【 တစ်ပတ်အတွင်း နိုင်ငံတကာသတင်း သုံးသပ်ချက် 】 ရုရှားပြိုလဲဖို့ လက်တစ်ကမ်းအလို

ယခုတစ်ပတ်အတွင်း နိုင်ငံတကာသတင်းတွေက မျက်တောင်ခတ်ဖို့ မေ့လောက်အောင် စိတ်ဝင်စားစရာကောင်းခဲ့ပါတယ်။

အမေရိကန်သမ္မတ ဘိုင်ဒင်က တရုတ်သမ္မတ ရှီကျင့်ဖျင်ကို အာဏာရှင်လို့ပြောခဲ့လို့ တရုတ်-အမေရိကန်အကြား ဘယ်လောက်ထိ တင်းမာမှုတွေ ပြန်ပြန်မြင့်တက်မလဲဆိုပြီး စောင့်ကြည့်နေချိန်မှာ ရုရှားကြေးစားစစ်တပ် ဝဂ္ဂနာအဖွဲ့က မော်စကိုအထိ တက်သိမ်းဖို့ ဖြစ်လာတဲ့အတွက် သတင်းအားလုံးဟာ မအောင်မြင်ခဲ့တဲ့ ရုရှားအာဏာသိမ်းမှုဆီ ရောက်သွားခဲ့ပါတယ်။ဒီတစ်ပတ်ဟာ နိုင်ငံတကာသတင်းမီဒီယာတွေမှာ ဖော်ပြခဲ့တဲ့အတိုင်း ရုရှားပြည်တွင်းမှာ အာဏာရှင် ပူတင်ရဲ့ နိဂုံးပိုင်းရောက်ဖို့ လက်တစ်ကမ်းထိရောက်လာခဲ့တဲ့အကြောင်းကို ဖော်ပြချင်ပါတယ်။

           ရုရှားစစ်တပ်နှင့် ပရီဂိုဇင်ရဲ့ ပြဿနာ

ဇွန် ၂၄ ရက်မှာ ရုရှားကြေးစားစစ်တပ် ဝဂ္ဂနာက ယူကရိန်းနယ်ထဲရှိ ဘတ်ခ်မွတ်ကနေ ရုရှားတောင်ပိုင်းစစ်ဌာနချုပ် အခြေစိုက်ရာ ရော့စတော့ကို တက်သိမ်းရာကနေ ရုရှားရဲ့ အကွဲအပြဲဇာတ်လမ်းက ကမ္ဘာကို အထိတ်တလန့်ဖြစ်စေခဲ့ပါတယ်။

ဒီမတိုင်ခင်ကတည်းက ရုရှားစစ်တပ်နဲ့ ဘတ်ခ်မွတ်မှာ နာမည်ရခဲ့တဲ့ ဝဂ္ဂနာအုပ်စုကြား ပြဿနာတွေက ရှိခဲ့ပါတယ်။ရုရှားစစ်တပ်အကြီးအကဲတွေဖြစ်တဲ့ ကာကွယ်ရေးဝန်ကြီးနဲ့ ကာကွယ်ရေးဦးစီးချုပ်ကို ဘတ်ခ်မွတ်တိုက်ပွဲမှာ လက်နက်ခဲယမ်းထောက်ပံ့မှုမပေးတာကနေစပြီး ပြင်းပြင်းထန်ဝေဖန်ခဲ့တဲ့ ပရီဂိုဇင်ဟာ ဘတ်ခ်မွတ်ကို ယူကရိန်းတပ်တွေဆီကနေ သိမ်းယူပြီးနောက်မှာ သူ့ရဲ့ပေါ်ပြူလာဖြစ်မှုဟာ ရုရှားပြည်တွင်းမှာ သိသိသာသာ ဖြစ်လာခဲ့ပါတယ်။

ပူတင်ရဲ့ စားဖိုမှူးအဖြစ် နာမည်ထွက်ခဲ့တဲ့ ပရီဂိုဇင်နဲ့ ရုရှားကာကွယ်ရေးဝန်ကြီးဌာနကြားဖြစ်တဲ့ နောက်ပြဿနာတစ်ခုက  ရုရှားလက်နက်ကိုင်ကုမ္ပဏီတွေ မှတ်ပုံတင်ရမယ်ဆိုတဲ့ကိစ္စပါ။အစောပိုင်းမှာတော့ ပရီဂိုဇင်က သူကုမ္ပဏီဖြစ်တဲ့ ဝဂ္ဂနာအဖွဲ့ကို ပူတင်ကိုယ်တိုင်ပြောရင်တောင် မှတ်ပုံမတင်ဘူးလို့ ပြောခဲ့ပေမယ့် နောက်ပိုင်းမှာ ပြောထားတာကိုပြင်ပြီး မော်စကိုမှာ မှတ်ပုံတင်ဖို့ သွားခဲ့ပါတယ်။ဒါပေမဲ့ ပရီဂိုဇင်ရဲ့ မှတ်ပုံတင်တာကို ရုရှားကာကွယ်ရေးဝန်ကြီးဌာနမှာ လက်ခံမယ်သူမရှိတဲ့အထိကို ဖြစ်ခဲ့ပါတယ်။ဒီလိုအကြိတ်အခဲတွေရှိသလို ဘတ်ခ်မွတ်ကနေသိမ်းပြီး ရုရှားစစ်တပ်လက်အပ်ပြီး  ပြန်ထွက်မယ့် ပရီဂိုဇင်ရဲ့ အကြံအစည်ကိုလည်း ရုရှားစစ်တပ်က တားခဲ့တဲ့အတွက် ယူကရိန်းတန်ပြန်ထိုးစစ်မှာ ရုရှားဘက်ကျဆုံးမှုကို ရုရှားစစ်တပ်နဲ့ ပူတင်ဘက်ကဖုံးပြီး နိုင်နေသလို ပြောခဲ့ပေမယ့် ပရီဂိုဇင်က အခြေအနေမှန်ကိုပြောခဲ့လို့ နှစ်ဘက်ကြား အက်ကြောင်းက ပိုကြီးလာခဲ့ပါတယ်။

ပရီဂိုဇင်ဘက်က တောက်လျှောက်ပြောခဲ့တာရှိပါတယ်။ဒါက ဘတ်ခ်မွတ်မှာ ဝဂ္ဂနာအဖွဲ့ကြောင့် မြို့ကို သိမ်းယူနိုင်ခဲ့အပြီးမှာ ထိုးတက်လာတဲ့ သူ့ပုံရိပ်ကို ရုရှားကာကွယ်ရေးဝန်ကြီး ဆာဂေး ရှိုးဂူနဲ့ ရုရှားကာကွယ်ရေးဦးစီးချုပ်တို့ မနာလိုဖြစ်နေတယ်ဆိုတဲ့ စကားပါပဲ။တကယ်လည်း ဒီသဘောမျိုးဖြစ်နေပြီး ဘတ်ခ်မွတ်မှာ အပြင်းအထန်ဆင်နွှဲနေစဉ် လက်နက်ထောက်ပံ့မှု ပြတ်တောက်ခဲ့တာတွေကြောင့် ပရီဂိုဇင်ဘက်ကနေ မကြာခဏအပြစ်တင်မှုတွေရှိခဲ့တာကို တွေ့ရပါတယ်။

ဇွန် ၂၀ ရက်မှာ ရုရှားကာကွယ်ရေးဝန်ကြီး ဆာဂေး ရှိုးဂူက ဦးစီးပြီး ရုရှားစစ်ဦးစီးချုပ်များ အစည်းအဝေးကို ကျင်းပခဲ့ပါတယ်။ဇွန် ၂၀ ရက်မှာပဲ ရုရှားကာကွယ်ရေးဝန်ကြီးဌာနရဲ့ ယမ်းထုတ်လုပ်ရေးစက်ရုံ မီးလောင်ပေါက်ကွဲခဲ့ပါတယ်။အဲဒီရက်မှာပဲ ရုရှားအစိုးရနဲ့ အစိုးရဝါဒဖြန့်သတင်းတွေက သေသွားပြီလို့ သတင်းဖြန့်ခဲ့တဲ့ ယူကရိန်းစစ်ထောက်လှမ်းရေးအကြီးအကဲနဲ့ ယူကရိန်းစစ်ဦးစီးချုပ်တို့ ယူကရိန်းရဲ့ ပထမဆုံး အဝေးပစ်တိုက်ခိုက်ရေးဒရုန်း စတင်ထုတ်လုပ် စမ်းသပ်တဲ့ပွဲနဲ့ ယူကရိန်းနိုင်ငံဆိုင်ရာ ဂျပန်သံအမတ်ကြီး မက်ဆူဒါကူနီနိုရီနဲ့အဖွဲ့ တွေ့ဆုံမှုမှာ ပြန်ပေါ်ထွက်လာခဲ့ပါတယ်။ဒီအတွက် သဘောထားတင်းမာတဲ့ ရုရှားဗိုလ်ချုပ်ဟောင်းတွေက သတင်းမှားတွေ ပြည်သူကိုဖြန့်နေရင် ယူကရိန်းမပျက်ဘဲ ရုရှားနိုင်ငံတော်ပဲ ပြိုကွဲပျက်စီးသွားလိမ့်မယ်” လို့ လူမှုကွန်ရက်တွေပေါ်ကနေ ဝေဖန်ရေးသားခဲ့ပါတယ်။

ဇွန် ၂၁ ရက် ရုရှားစစ်တက္ကသိုလ်ကျောင်းဆင်းတွေထဲက အကောင်းဆုံးဘွဲ့ရ ဗိုလ်လောင်းများနဲ့ တွေ့ဆုံမှုမှာ ပူတင်က အမေရိကန်၊ ဂျာမန်၊ ပြင်သစ်နဲ့ အနောက်နိုင်ငံလုပ် တင့်ကား ၂၄၅ စီးနဲ့ သံချပ်ကာ ကား ၆၇၈ စီးကို ရုရှားတပ်တွေက မီးရှို့ဖျက်ဆီးပြီးသွားပြီလို့ ပြောခဲ့သလို ရုရှားတပ်တွေရဲ့ အရည်အချင်းနဲ့ သတ္တိကို မယှဉ်နိုင်ဘူးဆိုတာ ယူကရိန်းတွေ သဘောပေါက်သွားပြီလို့ ပြောခဲ့ပါတယ်။အဲဒီရက်မှာဘဲ ပရီဂိုဇင်က “ရုရှားကာကွယ်ရေးဝန်ကြီးဌာနနဲ့ အစိုးရရဲ့ လက်ရှိလုပ်ကိုင်ပြောဆိုပုံတွေဟာ စစ်မြေပြင်က လက်ရှိအနေအထားနဲ့ ဆန့်ကျင်ဘက်ဖြစ်နေတယ်” လို့ ပြောခဲ့ပါတယ်။ဒါ့အပြင် သတင်းတွေ ထိမ်ချန်နေတဲ့အတွက် လက်ရှိပုံအတိုင်းသွားရင် ခရိုင်းမီးယားဟာ ယူကရိန်းတွေလက်ထဲ ပြန်ရောက်တော့မယ်” လို့ ပြောခဲ့ပါတယ်။ဒါဟာ ပူတင်အတွက်ကော ရုရှားစစ်တပ်အတွက်ပါ အရှက်တကွဲဖြစ်စရာပါ။

ဇွန် ၂၃ ရက်မှာ ပရီဂိုဇင်က “တန်ပြန်ထိုးစစ် စနေကတည်းက စစ်မြေပြင်မှာ တကယ်ဖြစ်နေတာက Leopard တင့်ကား ၂ စီးနဲ့ အမေရိကန် သံချပ်ကာ ၈ စီးပဲ ဖျက်ဆီးနိုင်တယ်။ဒါတောင် လေကြောင်းက ဗုံးကြဲတိုက်ခိုက်ပေးလို့ ဖျက်ဆီးနိုင်တာ” လို့ ပြောခဲ့ပါတယ်။အဲဒီအတွက် ရုရှားစစ်တပ်ပြောနေတာထက် အဆ ၃၀ အတိုးအလျှော့လုပ်ပြီး ယုံကြည်ကြလို့ ပြောခဲ့ပါတယ်။အဲဒီနောက်မှာ ဝဂ္ဂနာနောက်တန်းတပ်ဖွဲ့စခန်း လက်နက်ကြီးဒုံးကျည်ထိမှန်လို့ ထိခိုက်သေဆုံးမှုနဲ့ ပျက်စီးမှုတွေများခဲ့ပါတယ်။ပရီဂိုဇင်က ဒီပစ်ခတ်မှုက ရှေ့ကလာတာမဟုတ်ဘဲ နောက်ကလာတာဖြစ်ပါတယ်။ရုရှားကာကွယ်ရေးဝန်ကြီးဌာန အမိန့်နဲ့ ရုရှားစစ်တပ်ရဲ့ပစ်ခတ်မှုလို့ပဲ ဒဲ့ပြောချင်တယ်။ဒီအပေါ်မှာ ဘယ်လိုလက်တုံ့ပြန်မယ်ဆိုတာ မကြာခင်သိရမယ်” ပြောခဲ့ပါတယ်။

ပရီဂိုဇင်ရဲ့ စကားကို ရုရှားစစ်တပ်က အားချင်းပဲ တုံပြန်ခဲ့ပြီး  ရုရှားစစ်တပ်ပြောခွင့်ရ ဗိုလ်ချုပ် အီဂို ကိုနာရှန်ကော့ဗ်က ဝဂ္ဂနာတပ်ဖွဲ့က ထုတ်ပြန်နေသည့် သတင်းများကို မယုံကြည်ပါနဲ့လို့ ပြောခဲ့ပါတယ်။

ပရီဂိုဇင်ကလည်း အကျင့်ပျက် ခြစားနေတဲ့ ဝန်ကြီးနဲ့ စစ်ဗိုလ်ချုပ်တွေကို ဖယ်ရှားမယ်လို့ ရော့စတော့ကနေ မော်စကိုစစ်ရုံးချုပ်ထိ ချီတက်ပြီး တုံ့ပြန်မယ် ပြောဆိုခဲ့ရာကနေ အဝေးပြေးလမ်းတွေမှာ အတားအဆီးတွေချထားသလို တောင်ပိုင်းတိုင်းစစ်ဌာနချုပ် အခြေစိုက်ရာ ရော့စတော့ပြည်နယ် မြို့တော် လမ်းမတွေမှာ တင့်ကားတွေ၊ သံချပ်ကားတွေ ရုရှားစစ်တပ်က ချထားခဲ့ပါတယ်။ဒါ့အပြင် ပရီဂိုဇင်ဟာ လက်နက်ကိုင် ပုန်ကန်ထကြွဖို့အထိ တောင်းဆိုလာတဲ့အတွက် တရားရုံးချုပ်မှာ အမှုဖွင့်မယ်ဆိုပြီး သမ္မတ ပူတင်၏ ပြောခွင့်ရ ဒီမီထရီ ပက်စကော့ဗ်က ပြောခဲ့ပါတယ်။အဲဒါတွေဟာ ဇွန် ၂၃ ရက်မှာ ဆက်တိုက်ဖြစ်ခဲ့တာပါ။

ဝဂ္ဂနာတပ်ဖွဲ့တွေ ရုရှားနိုင်ငံထဲကို ချီတက်ဖို့ ပြင်နေတဲ့အချိန်မှာ ပြဿနာကို ငြိမ်းချမ်းစွာဖြေရှင်းဖို့ ပရီဂိုဇင်နှင့် ဝဂ္ဂနာတပ်ဖွဲ့ကို ရုရှားလေတပ် ဒု-ဗိုလ်ချုပ်ကြီး ဆာဂေး ဆူရိုဗီကင်က ကာကွယ်ရေးဝန်ကြီးဌာန လူမှုကွန်ရက်ပေါ်ကနေ မေတ္တာရပ်ခံခဲ့ပါတယ်။ဇွန် ၂၄ ရက်မှာ ပရီဂိုဇင်က ရုရှားကာကွယ်ရေးဝန်ကြီးဌာနကို စစ်ကြေညာလိုက်ပြီး ရုရှားကာကွယ်ရေးဝန်ကြီး ဆာဂေး ရှိုးဂူနှင့် စစ်ဦးစီးချုပ်တို့ ရော့စတော့မှာ သူ့ကိုလာရောက်မတွေ့ဆုံရင် မော်စကိုအထိ ချီတက်မယ် ပြောခဲ့ပါတယ်။ဒီနောက်မှာ ယူကရိန်းစစ်ပွဲအတွက် စစ်ဌာနချုပ်ဖြစ်သော တောင်ပိုင်းမြို့ကြီး ရော့စတော့အွန်ဒွန်ကို သိမ်းပိုက်ခဲ့ပါတယ်။

ပရီဂိုဇင်က “ကျွန်တော်တို့ တပ်ဖွဲ့တွေအားလုံး ရော့စတော့ပြည်နယ်ထဲကို ရောက်ပါပြီ။ကျနော်တို့တပ်တွေကို လမ်းပိတ်ဆို့ဖို့ ရှိုးဂူ အမိန့်ပေးထားတဲ့ တပ်တွေလည်း မရှိတော့ပါဘူး။ကျနော်တို့ကို လမ်းဖယ်ပေးပါတယ်” လို့ ပြောခဲ့ပါတယ်။

ရုရှားဖက်ဒရေးရှင်း ဖက်ဒရယ်လုံခြုံရေးဌာန စုံစမ်းစစ်ဆေးရေးဌာနက ပရီဂိုဇင်ကို စစ်အာဏာသိမ်းရန် စီစဉ်မှုဖြင့် ရာဇဝတ်မှုဖွင့်ခဲ့ပါတယ်။ရုရှားကာကွယ်ရေးဝန်ကြီးဌာနက ကြေးစားစစ်သားများကို တိုက်ရိုက်မေတ္တာရပ်ခံစာများ ထုတ်ပြန်ပြီး ရော့စတော့မြို့ဆီသို့ ချီတက်လာတဲ့ ပုန်ကန်မှုကို စွန်လွှတ်ရန် တိုက်တွန်းခဲ့ပါတယ်။

ယူဗန်ဂီ ပရီဂိုဇင်၏ ကြေးစားစစ်တပ် ရော့စတော့ကို သိမ်းယူပြီးနောက် ရုရှားသမ္မတ ပူတင်က နိုင်ငံတော်သို့ မိန့်ခွန်းပြောကြားခဲ့ပါတယ်။ပူတင်က အနာဂတ်အတွက် အကြမ်းတမ်းဆုံးစစ်ပွဲကို ရုရှားရင်ဆိုင်နေရကြောင်း၊ ထိုပုန်ကန်မှုဟာ “မိမိတို့၏ နိုင်ငံအဖြစ်တည်ရှိခြင်းကို ခြိမ်းခြောက်နေကြောင်း ပြောခဲ့ပြီး ထိုပုန်ကုန်မှုကို အပြင်းထန်ဆုံး အရေးယူမယ်” လို့ ကတိပြုခဲ့ပါတယ်။

ပရီဂိုဇင်က ရုရှားစစ်တပ်အနေဖြင့် သူ့ကို မခုခံရန် တိုက်တွန်းပြီး “ဒါက စစ်အာဏာသိမ်းတာမဟုတ်ဘူး။တရားမျှတမှုဆီကို ချီတက်နေတာ” လို့ ပြောခဲ့ပါတယ်။

ဒီလိုဖြစ်ရပ်ဟာ ရုရှားနိုင်ငံတွင်းမှာသာ မဟုတ်ပါဘူး။ကမ္ဘာကိုပါ အငိုက်မိ အံ့အားသင့်စေပါတယ်။ရုရှားပြည်တွင်းမှာ ဝဂ္ဂနာတပ်ဖွဲ့တွေကို ထောက်ခံတဲ့သူတွေ ပေါ်လာသလို မော်စကိုကနေ ရုရှားတောင်ပိုင်း ပြည်နယ်တွေဖြစ်တဲ့ ဗရိုးနက်ချ်နဲ့ ရော့စတော့ပြည်နယ်တွေကို ထွက်ခွာမယ့် ရထားလိုင်းအားလုံးကို ရပ်ဆိုင်းခဲ့ရပါတယ်။

ရုရှားလုံခြုံရေးကောင်စီ ဒု ဥက္ကဌ ဒီမီထရီ မက်ဗီဒက်ကလည်း သမ္မတ ဗလာဒီမာ ပူတင်နဲ့ ရုရှားစစ်တပ်ကို ထောက်ခံကြောင်း ပြသတဲ့ လူထုချီတက်ပွဲတွေ နေရာအနှံ့မှာ ကျင်းပကြဖို့ ပြောခဲ့ပါတယ်။မော်စကိုအဝင် လမ်းတွေဖြစ်တဲ့ ဒွန်၊ ယူရေးလ်နှင့် ခရိုင်းမီးယား အဝေးပြေးလမ်းတွေကိုလည်း ပိတ်ခဲ့ပါတယ်။

ဝဂ္ဂနာတပ်ဖွဲ့တွေက ရော့စတော့ကနေ မော်စကို ချီတက်ချိန်မှာ ရဟတ်ယာဉ် ၆ စင်းနဲ့ စစ်ဆင်ရေး အမိန့်ပေးလေယာဉ်တစ်စင်းကို ပစ်ချခဲ့လို့ ရုရှားလေယာဉ်မှူး ၁၃ ဦး သေဆုံးခဲ့ပါတယ်။

ပရီဂိုဇင်ကတော့ ရုရှားလေတပ်က စတင်ပစ်ခတ်ခဲ့တဲ့အတွက် ပစ်ချခဲ့ရတာဖြစ်လို့ သေဆုံးရသူတွေအတွက် ရုရှားကာကွယ်ရေးဝန်ကြီးဌာနကပဲ တာဝန်ယူရမယ်လို့ ပြောဆိုထားပါတယ်။

ရုရှားလေတပ်ရဲ့ ပစ်ခတ်မှုကြောင့် မော်စကိုအဝေးပြေးလမ်းမပေါ်မှာ ကုန်တင်ကားတစ်စီးနဲ့ အရပ်သားခရီးသည်တင်ကား ထိမှန်ပျက်စီးခဲ့ပြီး အရပ်သားသေဆုံးမှုတွေအပေါ်ကိုလည်း ရုရှားကာကွယ်ရေးဝန်ကြီးဌာနက တာဝန်ယူရမယ်လို့ ပရီဂိုဇင်က ပြောဆိုခဲ့ပါတယ်။

ရော့စတော့ကနေ ဆက်ချီတက်လာတဲ့ ဝဂ္ဂနာတပ်ဖွဲ့တွေကို တားမြစ်ခဲ့တဲ့ တပ်တွေမရှိတာကလည်း အတော်လေးကို စိတ်ဝင်စားစရာပါတယ်။မော်စကိုနဲ့ မိုင် ၁၀၀ ကျော်သာ ဝေးကွာတော့ချိန်မှာ ပူတင် မော်စကိုကနေ ထွက်ခွာသွားတဲ့ သတင်းတွေ၊ တူရကီ၊ ဘီလာရုစ်၊ တရုတ်နိုင်ငံက ခေါင်းဆောင်တွေဆီ ပူတင် ဖုန်းဆက်ပြီး သူအပေါ်ထောက်ခံပေးဖို့ တောင်းဆိုတဲ့ သတင်းတွေထွက်လာခဲ့တာကလည်း ကမ္ဘာကို အံအားသင့်စေခဲ့ပါတယ်။

ပူတင်နဲ့ ပရီဂိုဇင် ပြဿနာကြားကို ဝင်ဖျန်ဖြေခဲ့တာက ဘီလာရုစ်သမ္မတ လူကာရှန်ကိုပါ။လူကာရှန်ကို ကြားဝင်မှုကြောင့် ရုရှားစစ်ဘက်ဆိုင်ရာခေါင်းဆောင်ပိုင်းကို လက်နက်ကိုင်ပြီး အတိုက်အခံပြုလုပ်နေမှုကို ဝဂ္ဂနာတပ်ဖွဲ့က အဆုံးသတ်ခဲ့ပါတယ်။လူကာရှန်ကို ကြားဝင်စေ့စပ်မှုမှာ ထုတ်ပြန်ချက်တွေအရ ပရီဂိုရှင်အပေါ် စွဲဆိုထားသော ရာဇဝတ်မှုတွေ မော်စကိုက ပယ်ဖျက်ပေးပြီး ပါဝင်ခဲ့သူများကိုလည်း အရေးယူမှာမဟုတ်ဘူး ပြောခဲ့သလို ဒီဖြစ်ရပ်ကို ပူတင်က နဂိုပြောခဲ့တဲ့ “လက်နက်ကိုင်ပုန်ကန်မှု” အစား ပရီဂိုရှင်ပြောသလို  “တရားမျှတမှုဆီ ချီတက်နေတာ” လို့ ပြောခဲ့ပါတယ်။

မော်စကိုမြို့နှင့်အနီး မိုင်ပေါင်း ၁၂၅ မိုင်အထိ ရောက်ပြီးမှ လူကာရှန်ကို ဝင်ညှိပေးလို့ ဘီလာရုစ်ထိ တပ်ပြန်ဆုတ်သွားတဲ့ ယခုဖြစ်ရပ်ဟာ ယူကရိန်းတန်ပြန်ထိုးစစ်ကို အလူးအလဲခံနေရတဲ့ ရုရှားအတွက် စစ်ရေးရော နိုင်ငံရေးပါ အထိနာစေခဲ့ပါတယ်။အထူးသဖြင့် ရုရှားစစ်တပ်ရဲ့ အရည်အချင်းကို ကမ္ဘာက ထင်သာမြင်သာရှိစေခဲ့ပြီး  မကြာမီလာတော့မယ့် ရုရှားသမ္မတရွေးကောက်ပွဲမှာပါ ပူတင်ကို ထိခိုက်စေခဲ့ပါတယ်။လက်ရှိအချိန်အထိ ဒီပြဿနာပြီးသွားပြီဆိုပေမယ့် ဝဂ္ဂနာမပါတဲ့ ရုရှားစစ်တပ်ရဲ့ တိုက်ခိုက်မှုက ဘယ်လောက်ထိ ယူကရိန်းကို ခုခံနိုင်မလဲဆိုတာ တွက်ဆနေရပြီဖြစ်သလို လက်ရှိနောက်ထပ်အဖွဲ့တစ်ခုဖြစ်တဲ့ ချေချင်းညာအဖွဲ့ကိုပါ ပိုအားကောင်းစေလာလို့ ပူတင်အနေနဲ့ သူ့ကို ပုန်ကန်မယ့်အဖွဲ့တွေ ထပ်ရှိလာမှာကို စိုးရိမ်နေရပြီဖြစ်ပါတယ်။

ပရီဂိုဇင်ရဲ့ ပုန်ကန်မှုဟာ ပူတင်ရဲ့ ချုပ်ကိုင်မှုကို ကိုင်လှုပ်ခဲ့သလို ရုရှားကျဆုံးခန်းနားအထိ လက်တစ်ကမ်းအလိုထိ ရောက်ခဲ့ပါတယ်။ဝဂ္ဂနာအဖွဲ့သာ မော်စကိုအထိ ချီတက်ခဲ့မယ်ဆိုရင် ဘာဖြစ်လာမလဲဆိုတာ မသိနိုင်သလို ဝဂ္ဂနာအဖွဲ့တွေကို ရုရှားပြည်သူတွေက ဝိုင်းကြိုဆိုခဲ့တာက ရုရှားအုပ်ချုပ်သူတွေကို ဂယက်ရိုက်စေခဲ့လို့ ပရီရိုဇင်ရဲ့ ပုန်ကုန်မှုက ဘယ်လောက်ထိ ဆက်အကျိုးသက်ရောက်ဦးမလဲဆိုတာ စောင့်ကြည့်ရတော့မှာဖြစ်ပါတယ်။

ဒီလိုစိတ်ဝင်စားဖွယ်ရာ နိုင်ငံတကာအခင်းအကျင်းတွေအပြင် ဒီတစ်ပတ်မှာ တိုက်တန်းနစ်သင်္ဘောပျက်ကို သွားလေ့လာတဲ့ တိုင်တန်ရေငုပ်သင်္ဘောရဲ့ အပျက်အစီးတွေ ရေအောက်မှာတွေ့ရှိခဲ့တာ၊ ကျိုင်းကောင်ဒဏ်ကြောင့် အာဖဂန်နစ္စတန်မှာ အငတ်ဘေးသင့်နိုင်ကြောင်း ထုတ်ပြန်ခဲ့တာ၊ ဂရိနိုင်ငံအနီး ဖြစ်ပွားတဲ့ ငါးဖမ်းသင်္ဘောနစ်မြုပ်မှုမှာ ပါကစ္စတန်နိုင်ငံသား ၃၀၀ ကျော် သေဆုံးခဲ့တာ၊ အမေရိကနှင့် တရုတ်တို့ ပိုမိုဆွေးနွေးညှိနှိုင်းရန် ဂျာမဏီသမ္မတ တိုက်တွန်းခဲ့တာ၊ မြေအောက်ရေ အလွန်အကျွံထုတ်ယူမှုကြောင့် ကမ္ဘာဂြိုဟ်ဝင်ရိုး တိမ်းစောင်းလာတာ၊ ဟွန်ဒူးရပ်စ် အမျိုးသမီးအကျဉ်းထောင်မှာ ပြိုင်ဘက်ဂိုဏ်းတွေ ရန်ပွဲကြောင့် လူ (၄၀) ကျော် သေဆုံးခဲ့တာ၊ ထိုင်းရွေးကောက်ပွဲရလဒ် တရားဝင်အတည်ပြုကြောင်း ရွေးကောက်ပွဲကော်မရှင် ကြေညာခဲ့တာ၊ သမ္မတဟောင်း ထရမ့်အမှု ဩဂုတ် ၁၄ ရက် တရားရုံးစတင်စစ်ဆေးမှာ၊ တရုတ်နိုင်ငံမှာ ဂတ်စ်အိုးပေါက်ကွဲမှုကြောင့် ၃၀ ကျော်သေဆုံးခဲ့တာ၊ အာဆီယံ ပထမဆုံးအကြိမ် ပူးတွဲစစ်ရေးလေ့ကျင့်မယ့်နေရာ ပြောင်းရွှေ့ခဲ့တာ၊ အမေရိကန်- အိန္ဒိယ ခေါင်းဆောင်နှစ်ဦး အိမ်ဖြူတော်မှာ တွေ့ဆုံခဲတာ၊ ကမ္ဘာ့စိန်ခေါ်မှုတွေ ကန်-တရုတ် ပူးပေါင်းဖြေရှင်းဖို့ ကန်ဘဏ္ဍာရေးဝန်ကြီး တိုက်တွန်းခဲ့တာ၊ပေကျင်း၌ အပူချိန်မြင့်တက်မှု သတိပေးချက်အား အမြင့်ဆုံးအထိ တိုးမြှင့်ခဲ့ရတာ၊ ဂျာမဏီတွင် မုန်တိုင်းတိုက်ပြီး မိုးသီးများကြွေလို့ အဆောက်အဦများ ပျက်စီးခဲ့တာ၊ အမေရိကန်လေယာဉ်တင်သင်္ဘော ဗီယက်နမ်မှာ တထောက်နား ဆိုက်ကပ်ခဲ့တာ၊ ဆူဒန်နိုင်ငံမြို့တော်မှာ တိုက်ပွဲတွေပြန်ဖြစ်နေတာ စတဲ့ သတင်းတွေဖြစ်ခဲ့တဲ့အကြောင်း ဖော်ပြရင်း ယခုတစ်ပတ် နိုင်ငံတကာသတင်းသုံးသပ်ချက်ကို ဒီမှာပဲရပ်လိုက်ချင်ပါတယ်။

မင်းထက်