【 အနုပညာ 】လူရွှင်တော် ချွန်စက် ကွယ်လွန်

မြန်မာ့ရုပ်မြင်သံကြားအငြိမ့်ခန်းတွေမှာ တခေတ်တခါကာလက မိုးနတ်သူဇာအငြိမ့်နဲ့အတူ ဖျော်ဖြေတင်ဆက်ခဲ့တဲ့ လူရွှင်တော် ချွန်စက်ဟာ ဒီကနေ့(ဒီဇင်ဘာ ၂၅ ရက်) မနက် ၅ နာရီလောက်က ကွယ်လွန်သွားတယ်လို့ သိရပါတယ်။

 

“တကယ်ပါပဲ၊ ကျွန်တော်တို့နဲ့အတူတူ မိုးနတ်သူဇာအငြိမ့်မှာ ဇာဂနာတို့အပါအဝင် ဝါရင့်လူရွှင်တော်တွေနဲ့ ဖျော်ဖြေခဲ့ဖူးပါတယ်၊ အလွန်လည်း စိတ်မကောင်းဖြစ်ရပါတယ်” လို့ လူရွှင်တော် ငှက်ပျောကြော်က အတည်ပြု ပြောကြားပါတယ်။ လူရွှင်တော် ချွန်စက် (ခ) ဦးမျိုးဟန်ဟာ RIT ကျောင်းရဲ့ စွယ်တော်ရိပ်အငြိမ့်အဖွဲ့ရဲ့ လူရွှင်တော်တစ်ဦးလည်း ဖြစ်သလို ကွယ်လွန်ချိန်မှာ အသက် ၆၃ နှစ်ရှိပြီလို့ သိရပါတယ်။ သူဟာ COVID 19 ကူးစက်ခံရပြီး ပြန်လည်ကောင်းမွန်လာပြီးနောက် ယခုလိုကွယ်လွန်ခဲ့ကြောင်း၊ ၎င်းနဲ့နီးစပ်သူတွေထဲမှာ နှလုံးရောဂါဖြင့် ကွယ်လွန်ခဲ့တာလို့ ပြောပြသူတွေရှိသလို COVID 19 ရဲ့ နောက်ဆက်တွဲသက်ရောက်မှုကြောင့် ကွယ်လွန်တာလို့ ပြောဆိုကြပေမယ့် မိသားစုထံဆက်သွယ်တဲ့အခါ ပြောဆိုရှင်းလင်းနိုင်ခြင်း မရှိခဲ့ပါဘူး။

 

မကြာသေးခင်ကာလဖြစ်တဲ့ လွန်ခဲ့တဲ့အပတ်ထဲမှာလည်း ဝါရင့် လူရွှင်တော်တစ်ဦးဖြစ်တဲ့ ဧရာဟာ COVID 19 ကူးစက် ခံရပြီး ဆုံးပါးခဲ့တဲ့ ဖြစ်ရပ်မျိုးကြုံတွေ့ခဲ့ပါတယ်။ 

 

မင်းခေတ်လင်း 

(ဓာတ်ပုံ- MyoHan)

ရန်ကုန်၊ ဒီဇင်ဘာ ၂၅

 

(  Zawgyi  )