်ဆိုပြီး ရုရှားနိုင်ငံခြားရေးဝန်ကြီးဌာန ပြောခွင့်ရအမျိုးသမီး ဇာခါရိုဗာ ပြောခဲ့ပါတယ်။

ကိယက်ဗ်အပါအဝင် ယူကရိန်းနိုင်ငံတစ်ဝန်း မြို့တွေကို ရုရှားက ဒရုန်းနဲ့ ဆက်တိုက် တိုက်ခိုက်နေရာမှာ အီရန်လုပ် Shahed ဒရုန်း ၈ စင်းနှင့် ခရုဇ်ဒုံးကျည် ၃ စင်း ပစ်ချခဲ့တယ်ဆိုပြီး ယူကရိန်းဘက်က ထုတ်ပြန်ခဲ့ပါတယ်။ရုရှားဘက်က လေကြောင်းကနေ တိုက်ခိုက်နေတာရှိပေမယ့် မြေပြင်မှာတော့ အခြေအနေက ပြောင်းလဲစပြုနေပါတယ်။

အမေရိကန်စစ်တပ်အကြီးအကဲ မတ်ခ် မိုင်လေကတော့  ဝါရှင်တန်မှာ ကျင်းပတဲ့ အမျိုးသားသတင်းကလပ်မှာ ယူကရိန်းတန်ပြန်ထိုးစစ်နဲ့ပတ်သက်ပြီး သတင်းမီဒီယာတွေကို အတော်လေးပြောခဲ့ပါတယ်။ဒီထဲမှာ ဇီလင်စကီးနဲ့ မတ်ခ် မိုင်လေကြား နီးနီးကပ်ကပ်ဆက်ဆံမှုရှိတယ်ဆိုတာ ဇီလင်စကီးကပြောခဲ့တာရှိတဲ့အတွက် ဒီမှာပြောသမျှဟာ အတည်ယူလို့ရတဲ့ အနေအထားပါ။

မိုက်ခ် မိုင်လေက ယူကရိန်းတန်ပြန်ထိုးစစ်က တဖြည်းဖြည်းတိုးတက်လာနေပြီး ခက်ခဲသော မိုင်းကွင်းများကို ဖြတ်သန်းနေလို့ တစ်နေ့ကို မီတာ ၅၀၀ မှ မီတာ ၁၀၀၀ ကြားကနေ မီတာ ၁၀၀၀ ကနေ  မီတာ ၂၀၀၀ အထိ ရှေ့ကို ထိုးတက်လာနေတယ်လို့ ပြောခဲ့ပါတယ်။

လွန်ခဲ့သောအပတ်တုန်းက ယူကရိန်းသမ္မတ ဇီလင်စကီးဘက်က တန်ပြန်ထိုးစစ်နဲ့ပတ်သက်ပြီး ဆန္ဒရှိသည်ထက် နှေးကွေးနေတယ်လို့ပြောခဲ့ပြီး တောင်ပိုင်းက စတုရန်းမိုင် ၅၀ ခန့်လွတ်မြောက်စေခဲ့တယ်လို့ ပြောခဲ့ပါတယ်။

အခု မိုက်ခ် မိုင်လေက “စာရွက်ပေါ်က စစ်ပွဲနဲ့ ပကတိစစ်ပွဲက မတူဘူး။တကယ့်စစ်မြေပြင်မှာ တကယ့်လူတွေ သေနေတယ်။ရှေ့တန်းစစ်မျက်နှာနဲ့ တကယ့်ယာဉ်တွေက တကယ့်လူတွေ။ပြင်းထန်တဲ့ ပေါက်ကွဲမှုတွေက သူတို့ကို တစစီဖြတ်ပိုင်းလိုက်တယ်” လို့ ပြောခဲ့သလို “ဒီတန်ပြန်ထိုးစစ်က ၆ ပတ်၊ ၈ ပတ်၊ ၁၀ ပတ်ကြာမှာ၊ အရမ်းလည်းခက်ခဲတယ်။အရမ်းကြာမယ်၊ အရမ်းသွေးချောင်းစီးမယ်။ဒီကိစ္စက ထင်ယောင်ထင်မှားဖြစ်ရမယ့် ကိစ္စမဟုတ်ဘူး” လို့ ပြောခဲ့ပါတယ်။

တကယ်ပဲ ဒီလိုဖြစ်၊ မဖြစ်ဆိုတာ ဒုတိယယူဆချက်ဖြစ်တဲ့ ဝဂ္ဂနာပုန်ကုန်မှုဟာ အတုအယောင်ဆိုတဲ့ စွပ်စွဲချက်နဲ့ ဘီလာရုစ်ကနေ ကိယက်ဗ်ကို သိမ်းဖို့ စစ်မျက်နှာသစ်ဖွင့်ဖို့ဆိုတဲ့ ယူဆချက်နဲ့ စဉ်းစားကြည့်မယ်ဆိုရင် အတော်လေးကို နီးစပ်နေတာကို တွေ့ရပါတယ်။ဒါကို အနောက်နိုင်ငံက စစ်ရေးသုတေသီတွေကလည်း သတိပေးထားပါတယ်။ရုရှားအနေနဲ့ ဒီစစ်ပွဲမှာ နျူကလီးယားလက်နက် ထုတ်သုံးဖို့ဆိုတာ ထင်သလောက် မလွယ်ပါဘူး။ခြိမ်းခြောက်ရုံလောက်ပဲရနိုင်လို့ ဒီလက်နက်ကို သုံးလို့ရနိုင်တဲ့ ဘီလာရုစ်ဘက်ရွှေ့ပြီး ဘီလာရုစ်ဘက်မှာ အကြမ်းဖက်တွေထက်ဆိုးတဲ့ ဝဂ္ဂနာအဖွဲ့ကို ရွှေ့လိုက်ရတာကိုကြည့်ရင်  ဒုတိယယူဆချက်ဟာ ဖြစ်လာနိုင်ပါတယ်။

ဒုတိယယူဆချက်ဟာ ယူကရိန်းတန်ပြန်ထိုးစစ်ကို မဟန့်တားနိုင်ရင် ထိုးစစ်ပြန်စဖို့ဟာ ဘီလာရုစ်ကနေ ဖြစ်လာနိုင်တာပါ။ဒါကြောင့် အမေရိကန်က ပိုလန်မှာချထားဖို့ ပြင်ဆင်မယ်ဆိုပြီး ဘရပ်ဆဲလ်မှာ ဇွန် ၃၀ ရက် ကျင်းပတဲ့ ဥရောပကောင်စီ ထိပ်သီးဆွေးနွေးပွဲမှာ ပြောခဲ့တာဖြစ်ပါတယ်။ဒါဟာ NATO စစ်ရေးမဟာမိတ်အဖွဲ့ရဲ့ နျူကလီးယားဖြန့်ဝေ ဖြန့်ကျက်ရေး အစီအစဉ်မှာ ပါဝင်မယ်လို့လည်း ပိုလန်ဝန်ကြီးချုပ်က ပြောလိုက်တာပါပဲ။ဒီထဲ ဘယ်လ်ဂျီယံ၊ ဂျာမနီ၊ အီတလီ၊ နယ်သာလန်နဲ့ တူရကီတို့ပါနေလို့ ဒါဟာ NATO အနေနဲ့ ရုရှားဘက်လုပ်လာနိုင်တဲ့ စစ်ရေးအစီအစဉ်တွေကို ကြိုတင်ကာနေတာပါ။

အကဲဖြတ်တွေရဲ့ တွက်ချက်မှုအရဆိုရင် တန်ပြန်ထိုးစစ်သာ အလုပ်ဖြစ်လာမယ်ဆိုရင် စစ်ပွဲဟာ ဥရောပထိ ကျယ်ပြန့်လာဖို့ သေချာနေပါတယ်။

ဇီလင်စကီးကလည်း ဇူလိုင် ၂ ရက်မှာ နယ်မြေအားလုံး ပြန်ရပြီးမှ ရုရှားနဲ့ ငြိမ်းချမ်းရေးစကားပြောမယ်လို့ ပြောခဲ့တဲ့အတွက် ဒါဟာ စိတ်ကူးယဉ်မှုလား၊တကယ်တွက်ချက်မှုလားဆိုတာ မကြာခင်မြင်ရမှာဖြစ်ပြီး တကယ်တွက်ချက်ထားမှုသာဆိုရင် ပူတင်ရဲ့ ဇာတ်သိမ်းခန်းလား၊ ပူတင်ရဲ့ နျူကလီးယားစစ်လားဆိုတာ ကျနော်တို့သက်တမ်းမှာ မြင်ရမှာဖြစ်ပါတယ်။
   
ဒီတစ်ပတ်မှာ ဒီလိုအဖြစ်အပျက်တွေအပြင် တရုတ်မြောက်ပိုင်း တီယန်ကျင်းမှာ ကျင်းပတဲ့ နွေရာသီ ဒါဗင်ပို့စ်ဖိုရမ်မှာ တရုတ်ဝန်ကြီးချုပ် လီချန် တက်ရောက်မိန့်ခွန်းပြောခဲ့တာ၊ ပြင်သစ်မှာ ရဲပစ်ခတ်မှုကြောင့် လူငယ်တစ်ဦးသေဆုံးရာကနေ နိုင်ငံတစ်ဝန်း အဓိကရုဏ်းဖြစ်နေတာ၊ ကျိုင်းကောင်တွေကြောင့် အာဖဂန်နစ္စတန်မှာ အငတ်ဘေးသင့်နိုင်ကြောင်း ထုတ်ပြန်ခဲ့တာ၊ ပရီဂိုဇင်ကိုသတ်ရန် ရုရှားက FSB ထောက်လှမ်းရေးကို တာဝန်ပေးလိုက်တာ၊ ယူကရိန်းကို လက်နက်တပ်ဆင်ပေးမှု အမေရိကန်အများစု ထောက်ခံနေတာ၊ အင်အားပြင်းငလျင်တစ်ခု ဂျာဗားကျွန်းကို ဗဟိုပြုကာလှုပ်ခတ်ခဲ့တာ၊ သူလျှိုလုပ်မှုနဲ့ဖမ်းဆီးခံရတဲ့ ရုရှားနိုင်ငံသားအတွက် ပိုလန်နဲ့ ရုရှားကြား တင်းမာနေတာ၊ ဘီလီယံတန် F-35 ကိုယ်ပျောက်စတဲလ်သ် တိုက်လေယာဉ် ၂၅ စင်း အစ္စရေးဝယ်ယူဖို့ ထုတ်ပြန်ခဲ့တာ စတဲ့ သတင်းတွေဖြစ်ခဲ့တာနဲ့ ဒီတစ်ပတ် နိုင်ငံတကာသတင်းသုံးသပ်ချက် အစီအစဉ်ကို ဒီမှာပဲရပ်လိုက်ချင်ပါတယ်။

မင်းထက်