【 အလှအပနှင့် ကျန်းမာရေး 】 ဘာကြောင့် အပူလျှပ်တာလဲ ?

ရာသီဥတုပူပြင်းလှတဲ့ နွေရာသီမှာ အပူလျှပ်တာ အဖြစ်များပါတယ်။

 

အထူးသဖြင့် အသက်ကြီးသူများ၊ ကလေးသူငယ်များနှင့် ရောဂါအခံရှိသူများမှာ ပိုမိုအဖြစ်များပါတယ်။

 

အပူလျှပ်ရတဲ့ အကြောင်းအရင်း‌တွေကတော့

 

- ပတ်ဝန်းကျင်အပူချိန် အလွန်အမင်းမြင့်ခြင်း

- ပူပြင်းသော အပူချိန်အောက်တွင် သွားလာလှုပ်ရှားခြင်း/ပြင်းထန်သော ကိုယ်လက်လှုပ်ရှားမှုပြုလုပ်ခြင်း

- ရေဓာတ်ခမ်းခြောက်ခြင်း

- ပတ်ဝန်းကျင် အပူချိန်မြင့်ချိန်တွင် ထူထဲသော အဝတ်အစားများ ဝတ်ဆင်ခြင်း

- ပတ်ဝန်းကျင် အပူချိန်မြင့်ချိန်တွင် အရက်သောက်သုံးခြင်း

- ရုတ်တရက် အပူချိန်ပြောင်းလဲခြင်း (အပူချိန်ပူရာမှ အေးရာ (သို့မဟုတ်) အေးရာမှ ပူရာသို့ ရုတ်တရက် အပူချိန်ပြောင်းလဲခြင်း) စတဲ့အခြေအနေတွေမှာ အပူလျှပ်ခြင်း ဖြစ်စေနိုင်ပါတယ်။

 

အပူလျှပ်တဲ့အခါ ခံစားရတဲ့ ရောဂါလက္ခဏာတွေကတော့

 

- ခန္ဓာကိုယ် ပူလိုက်၊ အေးလိုက် ခံစားရခြင်း/ကြက်သီးထခြင်း

- ခန္ဓာကိုယ် အပူချိန်တက်ခြင်း

- ချွေးထွက်ခြင်း (အပူလျှပ်ခြင်း ပြင်းထန်ပါက ခန္ဓာကိုယ်အပူချိန်တက်သော်လည်း ချွေးမထွက်တော့ခြင်း)

- ခေါင်းမူး/ခေါင်းကိုက်ခြင်း

- ပျို့အန်ခြင်း

- ရင်တုန်ခြင်း/နှလုံးခုန်နှုန်းမြန်ခြင်း

- ပင်ပန်းနွမ်းနယ်ခြင်း

- ကြွက်တက်ခြင်း

- သတိလစ်ခြင်း

- တက်ခြင်း စတဲ့ လက္ခဏာတွေ ခံစားရနိုင်ပါတယ်။

 

အပူလျှပ်ခြင်းလက္ခဏာ‌တွေ ခံစားရတဲ့အခါ

- အေးမြသောနေရာတွင်နေပါ။ (အရိပ်ရှိသောနေရာ၊ ပန်ကာ၊ အဲလ်ကွန်း) စတဲ့ အေးတဲ့နေရာမှာ နေထိုင်ပါ။

- ရေဓာတ်ခမ်းခြောက်ခြင်းက ကာကွယ်ဖို့ ဓာတ်ဆားရည် များများသောက်ပါ။

- ပွပွချောင်ချောင် ချည်ထည်အဝတ်အစားများကို ဝတ်ဆင်ပါ။

- အပူလျှပ်ခြင်းကြောင့် ချွေးမထွက်ခြင်း၊ သတိလစ်ခြင်း၊ တက်ခြင်း စတဲ့ အရေးပေါ်လက္ခဏာတွေ ခံစားနေရတဲ့သူကို တွေ့ရှိပါက   

 

- အေးသောနေရာအောက်သို့ အမြန်ဆုံးရွှေ့ပါ။

- ခန္ဓာကိုယ်နေရာအနှံ့ အထူးသဖြင့် ချိုင်းကြား၊ ပေါင်ခြံ၊ လည်ပင်း စတဲ့ နေရာများကို ရေပတ် ရွှဲနေအောင် တိုက်ပါ။

- ‌ ရေစွတ်ထားသော စောင်၊ ရေခဲထုပ် စတာတွေနဲ့ ခန္ဓာကိုယ်အပူချိန်ကျအောင်ပြုလုပ်ပါ။

- ထူထဲသော အဝတ်အစားများ ဝတ်ဆင်ထားပါက အမြန်ဆုံးလဲလှယ်ပေးပါ။

- ဆေးရုံသို့ အမြန်ဆုံးသွားရောက်ပါ။

 

နွေရာသီမှာ အဖြစ်များတဲ့ အပူလျှပ်ခြင်း‌ကို ကာကွယ်ဖို့ အပူလျှပ်ခြင်းဖြစ်စေတဲ့ အပြုအမူတွေကို ရှောင်ကြဉ်ဖို့ လိုပါတယ်။

 

အပူလျှပ်ခြင်းကို သေချာမကုသရင်တော့ ပိုမိုပြင်းထန်ပြီး အသက်အန္တရာယ်ရှိနိုင်တာကြောင့်  အပူလျှပ်တဲ့ ရောဂါလက္ခဏာတွေ ခံစားရပါက ထိထိရောက်ရောက် ကုသဖို့ တိုက်တွန်းလိုပါတယ်။

 

Dr.Phyu

Photo Credit - freepik