【 အနုပညာ 】COVID အခြေအနေပေါ်မူတည်ကာ ဇာတ်ကားရိုက်ကူးခွင့်အတွက် ပြင်ဆင်နေတဲ့နေခြည်ရွှန်းလက်

MRTV-4 ရဲ့ ဇာတ်လမ်းတွဲတွေထဲကနေ ပရိသတ်သိလာတဲ့ သရုပ်ဆောင် နေခြည်ရွှန်းလက်ဟာ ရိုက်ကူးဖို့ စီစဉ်ထားတဲ့ ဇာတ်ကားတွေရှိပေမယ့် နယ်မှာရိုက်ကူးရမယ့်အခြေအနေမျိုးဖြစ်နေတာကြောင့် COVID 19 အခြေအနေပေါ်မူတည်ကာ စောင့်ဆိုင်းပြင်ဆင်နေတယ်လို့ သိရပါတယ်။

 

“အခုအချိန်မှာ ရိုက်ကူးခွင့်မရသေးဘူး၊ နေခြည်ရဲ့ ကားနှစ်ကားစလုံးက နယ်မှာရိုက်ဖို့ရှိတာ၊ Location ကလည်း နယ်မှာ ဆိုတော့ ဘယ်လိုမှ ပြောင်းလို့မရဘူး၊ နယ်မှာ သွားရိုက်ဖို့ အချိန်တစ်ခုစောင့်နေတာ၊ ပရိသတ်တွေနဲ့လည်း မမေ့ကြပါနဲ့နော်၊ ဇာတ်လမ်းတွဲတွေ တော်တော်များများရဲ့ ရိုက်ကူးရေးက နယ်မှာလေ၊ ရိုက်ကူးရေး တစ်ခု လုပ်ပြီဆိုရင် လူတွေက အများကြီးနဲ့ဆိုတော့ အခုက COVID အခြေအနေနဲ့ စောင့်နေတာ” လို့ ၎င်းက ရှင်းပြပါတယ်။ 

 

သူမဟာ ယဉ်ကျေးမှုတက္ကသိုလ်ကျောင်းသူတစ်ဦးလည်းဖြစ်သလို MRTV 4 မှာ လုပ်ကိုင်ရင်း ဇာတ်လမ်းတွဲတွေထဲ သရုပ်ဆောင်အဖြစ် ပါဝင်ခွင့်ရနေသူလည်းဖြစ်ပါတယ်။ လက်ရှိမှာလည်း Music Video တွေရိုက်ကူးထားသလို ဆက်လက်ရိုက်ကူးဖို့ ပြောဆိုထားတာတွေလည်း ရှိနေတယ်လို့ သိရပါတယ်။

 

“မနှစ်တုန်းက အခုလို New Year Count Down ဆိုရင် ပရိသတ်တွေအများကြီး ပျော်ကြရွှင်ကြနဲ့ ဒီနှစ်တော့ MRTV 4 မှာ အွန်လိုင်းပွဲအနေနဲ့ နေခြည်တို့ လုပ်နေပါတယ်၊ ဒီနှစ်မှာက ဖန်သားပြင်ကပဲ တင်ဆက်ကြတာ ဖြစ်ပါတယ်၊ ဂိမ်းတွေလည်း ကစားတယ်၊ မနှစ်ကလိုတော့ ပွဲကြီးမျိုးမလုပ်ရဘူးပေါ့၊ ပရိသတ်တွေအနေနဲ့ နှစ်သစ်မှာ ပျော်ရွှင်ကြပါစေ၊ နောင်နှစ်မှာ အခု ၂၀၂၀ ထဲကြုံနေရတဲ့ အခြေအနေတွေကို ကိုယ့်ကိုယ်ကို သင်ခန်းစာယူပြီးတော့ ၂၀၂၁ မှာ ကိုယ့်ကိုယ်ကို ပိုချစ်ပိုတန်ဖိုးထားပြီး ကိုယ့်ကိုယ်ကို ပိုကောင်းအောင် လုပ်နိုင်ကြပါစေ၊ စီးပွားလာဘ်လာဘတွေလည်း တိုးပါစေလို့ ဆုတောင်းပေးလိုက်ပါတယ်”လို့ ၎င်းက နှစ်သစ် ဆုတောင်းစကား ပြောကြားခဲ့ပါတယ်။ 

 

မင်းခေတ်လင်း

(ဓာတ်ပုံ- ကိုနိုင် NG) 

 

(  Zawgyi  )