【 အနုပညာ 】ပွင့်လင်းတာနဲ့မတန်ဘူးဆိုတဲ့ မော်ဒယ်သရုပ်ဆောင် ရွှေအိမ်စည်

ဟန်ဆောင်မှုတွေနဲ့ အမြုံတွေများတဲ့ခေတ်ကြီးထဲ ပွင့်လင်းတာနဲ့မတန်ဘူးဆိုပေမယ့် မိမိရဲ့ပွင့်လင်းတဲ့ အပြုအမူ အပြောအဆိုတွေကြောင့် ထိန်းနေရတယ်လို့ မော်ဒယ်သရုပ်ဆောင် ရွှေအိမ်စည်က ပြောပါတယ်။ပွင့်ပွင့်လင်းလင်း ပြောဆိုနေထိုင်တတ်တာကြောင့်လည်း သူ့ကိုဝေဖန်တိုက်ခိုက်သူတွေလည်းရှိခဲ့တယ်လို့ သိရပါတယ်။ 

 

“လူတွေက ပွင့်လင်းတာနဲ့မတန်ဘူးအိမ်စည်တဲ့၊ အဲ့လိုပြောလာတာတွေရှိတယ်၊ ဟုတ်တယ်လေ၊ အမြုံတွေများနေတဲ့ ခေတ်ကြီးမှာ ကိုယ်ကကောင်းပေမယ့်သော်ငြားလည်း ခံရတယ်၊ ပွင့်လင်းတော့ပွင့်လင်း ပေမယ့် ကိုယ့်ရဲ့အရေးကြီးတဲ့ ကိုယ်ရေးကိုယ်တာ Information တွေ ပါသွားတဲ့အထိတော့ ပွင့်လင်းဖို့ မကောင်းတော့ဘူးလေ၊ အရာအားလုံးနဲ့ပတ်သက်ပြီး ပွင့်လင်းနေရင် နိုင်ငံခြားမှာတော့အဆင်ပြေနိုင်ချင်ရင် ပြေနိုင်ပေမယ့် ဒီမှာတော့ မပြေနိုင်ဘူး၊ အိမ်စည်ကိုယ်တိုင်လည်း ခံခဲ့ရတာလေ၊ ကိုယ့်ရဲ့ ပွင့်လင်းတဲ့ပုံစံတော့ မပြောင်းလဲဘူး၊ လူတွေက ဖောရှောဆိုပြီးအကုန်လုံးလည်း တွက်လို့မရဘူးလေ၊ ဘယ်သူနဲ့ပွင့်လင်းမယ်၊ ဘယ်သူနဲ့မပွင့်လင်းဘူး အဲ့လိုပဲပေါ့”လို့ ၎င်းက ရှင်းပြပါတယ်။

 

အခုလိုကာလမှာ ကြော်ငြာလေးတွေလည်း ရိုက်လာရသလို သူမ နှစ်သက်တဲ့ မော်ဒယ်ရှိုးလျှောက်တာတွေ၊ ပွဲလမ်းသဘင်တွေဟာ COVID ကြောင့် မလုပ်ရသေးတဲ့အတွက် စိတ်ပျက်လက်ပျက် ဖြစ်နေတယ်လို့ သိရပါတယ်။ COVID စည်းကမ်းချက်တွေ ဖြေလျော့ကာ ခရီးသွားလာခွင့်တွေရပြီဆိုပါက တစ်လ၊ နှစ်လ အကြာ အပန်းဖြေခရီးထွက်ဖို့လည်းရှိနေတယ်လို့ ဆိုပါတယ်။ 

 

ဆက်လက်ပြီး နှစ်သစ်ဆုတောင်းစကား အနေနဲ့ ၎င်းက “နှစ်သစ်ဆုတောင်းအနေနဲ့ပြောရရင် စိတ်ဓာတ်မကျ ကြပါနဲ့လို့ ပြောချင်တယ်၊ ဒီအခြေအနေကြီးကလေ အဆင်ပြေ လာလိုက်၊ ဆိုးသွားလိုက်နဲ့ ကိုယ့်ကိုယ်ကိုတောင် ဘာမှန်းမသိဘူး၊ ရူးတောင်ရူးချင်တယ်၊ ကိုယ့်ဟာနဲ့ကိုယ် Modivation ယူပြီးတော့ တစ်ရက်ထက်တစ်ရက် အကောင်းဆုံးဖြစ်အောင် ရပ်တည်ပါ၊ အများကြီးမတွေးပါနဲ့ အဲ့ဒါလေးပဲ ပြောချင်ပါတယ်”လို့ ပြောကြားခဲ့ပါတယ်။ 

 

မင်းခေတ်လင်း

(ဓာတ်ပုံ- ကိုနိုင် NG)

ရန်ကုန်၊ ဇန်နဝါရီ ၁၁ 

 

(  Zawgyi  )